1 Samuel 11

Lahu Bible Edited © Thailand Bible Society and Bible Society of Myanmar, 2010, 2020.

← Chapter 10 Jump to: Chapter 12 →

1Oˇ ve hkʼaw‸ nawˉ ha pa teˇ maˬ hkʼe gaˬ ve teˇ yanˇ, Aˍmawˇniˆ chaw Naˍhaˆ lehˬ Giˇlaˆ mvuhˇmiˬ hkʼaw cawˬ ve Yaˍbehˆ venˇ lo yawˇ ve ma‸ yaˇ teˇ hpaˍ shiˍ laˬ leh, venˇ oˇ ve hta‸ caw hoˆ taˍ ve yoˬ. Oˇ htaˇ Yaˍbehˆ venˇ yaˇ teˇ hpaˍ lehˬ, Ngaˬ hui hta‸ shaˉ caˆ caˇ-oˆ. Oˇ hkʼe te ve kʼo, ngaˬ hui lehˬ nawˬ uˉ peunˍ ve awˬ hawˉ lo chehˇ tuˬ yoˬ, teh‸ Naˍhaˆ hta‸ kʼoˆ piˇ ve yoˬ.

2Naˍhaˆ kʼaw‸ yaw hkʼaw‸ leh kʼoˆ ve, Ngaˬ nawˬ hui hta‸ hkʼa mvuhˇ hkʼa na te leh nawˬ hui teˇ gʼaˇ le le ve la‸ sha paˉ mehˆ shiˍ hta‸ te luˬ peuˬ htaˇ heh‸, nawˬ hui geh shaˉ caˆ caˇ tuˬ yoˬ, teh‸ yawˇ hui hta‸ kʼoˆ piˇ ve yoˬ.

3Oˇ htaˇ, Yaˍbehˆ venˇ hta‸ uˉ peunˍ chehˇ ve awˬ hoˉ awˬ naˬ teˇ hpaˍ kʼaw‸ kʼoˆ ve, Awˬ lawn chi ve Iˉsaˍreˍlaˆ mvuhˇmiˬ hkʼaˬ ti chi ti lo ca hto maˍ piˇ tuˬ, ngaˬ hui hta‸ awˬ yanˇ 7 nyi pe‸ laˇ-oˆ. Chaw teˇ gʼaˇ ka‸ ngaˬ hui hta‸ maˇ ca ga laˇ ve kʼo, ngaˬ hui nawˬ ve awˬ ceˬ te tuˬ yoˬ, teh‸ kʼoˆ piˇ ve yoˬ.

4Chaw oˇ ve teˇ hpaˍ lehˬ, Sawˉlu‸ chehˇ taˍ kuiˬ Giˇbaˍ venˇ lo laˬ leh, awˬ lawn hkʼa peu-eˬ yawˇ hui hta‸ kʼoˆ maˍ piˇ ve yoˬ. Hkʼa gʼa kaˇ ve chaw hkʼa peu-eˬ dawˇ haˍ jaˇ leh hawˬ chehˇ ve yoˬ.

5Oˇ htaˇ, Sawˉlu‸ lehˬ yawˇ ve nuˇ teˇ hpaˍ hta‸ gʼa‸ veu laˇ leh ti mi hkʼaw kʼaw‸ la chehˇ ve yoˬ. Venˇ yaˇ teˇ hpaˍ hawˬ chehˇ ve hta‸ yawˇ gʼa mawˬ ve teˇ yanˇ, Nawˬ hui aˬ hto‸ ma hpeh‸ ve le, teh‸ yawˇ hui hta‸ na nyi ve yoˬ. Oˇ htaˇ, yawˇ hui lehˬ Yaˍbehˆ venˇ yaˇ teˇ hpaˍ kʼoˆ laˇ ve tawˇ hkʼa peu-eˬ yawˇ hta‸ kʼaw‸ kʼoˆ maˍ piˇ ve yoˬ.

6Tawˇ oˇ ve teˇ hpaˍ hta‸ Sawˉlu‸ gʼa kaˇ ve teˇ yanˇ, Gʼuiˬsha ve Awˬ ha hpu yawˇ awˬ hkʼoˆ ya‸ la leh, yawˇ nyi ma zuhˆ jaˇ ve yoˬ.

7Hkʼe te leh, yawˇ nuˇ paˍ nyiˇ hkeh hta‸ yuˬ leh hkʼa deh‸ tawˆ hpoˆ peuˬ hkʼaw‸ nawˉ, Iˉsaˍreˍlaˆ mvuhˇmiˬ hkʼaˬ ti chi ti lo feu kʼai ve yoˬ. Yawˇ tawˇ shanˍ feu leh kʼoˆ ve, Sawˉlu‸ leh Saˍmo-eˍlaˆ hkʼaˇ suh ma‸ bawˆ kuiˬ lo maˇ kʼai ve chaw lehˬ, nuˇ chi hta‸ te piˇ ve hkʼe yawˇ ve nuˇ hta‸ htawˇ te piˇ tuˬ yoˬ, teh‸ kʼoˆ ve yoˬ. Iˉsaˍreˍlaˆ chaw teˇ hpaˍ lehˬ, Gʼuiˬsha ciˍ yanˍ laˇ tuˬ ve hta‸ kawˆ ve pa taw, yawˇ hui hkʼa peu-eˬ nyi ma teˇ shiˍ tiˉ te leh yawˇ geh laˬ ve yoˬ.

8Sawˉlu‸ lehˬ, chaw oˇ ve teˇ hpaˍ hta‸ Beˍzehˆ venˇ lo shiˍ kʼai ve yoˬ. Hkʼe te leh, oˇ kaˬ lo Iˉsaˍreˍlaˆ chaw 3 shehnˉ gʼaˇ leh Yuˇda‸ chaw 3 meunˍ gʼaˇ gaˬ la ve yoˬ.

9Oˇ htaˇ yawˇ hui lehˬ, Shawˉ pawˍ mvuhˇ law‸ kʼaw tcuhˆ la paˇ neˇ kʼo, nawˬ hui gʼa ponˬ tuˬ yoˬ, teh‸ Yaˍbehˆ venˇ yaˇ teˇ hpaˍ hta‸ kʼoˆ piˇ ve yoˬ. Tawˇ oˇ ve hta‸ Yaˍbehˆ venˇ yaˇ teˇ hpaˍ gʼa kaˇ htaˇ ha lehˬ jaˇ ve yoˬ.

10Hkʼe te leh yawˇ hui Naˍhaˆ hta‸, Shawˉ pawˍ kʼo, ngaˬ hui nawˬ ve awˬ ceˬ te laˇ tuˬ yoˬ. Nawˬ te gaˇ ve hkʼe ngaˬ hui hta‸ te laˇ-oˆ, teh‸ yawˇ hta‸ kʼoˆ piˇ ve yoˬ.

11Shawˉ pawˍ mvuhˇ htiˇ la ve teˇ yanˇ, Sawˉlu‸ lehˬ yawˇ ve ma‸ yaˇ teˇ hpaˍ hta‸ shehˆ moˍ pehˬ leh, Aˍmawˇniˆ chaw hui hta‸ ca bawˆ-e ve yoˬ. Mvuhˇ law‸ kʼaw tcuhˆ la ve teˇ yanˇ, yawˇ hui hta‸ bawˆ gʼaˇ ve yoˬ. Maˇ suh leh cawˬ taˉ ve chaw teˇ hpaˍ tawˬ miˇ tawˬ hkʼaˇ gʼuiˇ hpaw-e ve yoˬ.

12Oˇ ve hkʼaw‸ nawˉ Iˉsaˍreˍlaˆ chaw teˇ hpaˍ lehˬ, Sawˇlu‸ hta‸ ngaˬ hui ve jawˇmawˇ te tcuh maˇ keunˍ teh‸ kʼoˆ ve chaw a shu le. Chaw oˇ ve teˇ hpaˍ ngaˬ hui hta‸ chiˇ a‸ laˇ-oˆ. Ngaˬ hui chaw oˇ ve teˇ hpaˍ hta‸ tiˇ pehˍ piˇ tuˬ yoˬ, teh‸ Saˍmo-eˍlaˆ hta‸ kʼoˆ piˇ ve yoˬ.

13Ya‸ hkʼaˇ Sawˉlu‸ lehˬ, Ya‸ nyi chaw teˇ gʼaˇ hta‸ ka‸ maˇ gʼa tiˇ pehˍ. Awˬ lawn kʼo, Ya‸ nyi lehˬ Gʼuiˬsha Iˉsaˍreˍlaˆ chaw hui hta‸ ponˬ laˇ ve awˬ nyi hpeh‸ ve yoˬ, teh‸ kʼoˆ ve yoˬ.

14Oˇ htaˇ Saˍmo-eˍlaˆ lehˬ, Ngaˬ hui Giˇlaˍgaˍ venˇ lo kʼaw‸ kʼo‸-e leh, Sawˉlu‸ hta‸ jawˇmawˇ teˇ pawˆ kʼaw‸ te tcuh-a veuˬ, teh‸ yawˇ hui hta‸ kʼoˆ piˇ ve yoˬ.

15Hkʼe te leh, yawˇ hui hkʼa peu-eˬ Giˇlaˍgaˍ lo kʼaw‸ kʼo‸-e leh, da‸ kehˬ ve chehˇ kuiˬ lo Sawˉlu‸ hta‸ jawˇmawˇ ve aˉ yaˇ tcuhˉ piˇ ve yoˬ. Oˇ kaˬ lo yawˇ hui Gʼuiˬsha hta‸ tuˉ tanˇ leh, Sawˉlu‸ leh Iˉsaˍreˍlaˆ chaw hkʼa peu-eˬ ha lehˬ ha kʼa te chehˇ ve yoˬ.

← Chapter 10 Jump to: Chapter 12 →