1 Kings 6

Luganda (BIBU1) (BIBULIYA ENTUKUVU)

← Chapter 5 Jump to: Chapter 7 →

1Solomoni yatandika okuzimba Ekiggwa ky'Omukama mu mwaka ogw'ebikumi ebina mu kinaana okuva Abayisirayeli lwe baava mu nsi y'e Misiri, mu mwaka ogwokuna ogw'obwakabaka bwa Solomoni mu Yisirayeli, mu mwezi ogwokubiri, Zivu.

2Ekiggwa Solomoni kye yali azimbira Omukama kyali kya mikono nkaaga mu buwanvu, emikono amakumi abiri mu bugazi n'emikono amakumi asatu mu busimba.

3Ekisasi mu maaso g'ekisenge ekinene eky'Ekiggwa kyali kya mikono amakumi abiri obuwanvu okwenkana n'obugazi bw'Ekiggwa, n'emikono kkumi obugazi mu bwenyi bw'Ekiggwa.

4Mu Kiggwa n'akoleramu amadirisa amafunda ag'olukabazzi.

5Yazimba ekisenge ekyaliko obusenge ng'akikookedde ku kisenge ekibugiriza Eddiiro n'Ekisenge eky'Omunda okukyetooloola.

6Omwaliiro ogwa wansi gwali gwa mikono ataano mu bugazi, ate ogw'omu makkati nga gwa mikono mukaaga mu bugazi, ogwokusatu nga gwa emikono musanvu mu bugazi. Yakola ebweru w'ekisenge ky'Ekigwa oluzizi okukyetooloola emiti egiwanirira gireme kuyingira mu bisenge bya Kiggwa.

7Mu kuzimba Ekiggwa, amayinja agamaze okubajjibwa mu kirombe gokka ge gaakozesebwa; ennyondo, embazzi na buli kya kyuma kyonna, tebyawulirwako mu Kiggwa nga kizimbibwa.

8Omulyango gw'oku mwaliiro ogusooka gwali ku luuyi olw'emaserengeta olw'Ekiggwa; amadaala ageenyooleza gaayambukanga okugenda ku mwaliiro ogwokubiri, ate ne gasinziira awo okwambuka ku gwokusatu.

9Bw'atyo yazimba Ekiggwa n'akimaliriza, n'akisereka n'emikomba n'embaawo ez'entolookyo.

10Yazimba obusenge obw'ebbali okwetooloola Ekiggwa kyonna, obugulumivu emikono etaano; yabugatta n'Ekiggwa n'emikiikiro egy'entolookyo.

11Ekigambo ky'Omukama ne kijjira Solomoni nti:

12“Wuuno ozimba ekiggwa kino; bw'onootambulira mu mateeka gange, n'otuusanga ennamula yange, n'okwatanga ebiragiro byange byonna, n'obiwulira, nzija kutuukiriza mu ggwe bye nagamba Dawudi kitaawo.

13Nzija kubeeranga mu makkati g'Abayisirayeli, sigenda kwabulira bantu bange Yisirayeli.”

14Solomoni bw'atyo n'azimba Ekiggwa, n'akimaliriza.

15Ebisenge by'Ekiggwa munda yabibembekako embaawo z'entolookyo, okuva ku mwaliiro gw'Ekiggwa wansi okutuusa waggulu ebisenge gye bikoma ku mikomba. Omwaliiro gw'Ekiggwa yagubikka embaawo eza sipulaasi.

16Munda eri Ekiggwa gye kikoma yakutulako ekitundu kya mikono amakumi abiri, n'akibikka n'embawo ez'entolookyo okuva ku mwaliiro wansi okutuukira ddala waggulu. Bw'atyo mu Kiggwa n'akolamu Ekisenge eky'Omunda, Awatukuvu Ennyo.

17Eddiiro, mu maaso g'Ekisenge eky'Omunda, lyali lya mikono amakumi ana obuwanvu.

18Ebisenge munda mu Kiggwa byali bibikkiddwa n'embaawo ez'entolookyo, nga kwoleddwako endeku n'ebimuli ebyanyizza. Byonna byali bibikiddwa n'embaawo ez'entolookyo, nga tewali jjinja lirabikako bweru n'akatono.

19Ekisenge ky'Ekisenge eky'Omunda yali akikoze munda mu Kiggwa, alyoke ateeke omwo Ssanduuku y'Endagaano ey'Omukama.

20Ekisenge ky'Awatukuvu Ennyo kyali kya mikono amakumi abiri mu buwanvu, n'emikono amakumi abiri mu bugazi, n'emikono amakumi abiri mu busimba. Munda mwonna n'amaalamu ne zaabu atatabuddwamu kirala. Wansi mu Watukuvu Ennyo yamaalawo ne zaabu. N'omwaliiro n'agubikka n'embaawo ez'entolookyo.

21Ekiggwa munda Solomoni yakimaala ne zaabu atatabuddwamu kirala; mu maaso g'Ekisenge eky'Omunda n'assaawo enjegere ensiige zaabu.

22Ekiggwa kyonna yakisiiga zaabu okutuusa nga kyonna akimaze, n'Omwaliiro gw'Ekisenge eky'Omunda n'agubikka ne zaabu.

23Mu Kisenge eky'Omunda yakoleramu bakerubi babiri mu miti egy'oliva, ng'obugulumivu bwa mikono kkumi.

24Ekiwaawaatiro eky'omukerubi omu nga kiweza emikono etaano, n'ekiwaawaatiro ekyokubiri emikono etaano; ng'okuva ku kasongezo k'ekiwaawaatiro ekimu okukoona ku kasongezo k'ekirala wawerawo emikono kkumi.

25N'omukerubi owookubiri yaliko emikono kkumi; bakerubi bombi nga ba kigero kimu, n'enfaanana ye emu.

26Omukerubi omu obusimba ng'aliko emikono kkumi, n'omukerubi owookubiri naye bw'atyo.

27Yateeka bakerubi mu kisenge eky'omunda ddala eky'Ekiggwa. Ebiwaawaatiro byabwe byali byanjuluze; ekiwaawaatiro ky'omu nga kikwata ku kisenge eky'eno, n'ekiwaawaatiro eky'owookubiri nga kikwata ku kisenge eky'eri. Ebiwaawaatiro ebitunuuliraganye nga bikwataganira wakati w'Ekiggwa.

28Ne bakerubi yabasiiga zaabu.

29N'ebisenge byonna eby'Ekiggwa eby'omunda n'ebweru okwetooloola, yayolako ebifaananyi bya bakerubi, eby'enkindu n'eby'ebimuli ebyanyizza.

30Ne wansi ku myaliiro gy'ebisenge ebyo munda n'ebweru yasiigako zaabu.

31Omulyango oguyingira Awatukuvu Ennyo yagukolera enzigi mu miti gy'oliva ez'emyango etaano.

32Ku nzigi bbiri ez'omuti gw'oliva yayolako ebifaananyi bya bakerubi, eby'enkindu n'eby'ebimuli ebyanyizza. Ebifaananyi ebya bakerubi, n'enkindu n'ebimuli ebyanyizza yabibikka zaabu.

33Mu ngeri ye emu yakola emyango ena mu miti gy'oliva olw'omulyango oguyingira mu Ddiiro.

34Yakola n'enzigi bbiri mu miti gy'obufaraawo ez'ebiwero bibiri nga buli lumu lweggulira ku ppata, era n'enzigi endala bbiri ez'ebiwero nga zeggulira ku ppata.

35N'ayolako ebifaananyi bya bakerubi, eby'enkindu n'eby'ebimuli ebyanyizza; byonna n'abisiigako zaabu.

36Yazimba oluggya olwomunda lwa mayinja ga mbu ssatu amabajje, n'olubu lumu olw'emiti egy'entolookyo emiwawule.

37Omusingi gw'Ekiggwa ky'Omukama gwasooka okubangibwa mu mwaka ogwokuna, mu mwezi Zivu;

38ate mu mwaka ogw'ekkumi n'ogumu, mu mwezi ogwomunaana, Buli, Ekiggwa ne kimalirizibwa, na byonna eby'okukizimba nga bwe byali bitegekeddwa; yakizimbira emyaka musanvu.

← Chapter 5 Jump to: Chapter 7 →