Isaiah 34

Kituba (BIBILIYA NA KITUBA)

← Chapter 33 Jump to: Chapter 35 →

1Beno belama samu na kuwa! Beno bantu ya bayinsi beno teka makutu! Bika ti ntoto na nyonso yina kele na yawu kuwa, bika ti yinza na nyonso yina yawu ke na kupesa kuwa!

2Samu ti nkele ya Yave ke bwidila bayinsi nyonso, mpe nkele ya yandi ya kulutila ke bwidila binwani nyonso ya bawu, yandi ke mwangisa nyonso, yandi ke manisa na kufwa nyonso.

3Ba ke losa bamvumbi ya bawu na ngaanda, banzutu ya bawu ke basika nsunga mpe menga ya bawu ke kulumuka na myongo.

4Binwani nyonso ya mazulu ke bola, mazulu ke zingama mutindu dibuku, mpe binwani ya yawu nyonso ke kubwa, mutindu makasa ya kukawuka ya yinti ya vinu, to ya olive ke kubwaka

5Mbele ya munu ya mvita me kola kuna na zulu, yawu me fuluka na menga, yawu me bwidila bantu ya Edome, yawu me bwidila bantu yina yandi me baka lukanu ya kumanisa na kufwa bawu nyonso, samu na kusemba bawu.

6Mbele ya mvita ya Yave me fuluka na menga mpe yawu kele na mafuta na zulu ya yawu, yawu kele mutindu menga ya mameme na bankombo, yawu kele mutindu mafuta ya mbala ya kivumu ya dimeme ya mbakala, kuna na mbanza Bosela, Yave me kubika munkayulu, ya kele mwangusulu ya kusakana ve kuna na yinsi ya Edome.

7Bampakasa, bangombe ya nkento mpe ya mbakala ke na kubwa kaka na mbala mosi, ntoto me fuluka na menga, mfundu-mfundu me fuluka na mafuta.

8Ya kele ni kilumbu yina Yave ke futisa bantu ya Edome yimbi ya bawu, mvula yina yandi ke semba bawu samu na Siyone.

9Maza ya mizumba ya Edome ke kituka mutindu mafuta ya kilo, ntoto ya yawu ke kituka sufe ya tiya, yinsi ke kituka mafuta ya kilo ya tiya.

10Tiya yina ke kufwa ve, ya vwanda na ntangu to na mpimpa, mulinga ya yawu ke zanguka ya mankululu, yawu ke vwanda ya kumwangana bambandu na bambandu, mpe ata muntu ve ke luta dyaka kuna.

11Yawu ke kuma kisika ya dikuti, mpe ya nsibisi, ndeke yina ba ke bokilaka wulote mpe nkwankwa ke kwiza zinga kuna, Yave ke mwangisa yinsi, yawu ke bikana kaka mpamba, mutindu ya vwandaka ntete yinza kuyilama.

12Bantwadisi ke vwanda dyaka ve, samu na kusoola ntinu, bamfumu nyonso ke vwanda dyaka ve.

13Bayinti ya bansende ke banda na kubasika na bayinzo ya kitoko, matiti ya yimbi mpe matiti ya bansende ke banda na kubasika na bibaka ya lukengolo, mibaku ke kwiza zinga kuna, ba-otelise ke kwiza vukana kuna.

14Banyawu mpe bayimbwa ya mfinda ke bwabana kuna, bankombo ke bwabana kuna, ni kuna mpeve ya yimbi yina ba ke bokilaka Lilite ke kuzwaka kisika ya kupema.

15Ni na kisika yina, nyoka ke sala dizanza ya yandi, yandi ke buta mpe ke vwandila meki ya yandi, tii ntangu bana ya yandi ke basika. Ni kuna mpe ke vukana bango-nuni.

16Beno sosa dibuku ya Yave, mpe beno tanga! Ata mosi na kati ya bibulu yayi ke na kukondwa, ata mosi ve ke kondwa na kati ya bampangi ya yandi. Ni Yave ke pesaka bawu bantumunu. Ni Mpeve ya Yave ke kutikaka bawu.

17Yave me bula dzeke, samu na kupesa na konso kibulu kikunku ya yandi, yandi me baka singa ya yandi samu na kuteza kikunku ya ntoto ya bawu na yinsi. Yawu ke kuma ya bawu ya mankululu, bambandu na bambandu, ni kuna bawu ke kuzwa kisika ya kuzinga.

← Chapter 33 Jump to: Chapter 35 →