Isaiah 52

Kituba (BIBILIYA NA KITUBA)

← Chapter 51 Jump to: Chapter 53 →

1Vumbuka, vumbuka! Nge Siyone, lwata ngolo ya nge! Lwata binkuti ya nge ya mukembo, Yelusalemi mbanza ya longo! Samu ti ata muntu yina ba zengaka ve bubakala, to yina kele ya kuvedila ve ke kota ve na sika ya nge.

2Ningisa fundu-fundu ya nge, telama, mpe vwanda, nge Yelusalemi! Katula basinga yina ba kangaka nge na laka, nge Siyone kento ya kitoko, nge yina ba me bwila!

3Samu ti Yave ke na kutuba: Ba tekisaka beno ya mpamba, ba ke kuula beno kondwa kupesa mbongo.

4Samu ti Yave Nzambi ke na kutuba dyaka: Na mbandukulu, bantu ya munu kwendaka zinga na bunzenza ntete na Ngipiti, na manima bantu ya Asili kwamisaka bawu ata ti bawu salaka dyambu ve.

5Kasi ntangu yayi, Yave ke na kutuba: Wapi ndandu yina mu ke kuzwa? Samu ti ba me bwila bantu ya munu ya mpamba, Yave me tuba: Bantu ya ntima ya yimbi ke na kubula ntulu, mpe bilumbu nyonso, bawu ke na kusafulaka Nkumbu ya munu!

6Ni yawu yina, bantu ya munu ke zaba nkumbu ya munu. Ni yawu yina, ni na kilumbu yina bawu ke zaba ti, ni munu tubaka ti: Munu, yandi yayi!

7Ya kele kitoko na zulu ya myongo, makulu ya ntumwa yina ke na kunata bansangu ya mbote, yandi ke na kusamuna kizunu, buyenge mpe mpulusu, yandi ke na kutuba na nge Siyone: «Nzambi ya nge kele ntinu!»

8Bandinga ya bankebi ke na kuwakana, bawu ke na kuzangula bandinga, kintwadi, bawu nyonso ke na kusala milolo ya nsayi samu ti ni na meso ya bawu, bawu ke na kutala Yave ke na kwiza dyaka na Siyone.

9Beno sala milolo ya nsayi, kintwadi beno wakisa kilengi ya beno, beno bisika ya kumwangana ya Yelusalemi! Samu ti Yave me bomba dikanda ya yandi mpe yandi me kuula Yelusalemi.

10Yave me lakisa lulendo mpe bulongo ya yandi na meso ya makanda nyonso, mpe bantu ya bandilu nyonso ya ntoto, ke tala nkudulu yina Nzambi ya beto ke natina beto.

11Beno kwenda, beno kwenda! Beno basika kuna beno kusimba ata kima mosi ve yina kele ve ya kuvedila! Beno basika na mbanza yina! Beno kukivedisa, beno yina ke nataka bisalulu ya Yave!

12Beno ke basika kuna ve na mbangu nyonso, beno ke tambula ve mutindu bantu ke na kukima, samu ti Yave ke tambula na mantwala ya beno, mpe Nzambi ya Isayeli ke tambula na manima ya beno.

13Tala, kisyelo ya munu, yandi ke bonga na nyonso yina yandi ke sala, yandi ke butuka, yandi ke vwanda ya kuzangama, yandi ke vwanda ya kuzangama mingi.

14Bantu mingi talaka boma mingi, na kutala yandi, samu ti kizizi ya yandi bebaka, kizizi ya yandi vwandaka dyaka ve mutindu ya muntu.

15Ntangu yayi, nkonga ya bantu ya bayinsi nyonso ke yituka samu na yandi, na mantwala ya yandi, bantinu ke kanga bayinwa, samu ti bawu ke tala bawu mosi mambu yina ba zabisaka bawu ve, bawu ke visa mambu yina bawu me kuwaka ntete ve.

← Chapter 51 Jump to: Chapter 53 →