1 Samuel 21

Lahu Bible Edited © Thailand Bible Society and Bible Society of Myanmar, 2010, 2020.

← Chapter 20 Jump to: Chapter 22 →

1Daˍviˆ lehˬ, Gʼuiˬsha ve paw hkuˇ Aˍbiˆmaˍlehˆ chehˇ taˍ kuiˬ Nawˇbaˆ venˇ lo kʼai ve yoˬ. Oˇ htaˇ, paw hkuˇ oˇ ve kawˆ cheˇ ve hkʼaw yawˇ geh laˬ leh, Aˬ hto‸ ma pa taw nawˬ teˇ gʼaˇ ceh tiˉ choˬ kaˬ laˬ ve le, teh‸ yawˇ na nyi piˇ ve yoˬ.

2Daˍviˆ kʼaw‸ yaw hkʼaw‸ leh kʼoˆ ve, Jawˇmawˇ kanˉ tcuh laˇ ve pa taw, ngaˬ choˬ kaˬ laˬ ve yoˬ. Ngaˬ choˬ kaˬ lo aˬ hto‸ ma ca te la ve chaw teˇ gʼaˇ hta‸ ka‸ taˇ hto piˇ, teh‸ yawˇ ngaˬ hta‸ kʼoˆ laˇ taˍ ve yoˬ. Ngaˬ ve ma‸ yaˇ teˇ hpaˍ hta‸ ngaˬ teˇ kaˬ lo chehˇ tcuh taˍ ve yoˬ.

3Nawˬ geh aˬ hto‸ ma caˇ tuˬ cawˬ le. Ngaˬ hta‸ hkaoˍmonˇ ngaˇ shiˍ, maˇ heˆ kʼo awˬ nu ve caˇ tuˬ teˇ ceuˬ ceuˬ pe‸ laˇ-oˆ, teh‸ yawˇ hta‸ kʼoˆ piˇ ve yoˬ.

4Oˇ htaˇ paw hkuˇ oˇ ve lehˬ, Ngaˬ geh awˬ nu ve hkaoˍmonˇ maˇ cawˬ. Da‸ kehˬ ve hkaoˍmonˇ tiˉ cawˬ ve yoˬ. Nawˬ ve ma‸ yaˇ teˇ hpaˍ, chi teˇ nyiˇ nyi awˬ hkʼaw lo yaˇ miˇ geh maˇ ca zuh‸ ve kʼo, hkaoˍmonˇ oˇ ve teˇ hpaˍ hta‸ caˇ hpeh‸ ve yoˬ, teh‸ yawˇ hta‸ kʼoˆ piˇ ve yoˬ.

5Daˍviˆ kʼaw‸ yaw hkʼaw‸ leh kʼoˆ ve, Ngaˬ hui yaˇ miˇ geh maˇ zuh‸. Ngaˬ hui yaˇ miˇ teˇ gʼaˇ ka‸ maˇ cawˬ. Ngaˬ hui chi hkʼe awˬ baˬ hpawˇ tawˆ-e leh kanˉ ca te tuˬ cawˬ la ve teˇ yanˇ, ngaˬ hui a shu yawˇ awˬ to hta‸ da‸ kehˬ piˇ taˍ ve yoˬ. Chi teˇ pawˆ lehˬ, leuˉ leh uiˍ jaˇ ve kanˉ teˇ maˬ hta‸ ca te toˇ ve pa taw, ngaˬ hui ve awˬ to hta‸ leuˉ leh da‸ keh piˇ taˍ ve yoˬ, teh‸ kʼoˆ ve yoˬ.

6Hkʼe te leh paw hkuˇ oˇ ve lehˬ, Daˍviˆ hta‸ da‸ kehˬ ve hkaoˍmonˇ yuˬ piˇ ve yoˬ. Awˬ lawn kʼo, yawˇ geh cawˬ taˍ ve hkaoˍmonˇ lehˬ, Gʼuiˬsha hta‸ tanˇ gehˇ sheˍ ve hkaoˍmonˇ awˬ suhˉ teˇ hpaˍ hpeh‸ ve yoˬ.

7(Oˇ ve teˇ nyi Sawˉlu‸ nuˇ hawˉ paˍ awˬ hoˉ Eˇdonˍ venˇ yaˇ Dawˇgaˆ lehˬ, yawˇ awˬ to hta‸ da‸ tuˬ kehˬ tuˬ te tuˬ awˬ pon oˇ kaˬ lo chehˇ taˍ ve yoˬ.)

8Daˍviˆ Aˍbiˆmaˍlehˆ hta‸ kʼoˆ piˇ ve, Nawˬ ngaˬ hta‸ gehˇ maˇ heˆ kʼo, aˉhtaw teˇ maˬ maˬ piˇ laˇ maˇ hpeh‸ laˇ. Jawˇmawˇ ngaˬ hta‸ haˆ haˆ tawˆ kʼai tcuh laˇ ve pa taw, ngaˬ te‸ chiˉ la‸ caˉ maˇ gʼa yuˬ tanˇ ve yoˬ, teh‸ kʼoˆ ve yoˬ.

9Oˇ htaˇ Aˍbiˆmaˍlehˆ lehˬ, Nawˬ Eˇlaˍ lawˬ hkʼo‸ hkʼaw Gawˇliˇya‸ hta‸ bawˆ da‸ htaˇ gʼa taˍ ve aˉhtaw oˇ ve ngaˬ geh cawˬ taˍ sheˍ ve yoˬ. Aˉhtaw oˇ ve hta‸ hpa hkʼa deh‸ hawˆ htiˆ leh, ka ti‸ shaˉ caˆ ta kʼoˍ hkʼaw‸ nawˉ paˉ lo teh taˍ ve yoˬ. Nawˬ heuˆ gaˇ ve kʼo, yuˬ kʼai-o. Ngaˬ geh aˉhtaw chi teˇ maˬ tiˉ cawˬ ve yoˬ, teh‸ Daˍviˆ hta‸ kʼaw‸ kʼoˆ piˇ ve yoˬ. Oˇ htaˇ Daˍviˆ lehˬ, Aˉhtaw oˇ ve ngaˬ hta‸ pe‸ laˇ-oˆ. Chi a‸ kehˉ da‸ ve aˉhtaw teˇ maˬ ka‸ maˇ cawˬ, teh‸ kʼoˆ ve yoˬ.

10Daˍviˆ lehˬ, Sawˉlu‸ hta‸ kawˆ ve pa taw oˇ kaˬ lo kʼaw‸ tawˆ kʼai leh, Gaˍtaˆ mvuhˇmiˬ ve jawˇmawˇ Aˍhkiˆ geh kʼai ve yoˬ.

11Oˇ htaˇ, Aˬhkiˆ ve ma‸ poˍ lonˉ teˇ hpaˍ lehˬ, Chi ve hpaˇ jawˇmawˇ Daˍviˆ hpeh‸ ve maˇ heˆ laˇ. Sawˉlu‸ lehˬ, chaw awˬ hinˉ gʼaˇ hta‸ tiˇ pehˍ ve yoˬ. Ya‸ hkʼaˇ, Daˍviˆ lehˬ chaw awˬ meunˍ gʼaˇ hta‸ tiˇ pehˍ ve yoˬ, teh‸ yaˇ miˇ teˇ hpaˍ kʼa mui chiˇ mvuh piˇ ve chi hpaˇ hta‸ yoˬ, teh‸ Aˍhkiˆ hta‸ kʼoˆ piˇ ve yoˬ.

12Daˍviˆ lehˬ, tawˇ oˇ ve teˇ hpaˍ hta‸ gʼa kaˇ htaˇ, yawˇ jawˇmawˇ Aˍhkiˆ hta‸ kawˆ jaˇ ve yoˬ.

13Hkʼe te leh, Daˍviˆ lehˬ yawˇ hui hkʼa peu-eˬ mehˆ gʼuˇ suhˍ lo chaw gʼuˇ hkʼe te maˍ piˇ ve yoˬ. Yawˇ lehˬ, lanˇ venˇ yehˬ miˉ hta‸ gaˆ leh, yawˇ ve paˇ tcuhˆ hkʼoˆ lo ciˉ gʼuiˇ shoˇ ya‸ la tcuh ve yoˬ.

14Oˇ htaˇ Aˍhkiˆ lehˬ, Nyi loˬ. Chaw chi hpaˇ gʼuˇ chehˇ ve yoˬ. Aˬ hto‸ ma pa taw, nawˬ hui yawˇ hta‸ ngaˬ geh shiˍ veu laˇ ve le.

15Ngaˬ geh chaw gʼuˇ hkʼa biˇ chehˇ taˍ ve maˇ heˆ laˇ. Aˬ hto‸ ma pa taw, ngaˬ ve hawˉ yehˬ hkʼaw chaw gʼuˇ paˍ chi hta‸ shiˍ veu laˇ leh, ngaˬ hta‸ ca te sho‸ sha‸ la ve le, teh‸ yawˇ ve ma‸ ponˍ lonˉ teˇ hpaˍ hta‸ kʼoˆ piˇ ve yoˬ.

← Chapter 20 Jump to: Chapter 22 →