1 Samuel 13

Lahu Bible Edited © Thailand Bible Society and Bible Society of Myanmar, 2010, 2020.

← Chapter 12 Jump to: Chapter 14 →

1Sawˉlu‸ jawˇmawˇ hpeh‸ la ve teˇ yanˇ, yawˇ ve a sha‸ 30 hkʼaw‸ gaˬ peuˬ ve yoˬ. Yawˇ lehˬ Iˉsaˍreˍlaˆ chaw hui hta‸ awˇ chi hkʼaw‸ uˉ peunˍ ve yoˬ.

2Sawˉlu‸ lehˬ Iˉsaˍreˍlaˆ ma‸ yaˇ 3,000 gʼaˇ hta‸ leuˆ yuˬ peuˬ hkʼaw‸ nawˉ, awˬ nu ve chaw hkʼa peu-eˬ hta‸ a shu yawˇ ve yehˬ lo kʼaw‸ kʼo‸-e tcuh ve yoˬ. Yawˇ lehˬ ma‸ yaˇ 2,000 gʼaˇ hta‸ yawˇ geh teˇ geh Miˆmaˆ venˇ leh Beˍteˍlaˆ mvuhˇmiˬ hkʼaw chehˇ tcuh taˍ ve yoˬ. Awˬ nu ve ma‸ yaˇ 1,000 gʼa hta‸ Beˍyaˬmenˍ chaw hui ve mvuhˇmiˬ hkʼaw cawˬ ve Giˇbaˍ venˇ hkʼaw yawˇ ve yaˇ paˍ Yawˇnaˆtanˍ geh chehˇ tcuh taˍ ve yoˬ.

3Yawˇnaˆtanˍ lehˬ, Giˇbaˍ venˇ hkʼaw chehˇ ve Hpiˇliˇtiˆ ma‸ poˍ lonˉ hta‸ tiˇ pehˍ ve yoˬ. Oˇ htaˇ Sawˉlu‸ lehˬ Heˍbrehˇ chaw teˇ hpaˍ ma‸ bawˆ kuiˬ lo laˬ tuˬ Iˉsaˍreˍlaˆ mvuhˇmiˬ hkʼaˬ ti chi ti lo nuˇ hkaw ca meuˆ tcuh ve yoˬ.

4Sawˉlu‸ lehˬ Hpiˇliˇtiˆ ma‸ poˍ lonˉ hta‸ tiˇ pehˍ peuˬ ve awˬ lawn leh Hpiˇliˇtiˆ chaw teˇ hpaˍ yawˇ hta‸ cha‸ naˬ jaˇ peuˬ ve awˬ lawn hta‸ Iˉsaˍreˍlaˆ chaw teˇ hpaˍ gʼa shiˍ ve teˇ yanˇ, yawˇ hui hkʼa peu-eˬ Giˇlaˍgaˍ venˇ lo Sawˇlu‸ geh hpawnˬ laˬ ve yoˬ.

5Hpiˇliˇtiˆ chaw teˇ hpaˍ htawˇ, Iˉsaˍreˍlaˆ chaw hui hta‸ bawˆ da‸ tuˬ tawˆ la ve yoˬ. Yawˇ hui lehˬ iˉ mvuhˇ lawˬ 30,000 leh iˉ mvuhˇ ciˇ ve ma‸ yaˇ 6,000 gʼaˇ cawˬ ve yoˬ. Chi awˬ hkʼoˆ, yawˇ hui ve ma‸ yaˇ teˇ hpaˍ lehˬ laˇ tsuhˇ gʼuiˬ pfuhˍ lo cawˬ ve shehˇ shiˍ hkʼa shuˍ maˇ jaˇ ve yoˬ. Yawˇ hui lehˬ Beˍtaˍvenˍ venˇ mvuhˇ nyi tawˆ hpawˇ lo cawˬ ve Miˆmaˆ venˇ lo kʼai leh oˇ kaˬ lo deh chehˇ taˍ ve yoˬ.

6Hpiˇliˇtiˆ chaw hui lehˬ Iˉsaˍreˍlaˆ chaw hui hta‸ hehnˇ chaweh te piˇ ve pa taw, yawˇ hui haˉ kʼoˍ, haˉ hpawˇ leh nanˬ bawˍ teˇ hpaˍ hkʼaw ca hpaw va‸ taˍ ve yoˬ.

7Iˉsaˍreˍlaˆ chaw teˇ hpaˍ Yawˇdanˍ iˉ kaˆ lawˬ hta‸ hkanˍ tawˆ-e leh Gaˆ leh Giˇlaˆ mvuhˇmiˬ lo hpaw-e ve yoˬ. Sawˉlu‸ lehˬ Giˇlaˍgaˍ venˇ hkʼaw chehˇ taˍ leh, yawˇ geh chehˇ taˍ ve chaw teˇ hpaˍ htawˇ kaw ˆcheˇ chehˇ ve yoˬ.

8Saˍmo-eˍlaˆ kʼoˆ piˇ taˍ ve hkʼe, Sawˉlu‸ lehˬ Saˍmo-eˍlaˆ hta‸ suhˍ nyi hkʼa gaˬ law chehˇ taˍ ve yoˬ. Ya‸ hkʼaˇ, Saˍmo-eˍlaˆ Giˇlaˍgaˍ venˇ lo maˇ laˬ. Hkʼe te leh, ma‸ yaˇ teˇ hpaˍ hpaˍ Sawˉlu‸ hta‸ baˬ taˉ leh hpaw-e ve yoˬ.

9Oˇ htaˇ Sawˉlu‸ lehˬ, Ngaˬ geh lo tuˉ tanˇ tuˬ yuˬ veu laˇ-oˆ, teh‸ yawˇ hui hta‸ kʼoˆ piˇ ve yoˬ. Hkʼe te leh, yawˇ tuˉ tanˇ tuˬ oˇ ve hta‸ tuˉ tanˇ ve yoˬ.

10Yawˇ tuˉ tanˇ peuˬ ve teˇ yanˇ Saˍmo-eˍlaˆ gaˬ la ve yoˬ. Hkʼe te leh, Sawˉlu‸ yawˇ hta‸ ca ha‸ yuˬ tuˬ kʼai ve yoˬ.

11Oˇ htaˇ Saˍmo-eˍlaˆ lehˬ, Nawˬ hkʼaˬhkʼe te ve le, teh‸ yawˇ hta‸ kʼoˆ piˇ ve yoˬ. Sawˉlu‸ kʼaw‸ yaw hkʼaw‸ leh kʼoˆ ve, Ngaˬ ve chaw teˇ hpaˍ ngaˬ hta‸ baˬ taˉ leh hpaw-e chehˇ ve hta‸ gʼa mawˬ ve yoˬ. Nawˬ htawˇ kʼoˆ taˍ ve hkʼe haˆ maˇ gaˬ la ve awˬ hkʼoˆ, Hpiˇliˇtiˆ chaw teˇ hpaˍ lehˬ Miˆmaˆ venˇ hkʼaw hpoˆ chehˇ taˍ ve yoˬ.

12Chi hta‸ pa taw, Hpiˇliˇtiˆ chaw teˇ hpaˍ choˬ kaˬ ngaˬ chehˇ taˍ kuiˬ Giˇlaˍgaˍ venˇ hta‸ ca bawˆ la tuˬ yoˬ. Ngaˬ lehˬ Gʼuiˬsha hta‸ te‸ chiˉ maˇ gʼa na nyi sheˍ teh‸ dawˇ leh, Gʼuiˬsha hta‸ tuˉ tanˇ piˇ peuˬ ve yoˬ, teh‸ kʼoˆ ve yoˬ.

13Oˇ htaˇ Saˍmo-eˍlaˆ yawˇ hta‸ kʼoˆpiˇ ve, Nawˬ te ve kanˉ lehˬ a ciˉ ka‸ maˇ cawˇ. Nawˬ lehˬ Gʼuiˬsha kʼoˆ taˍ ve tawˇ hta‸ ponˬ leuˉ ve yoˬ. Nawˬ Gʼuiˬsha ve tawˇ hta‸ hkʼa deh‸ na yuˬ chehˇ ve hkʼe kʼo, Gʼuiˬsha lehˬ nawˬ leh nawˬ ve awˬ ceuˬ awˬ hkʼaˇ teˇ hpaˍ hta‸, Iˉsaˍreˍlaˆ chaw hui awˬ hkʼoˆ co co taiˍ taiˍ uˉ peunˍ tcuh laˇ tuˬ yoˬ.

14Ya‸ hkʼaˇ, nawˬ lehˬ chi beu‸ awˬ gʼuˇ suhˍ caˉ leh gʼa kʼaw‸ uˉ peunˍ tuˬ ve maˇ heˆ. Nawˬ Gʼuiˬsha ve tawˇ hta‸ maˇ na yuˬ ve pa taw, Gʼuiˬsha lehˬ yawˇ nyi ma cawˇ ve chaw hta‸ ca leh, yawˇ ve chaw teˇ hpaˍ hta‸ uˉ peunˍ tcuh tuˬ yoˬ, teh‸ yawˇ hta‸ kʼoˆ piˇ ve yoˬ.

15Oˇ hkʼe kʼoˆ peuˬ hkʼaw‸ nawˉ, Saˍmo-eˍlaˆ Giˇlaˍgaˍ venˇ hkʼaw tawˆ kʼai ve yoˬ. Cawˬ taˍ sheˍ ve ma‸ yaˇ teˇ hpaˍ Sawˉlu‸ hkʼaˇ suh gʼa‸ kʼai ve yoˬ. Yawˇ hui Giˇlaˍgaˍ venˇ hkʼaw tu leh Beˍyaˍmenˍ chaw hui ve mvuhˇmiˬ hkʼaw cawˬ ve Giˇbaˍ venˇ lo kʼai ve yoˬ. Sawˉlu‸ lehˬ yawˇ ve ma‸ yaˇ teˇ hpaˍ hta‸ kʼaw‸ gʼaw nyi leh, ma‸ yaˇ 600 gʼaˇ ceh cawˬ taˉ ve hta‸ gʼa mawˬ ve yoˬ.

16Sawˉlu‸, yawˇ ve yaˇ Yawˇnaˆtanˍ leh yawˇ ve ma‸ yaˇ teˇ hpaˍ, Beˍyaˍmenˍ chaw hui ve mvuhˇmiˬ hkʼaw cawˬ ve Giˇbaˍ venˇ hkʼaw chehˇ taˍ ve yoˬ. Hpiˇ liˇtiˆ chaw teˇ hpaˍ lehˬ Miˆmaˆ venˇ hkʼaw deh chehˇ taˍ ve yoˬ.

17Hpiˇliˇtiˆ chaw teˇ hpaˍ shehˆ moˍ pehˬ leh tawˆ la ve yoˬ. Teˇ moˍ lehˬ Shuˇ-aˍ mvuhˇmiˬ hkʼaw cawˬ ve Awˇhpaˍraˆ venˇ hpawˇ lo kʼai leh,

18awˬ nu ve teˇ moˍ lehˬ Zeˍbonˍ lawˬ hkʼo‸ coˇ paˉ lo cawˬ ve hkʼaw hkʼoˆ lo taˆ-e ve yoˬ.

19Iˉsaˍreˍlaˆ chaw hui ve mvuhˇmiˬ hkʼaw lo ca liˉ paˍ teˇ gʼaˇ ka‸ maˇ cawˬ. Awˬ lawn kʼo, Hpiˇliˇtiˆ chaw teˇ hpaˍ lehˬ Heˍbrehˇ chaw hui hta‸ aˉhtaw leh gehˇ te yehˇ tuˬ a hkaw-anˬ maˇ piˇ.

20(Chi hta‸ pa taw, Iˉsaˍreˍlaˆ chaw teˇ hpaˍ lehˬ, yawˇ hui ve laˇ hpuiˇ, ceˉ ceˇ, ciˉ kʼoˆ, leh law‸ kʼawˉ teˇ hpaˍ hta‸ kʼaw‸ gu shoˆ tuˬ Hpiˇliˇtiˆ chaw hui geh gʼa kʼai ve yoˬ.

21Ceˉ ceˇ leh law‸ kʼawˉ gu shoˆ ve awˬ hpfuhˇ lehˬ, teˇ hteh‸ hkʼe gʼa piˇ leh, laˇ hpuiˇ leh ciˉ kʼoˆ gu shoˆ ve awˬ hpfuhˇ lehˬ 2 hteh‸ hkʼe gʼa piˇ ve yoˬ.)

22Chi hta‸ pa taw, ma‸ bawˆ kuiˬ lo Sawˉlu‸ leh Yawˇnaˆtanˍ maˇ heˆ ve kʼo, awˬ nu ve Iˉsaˍreˍlaˆ ma‸ yaˇ teˇ gʼaˇ ka‸ aˉhtaw leh gehˇ maˇ cawˬ.

23Hpiˇliˇtiˆ chaw teˇ hpaˍ lehˬ Miˆmaˆ kʼaˍ le‸ hta‸ hkʼa deh‸ shaw taˍ ve yoˬ.

← Chapter 12 Jump to: Chapter 14 →