1 Samuel 12

Lahu Bible Edited © Thailand Bible Society and Bible Society of Myanmar, 2010, 2020.

← Chapter 11 Jump to: Chapter 13 →

1Oˇ ve hkʼaw‸ nawˉ, Saˍmo-eˍlaˆ Iˉsaˍreˍlaˆ chaw hui hta‸ kʼoˆ piˇ ve, Nawˬ hui ngaˬ hta‸ te tcuh laˇ ve hkʼe, ngaˬ hkʼa deh‸ na yuˬ leh te peuˬ. Nawˬ hui hta‸ uˉ peunˍ tuˬ, ngaˬ nawˬ hui hta‸ jawˇmawˇ teˇ gʼaˇ pe‸ laˇ peuˬ.

2Chi beu‸ nawˬ hui hta‸ sheh kʼai laˇ tuˬ jawˇmawˇ cawˬ taˍ peuˬ. Ngaˬ lehˬ, chi beu‸ mawˇ la peuˬ leh, ngaˬ ve yaˇ teˇ hpaˍ nawˬ hui geh chehˇ taˍ ve yoˬ. Ngaˬ yaˇ nehˬ htaˇ ka‸ te leh ya‸ nyi hkʼa gaˬ, nawˬ hui hta‸ sheh kʼai laˇ chehˇ ve yoˬ.

3Ngaˬ teˇ ceuˬ ceuˬ te ya‸ taˍ ve cawˬ kʼo, ya‸ nyi Gʼuiˬsha leh yawˇ leuˆ yuˬ taˍ ve jawˇmawˇ mehˆ gʼuˇ suhˍ venˇbaˆ oˇ ve hta‸ hpeu‸ maˍ laˇ-oˆ. Ngaˬ lehˬ chaw teˇ gʼaˇ gʼaˇ ve nuˇ leh piˉ laˬ teˇ hkeh hkeh yuˬ taˍ ve cawˬ aw laˇ. Ngaˬ chaw teˇ gʼaˇ gʼaˇ hta‸ heˍ caˇ ve leh fawˉ mehˍ piˇ ve cawˬ jaw laˇ. Chaw teˇ gʼaˇ gʼaˇ geh ngaˬ la‸ shawnˍ yuˬ caˇ ve cawˬ aw laˇ. Ngaˬ lehˬ awˬ ceuˬ oˇ hkʼe ve teˇ ceuˬ ceuˬ te taˍ ve cawˬ kʼo, ngaˬ yuˬ taˍ ve mawˇ oˇ ve awˬ pon awˬ hpfuhˇ kʼaw‸ shaiˍ laˇ tuˬ yoˬ, teh‸ yawˇ hui hta‸ kʼoˆ piˇ ve yoˬ.

4Chaw oˇ ve teˇ hpaˍ kʼaw‸ yaw hkʼaw‸ leh kʼoˆ ve, Nawˬ lehˬ ngaˬ hui hta‸ maˇ heˍ caˇ laˇ jaw leh, ngaˬ hui teˇ gʼaˇ hta‸ ka‸ maˇ fawˉ mehˍ laˇ jaw. Nawˬ lehˬ chaw teˇ gʼaˇ geh ka‸ mawˇ maˇ lawˬ yuˬ jaw, teh‸ kʼoˆ ve yoˬ.

5Oˇ htaˇ Saˍmo-eˍlaˆ kʼoˆ ve, Ngaˬ lehˬ te‸ chiˉ venˇbaˆ taˍ kuiˬ maˇ cawˬ ve chaw hpeh‸ ve awˬ lawn, ya‸ nyi Gʼuiˬsha leh yawˇ leuˆ yuˬ taˍ ve jawˇmawˇ lehˬ shaˉ hkiˆ hpeh‸ ve yoˬ, teh‸ kʼoˆ ve yoˬ. Yawˇ hui kʼaw‸ yaw hkʼaw‸ leh, Gʼuiˬsha lehˬ ngaˬ hui ve shaˉ hkiˆ hpeh‸ ve yoˬ, teh‸ kʼoˆ ve yoˬ.

6Saˍmo-eˍlaˆ kʼaw‸ caˉ leh kʼoˆ ve, Gʼuiˬsha lehˬ Moˉseˍ leh Aˍronˍ hui hta‸ leuˆ yuˬ leh, nawˬ hui ve awˬ puˍ awˬ pi teˇ hpaˍ hta‸ Eˇjiˇtu‸ mvuhˇmiˬ hkʼaw shiˍ tawˆ la piˇ taˍ ve yoˬ.

7Chi beu‸ ngaˬ hui huˉ chehˇ taˍ kuiˬ lo hkʼa deh‸ huˉ taˍ-o‸. Gʼuiˬsha mehˆ gʼuˇ suhˍ ngaˬ nawˬ hui hta‸ venˇbaˆ taˍ leh, nawˬ hui ve awˬ puˍ awˬ pi teˇ hpaˍ leh nawˬ hui teˇ hpaˍ hta‸ Gʼuiˬsha hkʼaˬ hkʼe te ponˬ laˇ taˍ ve awˬ lawn teˇ hpaˍ, nawˬ hui hta‸ teˇ pawˆkʼaw‸ dawˇ nawˇ laˇ shaˍ.

8Yaˍkoˆ leh yawˇ ve yehˬ yaˇ kʼa yaˇ teˇ hpaˍ Eˇjiˇtu‸ mvuhˇmiˬ lo kʼai leh, Eˇjiˇ tu‸ chaw teˇ hpaˍ yawˇ hui hta‸ fawˉ mehˍ piˇ ve teˇ yanˇ nawˬ hui ve awˬ puˍ awˬ pi teˇ hpaˍ Gʼuiˬsha hta‸ kuˬ ve yoˬ. Hkʼe te leh, Gʼuiˬsha Moˉseˍ leh Aˍronˍ hui hta‸ yawˇ hui geh kʼai tcuh leh, yawˇ hui hta‸ Eˇjiˇtu‸ mvuhˇmiˬ hkʼaw shiˍ tawˆ la piˇ peuˬ hkʼaw‸ nawˉ, mvuhˇmiˬ chi hkʼaw chehˇ tcuh taˍ ve yoˬ.

9Ya‸ hkʼaˇ yawˇ hui Gʼuiˬsha hta‸ leunˇ kʼai ve yoˬ. Hkʼe te leh, Yawˇ lehˬ Haˍ zawˇ venˇ hta‸ uˉ peunˍ chehˇ ve jawˇmawˇ hta‸ cuˇ leh yawˇ hui hta‸ ca bawˆ la tcuh ve yoˬ.

10Oˇ htaˇ yawˇ hui Gʼuiˬsha hta‸ kuˬ leh, Ngaˬ hui te ya‸ jaˇ peuˬ. Awˬ lawn kʼo, ngaˬ hui nawˬ hta‸ baˬ taˉ leh Baˍlaˆ gʼuiˬsha leh Aˍshaˆtaˍrehˆ gʼuiˬsha teˇ hpaˍ hta‸ oˉ kʼoˍ pui ve yoˬ. Ngaˬ hui hta‸ canˇ paˍ hui ve la‸ sheh hkʼaw ponˬ laˇ-oˆ. Oˇ hkʼe te ve kʼo, ngaˬ hui nawˬ hta‸ oˉ kʼoˍ kʼaw‸ pui tuˬ yoˬ, teh‸ kʼoˆ ve yoˬ.

11Oˇ htaˇ, Gʼuiˬsha lehˬ nawˬ hui hta‸ ponˬ laˇ tuˬ Yeˍruˆbaˍbeˍlaˆ, Baˍrehˆ, Yeˍ hpaˍtaˆ leh Saˍmo-eˍlaˆ hui hta‸ peu laˇ leh, nawˬ hui gawˬ lehˍ gʼa chehˇ ve yoˬ.

12Aˍmonˍ jawˇmawˇ Naˍhaˆ nawˬ hui hta‸ ca bawˆ la tuˬ laˬ chehˇ ve hta‸ nawˬ hui gʼa mawˬ ve teˇ yanˇ, nawˬ hui Gʼuiˬsha hta‸ chiˇ baˬ leh, Ngaˬ hui hta‸ uˉ peunˍ laˇ tuˬ jawˇmawˇ teˇ gʼaˇ heuˆ gaˇ ve yoˬ, teh‸ nawˬ hui ngaˬ hta‸ kʼoˆ laˇ ve yoˬ.

13Nyi loˬ. Chi beu‸ nawˬ hui leuˆ yuˬ taˍ ve jawˇmawˇ nawˬ hui geh chehˇ taˍ ve yoˬ. Nawˬ hui jawˇmawˇ teˇ gʼaˇ lawˬ leh Gʼuiˬsha nawˬ hui hta‸ jawˇmawˇ teˇ gʼaˇ piˇ laˇ taˍ peuˬ.

14Nawˬ hui leh nawˬ hui ve jawˇmawˇ lehˬ, Gʼuiˬsha hta‸ kawˆ ve hkʼaw yawˇ ve tawˇ hta‸ na yuˬ leh yawˇ ve a loˍ hta‸ te ve kʼo, nawˬ hui hkʼa te ve teˇ hpaˍ uiˍ la da‸ la tuˬ yoˬ.

15Ya‸ hkʼaˇ, nawˬ hui lehˬ yawˇ ve tawˇ hta‸ maˇ na yuˬ ve kʼo, yawˇ lehˬ nawˬ hui leh nawˬ hui ve jawˇmawˇ geh chehˇ tuˬ ve maˇ heˆ.

16Chi hta‸ pa taw, chi beu‸ nawˬ hui chehˇ taˍ kuiˬ lo hkʼa deh‸ huˉ taˍ-o‸. Gʼuiˬsha lehˬ uiˍ jaˇ ve kanˉ teˇ maˬ te maˍ laˇ ve hta‸ nawˬ hui gʼa mawˬ tuˬ yoˬ.

17Chi beu‸ lehˬ mvuhˇ goˇ ve awˬ yanˇ hpeh‸ ve maˇ heˆ laˇ. Ngaˬ bon lawˬ leh Gʼuiˬsha lehˬ mvuhˇ tawˍ leh mvuhˇ yeˬ laˬ piˇ tuˬ yoˬ. Chi hkʼe hpeh‸ la ve hta‸ nawˬ hui gʼa mawˬ ve kʼo, nawˬ hui jawˇmawˇ lawˬ ve lehˬ, Gʼuiˬsha hta‸ te ya‸ jaˇ peuˬ ve hta‸ nawˬ hui shiˍ la tuˬ yoˬ, teh‸ yawˇ hui hta‸ kʼoˆ piˇ ve yoˬ.

18Hkʼe te leh, Saˍmo-eˍlaˆ bon lawˬ ve yoˬ. Oˇ htaˇ, Gʼuiˬsha lehˬ mvuhˇ tawˍ leh mvuhˇ yeˬ laˬ piˇ lawˬ ve yoˬ. Chaw oˇ ve hkʼa peu-eˬ Gʼuiˬsha leh Saˍmo-eˍlaˆ hta‸ kawˆ jaˇ ve yoˬ.

19Hkʼe te leh, yawˇ hui Saˍmo-eˍlaˆ hta‸ kʼoˆ piˇ ve, Ngaˬ hui maˇ gʼa suh tuˬ awˬ bon te leh nawˬ ve Gʼuiˬsha geh bon lawˬ laˇ-oˆ. Ngaˬ hui lehˬ awˬ kaˍ awˬ nu venˇbaˆ hkʼa biˇ cawˬ taˍ ve awˬ hkʼoˆ, ngaˬ hui jawˇmawˇ teˇ gʼaˇ kʼaw‸ lawˬ ve hkʼaw venˇbaˆ kʼaw‸ te peuˬ, teh‸ kʼoˆ ve yoˬ.

20Oˇ htaˇ, Saˍmo-eˍlaˆ kʼaw‸ yaw hkʼaw‸ leh kʼoˆ ve, Taˇ kawˆ. Nawˬ hui haiˬ ve kanˉ chi hta‸ te peuˬ ve htawˇ, Gʼuiˬsha hta‸ taˇ baˬ. Nawˬ hui ve nyi ma awˬ tawˬ hkʼa gaˬ yawˇ ve kanˉ hta‸ te-o.

21Maˇ heˆ heˆ ve gʼuiˬsha teˇ hpaˍ hkʼaˇ suh taˇ kʼai. Yawˇ hui lehˬ nawˬ hui hta‸ ga laˇ maˇ puiˉ leh, ponˬ laˇ maˇ puiˉ. Aw lawn kʼo, yawˇ hui lehˬ te‸ chiˉ tcuhˉ kuiˬ maˇ cawˬ leh hkʼe leˇ hpeh‸ ve yoˬ.

22Gʼuiˬsha lehˬ, nawˬ hui hta‸ yawˇ ve chaw hpeh‸ la piˇ tuˬ ka ti‸ te taˍ peuˬ ve pa taw, nawˬ hui hta‸ chiˇ baˬ laˇ tuˬ ve maˇ heˆ.

23Nawˬ hui yawˇ hta‸ maˇ gʼa te ya‸ tuˬ, Gʼuiˬsha lehˬ ngaˬ hta‸ nawˬ hui awˬ pon hkʼaˬ htaˆ ka‸ bon lawˬ tcuh laˇ chehˇ ve yoˬ. Nawˬ hui te keunˍ te cawˇ ve kanˉ teˇ hpaˍ ngaˬ nawˬ hui hta‸ maˍ laˇ tuˬ yoˬ.

24Nawˬ hui ve nyi ma awˬ tawˬ hkʼa gaˬ, Gʼuiˬsha hta‸ kawˆ leh yawˇ ve kanˉ hta‸ te-o. Yawˇ nawˬ hui awˬ pon uiˍ jaˇ ve kanˉ hkʼaˬ ma te laˇ taˍ peuˬ ve hta‸ htawˇ dawˇ nawˇ-oˆ.

25Ya‸ hkʼaˇ, nawˬ hui lehˬ venˇbaˆ hta‸ ceh tiˉ kʼaw‸ caˉ leh te kʼai chehˇ ve kʼo, nawˬ hui leh nawˬ hui ve jawˇmawˇ lehˬ luˬ kuiˬ sheˆ kuiˬ lo gʼa gaˬ tuˬ yoˬ, teh‸ yawˇ hui hta‸ kʼoˆ piˇ ve yoˬ.

← Chapter 11 Jump to: Chapter 13 →