1 Samuel 24

Lahu Bible Edited © Thailand Bible Society and Bible Society of Myanmar, 2010, 2020.

← Chapter 23 Jump to: Chapter 25 →

1Sawˉlu‸ lehˬ Hpiˇliˇtiˆ chaw hui hta‸ bawˆ da‸ peuˬ leh kʼaw‸ la chehˇ ve teˇyanˇ, Daˍviˆ lehˬ Eˍgaˍdiˆ teh‸ kʼoˆ ve chehˇ kuiˬ lo va‸ chehˇ taˍ ve awˬ lawn hta‸ Sawˉlu‸ gʼa shiˍ ve yoˬ.

2Hkʼe te leh, Sawˉlu‸ lehˬ cheuˬ jaˇ ve yawˇ ve ma‸ yaˇ 3 hinˉ gʼaˇ hta‸ shiˍ veu leh, Haˇ tawˉ pehˆ haˉ hpawˇ, teh‸ kʼoˆ ve chehˇ kuiˬ lo Daˍviˆ hta‸ ca hpfuhˆ kʼai ve yoˬ.

3Ya‸ kʼaw hpuiˇ lo yawˬ hkawˆ teˇ hpaˍ cawˬ kuiˬ lo gaˬ ve teˇ yanˇ, yawˇ haˉ kʼoˍ teˇ maˬ mawˬ leh, haˉ kʼoˍ oˇ ve hkʼaw gʼaˇ ca jehˇ tuˬ lo‸-e ve yoˬ. Daˍviˆ leh yawˇ ve ma‸ yaˇ teˇ hpaˍ lehˬ haˉ kʼoˍ oˇ ve teˇ hpawˇ lo chehˇ taˍ ve yoˬ.

4Oˬ htaˇ, Daˍviˆ ve ma‸ yaˇ teˇ hpaˍ lehˬ, Chi nawˬ awˬ pon da‸ ve awˬ yanˇ hpeh‸ ve yoˬ. Gʼuiˬsha lehˬ nawˬ ve canˇ paˍ hta‸ nawˬ ve la‸ sheh hkʼaw chiˇ a‸ laˇ tuˬ yoˬ, teh‸ kʼoˆ taˍ ve yoˬ. Chi beu‸ nawˬ yawˇ hta‸ te piˇ gaˇ ve hkʼe te piˇ hpeh‸ ve yoˬ, teh‸ Daˍviˆ hta‸ kʼoˆ piˇ ve yoˬ. Daˍviˆ a yehˉ yehˉ gaˆ kʼai leh, Sawˉlu‸ ve aˉ po‸ teˇ peˆ nuˆ yuˬ ve yoˬ.

5Yawˇ chi hkʼe gʼa te peuˬ ve pa taw, Daˍviˆ nyi ma maˇ sha.

6Hkʼe te leh, Daˍviˆ yawˇ ve ma‸ yaˇ teˇ hpaˍ hta‸ kʼoˆ piˇ ve, Gʼuiˬsha yawˇ leuˆ yuˬ taˍ ve jawˇmawˇ hta‸ ngaˬ maˇ gʼa te luˬ tuˬ, Gʼuiˬsha tawˍ taˍ laˇ piˇ-oˆ. Yawˇ lehˬ Gʼuiˬsha leuˆ yuˬ taˍ ve jawˇmawˇ hpeh‸ ve pa taw, ngaˬ yawˇ hta‸ a ciˉ ka‸ htawˇ maˇ keunˍ, teh‸ yawˇ hui hta‸ kʼoˆ piˇ ve yoˬ.

7Hkʼe te leh, Daˍviˆ lehˬ Sawˉlu‸ hta‸ te luˬ piˇ maˇ cawˇ ve awˬ lawn yawˇ ve ma‸ yaˇ teˇ hpaˍ hta‸ hkʼa deh‸ kʼoˆ maˍ piˇ ve yoˬ. Oˇ htaˇ, Sawˉlu‸ tu leh haˉ kʼoˍ hkʼaw tawˆ kʼai ve yoˬ.

8Oˇ htaˇ, Daˍviˆ yawˇ hkʼaˇ suh gʼa‸ kʼai leh, Jawˇmawˇ-oˬ, teh‸ yawˇ hta‸ kʼoˆ piˇ ve yoˬ. Sawˉlu‸ kʼaw‸ hpfuhˆ nyi ve teˇ yanˇ, Daˍviˆ lehˬ yawˆ yan ve hkʼaw miˬ chaˇ hkʼoˆ boˆ sheˬ ve yoˬ.

9Peuˬ hkʼaw‸ nawˉ yawˇ kʼoˆ ve, Aˍ hto‸ ma pa taw, naw lehˬ shu hkawˇ na leh ngaˬ nawˬ hta‸ kʼaw‸ hpfuhˆ chehˇ ve yoˬ, teh‸ dawˇ ve le.

10Ya‸ nyi Gʼuiˬsha lehˬ, haˉ kʼoˍ hkʼaw nawˬ hta‸ ngaˬ ve la‸ sheh hkʼaw chiˇ a‸ laˇ peuˬ ve hta‸ nawˬ dawˇ shiˍ cawˇ ve yoˬ. Nawˬ hta‸ tiˇ pehˍ piˇ tuˬ chaw teˇ hpaˍ ngaˬ hta‸ kʼoˆ laˇ ve yoˬ. Ya‸ hkʼaˇ, nawˬ awˬ pon ngaˬ dawˇ haˍ jaˇ ve yoˬ. Nawˬ lehˬ, Gʼuiˬsha leuˆ yuˬ taˍ ve jawˇmawˇ hpeh‸ ve pa taw, nawˬ hta‸ naˬ tuˬ te‸ chiˉ te piˇ maˇ hpeh‸, teh‸ ngaˬ yawˇ hui hta‸ kʼaw‸ kʼoˆ piˇ ve yoˬ.

11Ngaˬ pa-oˬ, ngaˬ ve la‸ sheh hkʼaw nawˬ ve aˉ po‸ teˇ peˆ yuˬ taˍ ve hta‸ nyi sheˍ. Nawˬ ve aˉ po‸ hta‸ ngaˬ nuˆ yuˬ taˍ ve yoˬ. Ya‸ hkʼaˇ, ngaˬ nawˬ hta‸ maˇ tiˇ pehˍ. Chi lehˬ ngaˬ nawˬ hta‸ tiˇ pehˍ gaˇ ve nyi ma maˇ cawˬ ve hta‸ nawˬ shiˍ cawˇ ve yoˬ. Nawˬ ngaˬ hta‸ tiˇ pehˍ tuˬ gʼa‸ ca chehˇ ve htawˇ, ngaˬ lehˬ nawˬ hta‸ a ciˉ ka‸ maˇ te ya‸.

12Ngaˬ huiˉ maˬ a shu teˇ gʼaˇ ya‸ chehˇ ve hta‸ Gʼuiˬsha suhˉ jehˬ laˇ piˇ-oˆ. Ngaˬ nawˬ hta‸ a ciˉ ka‸ maˇ te ya‸ taˍ ve pa taw, Gʼuiˬsha lehˬ nawˬ ngaˬ hta‸ te laˇ chehˇ ve kanˉ awˬ pon nawˬ hta‸ ciˍ yanˍ piˇ-oˆ.

13Haiˬ ve chaw lehˬ, haiˬ ve kanˉ hta‸ te ve yoˬ, teh‸ chaw mawˇ hkawˇ cawˬ ve hta‸ nawˬ htawˇ shiˍ taˍ ve yoˬ. Ya‸ hkʼaˇ, ngaˬ nawˬ hta‸ te luˬ tuˬ ve maˇ heˆ.

14Iˉsaˍreˍlaˆ ve jawˇmawˇ lehˬ, aˬ hto‸ ma hta‸ gʼa‸ yuˬ chehˇ ve hta‸ nyi sheˍ. Yawˇ lehˬ, suh taˍ ve hpuiˇ leh hpuiˇ she hta‸ gʼa‸ ca chehˇ ve yoˬ.

15Ngaˬ huiˉ maˬ a shu teˇ gʼaˇ ya‸ chehˇ ve hta‸ Gʼuiˬsha suhˉ jehˬ laˇ tuˬ yoˬ. Gʼuiˬsha lehˬ ngaˬ hta‸ ha‸ shaˉ leh, nawˬ ve la‸ sheh hkʼaw lo ponˬ laˇ tuˬ yoˬ, teh‸ kʼoˆ ve yoˬ.

16Daˍviˆ tawˇ oˇ ve teˇ hpaˍ hta‸ kʼoˆ peuˬ ve teˇ yanˇ, Sawˉlu‸ kʼoˆ ve, Nawˬ lehˬ ngaˬ yaˇ paˍ Daˍviˆ awˬ tehˬ yoˬ laˇ, teh‸ na nyi leh hawˬ ve yoˬ.

17Peuˬ hkʼaw‸ nawˉ yawˇ Daˍviˆ hta‸ kʼoˆ piˇ ve, Nawˬ lehˬ cawˇ ve hpawˇ lo chehˇ leh, ngaˬ lehˬ ya‸ ve hpawˇ lo chehˇ taˍ ve yoˬ. Ngaˬ nawˬ hta‸ chi taw taw te piˇ chehˇ ve ka‸, nawˬ ngaˬ hta‸ awˬ haiˬ maˇ kʼaw‸ te hkʼaw‸ laˇ.

18Ya‸ nyi Gʼuiˬsha ngaˬ hta‸ nawˬ ve la‸ sheh hkʼaw chiˇ a‸ piˇ peuˬ ve htawˇ, nawˬ lehˬ ngaˬ hta‸ haiˬ ve awˬ ceuˬ maˇ kʼaw‸ te‸ hkʼaw‸ laˇ ve hta‸ ngaˬ gʼa mawˬ peuˬ.

19Chaw teˇ gʼaˇ yawˇ ve canˇ paˍ hta‸ yuˬ gʼa peuˬ hkʼaw‸ nawˉ, hkʼaˬ nyiˇ pawˆ hpehˇ peu piˇ jaw le. Nawˬ ya‸ nyi ngaˬ hta‸ te laˇ taˍ ve kanˉ chi awˬ pon Gʼuiˬsha nawˬ hta‸ awˬ bon na‸ laˇ piˇ-oˆ.

20Nawˬ lehˬ Iˉsaˍreˍlaˆ chaw hui ve jawˇmawˇ gʼa te leh, mvuhˇmiˬ chi hta‸ gʼa uˉ peunˍ tuˬ ve chi beu‸ ngaˬ hkʼa deh‸ gʼa shiˍ peuˬ.

21Chi hta‸ pa taw, ngaˬ ve awˬ meh leh ngaˬ ve yehˬ yaˇ kʼa yaˇ teˇ hpaˍ ve awˬ meh hta‸ shu maˇ gʼa leunˇ kʼai tuˬ, nawˬ lehˬ ngaˬ ve awˬ ceuˬ awˬ hkʼaˇ teˇ hpaˍ hta‸ ponˬ piˇ tuˬ yoˬ, teh‸ Gʼuiˬsha ve awˬ meh hta‸ cuˇ leh hkanˍ laˇ-oˆ, teh‸ yawˇ hta‸ kʼoˆ piˇ ve yoˬ.

22Daˍviˆ htawˇ, Hkanˍ ve yoˬ, teh‸ kʼaw‸ kʼoˆ piˇ ve yoˬ. Oˇ ve hkʼaw‸ nawˉ Sawˉ lu‸ yawˇ ve hawˉ yehˬ lo kʼaw‸ kʼo‸-e leh, Daˍviˆ leh yawˇ ve ma‸ yaˇ teˇ hpaˍ htawˇ, yawˇ hui va‸ taˍ kuiˬ lo kʼaw‸ kʼo‸-e ve yoˬ.

← Chapter 23 Jump to: Chapter 25 →