1 Samuel 26

Lahu Bible Edited © Thailand Bible Society and Bible Society of Myanmar, 2010, 2020.

← Chapter 25 Jump to: Chapter 27 →

1Ziˇhpaˆ teh‸ kʼoˆ ve hteunˍ hkʼaw chehˇ ve chaw teˇ hpaˍ hpaˍ, Giˇbaˍ venˇ lo Sawˉlu‸ geh laˬ leh, Daˍviˆ lehˬYuˇda‸ hteunˍ lonˉ paˇ lo cawˬ ve Haˍhkiˇlaˆ hkʼaw hkʼoˆ lo va‸ chehˇ taˍ ve awˬ lawn ca kʼoˆ piˇ la ve yoˬ.

2Oˇ htaˇ, Sawˉlu‸ lehˬ Daˍviˆ hta‸ gʼa‸ yuˬ tuˬ yawˇ ve ma‸ yaˇ 3,000 gʼaˇ hta‸ shiˍ veu leh Ziˇhpaˆ hteunˍ lo kʼai ve yoˬ.

3Yawˇ lehˬ, Haˍhkiˇlaˆ hkʼaw hkʼoˆ lo deh chehˇ taˍ ve yoˬ. Daˍviˆ lehˬ, hteunˍ lonˉ oˇ ve hkʼaw chehˇ taˍ sheˍ ve yoˬ. Sawˉlu‸ yawˇ hta‸ gʼa‸ ca la ve oˇ kaˬ lo gaˬ la peuˬ ve hta‸ yawˇ gʼa shiˍ ve teˇ yanˇ,

4yawˇ chaw hta‸ hpehˇ leh ca jaˆ nyi tcuh ve yoˬ. Hkʼe te leh, Sawˉlu‸ oˇ kaˬ lo awˬ tehˬ awˬ na gaˬ la taˍ peuˬ ve hta‸ yawˇ gʼa shiˍ ve yoˬ.

5Oˇ htaˇ, yawˇ teˇ caw haˉ tu leh Sawˉlu‸ leh Neˍraˆ ve yaˇ paˍ, Sawˉlu‸ ve ma‸ poˍ lonˉ Aˍbaˍnaˍ hui zuh‸ chehˇ kuiˬ hta‸ ca nyi kʼai ve yoˬ. Sawˉlu‸ lehˬ, fa la awˬ kʼaw ji lo zuh‸ leh, yawˇ ve ma‸ yaˇ teˇ hpaˍ yawˇ hta‸ hkʼa caw zuhˇ lo zuh‸ chehˇ taˍ ve yoˬ.

6Oˇ htaˇ, Daˍviˆ lehˬ Hiˇtiˆ chaw Aˍbiˆmaˍlehˆ leh Zeˍruˆyaˍ ve yaˇ Yaˍbaˆ ve awˬ nyi paˍ Aˍbiˆshehˇ hui hta‸ kuˬ yuˬ leh, Nawˬ huiˉ maˬ a shu teˇ gʼaˇ ngaˬ geh Sawˉlu‸ deh chehˇ taˍ kuiˬ lo kʼai tuˬ le, teh‸ na nyi ve yoˬ. Aˍbiˆshehˇ lehˬ, Ngaˬ kʼai tuˬ yoˬ, teh‸ yawˇ hta‸ kʼaw‸ yaw hkʼaw‸ piˇ ve yoˬ.

7Hkʼe te leh, oˇ ve teˇ haˉ Daˍviˆ leh Aˍbiˆshehˇ yawˇ huiˉ maˬ Sawˉlu‸ deh chehˇ taˍ kuiˬ lo kʼai ve yoˬ. Sawˉlu‸ lehˬ, yawˇ ve gehˇ hta‸ uˉ htuˆ puiˍ lo choˆ taˍ leh fa la awˬ kʼaw ji lo zuh‸ muiˉ kʼa chehˇ ve yoˬ.

8Oˇ htaˇ, Aˍbiˆshehˇ Daˍviˆ hta‸ kʼoˆ piˇ ve, Ya‸ puiˉ Gʼuiˬsha lehˬ nawˬ ve canˇ paˍ hta‸ nawˬ ve la‸ sheh hkʼaw chiˇ a‸ laˇ taˍ peuˬ ve yoˬ. Chi beu‸ yawˇ ve gehˇ hta‸ yuˬ leh yawˇ hta‸ juˆ pehˍ piˇ tuˬ ngaˬ hta‸ a hkaw-anˬ pe‸ laˇ-oˆ. Ngaˬ yawˇ hta‸ teˇ hkʼe tiˉ juˆ tuˬ yoˬ, teh‸ kʼoˆ ve yoˬ.

9Ya‸ hkʼaˇ Daˍviˆ kʼoˆ ve, Nawˬ yawˇ hta‸ te‸ chiˉ maˇ gʼa te. Gʼuiˬsha leuˆ yuˬ taˍ ve jawˇmawˇ hta‸ te luˬ piˇ ve chaw hta‸ Gʼuiˬsha awˬ tehˬ awˬ na ciˍ yanˍ piˇ tuˬ yoˬ.

10Gʼuiˬsha lehˬ, te‸ chehˇ ve pa taw Sawˉlu‸ suh yanˇ gaˬ ve kʼo, yawˇ hta‸ tiˇ pehˍ piˇ tuˬ ve hta‸ ngaˬ hui shiˍ taˍ ve yoˬ. Oˇ hkʼe maˇ heˆ kʼo, ma‸ bawˆ kuiˬ lo yawˇ hta‸ suh-e piˇ lawˬ tuˬ yoˬ.

11Gʼuiˬsha yawˇ leuˆ yuˬ taˍ ve jawˇmawˇ hta‸ ngaˬ te‸ chiˉ maˇ gʼa te piˇ tuˬ, Gʼuiˬsha tawˍ taˍ laˇ piˇ-oˆ. Ngaˬ huiˉ maˬ yawˇ ve gehˇ leh, yawˇ ve iˉ kaˆ aˉ mo‸ kʼoˍ hta‸ yuˬ leh tawˆ kʼai-a veuˬ, teh‸ yawˇ hta‸ kʼoˆ piˇ ve yoˬ.

12Hkʼe te leh, Daˍviˆ lehˬ Sawˉlu‸ ve uˉ htuˆ puiˍ lo teh taˍ ve gehˇ leh iˉ kaˆ aˉ mo‸ kʼoˍ hta‸ yuˬ peuˬ hkʼaw‸ nawˉ, Aˍbiˆshehˇ hta‸ shiˍ leh tawˆ kʼai ve yoˬ. Hpeh‸ la peuˬ ve awˬ ceuˬ hta‸ chaw teˇ gʼaˇ kaˬ maˇ shiˍ maˇ jawˬ. Gʼuiˬsha yawˇ hui hta‸ zuh‸ mehˬ jaˇ piˇ lawˬ ve pa taw, yawˇ hui teˇ gʼaˇ ka‸ maˇ nawˇ.

13Oˇ ve hkʼaw‸ nawˉ, Daˍviˆ lehˬ lawˬ hkʼo‸ hta‸ hpanˍ kʼai leh coˇ paˉ hpawˇ lo cawˬ ve hkʼaw hkʼoˆ lo taˆ-e ve yoˬ.

14Yawˇ Sawˉlu‸ ve ma‸ yaˇ teˇ hpaˍ leh Aˍbaˍnaˍ hta‸ kuˬ leh, Aˍbaˍnaˍ-oˬ, nawˬ kaˇ chehˇ-aw laˇ, teh‸ kʼoˆ ve yoˬ. Oˇ htaˇ Aˍbaˍnaˍ lehˬ, Jawˇmawˇ hta‸ kuˬ chehˇ ve chaw oˇ ve a shu le, teh‸ kʼoˆ ve yoˬ.

15Daˍviˆ kʼoˆ ve, Nawˬ lehˬ hawˉ hkʼaˆ paˍ lonˉ teˇ gʼaˇ hpeh‸ ve maˇ heˆ laˇ. Oˇ hkʼe yoˬ kʼo, aˬ hto‸ ma pa taw nawˬ ve jawˇmawˇ hta‸ hkʼa deh‸ maˇ nyi ha‸ shaˉ ve le. Ya‸ sheh htaˇ ceh chaw teˇ gʼaˇ nawˬ ve jawˇmawˇ hta‸ tiˇ pehˍ tuˬ, fa la hkʼaw lo‸-e taˉ peuˬ.

16Aˍbaˍnaˍ-oˬ, nawˬ lehˬ nawˬ ve kanˉ hta‸ hkʼa deh‸ maˇ te. Nawˬ lehˬ Gʼuiˬsha leuˆ yuˬ taˍ ve jawˇmawˇ hta‸ hkʼa deh‸ maˇ nyi ha‸ shaˉ ve pa taw, nawˬ hui hkʼa peu-eˬ suh keunˍ ve yoˬ, teh‸ te‸ chehˇ ve Gʼuiˬsha hta‸ cuˇ leh ngaˬ hkanˍ ve yoˬ. Nyi loˬ. Jawˇmawˇ ve gehˇ hkʼaˬ lo le. Yawˇ ve uˉ htuˆ puiˍ lo teh taˍ ve iˉ kaˆ aˉ mo‸ kʼoˍ hkʼaˬ lo le, teh‸ yawˇ hta‸ kʼoˆ piˇ ve yoˬ.

17Sawˉlu‸ lehˬ Daˍviˆ hkawˇ hta‸ shiˍ ve pa taw, Nawˬ lehˬ ngaˬ yaˇ paˍ Daˍviˆ yoˬ laˇ, teh‸ na nyi ve yoˬ. Daˍviˆ kʼaw‸ yaw hkʼaw‸ leh kʼoˆ ve, Yoˬ, jawˇmawˇ-oˬ. Aˬ hto‸ ma pa taw nawˬ ngaˬ hta‸ gʼa‸ yuˬ chehˇ ve le.

18Ngaˬ aˬ hto ma teˇ ceuˬ te‸ ya‸ ve cawˬ le.

19Jawˇmawˇ-oˬ, ngaˬ kʼoˆ tuˬ ve tawˇ hta‸ a ciˉ na laˇ sheˍ. Ngaˬ hta‸ gʼa‸ yuˬ tuˬ, Gʼuiˬsha nawˬ hta‸ tcuh laˇ taˍ ve hkʼe kʼo, yawˇ nyi ma kʼaw‸ pa la tuˬ, yawˇ hta‸ teˇ ceuˬ ceuˬ tuˉ tanˇ piˇ hpeh‸ ve yoˬ. Ya‸ hkʼaˇ, chaw yaˇ teˇ hpaˍ oˇ hkʼe dawˇ tawˆ leh te chehˇ ve kʼo, Gʼuiˬsha hkeu ve teˇ ceuˬ yawˇ hui awˬ hkʼoˆ lo gaˬ la piˇ-oˆ. Yawˇ hui ngaˬ hta‸ awˬ nu ve gʼuiˬsha teˇ hpaˍ hta‸ oˉ kʼoˍ ca pui tcuh laˇ leh, Gʼuiˬsha yawˇ ve chaw teˇ hpaˍ hta‸ piˇ taˍ ve mvuhˇmiˬ hkʼaw, ngaˬ te‸ chiˉ awˬ shinˉ maˇ gʼa tuˬ, gʼa‸ kʼoˬ laˇ chehˇ ve yoˬ.

20Gʼuiˬsha hta‸ vuiˇ da‸ kuiˬ buiˇshaˆ aˉ naˆ chaw hui ve mvuhˇmiˬ hkʼaw ngaˬ hta‸ taˇ ca suh-e tcuh laˇ-oˆ. Aˬ hto‸ ma pa taw, Iˉsaˍreˍlaˆ ve jawˇmawˇ lehˬ, ngaˬ hkʼe ve hpuiˇ she ehˉ teˇ hkeh hta‸ tiˇ pehˍ tuˬ gʼa‸ ca toˇ chehˇ ve le. Aˬ hto‸ ma pa taw, yawˇ lehˬ ngaˆ hta‸ gʼa‸ yuˬ ve hkʼe ngaˬ hta‸ gʼa‸ yuˬ toˇ chehˇ ve le, teh‸ kʼoˆ ve yoˬ.

21Oˇ htaˇ Sawˉlu‸ kʼoˆ ve, Ngaˬ lehˬ te ya‸ jaˇ peuˬ. Ngaˬ yaˇ paˍ Daˍviˆ-oˬ, kʼaw‸ la-o. Ngaˬ nawˬ hta‸ maˇ kʼaw‸ ya‸-o. Awˬ lawn kʼo, ya‸ puiˉ nawˬ ngaˬ ve a sha‸ hta‸ ponˬ laˇ peuˬ. Ngaˬ lehˬ chaw gʼuˇ paˍ hkʼe hpeh‸ leh, haiˬ ve kanˉ hta‸ gʼa te peuˬ, teh‸ kʼoˆ ve yoˬ.

22Daˍviˆ kʼaw‸ yaw hkʼaw‸ leh kʼoˆ ve, Jawˇmawˇ-oˬ, nawˬ ve gehˇ choˬ kaˬ lo cawˬ taˍ ve yoˬ. Nawˬ ve chaw teˇ gʼaˇ hta‸ hpehˇ leh ca yuˬ hkʼaw‸ la tcuh-o.

23Ka ti‸ yeˬ leh hteˇ ve cawˇ ve chaw hta‸ Gʼuiˬsha awˬ bon na‸ piˇ ve yoˬ. Ya‸ nyi Gʼuiˬsha nawˬ hta‸ ngaˬ ve la‸ sheh hkʼaw chiˇ a‸ laˇ peuˬ ve yoˬ. Ya‸ hkʼaˇ, Gʼuiˬsha leuˆ yuˬ taˍ ve jawˇmawˇ hta‸ ngaˬ te‸ chiˉ maˇ te.

24Ya‸ nyi ngaˬ nawˬ ve a sha‸ hta‸ ponˬ piˇ ve hkʼe, Gʼuiˬsha htawˇ ngaˬ hta‸ kawˆ tuˬ dawˇ haˍ tuˬ hkʼaw ponˬ laˇ piˇ-oˆ, teh‸ kʼoˆ ve yoˬ.

25Oˇ htaˇ Sawˉlu‸ lehˬ, Ngaˬ yaˇ paˍ-oˬ, Gʼuiˬsha nawˬ hta‸ awˬ bon na‸ piˇ-oˆ. Nawˬ hkʼa te ve kanˉ teˇ ceuˬ le le uiˍ la da‸ la tuˬ yoˬ, teh‸ Daˍviˆ hta‸ kʼoˆ piˇ ve yoˬ. Oˇ ve hkʼaw nawˉ Daˍviˆ tawˆ kʼai leh, Sawˉlu‸ htawˇ yawˇ ve aˉ hkʼaw lo kʼo‸-e ve yoˬ.

← Chapter 25 Jump to: Chapter 27 →