Isaiah 50

Kituba (BIBILIYA NA KITUBA)

← Chapter 49 Jump to: Chapter 51 →

1Yave ke na kutuba: «Wapi sika kele mukanda ya kufwa makwela, yina lendaka pesa munu luve ya kufwa makwela na mama ya beno? To na sika ya wapi kidefisi mu tekisaka beno? Ba tekisaka beno, samu na yimbi ya beno, ni kondwa kutumama ya beno, salaka ti mu bingisa mama ya beno.

2Ntangu mu kwizaka, samu na yinki ata muntu vwandaka ve? Ntangu mu bokilaka, samu na yinki ata muntu ndimaka? Diboko ya munu kele nkufi samu na kukuula? Mu kele dyaka ve na ngolo samu na kupesa beno kimpwanza? Ntangu mu ke sembaka mubu, yawu ke kawukaka, mu ke kitulaka banzadi mutindu yinsi ya kuyuma. Bambisi ya yawu ke bolaka samu ti maza kele dyaka ve, yawu ke kufwaka na mpwila ya maza.

3Mu ke vwatisaka zulu na lele ya ndombe, mpe mu ke fukilaka yandi kinkuti ya bufwidi.»

4Yave, Mfumu, me pesa munu nzonzolo ya mulongoki, samu ti mu zaba kusyamisa na bampova bayina me lemba. Konso suka, yandi ke salaka, yandi ke salaka ti mu kuwa na makutu ya munu mutindu mulongoki.

5Yave Mfumu me fungula dikutu ya munu, mpe munu, mu me manga ve, mu me kima ve.

6Mu pesaka mukongo ya munu na bayina vwandaka bula munu, mpe mu pesaka mabundi ya munu na bayina vwandaka benda mandefo ya munu, mu bumbaka ve kizizi ya munu, na bayina vwandaka finga munu, mpe vwandaka losila munu mante.

7Yave, Mfumu me sadisa munu, ni yawu yina mu me kufwa ve nsoni, ni yawu yina mu me kumisa kizizi ya munu ngolo mutindu ditadi, mu zaba ti mu ke tala nsoni ve.

8Yandi kele pene-pene, yandi yina ke nungisa munu. Nani zola kufundisa munu? Beto kwenda na bazuzi! Nani zola kubotola munu luve ya munu? Yandi kubelama na munu!

9Yave, Mfumu ke kwiza sadisa munu, nani ke bedisa munu? Bambeni ya munu nyonso ke kubwa mutindu bilele yina me beba, mutindu bitende ya lele yina banselele me kudya.

10Nani na kati-kati ya beno ke zitisaka Yave? Bika ti yandi kuwila kisyelo ya yandi! Kana muntu ke na kutambula na kitombe, kondwa kutala nsemo, bika ti yandi kutula kivuvu ya yandi na Nkumbu ya Yave, Yandi kuyekama na Nzambi ya yandi!

11Kasi, beno bayina nyonso ke na kunamisa tiya, beno bayina ke na kubaka madyonga ya tiya, Beno kwenda kubwa na tiya ya beno mosi, mpe na kati ya madyonga yina beno me namisa beno mosi! Ni diboko ya munu me sala ti yawu kukumina beno. Beno ke kufwa na kati ya bampasi!

← Chapter 49 Jump to: Chapter 51 →