Isaiah 54

Kituba (BIBILIYA NA KITUBA)

← Chapter 53 Jump to: Chapter 55 →

1Vwanda na kyese, nge kento yina kele kisita, yina ke butaka ve! Sala milolo ya nsayi, nge kento yina me zaba ve bampasi ya misongo! Samu ti Yave ke na kutuba: «Samu ti kento yina bakala me manga ke lutila bana mingi na kento ya kukwela.»

2Na yina, kumisa yinzo ya nge ya lele nene, tanda balele ya yinzo ya nge. Kusosa ve na kuzaba ntalu ya yawu! Benda basinga, syamisa binko!

3Nge ke baka bantoto yina kele na lubakala, mpe na lumoso, bana ya nge ke botola bayinsi ya nkaka, bawu ke zinga dyaka na bambanza yina mwanganaka.

4Kutala boma ve, samu ti nge ke vwanda dyaka ve na nsoni, kutala dyaka nsoni ve, samu ti ba ke vweza dyaka nge ve. Kasi nge ke zimbana nsoni ya buntwenya ya nge, nge ke bambuka dyaka ve moyo, na nsoni yina nge talaka na bufwidi ya nge.

5Samu ti yina yidikaka nge kele bakala ya nge. Nkumbu ya yandi kele: Yave, Mfumu ya Binwani, yina ke kuula nge, ni Nzambi ya Longo ya Isayeli. Nkumbu ya yandi kele: Nzambi ya ntoto nyonso.

6Yave ke na kubokila nge, mutindu bakala ke bokilaka kento yina yandi mangaka, mpe ke na manyongo na ntima. Nkundi ya yandi ya buntwenya yina yandi mangaka, ni Nzambi ya nge me tuba yawu.

7Na mwa ntangu fyoti, mu mangaka nge, kasi na luzolo ya mingi, mu ke yamba dyaka nge.

8Na kati ya nkele ya munu ya kulutila, mu pesaka nge mukongo na mwa ntangu fyoti, kasi samu na luzolo ya munu ya bantangu nyonso, mu ke fwila nge kyadi, ni Yave kikuudi ya nge me tuba yawu.

9Mu ke sala mutindu mu salaka na ntangu ya Nowa: Mu kudyaka ndefi, ti maza ke fulusa dyaka ntoto ve. Mu kudyaka ndefi, ti mu ke dasukila dyaka nge ve, mpe mu ke semba dyaka nge ve.

10Ata ti myongo lenda kwenda ntama, mpe ti myongo ya fyoti kuningana, luzolo ya munu samu na nge ke manisa ve, ngwisani ya munu ya kizunu ke ningana ve, Ni Yave, yina ke ya kufuluka na luzolo, samu na nge me tuba yawu.

11Kyadi, nge mbanza yina mupepe me mwangisa, nge yina kele ve na muntu yina ke bomba nge! «Mu ke tunga nge na matadi ya ntalu, mu ke tunga lufulu ya nge na matadi ya safile.

12Mu ke yidikila banela ya nge na matadi ya lubi, mu ke yidikila myelo ya nge na matadi ya ntalu yina kele mutindu kimenga, mu ke tunga bibaka ya nge na matadi ya ntalu.

13Bana ya nge nyonso ke vwanda milongoki ya Yave, bana ya nge ke zinga na buyenge.

14Nge ke vwanda ya kusyama na ludedomo, nkwamusu ke vwanda dyaka ve, nge ke tala dyaka boma ve, samu ti boma ya kulutila ke vwanda dyaka ve, yawu ke belama dyaka ve na sika ya nge.

15Kana ba sadila nge mfundu, yawu me katuka ve na munu, konso muntu yina ke tedimina nge ke kubwa na yisi ya lutumu ya nge.

16Munu, mu yidikaka kisadi-bisengo, yina ke fulaka mupepe na makala ya tiya, samu na kuyidika kinwanunu ya konso mutindu, kasi mu yidika mpe kimwangisi samu na kumwangisa yawu.

17Konso kinwanunu yina ba yidikaka samu na kutalisa nge mpasi, yawu ke sala nge ata kima ve. Kana bantu nata nge na yinzo ya lusambusu, nge ke bedisa bawu.» «Yina kele ni mvwilu ya bisyelo ya Yave, mpe ni mutindu yina mu ke nungisa bawu. Ni Yave me tuba yawu.»

← Chapter 53 Jump to: Chapter 55 →