1 Samuel 16

Lahu Bible Edited © Thailand Bible Society and Bible Society of Myanmar, 2010, 2020.

← Chapter 15 Jump to: Chapter 17 →

1Gʼuiˬsha Saˍmo-eˍlaˆ hta‸ kʼoˆ piˇ ve, Nawˬ Sawˉlu‸ awˬ pon hkʼaˬ maw maw dawˇ haˍ chehˇ tuˬ sheˍ ve le. Ngaˬ yawˇ hta‸ chiˇ baˬ peuˬ. Shaˍlonˍ chu hta‸ hkʼa deh‸ ca taˍ-o‸. Ngaˬ nawˬ hta‸ Behˍlehˍhehnˍ venˇ hkʼaw chehˇ ve Yeˍsehˇ teh‸ kʼoˆ ve chaw geh kʼai peu laˇ tuˬ yoˬ. Awˬ lawn kʼo, yawˇ ve yaˇ paˍ teˇ gʼaˇ hta‸ jawˇmawˇ te tcuh tuˬ ngaˬ leuˆ yuˬ taˍ peuˬ, teh‸ yawˇ hta‸ kʼoˆ piˇ ve yoˬ.

2Oˇ htaˇ Saˍmo-eˍlaˆ lehˬ, Ngaˬ hkʼaˬ hkʼe te chi hkʼe te hpeh‸ tuˬ le. Awˬ lawn chi hta‸ Sawˉlu‸ gʼa kaˇ ve kʼo, yawˇ ngaˬ hta‸ tiˇ pehˍ laˇ tuˬ yoˬ, teh‸ kʼoˆ ve yoˬ. Gʼuiˬsha kʼaw‸ kʼoˆ ve, Nuˇ paˍ teˇ hkeh yuˬ veu leh, Gʼuiˬsha hta‸ ca tuˉ tanˇ la ve yoˬ, teh‸ kʼoˆ piˇ-oˆ.

3Yeˍsehˇ hta‸ htawˇ tuˉ tanˇ kuiˬ lo laˬ tuˬ kʼoˆ piˇ-oˆ. Nawˬ hkʼaˬ hkʼe gʼa te tuˬ ve ngaˬ hto laˇ tuˬ yoˬ. Ngaˬ nawˬ hta‸ maˍ laˇ ve chaw hta‸ nawˬ naˍ manˇ gʼa pfuhˍ piˇ tuˬ yoˬ, teh‸ yawˇ hta‸ kʼoˆ piˇ ve yoˬ.

4Saˍmo-eˍlaˆ lehˬ Gʼuiˬsha kʼoˆ piˇ ve hkʼe, Behˍlehˍhehnˍ venˇ lo kʼai ve yoˬ. Oˇ htaˇ Behˍlehˍhehnˍ venˇ hkʼaw chehˇ ve awˬ hoˉ awˬ naˬ teˇ hpaˍ, kawˆ ve cheˆ ve hkʼaw yawˇ geh laˬ leh, Nawˬ lehˬ gawˬ lehˍ ve hkʼaw ca guiˇ la ve laˇ, teh‸ yawˇ hta‸ kʼoˆ piˇ ve yoˬ.

5Saˍmo-eˍlaˆ kʼoˆ ve, Yoˬ. Gʼuiˬsha hta‸ tuˉ tanˇ tuˬ ngaˬ laˬ ve yoˬ. Nawˬ hui ve awˬ to hta‸ da‸ kehˬ piˇ leh ngaˬ geh laˬ-o‸, teh‸ yawˇ hui hta‸ kʼoˆ piˇ ve yoˬ. Yawˇ lehˬ, Yeˍsehˇ leh yaˇ teˇ hpaˍ hta‸ htawˇ, da‸ kehˬ tuˬ te tcuh leh yawˇ hui hta‸ tuˉ tanˇ kuiˬ lo laˬ tcuh ve yoˬ.

6Yawˇ hui gaˬ la leh, Saˍmo-eˍlaˆ Yeˍsehˇ ve yaˇ paˍ Eˇlaˍbaˆ hta‸ gʼa mawˬ ve teˇ yanˇ, Choˬ kaˬ Gʼuiˬsha mehˆ gʼuˇ suhˍ huˉ chehˇ taˍ ve chaw chi hpaˇ lehˬ, Gʼuiˬsha leuˆ yuˬ taˍ ve chaw hpeh‸ ve yoˬ, teh‸ dawˇ ve yoˬ.

7Gʼuiˬsha yawˇ hta‸ kʼoˆ piˇ ve, Awˬ to mvuh leh awˬ hkiˇ awˬ naˬ da‸ ve hta‸ nawˬ taˇ nyi. Ngaˬ yawˇ hta‸ leuˆ yuˬ taˍ ve maˇ heˆ. Ngaˬ lehˬ, chaw yaˇ hui nyi ve hkʼe nyi ve maˇ heˆ. Chaw yaˇ lehˬ, awˬ hta‸ hpawˇ ve awˬ hkiˇ awˬ naˬ hta‸ ceh nyi ve yoˬ. Ya‸ hkʼaˇ, ngaˬ lehˬ nyi ma hta‸ nyi ve yoˬ, teh‸ yawˇ hta‸ kʼoˆ piˇ ve yoˬ.

8Oˇ ve hkʼaw‸ nawˉ, Yeˍsehˇ lehˬ yawˇ ve yaˇ paˍ Aˍbiˆnaˍdaˆ hta‸ Saˍmo-eˍlaˆ geh shiˍ veu laˇ ve yoˬ. Oˇ htaˇ Saˍmo-eˍlaˆ lehˬ, Gʼuiˬsha leuˆ yuˬ taˍ ve chaw chi ve hpaˇ ka‸ maˇ heˆ sheˍ, teh‸ kʼoˆ ve yoˬ.

9Yeˍsehˇ lehˬ, yawˇ ve yaˇ paˍ Shaˍmaˍ hta‸ kʼaw‸ shiˍ veu laˇ ve yoˬ. Oˇ htaˇ Saˍmoeˍ laˆ lehˬ, Chi hpaˇ hta‸ ka‸ Gʼuiˬsha maˇ leuˆ yuˬ, teh‸ kʼoˆ ve yoˬ.

10Hkʼe te leh, Yeˍsehˇ lehˬ yawˇ ve yaˇ paˍ suhˍ gʼaˇ hkʼa gaˬ Saˍmo-eˍlaˆ geh shiˍ veu laˇ ve yoˬ. Ya‸ hkʼaˇ Saˍmo-eˍlaˆ lehˬ, Chaw chi teˇ hpaˍ teˇ gʼaˇ hta‸ ka‸ Gʼuiˬsha maˇ leuˆ yuˬ, teh‸ yawˇ hta‸ kʼoˆ piˇ ve yoˬ.

11Peuˬ hkʼaw‸ nawˉ, Nawˬ yaˇ paˍ teˇ gʼaˇ gʼaˇ cawˬ sheˍ laˇ, teh‸ yawˇ hta‸ na nyi ve yoˬ. Yeˍsehˇ kʼaw‸ yaw hkʼaw‸ leh kʼoˆ ve, Ngaˬ yaˇ paˍ leh teˇ gʼaˇ cawˬ sheˍ. Yawˇ lehˬ yawˬ teˇ hpaˍ ca hawˉ chehˇ taˍ ve yoˬ, teh‸ yawˇ hta‸ kʼoˆ piˇ ve yoˬ. Oˇ htaˇ Saˍmo-eˍlaˆ lehˬ, Yawˇ hta‸ choˬ kaˬ lo shiˍ veu laˇ-oˆ. Yawˇ maˇ gaˬ la sheˍ ve ceh ceh ngaˬ hui Gʼuiˬsha hta‸ tuˉ tanˇ tuˬ ve maˇ heˆ, teh‸ kʼoˆ ve yoˬ.

12Hkʼe te leh Yeˍsehˇ yawˇ hta‸ ca kuˬ tcuh ve yoˬ. Yawˇ lehˬ awˬ hkiˇ awˬ naˬ da‸ leh, awˬ gʼaˇ uiˍ ve yaˇ paˍ teˇ gʼaˇ hpeh‸ ve yoˬ. Oˇ htaˇ Gʼuiˬsha lehˬ, Ngaˬ leuˆ yuˬ taˍ ve chaw chi hpaˇ yoˬ. Yawˇ hta‸ naˍ manˇ pfuhˍ piˇ-oˆ, teh‸ Saˍmo-eˍlaˆ hta‸ kʼoˆ piˇ ve yoˬ.

13Hkʼe te leh, Saˍmo-eˍlaˆ lehˬ shaˍlonˍ chu hta‸ yuˬ leh yawˇ ve awˬ viˉ paˍ teˇ hpaˍ mehˆ gʼuˇ suhˍ Daˍviˆ hta‸ naˍ manˇ pfuhˍ piˇ ve yoˬ. Oˇ ve teˇ nyi hta‸ te leh, Gʼuiˬsha ve Awˬ ha hpu Daˍviˆ awˬ hkʼoˆ ya‸ la leh yawˇ geh chehˇ taˍ ve yoˬ. Oˇ hkʼe te peuˬ hkʼaw‸ nawˉ, Saˍmoeˍ laˆ Raˍmaˆ venˇ lo kʼaw‸ kʼo‸-e ve yoˬ.

14Gʼuiˬsha ve Awˬ ha hpu Sawˉlu‸ geh tawˆ kʼai leh, maˇ da‸ ve awˬ ha yawˇ geh chehˇ leh yawˇ hta‸ ciˍ yanˍ piˇ ve yoˬ.

15Oˇ htaˇ, yawˇ ve awˬ ceˬ teˇ hpaˍ yawˇ hta‸ kʼoˆ piˇ ve, Nawˬ hta‸ maˇ da‸ ve awˬ ha ciˍ yanˍ laˇ chehˇ ve hta‸ ngaˬ hui shiˍ ve yoˬ.

16Nawˬ a hkaw-anˬ piˇ laˇ ve kʼo, tinˍ hteˆ puiˉ jaˇ ve chaw hta‸ ngaˬ hui ca leh nawˬ geh shiˍ veu laˇ tuˬ yoˬ. Maˇ da‸ ve awˬ ha nawˬ awˬ hkʼoˆ ya‸ la htaˇ, chaw oˇ ve nawˬ hta‸ tinˍ hteˆ maˍ laˇ kʼo nawˬ nyi ma kʼaw‸ sha la tuˬ yoˬ, teh‸ yawˇ hta‸ kʼoˆ piˇ ve yoˬ.

17Oˇ htaˇ Sawˉlu‸ lehˬ, Tinˍ hteˆ puiˉ ve chaw hta‸ ca leh ngaˬ geh shiˍ veu laˇ-oˆ, teh‸ yawˇ hui hta‸ kʼoˆ piˇ ve yoˬ.

18Oˇ htaˇ, yawˇ ve awˬ ceˬ teˇ gʼaˇ kʼoˆ ve, Behˍlehˍhehnˍ venˇ hkʼaw chehˇ ve Yeˍsehˇ lehˬ, tinˍ hteˆ puiˉ jaˇ ve yaˇ paˍ teˇ gʼaˇ cawˬ ve yoˬ. Yawˇ lehˬ awˬ hkiˇ awˬ naˬ da‸ ve, ha‸ hanˉ ve leh tawˇ yaw puiˉ ve chaw hpeh‸ ve yoˬ. Gʼuiˬsha htawˇ yawˇ geh chehˇ taˍ ve yoˬ, teh‸ kʼoˆ ve yoˬ.

19Oˇ htaˇ Sawˉlu‸ lehˬ, Yeˍsehˇ geh tawˇ shanˍ feu piˇ leh, Yawˬ hawˉ chehˇ ve nawˬ yaˇ paˍ Daˍviˆ ngaˬ geh peu laˇ-oˆ, teh‸ kʼoˆ feu piˇ ve yoˬ.

20Hkʼe te leh, Yeˍsehˇ lehˬ Daˍviˆ hta‸ Sawˉlu‸ geh kʼai peu ve yoˬ. A pehˉ meuˇ gʼuiˬ teˇ kaw, aˉ che‸ ehˉ teˇ hkeh leh hkaoˍmonˇ teˇ hpaˍ hta‸ piˉ laˬ teˇ hkeh taˆ kʼai tcuh ve yoˬ.

21Daˍviˆ Sawˉlu‸ geh gaˬ leh, yawˇ ve awˬ ceˬ te ve yoˬ. Sawˉlu‸ yawˇ hta‸ nyi ma cawˇ jaˇ leh, yawˇ hta‸ yawˇ ve la‸ caˉ pfuhˇ shehˍ hpaˇ te tcuh ve yoˬ.

22Oˇ htaˇ, yawˇ Yeˍsehˇ hta‸ tawˇ shanˍ feu piˇ leh, Daˍviˆ hta‸ ngaˬ nyi ma cawˇ ve yoˬ. Yawˇ hta‸ ngaˬ ve hawˉ yehˬ hkʼaw chehˇ tcuh piˇ-oˆ, teh‸ kʼoˆ feu piˇ ve yoˬ.

23Oˇ ve teˇ nyi hta‸ te leh, maˇ da‸ ve awˬ ha Sawˉlu‸ awˬ hkʼoˆ ya‸ la ve teˇ yanˇ, Daˍviˆ lehˬ yawˇ ve tinˍ hta‸ yuˬ leh hteˆ maˍ piˇ ve yoˬ. Oˇ htaˇ, maˇ da‸ ve awˬ ha tawˆ kʼai leh, Sawˉlu‸ nyi ma kʼaw‸ sha la ve yoˬ.

← Chapter 15 Jump to: Chapter 17 →