Isaiah 61

Kituba (BIBILIYA NA KITUBA)

← Chapter 60 Jump to: Chapter 62 →

1Mpeve ya Yave Mfumu kele na zulu ya munu, Yave me soola munu, yandi me fidisa munu samu na kunata Nsangu ya Mbote na bamputu, yandi me fidisa munu na kuzabisa nsangu ya kimpwanza na bankole, samu na kunyakisa bayina bantima me lwala, samu na kusamuna kimpwanza na bankole, mpe samu na kupesa kimpwanza na bayina kele ya kukangama na bampanga,

2samu na kuzabisa mvula yina Yave ke lakisa bumbote ya yandi, samu na kuzabisa kilumbu yina Nzambi ya beto ke futisa bambeni ya yandi yimbi ya bawu, samu na kukindisa bayina ke na bufwidi,

3samu na kusadisa bantu ya Siyone yina ke na kati ya kifwidi, na kutula bawu kidimbu ya nkembo na yintu kasi bombi ve, samu na kupakula bawu mafuta ya kyese na kisika ya bufwidi, samu na kulwatisa bawu kinkuti ya nzitusu na kisika ya mpeve ya kondwa kivuvu, samu ti ba bokila bawu «Telebinte ya ludedomo», «Bilanga ya Yave», samu na kulakisa nkembo ya yandi.

4Ya tsyelika, bawu ke tunga dyaka bisika yina mwanganaka ntama, bawu ke yidika dyaka bambanza yina vwandaka me kuma ya mpamba, yina bikanaka ya mwangana katuka bambandu na bambandu.

5Banzenza ke kwiza zinga kuna, bawu ke dikisa bankombo mpe mameme ya beno, bana ya banzenza ke sadila beno kisalu ya kubalula ntoto ya bilanga, bawu ke sadila beno bilanga ya bayinti ya bambuma mpe ya vinu.

6Kasi beno, ba ke bokila beno «Banganga-Nzambi ya Yave», ba ke tuba ti beno kele «Bisyelo ya Nzambi ya beto.» Beno ke tala kilengi ya bimvwama ya bayinsi, nkembo ya yawu ke vwanda kinkuti ya beno.

7«Beno ke tala dyaka ve nsoni, kasi beno ke kuzwa difuta bambala zole, ba ke safula dyaka beno ve, kasi ba ke sadila beno milolo ya nsayi, bawu ke kuzwa mvwilu bambala zole na yinsi ya bawu, mpe mu ke vwanda kilengi ya bawu ya bantangu nyonso.

8Ya tsyelika, munu Yave, mu ke zolaka mambu ya kusungama, kasi mu ke yinaka mpe mu ke zolaka ve kulaba na mavanga ya yimbi, mu ke futa bawu mutindu kele kukwikama ya bawu mpe mu ke sala na bawu ngwisani ya mankululu.»

9Bana ya bawu ke zabana na bayinsi, mpe na kati ya makanda ya bantu, bawu ke zaba bana ya bana ya bawu na yinza nyonso. Bayina nyonso ke tala bawu, bawu ke zaba ti, bawu kele dikanda ya bantu yina Yave me sakumuna.

10Mu fuluka na kyese samu na Yave, mu ke yangalala samu na Nzambi ya munu. Ya tsyelika, yandi me lwatisa munu binkuti ya mpulusu, yandi me fukila munu kiyunga ya ludedomo, mu kele mutindu ndumba ya kukwela me lwata singa na yintu, mutindu nganga-Nzambi, mpe mutindu kento ya makwela me lwata misanga ya yandi.

11Mutindu ntoto ke menisaka bambuma, mpe mutindu bilanga ke pesaka bambuma, ni mutindu yina mpe Yave ke menisa ludedomo, mpe nzitusu na meso ya makanda nyonso ya bantu.

← Chapter 60 Jump to: Chapter 62 →