1 Samuel 15

Lahu Bible Edited © Thailand Bible Society and Bible Society of Myanmar, 2010, 2020.

← Chapter 14 Jump to: Chapter 16 →

1Saˍmo-eˍlaˆ Sawˉlu‸ hta‸ kʼoˆ piˇ ve, Gʼuiˬsha lehˬ yawˇ ve Iˉsaˍreˍlaˆ chaw hui awˬ hkʼoˆ jawˇmawˇ te tuˬ, nawˬ hta‸ naˍ manˇ ca pfuhˍ piˇ-oˆ, teh‸ ngaˬ hta‸ kʼoˆ laˇ ve yoˬ. Chi beu‸ kanˇ paˆ uiˍ ve Jawˇmawˇ Gʼuiˬsha hkʼaˬ hkʼe kʼoˆ taˍ ve hta‸ na sheˍ.

2Iˉsaˍreˍlaˆ chaw hui Eˇjiˇtu‸ mvuhˇmiˬ hkʼaw tawˆ la chehˇ ve teˇ yanˇ, Aˍmaˍ lehˆ chaw hui yawˇ hui hta‸ fawˉ mehˍ piˇ ve pa taw, Gʼuiˬsha lehˬ chi beu‸ yawˇ hui hta‸ kʼaw‸ ciˍ yanˍ piˇ tuˬ ve yoˬ.

3Chi hta‸ pa taw, nawˬ chi beu‸ Aˍmaˍlehˆ chaw hui hta‸ ca bawˆ-e loˬ. Yawˇ hui hkʼa cawˬ ve mawˇ hkʼa peu-eˬ ve hta‸ htawˇ te luˬ te sheˆ piˇ-oˆ. Te‸ chiˉ ka‸ taˇ teh taˉ. Hawˉ hkʼaˆ, yaˇ miˇ, yaˇ ehˉ, nuˇ, yawˬ, kaˍlaˍoˆ leh piˉ laˬ hkʼa peu-eˬ ve hta‸ tiˇ pehˍ-o‸, teh‸ yawˇ hta‸ kʼoˆ piˇ ve yoˬ.

4Sawˉlu‸ lehˬ yawˇ ve ma‸ yaˇ teˇ hpaˍ hta‸ Teˍlenˍ venˇ lo kuˬ yuˬ leh gʼaw nyi ve yoˬ. Iˉsaˍ reˍlaˆ ma‸ yaˇ 200,000 gʼaˇ cawˬ leh, Yuˇda‸ ma yaˇ 10,000 gʼaˇ cawˬ ve yoˬ.

5Oˇ ve hkʼaw‸ nawˉ, yawˇ ve ma‸ yaˇ teˇ hpaˍ hta‸ Aˍmaˍlehˆ chaw hui ve venˇ lo shiˍ kʼai leh, yawˇ hui hta‸ lawˬ hkʼo‸ hkʼaw va‸ taˍ tcuh ve yoˬ.

6Oˇ htaˇ, yawˇ Keˍniˆ chaw hui hta‸ shaˍ ti‸ piˇ leh kʼoˆ ve, Nawˬ hui maˇ suh gaˇ ve kʼo, Aˍmaˍlehˆ chaw hui geh taˇ hkaw‸ chehˇ. Yawˇ hui geh tawˆ kʼai loˬ. Awˬ lawn kʼo, nawˬ hui lehˬ Iˉsaˍreˍlaˆ chaw hui Eˇjiˇtu‸ mvuhˇmiˬhkʼaw tawˆ la chehˇ htaˇ, yawˇ hui hta‸ ha kʼaˉ piˇ ve pa taw yoˬ, teh‸ kʼoˆ ve yoˬ. Hkʼe te leh, Keˍniˆ chaw teˇ hpaˍ tawˆ kʼai ve yoˬ.

7Oˇ htaˇ Sawˉlu‸ lehˬ, Haˍviˇlaˍ venˇ hta‸ te leh Eˇjiˇtu‸ mvuhˇmiˬ mvuhˇ nyi tawˆ hpawˇ lo cawˬ ve Shuˉraˆ venˇ lo hkʼa gaˬ, Aˍmaˍlehˆ chaw hui hta‸ te luˬ te sheˆ piˇ ve yoˬ.

8Yawˇ lehˬ, Aˍmaˍlehˆ chaw hui ve jawˇmawˇ Aˍgaˆ hta‸ hpeh yuˬ leh, awˬ nu ve chaw hkʼa peu-eˬ ve hta‸ tiˇ pehˍ piˇ ve yoˬ.

9Sawˉlu‸ leh yawˇ ve ma‸ yaˇ teˇ hpaˍ Aˍgaˆ ve a sha‸ hta‸ ponˬ piˇ leh, da‸ jaˇ ve nuˇ, yawˬ, teˇ hpaˍ leh awˬ hpfuhˇ hkʼaˆ ve mawˇ teˇ hpaˍ hta‸ yuˬ taˍ ve yoˬ. Awˬ hpfuhˇ maˇ hkʼaˆ ve mawˇ hkʼa peu-eˬ ve hta‸ te luˬ te sheˆ piˇ ve yoˬ.

10Gʼuiˬsha Saˍmo-eˍlaˆ hta‸ kʼoˆ piˇ ve,

11Ngaˬ Sawˉlu‸ hta‸ jawˇmawˇ te tcuh ve lehˬ ya‸ jaˇ ve yoˬ. Yawˇ ngaˬ hta‸ baˬ taˉ leh ngaˬ ve tawˇ hta‸ ponˬ leuˉ ve yoˬ, teh‸ kʼoˆ ve yoˬ. Saˍmo-eˍlaˆ htawˇ nyi ma zuhˆ jaˇ leh, teˇ haˉ tanˇ hkuinˇ yawˇ Gʼuiˬsha hta‸ lawˬ hkawˉ chehˇ ve yoˬ.

12Shawˉ pawˍ teˇ na‸ mvuhˇ htiˇ la ve teˇ yanˇ, Yawˇ Sawˉlu‸ hta‸ hpuˇ da‸ tuˬ tawˆ kʼai ve yoˬ. Sawˉlu‸ lehˬ, Kaˍmeˍlaˆ venˇ lo kʼai leh yawˇ hta‸ dawˇ nawˇ tuˬ haˉ pui shiˍ duˇ ti taˉ peuˬ hkʼaw‸ nawˉ Giˇlaˍgaˍ venˇ lo kʼai peuˬ ve hta‸ Saˍmo-eˍlaˆ gʼa kʼaˇ ve yoˬ.

13Hkʼe te leh, Saˍmo-eˍlaˆ Sawˇlu‸ geh kʼai ve yoˬ. Sawˉlu‸ yawˇ hta‸ ha‸ yuˬ leh, Saˍmo-eˍlaˆ-o‸, Gʼuiˬsha nawˬ hta‸ awˬ bon na‸ piˇ-oˆ. Ngaˬ lehˬ yawˇ ve tawˇ hkawˇ hta‸ hkʼa deh‸ na yuˬ peuˬ, teh‸ yawˇ hta‸ kʼoˆ piˇ ve yoˬ.

14Oˇ htaˇ Saˍmo-eˍlaˆ lehˬ, Hkʼe te kʼo, aˬ hto‸ ma pa taw chi beu‸ nuˇ leh yawˬ teˇ hpaˍ kuˬ chehˇ ve awˬ hkawˇ hta‸ ngaˬ gʼa kaˇ chehˇ ve le, teh‸ yawˇ hta‸ na nyi ve yoˬ.

15Sawˇlu‸ kʼoˆ ve, Oˇ ve teˇ hpaˍ hta‸ ngaˬ ve ma‸ yaˇ teˇ hpaˍ Aˍmaˍlehˆ chaw hui geh yuˬ taˍ ve yoˬ. Yawˇ hui lehˬ, da‸ jaˇ ve nuˇ, yawˬ oˇ ve teˇ hpaˍ nawˬ ve Gʼuiˬsha hta‸ tuˉ tanˇ piˇ tuˬ ha‸ shaˉ taˍ ve yoˬ. Awˬ nu ve teˇ hpaˍ hta‸ ngaˬ hui te luˬ te sheˆ taˉ ve yoˬ, teh‸ kʼoˆ ve yoˬ.

16Oˇ htaˇ Saˍmo-eˍlaˆ lehˬ, Pehˇ-o, taˇ kʼoˆ loˬ. Aˉ nyi haˉ Gʼuiˬsha ngaˬ hta‸ hkʼaˬ hkʼe kʼoˆ laˇ taˍ ve awˬ lawn chi beu‸ nawˬ hta‸ hto laˇ shaˍ, teh‸ kʼoˆ ve yoˬ. Sawˉlu‸ lehˬ, Ngaˬ hta‸ a ciˉ hto laˇ-oˆ, teh‸ kʼoˆ ve yoˬ.

17Saˍmo-eˍlaˆ kʼoˆ ve, Nawˬ awˬ to hta‸ nawˬ dawˇ i gaˇ i chehˇ ve htawˇ, nawˬ lehˬ Iˉsaˍreˍlaˆ chaw hui ve jawˇmawˇ hpeh‸ ve yoˬ. Nawˬ lehˬ, Iˉsaˍreˍlaˆ chaw hui ve jawˇmawˇ hpeh‸ la tuˬ, Gʼuiˬsha nawˬ hta‸ naˍ manˇ pfuhˍ laˇ taˍ peuˬ leh,

18haiˬ jaˇ ve Aˍmaˍlehˆ chaw hui hta‸ ca te luˬ piˇ tuˬ nawˬ hta‸ kʼai tcuh taˍ ve yoˬ. Yawˇ hui hkʼa peu-eˬ ve hta‸ tiˇ pehˍ piˇ tuˬ, yawˇ nawˬ hta‸ kʼoˆ piˇ taˍ ve yoˬ.

19Aˬ hto‸ ma pa taw, yawˇ ve tawˇ hta‸ nawˬ maˇ na yuˬ ve le. Aˬ hto‸ ma pa taw, Gʼuiˬsha a loˍ maˇ cawˇ ve kanˉ hta‸ te leh, mawˆ jeˬ oˇ ve teˇ hpaˍ hta‸ hiˉ yuˬ ve le, teh‸ yawˇ hta‸ kʼoˆ piˇ ve yoˬ.

20Sawˉlu‸ kʼaw‸ yaw hkʼaw‸ leh kʼoˆ ve, Ngaˬ Gʼuiˬsha ve tawˇ hta‸ na yuˬ leh te peuˬ ve yoˬ. Yawˇ ngaˬ hta‸ kʼoˆ laˇ ve hkʼe ngaˬ kʼai leh, Aˍmaˍlehˆ chaw hkʼa peu-eˬ hta‸ tiˇ pehˍ piˇ peuˬ hkʼaw‸ nawˉ, jawˇmawˇ Aˍgaˆ hta‸ hpeh veu laˇ taˍ ve yoˬ.

21Ya‸ hkʼaˇ, ngaˬ ve ma‸ yaˇ teˇ hpaˍ lehˬ yawˇ hui yuˬ gʼa taˍ ve da‸ jaˇ ve nuˇ, yawˬ teˇ hpaˍ hta‸ maˇ tiˇ pehˍ piˇ. Yawˇ hui lehˬ, ceˇ oˇ ve teˇ hpaˍ hta‸ choˬ kaˬ Giˇlaˍgaˍ venˇ lo nawˬ ve Gʼuiˬsha hta‸ tuˉ tanˇ piˇ tuˬ yuˬ veu laˇ ve yoˬ, teh‸ kʼoˆ ve yoˬ.

22Oˇ htaˇ Saˍmo-eˍlaˆ kʼoˆ ve, Gʼuiˬsha hkʼaˬ ve teˇ ceuˬ hta‸ nyi hkʼaˇ suh ve le. Na yuˬ ve hta‸ laˇ. Maˇ heˆ kʼo, tuˉ tanˇ tuˬ hta‸ laˇ. Gʼuiˬsha ve tawˇ hta‸ na yuˬ ve teˇ ceuˬ lehˬ, da‸ jaˇ ve yawˬ ehˉ hta‸ yuˬ leh Gʼuiˬsha hta‸ tuˉ tanˇ piˇ ve a‸ kehˉ da‸ leuˉ ve yoˬ.

23Yawˇ hta‸ hpfuhˆ ve chaw lehˬ, shu hta‸ neˇ pi pfuhˍ ve chaw hkʼe taw venˇbaˆ uiˍ leh, nyi ma uiˍ ve mvuh ve chaw htawˇ shaˉ ho‸ hta‸ oˉ kʼoˍ pui ve chaw hkʼe taw venˇbaˆ uiˍ ve yoˬ. Nawˬ Gʼuiˬsha ve tawˇ hta‸ maˇ na yuˬ ve pa taw, Gʼuiˬsha nawˬ hta‸ chiˇ baˬ peuˬ, teh‸ yawˇ hta‸ kʼoˆ piˇ ve yoˬ.

24Oˇ htaˇ Sawˉlu‸ kʼaw‸ yaw hkʼaw‸ leh kʼoˆ ve, Ngaˬ lehˬ te ya‸ jaˇ peuˬ. Gʼuiˬsha ve tawˇ leh nawˬ maˍ laˇ ve tawˇ hta‸ ngaˬ ponˬ leuˉ peuˬ. Ngaˬ lehˬ, ngaˬ ve ma‸ yaˇ teˇ hpaˍ hta‸ kawˆ ve pa taw, yawˇ hui te gaˇ ve hkʼe yawˇ hui hta‸ gʼa te tcuh piˇ peuˬ.

25Chi beu‸ ngaˬ nawˬ hta‸ lawˬ hkawˉ ve yoˬ. Ngaˬ ve venˇbaˆ hta‸ hpehˇ laˇ leh, ngaˬ Gʼuiˬsha hta‸ oˉ kʼoˍ pui hpeh‸ tuˬ, ngaˬ hta‸ a ciˉ shiˍ kʼo‸-e laˇ-oˆ, teh‸ yawˇ hta‸ kʼoˆ piˇ ve yoˬ.

26Ya‸ hkʼaˇ, Saˍmo-eˍlaˆ lehˬ, Ngaˬ nawˬ geh kʼo‸-e tuˬ ve maˇ heˆ. Nawˬ Gʼuiˬsha ve tawˇ hta‸ maˇ na yuˬ ve pa taw, yawˇ nawˬ hta‸ chiˇ baˬ peuˬ, teh‸ yawˇ hta‸ kʼoˆ piˇ ve yoˬ.

27Oˇ hkʼe kʼoˆ peuˬ hkʼaw‸ nawˉ Saˍmo-eˍlaˆ hpfuhˆ kʼo‸-e ve yoˬ. Oˇ htaˇ Sawˇlu‸ lehˬ, Saˍmo-eˍlaˆ ve aˉ po‸ hta‸ gʼa‸ tcuhˆ ve pa taw, aˉ po‸ oˇ ve tzuh‸ sheˬ ve yoˬ.

28Saˍmo-eˍlaˆ yawˇ hta‸ kʼoˆ piˇ ve, Gʼuiˬsha lehˬ ya‸ nyi Iˉsaˍreˍlaˆ ve mvuhˇmiˬ hta‸ nawˬ ve la‸ sheh hkʼaw lo yuˬ hkʼaw‸ leh, nawˬ a‸ kehˉ da‸ ve chaw hta‸ piˇ peuˬ.

29Iˉsaˍreˍlaˆ ve kanˇ paˆ uiˍ jaˇ ve Gʼuiˬsha lehˬ, maˇ heˍ puiˉ leh nyi ma htawˇhpfuhˆnawˬhpfuhˆ maˇ cawˬ. Yawˇ lehˬ chaw yaˇ hpeh‸ ve maˇ heˆ. Yawˇ ve nyi ma htawˇhpfuhˆnawˬhpfuhˆ maˇ cawˬ, teh‸ yawˇ hta‸ kʼoˆ piˇ ve yoˬ.

30Sawˉlu‸ kʼaw‸ yaw hkʼaw‸ leh kʼoˆ ve, Ngaˬ lehˬ te ya‸ jaˇ peuˬ. Ya‸ hkʼaˇ, Iˉsaˍreˍlaˆ awˬ hoˉ awˬ naˬ teˇ hpaˍ leh Iˉsaˍreˍlaˆ chaw hkʼa peu-eˬ gʼuˇ suhˍ ngaˬ hta‸ chi teˇ pawˆ ceh kʼaw‸ taˍ uiˍ laˇ leh, ngaˬ nawˬ ve Gʼuiˬsha hta‸ oˉ kʼoˍ pui hpeh‸ tuˬ, ngaˬ hta‸ a ciˉ shiˍ kʼo‸-e laˇ-oˆ, teh‸ yawˇ hta‸ kʼoˆ piˇ ve yoˬ.

31Hkʼe te leh Saˍmo-eˍlaˆ kʼo‸-e leh, Sawˉlu‸ Gʼuiˬsha hta‸ oˉ kʼoˍ pui ve yoˬ.

32Oˇ htaˇ Saˍmo-eˍlaˆ lehˬ, Jawˇmawˇ Aˍgaˆ hta‸ ngaˬ geh lo shiˍ veu laˇ-oˆ, teh‸ kʼoˆ ve yoˬ. Aˍgaˆ lehˬ kawˆ cheˇ jaˇ ve hkʼaw yawˇ geh laˬ leh, Suh ve teˇ ceuˬ lehˬ hkʼaˬ ma hkʼaˇ jaˇ ve le, teh‸ kʼoˆ ve yoˬ.

33Saˍmo-eˍlaˆ kʼoˆ ve, Nawˬ ve aˉhtaw lehˬ yaˇ miˇ laiˉ gʼaˇ hta‸ yaˇ maˇ cawˬ tuˬ te piˇ ve hkʼe, chi beu‸ nawˬ ve awˬ e lehˬ yaˇ teˇ gʼaˇ ka‸ cawˬ tuˬ ve maˇ heˆ, teh‸ kʼoˆ ve yoˬ. Hkʼe kʼoˆ peuˬ hkʼaw‸ nawˉ, Giˇlaˍgaˍ venˇ hkʼaw cawˬ ve tuˉ tanˇ kuiˬ gʼuˇ suhˍ lo yawˇ Aˍgaˆ hta‸ peuˆ nehˆ piˇ ve yoˬ.

34Oˇ ve hkʼaw‸ nawˉ, Saˍmo-eˍlaˆ Raˍmaˆ venˇ lo kʼaw‸ kʼo‸-e ve yoˬ.

35Saˍmo-eˍlaˆ yawˇ a sha‸ te‸ chehˇ ve teˇ co-e, Sawˇlu‸ hta‸ teˇ pawˆ ka‸ maˇ gʼa kʼaw‸ mawˬ. Ya‸ hkʼaˇ, yawˇ lehˬ Sawˉlu‸ awˬ pon dawˇ haˍ chehˇ ve yoˬ. Gʼuiˬsha lehˬ, Sawˉlu‸ hta‸ Iˉsaˍreˍlaˆ chaw hui ve jawˇmawˇ gʼa te tcuh peuˬ ve pa taw, hpeh‸ bawˬ jaˇ ve yoˬ.

← Chapter 14 Jump to: Chapter 16 →