1 Samuel 10

Lahu Bible Edited © Thailand Bible Society and Bible Society of Myanmar, 2010, 2020.

1Oˇ ve hkʼaw‸ nawˉ, Saˍmo-eˍlaˆ lehˬ shaˍlonˍ chu keu taˍ ve kaw hta‸ yuˬ leh Sawˉlu‸ ve oˉ kʼoˍ hkʼoˆ ngeuˍ pfuhˍ piˇ ve yoˬ. Yawˇ Sawˉlu‸ hta‸ boˆ nu piˇ leh kʼoˆ ve, Nawˬ lehˬ Gʼuiˬsha ve Iˉsaˍreˍlaˆ chaw hui hta‸ uˉ peunˍ tuˬ, yawˇ nawˬ hta‸ naˍ manˇ pfuhˍ laˇ ve yoˬ. Nawˬ lehˬ yawˇ ve chaw teˇ hpaˍ hta‸ gʼa uˉ peunˍ leh, yawˇ hui hta‸ canˇ paˍ teˇ hpaˍ ve la‸ sheh hkʼaw gʼa ponˬ piˇ tuˬ yoˬ. Yawˇ ve chaw teˇ hpaˍ hta‸ uˉ peunˍ tuˬ Gʼuiˬsha nawˬ hta‸ leuˆ yuˬ taˍ ve awˬ heˆ chi hkʼe cawˬ ve yoˬ.

2Nawˬ ya‸ nyi ngaˬ hta‸ hpaˆ da‸ taˉ leh kʼo‸-e chehˇ ve teˇ yanˇ, Beˍyaˍmenˍ chaw hui ve mvuhˇmiˬ, Zeˍlaˍzeˍ venˇ hkʼaw cawˬ ve Raˍhkeˍlaˆ ve tuˍ hpfuh lo gaˬ htaˇ, nawˬ chaw nyiˇ gʼaˇ hta‸ gʼa hpuˇ da‸ tuˬ yoˬ. Yawˇ huiˉ maˬ lehˬ, mehˉ kʼai taˍ ve nawˬ pa ve piˉ laˬ teˇ hpaˍ kʼaw‸ mawˬ peuˬ ve awˬ lawn maˇ kʼoˆ, nawˬ pa lehˬ piˉ laˬ oˇ ve teˇ hpaˍ awˬ pon dawˇ haˍ ve a‸ kehˉ nawˬ awˬ pon dawˇ haˍ leh, Ngaˬ yaˇ paˍ awˬ pon hkʼaˬ hkʼe gʼa te tuˬ le, teh‸ kʼoˆ chehˇ ve awˬ lawn maˇ kʼoˆ, nawˬ hta‸ hto laˇ tuˬ yoˬ.

3Oˇ ve hkʼaw‸ nawˉ, nawˬ awˬ gʼuˇ suhˍ kʼaw‸ caˉ kʼai leh Taˍbawˇraˆ venˇ hkʼaw cawˬ ve da‸ kehˬ ve suhˆ cehˬ cawˬ kuiˬ lo gaˬ ve teˇ yanˇ, Beˍteˍlaˆ venˇ lo Gʼuiˬsha hta‸ ca tuˉ tanˇ tuˬ kʼai chehˇ ve chaw shehˆ gʼaˇ hta‸ nawˬ gʼa kʼaw‸ mawˬ tuˬ yoˬ. Teˇ gʼaˇ lehˬ aˉ che‸ ehˉ 3 hkeh pfuhˇ taˍ ve yoˬ. Awˬ nu ve teˇ gʼaˇ lehˬ, hkaoˍmonˇ shehˆ diˬ yuˬ taˍ leh, awˬ nu ve teˇ gʼaˇ lehˬ, a pehˉ meuˇ gʼuiˬ teˇ kaw yuˬ taˍ ve yoˬ.

4Yawˇ hui nawˬ hta‸ la‸ kʼawˍ caˉ laˇ leh, hkaoˍmonˇ nyiˇ diˬ piˇ laˇ tuˬ yoˬ. Nawˬ lehˬ hkaoˍmonˇ oˇ ve teˇ hpaˍ hta‸ gʼa ha‸ yuˬ ve yoˬ.

5Oˇ ve hkʼaw‸ nawˉ, nawˬ lehˬ Hpiˇliˇtiˆ chaw hui deh chehˇ taˍ kuiˬ Giˇbaˍ venˇ hkʼaw cawˬ ve Gʼuiˬsha ve hkʼaw pui lo gʼa kʼai tuˬ yoˬ. Nawˬ venˇ taˍ meu‸ hpe‸ lo gaˬ htaˇ, Gʼuiˬsha ve tcuh kaˍ paˍ teˇ hpaˍ tinˍ hteˆ, cehnˍ dawˆ, lehˉ lu meuˆ leh hkʼaw pui hkʼoˆ cawˬ ve tuˉ tanˇ kuiˬ lo ya‸ la chehˇ ve hta‸ nawˬ gʼa mawˬ tuˬ yoˬ. Yawˇ hui kʼaˍ hkʼeˆ leh kuˬ chehˇ ve yoˬ.

6Oˇ htaˇ Gʼuiˬsha ve Awˬ ha hpu nawˬ awˬ hkʼoˆ ya‸ la leh, nawˬ lehˬ yawˇ hui geh kʼaˍ hkʼeˆ leh chaw awˬ suhˉ teˇ gʼaˇ hkʼe hpeh‸ la tuˬ yoˬ.

7Chi hkʼe hpeh‸ la ve teˇ yanˇ, Gʼuiˬsha nawˬ hta‸ te tcuh laˇ ve hkʼe te-o.

8Nawˬ lehˬ ngaˬ gʼuˇ suhˍ Giˇlaˍgaˍ venˇ lo gʼa kʼai tuˬ yoˬ. Oˇ kaˬ lo ngaˬ nawˬ hta‸ hpuˇ da‸ leh, Gʼuiˬsha hta‸ tuˉ tanˇ piˇ tuˬ yoˬ. Oˇ kaˬ lo suhˍ nyi hkʼa gaˬ ngaˬ hta‸ law taˍ-o‸. Ngaˬ laˬ leh nawˬ hkʼaˬ hkʼe gʼa te kʼai tuˬ, nawˬ hta‸ hto laˇ tuˬ yoˬ, teh‸ yawˇ hta‸ kʼoˆ piˇ ve yoˬ.

9Sawˉlu‸ lehˬ Saˍmo-eˍlaˆ geh tawˆ kʼai chehˇ ve teˇ yanˇ, Gʼuiˬsha yawˇ hta‸ chaw awˬ suhˉ teˇ gʼaˇ kʼaw‸ hpeh‸ la piˇ ve yoˬ. Saˍmo-eˍlaˆ hkʼa kʼoˆ piˇ taˍ ve awˬ ceuˬ teˇ hpaˍ oˇ ve teˇ nyi hkʼaw biˇ la ve yoˬ.

10Sawˉlu‸ leh yawˇ ve awˬ ceˬ paˍ yawˇ huiˉ maˬ, Giˇbaˍ venˇ hkʼaw gaˬ la ve teˇ yanˇ, Gʼuiˬsha ve tcuh kaˍ paˍ teˇ moˍ yawˇ hta‸ ca ha‸ yuˬ la ve yoˬ. Oˇ htaˇ, Gʼuiˬsha ve Awˬ ha hpu yawˇ awˬ hkʼoˆ ya‸ la leh, yawˇ lehˬ tcuh kaˍ paˍ oˇ ve teˇ hpaˍ geh teˇ geh kʼaˍ hkʼeˆ leh kuˬ chehˇ ve yoˬ.

11Yawˇ hta‸ shiˍ da‸ ve chaw teˇ hpaˍ yawˇ chi hkʼe te chehˇ ve hta‸ gʼa mawˬ ve teˇ yanˇ, Kiˇshaˆ ve yaˇ paˍ chi hkʼaˬ hkʼe hpeh‸-oˬ ve le. Sawˉlu‸ chi tcuh kaˍ paˍ hpeh‸ la-oˬ ve laˇ, teh‸ teˇ gʼaˇ leh teˇ gʼaˇ kʼoˆ da‸ ve yoˬ.

12Oˇ kaˬ lo chehˇ taˍ ve chaw teˇ gʼaˇ kʼaw‸ yaw hkʼaw‸ leh kʼoˆ ve, Awˬ nu ve chaw teˇ hpaˍ awˍ, a shu le. Yawˇ hui ve awˬ pa teˇ hpaˍ ka‸ Gʼuiˬsha ve tcuh kaˍ paˍ hpeh‸ ve laˇ, teh‸ kʼoˆ ve yoˬ. Oˇ ve teˇ nyi hta‸ te leh, Sawˉlu‸ lehˬ Gʼuiˬsha ve tcuh kaˍ paˍ hpeh‸ la-oˬ ve laˇ, teh‸ shu kʼoˆ da‸ kʼai ve yoˬ.

13Sawˉlu‸ lehˬ, kʼaˍ hkʼeˆ leh kuˬ toˇ peuˬ hkʼaw‸ nawˉ, hkʼaw pui hkʼoˆ lo cawˬ ve tuˉ tanˇ kuiˬ lo kʼai ve yoˬ.

14Oˇ htaˇ Sawˉlu‸ ve aˉ shuˍ paˍ lehˬ, Nawˬ huiˉ maˬ hkʼaˬ lo kʼai toˇ ve le, teh‸ Sawˇlu‸ leh yawˇ ve awˬ ceˬ paˍ hta‸ na nyi ve yoˬ. Ngaˬ huiˉ maˬ piˉ laˬ hta‸ gʼa‸ ca toˇ chehˇ ve yoˬ. Ca maˇ mawˬ ve pa taw Saˍ moeˍlaˆ geh kʼai ve yoˬ, teh‸ yawˇ hta‸ kʼaw‸ yaw hkʼaw‸ piˇ ve yoˬ.

15Yawˇ nawˬ huiˉ maˬ hta‸ hkʼaˬ hkʼe kʼoˆ laˇ ve le, teh‸ yawˇ ve aˉ shuˍ paˍ kʼaw‸ na nyi ve yoˬ.

16Piˉlaˬ oˇ ve teˇ hpaˍ hta‸ kʼaw‸ mawˬ taˍ peuˬ, teh‸ yawˇ ngaˬ huiˉ maˬ hta‸ kʼoˆ laˇ ve yoˬ, teh‸ kʼaw‸ yaw hkʼaw‸ piˇ ve yoˬ. Ya‸ hkʼaˇ, yawˇ lehˬ jawˇmawˇ hpeh‸ la tuˬ Saˍmo-eˍlaˆ kʼoˆ taˍ ve tawˇ yawˇ ve aˉ shuˍ paˍ hta‸ maˇ hto piˇ.

17Saˍmo-eˍlaˆ lehˬ, bon pawehˇ lonˉ teˇ maˬ te tuˬ Iˉsaˍreˍlaˆ chaw hui hta‸ Miˆsaˍ paˍ venˇ hkʼaw kuˬ hpawnˬ ve yoˬ.

18Peuˬ hkʼaw‸ nawˉ, yawˇ chaw oˇ ve teˇ hpaˍ hta‸ chi hkʼe kʼoˆ piˇ ve yoˬ. Iˉsaˍreˍlaˆ ve Jawˇmawˇ Gʼuiˬsha kʼoˆ ve, Ngaˬ nawˬ hui hta‸ Eˇjiˇtu‸ mvuhˇmiˬ hkʼaw shiˍ tawˆ la leh, Eˇjiˇtu‸ chaw leh nawˬ hui hta‸ fawˉ mehˍ laˇ chehˇ ve chaw hui ve la‸ sheh hkʼaw ngaˬ nawˬ hui hta‸ ponˬ laˇ taˍ ve yoˬ.

19Ngaˬ lehˬ, nawˬ hui hta‸ tu‸ hkanˍ haˍ gʼawˇ kuiˬ hkʼaw ponˬ laˇ shehˍ hpaˇ, nawˬ hui ve Gʼuiˬsha hpeh‸ ve yoˬ. Ya‸ hkʼaˇ, ya‸ nyi nawˬ hui ngaˬ hta‸ chiˇ baˬ leh, nawˬ hui hta‸ jawˇmawˇ teˇ gʼaˇ piˇ laˇ tuˬ lawˬ chehˇ ve yoˬ. Chi hta‸ pa taw, nawˬ hui a shu yawˇ ve awˬ ceuˬ awˬ hkʼaˇ hta‸ shawˍ leh, ngaˬ mehˆ gʼuˇ suhˍ huˉ taˍ-o‸, teh‸ kʼoˆ ve yoˬ.

20Oˇ ve hkʼaw‸ nawˉ, Saˍmo-eˍlaˆ lehˬ Iˉsaˍreˍlaˆ chaw teˇ ceuˬ peuˬ teˇ ceuˬ hta‸ gʼuˇ suhˍ lo ku‸ tawˆ ve yoˬ. Gʼuiˬsha lehˬ, Beˍyaˍmenˍ awˬ ceuˬ awˬ hkʼaˇ hta‸ leuˆ yuˬ ve yoˬ.

21Teˇ pawˆ Saˍmo-eˍlaˆ lehˬ, Beˍyaˍmenˍ awˬ ceuˬ awˬ hkʼaˇ hkʼaw ve yehˬ kʼa teˇ hpaˍ hta‸ gʼuˇ suhˍ lo kuˬ tawˆ ve yoˬ. Hkʼe te leh, Maˍtaˍriˆ ve yehˬ kʼa hta‸ leuˆ yuˬ ve yoˬ. Oˇ htaˇ, Maˍtaˍriˆ ve yehˬ yaˇ kʼa yaˇ teˇ hpaˍ shu gʼuˇ suhˍ lo tawˆ la ve yoˬ. Hkʼe te leh, Kiˇshaˆ ve yaˇ paˍ Sawˉlu‸ hta‸ leuˆ yuˬ ve yoˬ. Yawˇ hui Sawˉlu‸ hta‸ ca hpfuhˆ nyi ve yoˬ. Ya‸ hkʼaˇ, yawˇ hui yawˇ hta‸ ca maˇ mawˬ ve teˇ yanˇ,

22Awˬ nu ve chaw teˇ gʼaˇ gʼaˇ cawˬ sheˍ laˇ, teh‸ yawˇ hui Gʼuiˬsha hta‸ na nyi ve yoˬ. Oˇ htaˇ Gʼuiˬsha kʼaw‸ yaw hkʼaw‸ leh, Sawˉlu‸ lehˬ mawˇ teˇ hpaˍ awˬ kaˍ lo va‸ taˍ ve yoˬ, teh‸ kʼoˆ ve yoˬ.

23Hkʼe te leh, yawˇ hui Sawˉlu‸ hta‸ ca shiˍ veu laˇ ve yoˬ. Yawˇ lehˬ, oˇ kaˬ lo chehˇ taˍ ve chaw hkʼa peu-eˬ a‸ kehˉ aˬ laˬ hkʼe teˇ jaˆ mvuh ve yoˬ.

24Oˇ htaˇ Saˍmo-eˍlaˆ kʼoˆ ve, Gʼuiˬsha leuˆ yuˬ taˍ ve chaw lehˬ, chaw chi hpaˇ yoˬ. Yawˇ hkʼe ve chaw ngaˬ hui geh teˇ gʼaˇ ka‸ maˇ cawˬ, teh‸ chaw moˍ lonˉ hta‸ kʼoˆ piˇ ve yoˬ. Oˇ htaˇ chaw hkʼa peu-eˬ, Jawˇmawˇ co zuhˬ ha zuhˬ cawˬ piˇ-oˆ, teh‸ kʼoˆ ve yoˬ.

25Oˇ ve hkʼaw‸ nawˉ Saˍmo-eˍlaˆ lehˬ, jawˇmawˇ teˇ gʼaˇ te keunˍ te cawˇ ve kanˉ awˬ lawn chaw chi ma ve hta‸ hto maˍ piˇ leh, li‸ hkʼaw hkʼa deh‸ bvuh‸ keh leh da‸ kehˬ ve chehˇ kuiˬ lo teh taˍ ve yoˬ. Hkʼe te peuˬ hkʼaw‸ nawˉ, yawˇ hui hkʼa peu-eˬ hta‸ a shu yawˇ ve yehˬ lo kʼaw‸ kʼo‸-e tcuh ve yoˬ.

26Sawˉlu‸ htawˇ Giˇbaˍ venˇ hkʼaw cawˬ ve yawˇ ve yehˬ lo kʼo‸-e ve yoˬ. Gʼuiˬsha leuˆ yuˬ taˍ ve ha‸ hanˉ ve chaw teˇ hpaˍ, yawˇ hkʼaˇ suh gʼa‸ kʼai ve yoˬ.

27Ya‸ hkʼaˇ, haiˬ ve chaw teˇ hpaˍ lehˬ, Chaw chi hpaˇ ngaˬ hui hta‸ hkʼaˬ hkʼe te ponˬ laˇ gʼa tuˬ le, teh‸ maˇ shawˍ maˇ caˆ kʼoˆ leh, yawˇ hta‸ te‸ chiˉ la‸ shawnˍ maˇ piˇ.

← Chapter 9 Jump to: Chapter 11 →