Isaiah 60

Kituba (BIBILIYA NA KITUBA)

← Chapter 59 Jump to: Chapter 61 →

1Telama, lezima! Samu ti nsemo ya nge me kwiza, samu ti nkembo ya Yave me telama na zulu nge.

2Tala kitombe me fuka ntoto, mpe dituti ya ndombe me fuka makanda nyonso, kasi na zulu ya nge Yave me telama yandi mosi mutindu ntangu, nkembo ya yandi ke talana na nge.

3Makanda ya bantu ke tambula na nsemo ya nge, mpe bantinu ke tambula na kulezima yina ke talana na nge.

4Zungisa meso na balweka nyonso mpe tala: Bawu nyonso ke na kukutana, bawu ke na kwiza tii na sika ya nge, bana ya nge ya babakala ke katuka ntama, bana ya nge ya bakento ba ke na kunata bawu mutindu bana ya fyoti na mukongo.

5Na yina, nge ke tala yawu mpe nge ke lezima na kilengi, ntima ya nge ke yangalala mpe ke vimba, samu ti bimvwama yina babwatu ke na kunata ke tambula na zulu ya mubu yawu ke kuma tii na sika ya nge, bimvwama ya makanda ya bantu ke kuma tii na sika ya nge.

6Nge ke dyama samu na nkonga ya basamo, basamo ya Midyane mpe ya Efa ke fulusa yinsi ya nge, bantu nyonso ya Saba ke kwiza mpe ba ke natina nge wolo na maaka ya nsunga ya mbote, bawu ke samuna mutindu nsangu ya mbote, nzitusu ya Yave.

7Mameme ya mbakala mpe ya nkento ya bwala Kedale ke kwiza yonzama na sika ya nge, bankombo ya mbakala ya Nabayote ke sadisa, yawu ke yuluka na kiyokolo ya munu mutindu munkayulu ya kuyoka, yawu ke vwanda ya kuzolakana, mu ke sala ti Yinzo yina mu ke vwandaka ku lezima.

8Banani yina ke na kwenda na zulu mutindu dituti, mutindu mabembe ke na kuvutuka na yinzo ya bawu?

9Bantu yina ke zingaka na bisanga to na bizunga ya maza ya mubu ke tula kivuvu ya bawu na munu, babwatu ya Talesise ke kwiza ya ntete, samu na kuvutula bana ya nge yina me katuka na yinsi ya ntama, na mbongo mpe wolo ya bawu, samu na kuzitisa Yave, Nzambi ya nge, Nzambi ya Longo ya Isayeli yina ke salaka ti nge lezima.

10Banzenza ke kutunga dyaka bibaka ya nge, bantinu ya bawu ke vwanda bisadi ya nge, samu ti na nkele ya munu mu bulaka nge, kasi na ntangu yayi, na lemvo ya munu, mu ke lakisa nge luzolo ya munu ya mingi.

11Myelo ya nge ke vwandaka kaka ya kufunguka, mpimpa na ntangu, yawu ke vwanda kaka mwasi, samu na kukotisa bimvwama ya mingi ya makanda ya bantu, bantinu na bantu mpe bima ya bawu nyonso.

12Samu ti yinsi mpe yinsi ya kintinu yina ke vwanda ve na yisi ya lutumu ya nge ke zimbana, ya tsyelika, makanda ya bantu yina ke mwangana nyonso.

13Ba ke nata bayinti ya sipelese, ya palatane, ya zenevele, yina ke salaka nkembo ya Libane, samu na kubongisa kisika yina kele Yinzo ya munu, mu ke sala ti kisika mu ke tulaka makulu ya munu ku vwanda ya nkembo.

14Bana ya bantu yina vwandaka kwamisa nge, bawu ke kwiza mpe ke kondama na mantwala ya nge, bayina vwandaka vweza nge ke fukama na makulu ya nge, bawu ke bokila nge: «Mbanza ya Yave, Siyone ya Longo ya Isayeli».

15Ba bikaka nge, ba yinaka nge, ata muntu vwandaka luta na sika ya nge, kasi mu ke sala ti nge vwanda dyambu ya fyele, mpe mu ke sala ti nge vwanda dyambu ya nsayi ya bambandu na bambandu.

16Nge ke kunwa miliki ya bayinsi, nge ke kunwa mabene ya bantinu. Na yina, nge ke zaba ti mu kele Yave, yina ke vuukisaka nge, mu kele kikuudi ya nge, Muntu ya lulendo ya Yakobi.

17Na kisika ya kisengo ya mbwaki, mu ke natina nge wolo, na kifulu ya palata mu ke natina kisengo, na kifulu ya bayinti mu ke natina nge kisengo ya mbwaki, na kifulu ya matadi mu ke natina nge kisengo. Mu ke tula na kati ya nge kizunu samu na kukengidila nge mpe ludedomo samu na ku yala nge.

18Ba ke zonzila dyaka mambu ya ngolo na yinsi ya nge, to mwangusulu na muvusu na kizunga ya nge, nge ke bokila bibaka ya nge «Mpulusu», mpe myelo ya nge «Nzitusu».

19Ya ke vwanda dyaka ve ni ntangu ke pesa nge nsemo ya kilumbu, nsemo ya ngonda ke kyenzola dyaka nge ve na mpimpa, samu ti Yave ke vwanda nsemo ya nge ya bantangu nyonso, ya tsyelika Nzambi ya nge ke vwanda kulezima ya nge.

20Kubanda bubu yayi, ntangu ya nge ke lala dyaka ve mpe ngonda ya nge ke zimbana dyaka ve, samu ti Yave ke vwanda nsemo ya nge ya bantangu nyonso. Bilumbu ya nge ya kyadi ke manisa.

21Bantu ya dikanda ya nge ke vwanda bawu nyonso ya kudedama, mpe bawu ke kuzwa yinsi mutindu mvwilu ya bawu samu na bantangu nyonso. Bawu kele mitwikila yina mu me kunda munu mosi, mavanga ya maboko ya munu, yina ke lakisa nkembo ya munu.

22Dikanda yina me lutila fyoti, ke vwanda na lutangu ya funda mosi (1 000) ya bantu, dikanda yina kele ve na ngolo na makanda nyonso, ke yinsi ya lulendo. Munu Yave, mu ke lungisa yawu na nswalu nyonso.

← Chapter 59 Jump to: Chapter 61 →