1 Samuel 22

Lahu Bible Edited © Thailand Bible Society and Bible Society of Myanmar, 2010, 2020.

← Chapter 21 Jump to: Chapter 23 →

1Oˇ ve hkʼaw‸ nawˉ, Daˍviˆ Gaˍtaˆ venˇ hkʼaw tawˆ kʼai leh, Aˍduˆlanˍ venˇ paˇ lo cawˬ ve haˉ kʼoˍ hkʼaw ca va‸ taˍ ve yoˬ. Yawˇ oˇ kaˬ lo va‸ chehˇ ve hta‸ yawˇ ve yehˬ yaˇ kʼa yaˇ teˇ hpaˍ gʼa kaˇ ve teˇ yanˇ, yawˇ hui yawˇ geh laˬ ve yoˬ.

2Shu fawˉ mehˍ ve hta‸ gʼa hkanˍ ve chaw, shu ve jeˬ hta‸ kʼaw‸ shaiˍ piˇ maˇ gʼa ve chaw, shu hta‸ nyi hkʼaˇ maˇ suh ve chaw hkʼa peu-eˬ yawˇ geh laˬ leh, yawˇ lehˬ awˬ hoˉ hkʼe hpeh‸ la ve yoˬ. Yawˇ geh chaw 400 gʼaˇ hkʼe chehˇ taˍ ve yoˬ.

3Daˍviˆ oˇ kaˬ lo kʼaw‸ tu leh, Mawˇbaˆ mvuhˇmiˬ hkʼaw cawˬ ve Miˆsaˍpaˍ venˇ lo kʼai ve yoˬ. Yawˇ Mawˇbaˆ jawˇmawˇ geh kʼai leh, Gʼuiˬsha ngaˬ hta‸ hkʼaˬ hkʼe te tcuh laˇ gaˇ ve hta‸ ngaˬ shiˍ la htaˇ hkʼa gaˬ, awˬ bon te leh ngaˬ pa ngaˬ e hta‸ nawˬ geh a ciˉ chehˇ tcuh taˍ piˇ-oˆ, teh‸ kʼoˆ ve yoˬ.

4Hkʼe te leh, Daˍviˆ lehˬ yawˇ ve awˬ pa awˬ e hta‸ Mawˇbaˆ jawˇmawˇ geh teh taˉ ve yoˬ. Yawˇ hui lehˬ Daˍviˆ heh puiˉ hkʼaw lo ca hpaw toˇ chehˇ ve awˬ yanˇ hkʼaw, oˇ kaˬ lo chehˇ taˍ ve yoˬ.

5Oˇ htaˇ, Gaˆ teh‸ kʼoˆ ve Gʼuiˬsha ve tcuh kaˍ paˍ teˇ gʼaˇ Daˍviˆ geh laˬ leh, Nawˬ choˬ kaˬ lo taˇ va‸ chehˇ-oˆ. Yuˇda‸ mvuhˇmiˬ lo haˆ kʼai loˬ, teh‸ yawˇ hta‸ kʼoˆ piˇ ve yoˬ. Hkʼe te leh Daˍviˆ tawˆ kʼai leh, Heˍraˆ teh‸ kʼoˆ ve hteunˍ hkʼaw lo ca chehˇ taˍ ve yoˬ.

6Sawˉlu‸ lehˬ, Giˇbaˍ venˇ hkʼaw chehˇ taˍ ve yoˬ. Yawˇ lehˬ, gehˇ teˇ maˬ yuˬ taˍ leh, hkʼaw pui teˇ maˬ hkʼoˆ cawˬ ve ma‸ kehˇ ceh hawˉ mui chehˇ ve yoˬ. Yawˇ ve ma‸ poˍ lonˉ hkʼa peu-eˬ yawˇ paˇ lo huˉ taˍ ve yoˬ. Daˍviˆ leh yawˇ ve chaw teˇ hpaˍ hkʼaˬ lo va‸ chehˇ ve hta‸ yawˇ gʼa kaˇ ve yoˬ.

7Oˇ htaˇ yawˇ ve ma‸ poˍ lonˉ teˇ hpaˍ hta‸ kʼoˆ piˇ ve, Beˍyaˍmenˍ awˬ ceuˬ awˬ hkʼaˇ teˇ hpaˍ-oˬ, na sheˍ. Daˍviˆ lehˬ, yawˇ ve ti mi leh a pehˉ meuˇ hko teˇ hpaˍ nawˬ hui hta‸ piˇ laˇ leh, nawˬ hui hta‸ yawˇ ve ma‸ poˍ lonˉ te tcuh laˇ tuˬ yoˬ, teh‸ dawˇ chehˇ ve laˇ.

8Chi hta‸ pa taw, nawˬ hui ngaˬ hta‸ kʼaw‸ hpfuhˆ chehˇ ve laˇ. Ngaˬ yaˇ paˍ lehˬ, Daˍviˆ hta‸ shaˉ caˆ caˇ leh awˬ chawˇ te da‸ chehˇ ve awˬ lawn nawˬ hui teˇ gʼaˇ ka‸ ngaˬ hta‸ maˇ hto laˇ. Nawˬ hui teˇ gʼaˇ ka‸ ngaˬ awˬ pon maˇ dawˇ hkiˉ. Daˍviˆ lehˬ chi beu‸ ngaˬ hta‸ tiˇ pehˍ tuˬ da‸ ve awˬ yanˇ hta‸ ca chehˇ leh, ngaˬ yaˇ paˍ yawˇ hta‸ awˬ gʼaˇ piˇ chehˇ ve awˬ lawn, nawˬ hui teˇ gʼaˇ ka‸ ngaˬ hta‸ maˇ hto laˇ, teh‸ yawˇ hui hta‸ kʼoˆ piˇ ve yoˬ.

9Eˇdonˍ venˇ yaˇ Dawˇgaˆ lehˬ, Sawˉlu‸ ve ma‸ poˍ lonˉ teˇ hpaˍ geh huˉ taˍ ve yoˬ. Yawˇ kʼoˆ ve, Daˍviˆ lehˬ Mawˇbaˆ venˇ hkʼaw chehˇ ve Aˍhiˇtuˆ ve yaˇ paˍ Aˍbiˆmaˍlehˆ geh kʼai ve hta‸ ngaˬ gʼa mawˬ ve yoˬ.

10Daˍviˆ hkʼaˬ hkʼe te cawˇ ve Aˍbiˆmaˍlehˆ Gʼuiˬsha hta‸ ca na nyi ve yoˬ. Peuˬ hkʼaw‸ nawˉ, yawˇ Daˍviˆ hta‸ hkaoˍmonˇ leh Gawˇliˇya‸ ve aˉhtaw yuˬ piˇ ve yoˬ, teh‸ kʼoˆ ve yoˬ.

11Hkʼe te leh, Sawˉlu‸ lehˬ paw hkuˇ Aˍbiˆmaˍlehˆ leh Nawˇbaˆ venˇ hkʼaw paw hkuˇ hkʼa te chehˇ ve yawˇ ve awˬ ceuˬ awˬ hkʼaˇ hkʼa peu-eˬ ve hta‸ yawˇ geh kuˬ yuˬ ve yoˬ. Yawˇ hui hkʼa peu-eˬ yawˇ geh laˬ ve yoˬ.

12Oˇ htaˇ Sawˉlu‸ lehˬ, Aˍbiˆmaˍlehˆ-oˬ, hkʼa deh‸ na sheˍ, teh‸ yawˇ hta‸ kʼoˆ piˇ ve yoˬ. Aˍbiˆmaˍlehˆ htawˇ, Jawˇmawˇ-oˬ, ngaˬ na chehˇ taˍ ve yoˬ, teh‸ kʼaw‸ yaw hkʼaw‸ piˇ ve yoˬ.

13Sawˉlu‸ yawˇ hta‸ na nyi leh kʼoˆ ve, Aˬ hto‸ ma pa taw Daˍviˆ nawˬ huiˉ maˬ ngaˬ hta‸ kʼaw‸ hpfuhˆ ve le. Aˬ hto‸ ma pa taw, nawˬ yawˇ hta‸ hkaoˍmonˇ, aˉhtaw piˇ leh yawˇ awˬ pon Gʼuiˬsha geh tawˇ yaw piˇ ve le. Chi beu‸ yawˇ ngaˬ hta‸ kʼaw‸ hpfuhˆ leh, ngaˬ hta‸ tiˇ pehˍ tuˬ da‸ ve awˬ yanˇ hta‸ law chehˇ taˍ ve yoˬ, teh‸ yawˇ hta‸ kʼoˆ piˇ ve yoˬ.

14Aˍbiˆmaˍlehˆ kʼaw‸ yaw hkʼaw‸ leh kʼoˆ ve, Daˍviˆ lehˬ ka ti‸ yeˬ jaˇ ve nawˬ ve ma‸ poˍ lonˉ hpeh‸ ve yoˬ. Yawˇ lehˬ, nawˬ ve awˬ maˉ paˍ ka‸ hpeh‸ leh, nawˬ ve a sha‸ shaw paˍ ma‸ poˍ lonˉ hpeh‸ ve yoˬ. Chi awˬ hkʼoˆ, yawˇ lehˬ hawˉ yehˬ hkʼaw shu taˍ uiˍ taˍ mvuh ve chaw teˇ gʼaˇ hpeh‸ ve yoˬ.

15Chi lehˬ, yawˇ awˬ pon ngaˬ awˉ lawˉ peuˇ teˇ pawˆ Gʼuiˬsha hta‸ tawˇ yaw piˇ ve maˇ heˆ. Ngaˬ awˬ to maˇ kʼoˆ, ngaˬ ve yehˬ yaˇ kʼa yaˇ teˇ hpaˍ maˇ kʼoˆ, nawˬ hta‸ kʼaw‸ hpfuhˆ ve yoˬ, teh‸ nawˬ maˇ kʼoˆ laˇ cawˇ. Yawˇ te chehˇ ve kanˉ hta‸ ngaˬ te‸ chiˉ maˇ gʼa shiˍ, teh‸ kʼoˆ ve yoˬ.

16Oˇ htaˇ jawˇmawˇ lehˬ, Aˍbiˆmaˍlehˆ-oˬ, nawˬ leh nawˬ ve awˬ ceuˬ awˬ hkʼaˇ hkʼa peu-eˬ gʼa suh tuˬ yoˬ, teh‸ kʼoˆ ve yoˬ.

17Oˇ hkʼe kʼoˆ piˇ peuˬ hkʼaw‸ nawˉ, Gʼuiˬsha ve paw hkuˇ chi teˇ hpaˍ hta‸ tiˇ pehˍ-o‸. Yawˇ hui lehˬ Daˍviˆ hta‸ awˬ chawˇ te leh yawˇ gʼuiˇ hpaw-e chehˇ ve hta‸ shiˍ taˍ ve htawˇ, ngaˬ hta‸ maˇ hto laˇ, teh‸ yawˇ ve ma‸ yaˇ teˇ hpaˍ hta‸ kʼoˆ piˇ ve yoˬ. Ya‸ hkʼaˇ, chaw teˇ gʼaˇ ka‸ Gʼuiˬsha ve paw hkuˇ teˇ hpaˍ hta‸ tiˇ pehˍ maˇ haˆ.

18Oˇ htaˇ Sawˉlu‸ lehˬ, Nawˬ yawˇ hui hta‸ tiˇ pehˍ-o‸, teh‸ Dawˇgaˆ hta‸ kʼoˆ piˇ ve yoˬ. Hkʼe te leh, Dawˇgaˆ yawˇ hui hkʼa peu-eˬ ve hta‸ tiˇ pehˍ piˇ ve yoˬ. Oˇ ve teˇ nyi awˬ hkʼaw lo, yawˇ Gʼuiˬsha ve paw hkuˇ 85 gʼaˇ hta‸ tiˇ pehˍ piˇ ve yoˬ.

19Sawˉlu‸ lehˬ, paw hkuˇ ve venˇ teh‸ kʼoˆ ve Nawˇbaˆ venˇ hkʼaw hkʼa chehˇ ve chaw hkʼa peu-eˬ leh to nuˇ to shaˆ hkʼa peu-eˬ ve hta‸ htawˇ tiˇ pehˍ leh te luˬ te sheˆ tcuh ve yoˬ.

20Ya‸ hkʼaˇ, Aˍbiˆmaˍlehˆ ve yaˇ paˍ Aˍbyaˍtaˍ gʼuiˇ tawˆ la leh, Daˍviˆ geh ca chehˇ la ve yoˬ.

21Sawˉlu‸ lehˬ Gʼuiˬsha ve paw hkuˇ hkʼa peu-eˬ ve hta‸ tiˇ pehˍ peuˬ ve awˬ lawn, yawˇ Daˍviˆ hta‸ hto piˇ ve yoˬ.

22Daˍviˆ yawˇ hta‸ kʼoˆ piˇ ve, Oˇ ve teˇ nyi Dawˇgaˆ hta‸ ngaˬ oˇ kaˬ lo gʼa mawˬ ve teˇ yanˇ, yawˇ Sawˉlu‸ hta‸ awˬ tehˬ awˬ na hto piˇ tuˬ yoˬ, teh‸ ngaˬ shiˍ ve yoˬ. Nawˬ ve awˬ ceuˬ awˬ hkʼaˇ teˇ hpaˍ gʼa suh ve lehˬ ngaˬ hta‸ pa taw yoˬ.

23Nawˬ ngaˬ geh chehˇ taˍ-o‸. Taˇ kawˆ, Sawˉlu‸ lehˬ nawˬ hta‸ ka‸, ngaˬ hta‸ ka‸ tiˇ pehˍ gaˇ chehˇ ve yoˬ. Ya‸ hkʼaˇ, nawˬ ngaˬ geh chehˇ taˍ ve kʼo gʼa ponˬ tuˬ yoˬ, teh‸ yawˇ hta‸ kʼoˆ piˇ ve yoˬ.

← Chapter 21 Jump to: Chapter 23 →