1 Samuel 23

Lahu Bible Edited © Thailand Bible Society and Bible Society of Myanmar, 2010, 2020.

← Chapter 22 Jump to: Chapter 24 →

1Hpiˇliˇtiˆ chaw teˇ hpaˍ Kiˇlaˆ venˇ hta‸ ca bawˆ la leh, awˬ shiˍ awˬ nu teˇ hpaˍ hta‸ ca hkʼawˇ yuˬ la chehˇ ve awˬ lawn hta‸ Daˍviˆ gʼa kaˇ ve yoˬ.

2Hkʼe te leh, yawˇ Gʼuiˬsha hta‸ na nyi leh, Gʼuiˬsha-oˬ, ngaˬ Hpiˇliˇtiˆ chaw hui hta‸ gʼa ca bawˆ tuˬ laˇ, teh‸ kʼoˆ ve yoˬ. Oˇ htaˇ Gʼuiˬsha lehˬ, Yoˬ, nawˬ Hpiˇliˇtiˆ chaw hui hta‸ ca bawˆ leh, Kiˇlaˆ venˇ hta‸ htaiˍ hkʼaw‸ piˇ-oˆ, teh‸ kʼoˆ piˇ ve yoˬ.

3Ya‸ hkʼaˇ, yawˇ ve ma‸ yaˇ teˇ hpaˍ lehˬ, Ngaˬ hui cho kaˬ Yuˇda‸ mvuhˇmiˬ hkʼaw chehˇ ve ka‸ gʼa kawˆjehˇ chehˇ ve yoˬ. Ngaˬ hui Kiˇlaˆ venˇ lo kʼai leh, Hpiˇliˇtiˆ chaw hui hta‸ ca kʼaw‸ bawˆ-e ve kʼo, naˬ beuˬ hkʼoˆ neˇ shaˬ ve hkʼe hpeh‸ tuˬ yoˬ, teh‸ yawˇ hta‸ kʼoˆ piˇ ve yoˬ.

4Hkʼe te leh, Daˍviˆ Gʼuiˬsha hta‸ teˇ pawˆ kʼaw‸ na nyi ve yoˬ. Ya‸ hkʼaˇ Gʼuiˬsha lehˬ, Kiˇlaˆ venˇ hta‸ ca bawˆ-e loˬ. Hpiˇliˇtiˆ chaw hui hta‸ ngaˬ nawˬ ve la‸ sheh hkʼaw chiˇ a‸ laˇ tuˬ yoˬ, teh‸ yawˇ hta‸ kʼoˆ piˇ ve yoˬ.

5Oˇ htaˇ, Daˍviˆ leh yawˇ ve ma‸ yaˇ teˇ hpaˍ Kiˇlaˆ venˇ lo kʼai leh Hpiˇliˇtiˆ chaw hui hta‸ ca bawˆ-e ve yoˬ. Yawˇ hui lehˬ, Hpiˇliˇtiˆ chaw maˇ maˇ hta‸ tiˇ pehˍ piˇ leh, yawˇ hui ve ceˇ teˇ hpaˍ hta‸ hiˉ yuˬ ve yoˬ. Hkʼe te leh, Daˍviˆ Kiˇlaˆ venˇ hta‸ htaiˍ hkʼaw‸ piˇ ve yoˬ.

6Oˇ htaˇ, Aˍbiˆmaˍlehˆ ve yaˇ paˍ Aˍbyaˍtaˍ lehˬ, ka ti‸ shaˉ caˆ ta kʼoˍ hta‸ taˆ veu leh Kiˇlaˆ venˇ lo Daˍviˆ geh kʼai ve yoˬ.

7Daˍviˆ Kiˇlaˆ venˇ lo kʼai peuˬ ve hta‸ Sawˉlu‸ gʼa shiˍ ve teˇ yanˇ yawˇ kʼoˆ ve, Chi teˇ pawˆ Gʼuiˬsha lehˬ yawˇ hta‸ ngaˬ ve la‸ sheh hkʼaw chiˇ a‸ laˇ peuˬ. Daˍviˆ lehˬ, hkʼa deh‸ ko taˍ ve venˇ hkʼaw lo‸-e leh va yaw taˍ peuˬ ve hkʼe yoˬ, teh‸ kʼoˆ ve yoˬ.

8Hkʼe te leh, Sawˉlu‸ lehˬ Kiˇlaˆ venˇ hta‸ ca bawˆ leh, Daˍviˆ hta‸ hpeh yuˬ tuˬ yawˇ ve ma‸ yaˇ teˇ hpaˍ hta‸ kuˬ hpawnˬ ve yoˬ.

9Sawˉlu‸ yawˇ hta‸ ca bawˆ la tuˬ gu chehˇ ve awˬ hkawˇ hta‸ Daˍviˆ gʼa kaˇ ve teˇ yanˇ, Da‸ ve kehˬ ve ka ti‸ shaˉ caˆ ta kʼoˍ choˬ kaˬ lo yuˬ veu laˇ-oˆ, teh‸ paw hkuˇ Aˍbyaˍtaˍ hta‸ kʼoˆ piˇ ve yoˬ.

10Oˇ htaˇ Daˍviˆ kʼoˆ ve, Iˉsaˍreˍlaˆ ve Jawˇmawˇ Gʼuiˬsha-oˬ, Sawˉlu‸ lehˬ ngaˬ hta‸ pa taw, Kiˇlaˆ venˇ hta‸ ca te luˬ la tuˬ gu chehˇ ve awˬ hkawˇ hta‸ ngaˬ gʼa kaˇ ve yoˬ.

11Kiˇlaˆ venˇ yaˇ teˇ hpaˍ, ngaˬ hta‸ Sawˉlu‸ ve la‸ sheh hkʼaw lo chiˇ a‸ piˇ tuˬ ve laˇ. Iˉsaˍ reˍlaˆ ve Jawˇmawˇ Gʼuiˬsha-oˬ, ngaˬ hta‸ a ciˉ kʼaw‸ yaw hkʼaw‸ laˇ-oˆ, teh‸ kʼoˆ ve yoˬ. Oˇ htaˇ Gʼuiˬsha lehˬ, Sawˉlu‸ laˬ tuˬ yoˬ, teh‸ kʼaw‸ yaw hkʼaw‸ piˇ ve yoˬ.

12Kiˇlaˆ venˇ yaˇ teˇ hpaˍ lehˬ, ngaˬ hta‸ Sawˉlu‸ ve la‸ sheh hkʼaw lo chiˇ a‸ piˇ tuˬ ve laˇ, teh‸ Daˍviˆ Gʼuiˬsha hta‸ kʼaw‸ na nyi ve yoˬ. Yawˇ hui oˇ hkʼe te tuˬ yoˬ, teh‸ Gʼuiˬsha kʼaw‸ yaw hkʼaw‸ piˇ ve yoˬ.

13Hkʼe te leh, Daˍviˆ leh yawˇ ve ma‸ yaˇ 600 gʼaˇ ve hkʼa peu-eˬ, Kiˇlaˆ venˇ hkʼaw teˇ cawˬ haˉ tawˆ kʼai ve yoˬ. Daˍviˆ lehˬ, Kiˇlaˆ venˇ hkʼaw tawˆ kʼai peuˬ ve hta‸ Sawˉlu‸ gʼa kaˇ ve teˇ yanˇ, yawˇ Kiˇlaˆ venˇ hta‸ maˇ ca kʼaw‸ bawˆ ve yoˬ.

14Daˍviˆ lehˬ, Ziˇhpaˆ teh‸ kʼoˆ ve heh puiˉ hkʼaw lo ca va‸ taˍ ve yoˬ. Sawˉlu‸ lehˬ, hkʼaˬ htaˆ ka‸ yawˇ hta‸ gʼa‸ ca chehˇ ve yoˬ. Ya‸ hkʼaˇ, Gʼuiˬsha lehˬ Daˍ viˆ hta‸ Sawˉlu‸ ve la‸ sheh hkʼaw maˇ chiˇ a‸ piˇ.

15Sawˉlu‸ yawˇ hta‸ tiˇ pehˍ tuˬ gʼa‸ ca chehˇ ve pa taw, Daˍviˆ kawˆ jaˇ chehˇ ve yoˬ. Yawˇ lehˬ, Ziˇhpaˆ heh puiˉ hkʼaw lonˉ awˬ paˇ lo cawˬ ve Hawˉreˍsaˆ teh‸ kʼoˆ ve chehˇ kuiˬ lo chehˇ taˍ ve yoˬ.

16Oˇ htaˇ, Yawˇnaˆtanˍ yawˇ geh kʼai leh, Gʼuiˬsha yawˇ hta‸ ha‸ shaˉ chehˇ ve awˬ lawn kʼoˆ maˍ piˇ leh yawˇ hta‸ awˬ gʼaˇ piˇ ve yoˬ.

17Yawˇ kʼoˆ ve, Nawˬ taˇ kawˆ. Ngaˬ pa Sawˉlu‸ lehˬ nawˬ hta‸ te‸ chiˉ te laˇ maˇ gʼa taˬ. Nawˬ lehˬ Iˉsaˍreˍlaˆ chaw hui ve jawˇmawˇ gʼa te leh, ngaˬ lehˬ ngaˬ pa shiˍ taˍ ve hkʼe, nawˬ awˬ hawˉ ve jawˇmawˇ gʼa te tuˬ yoˬ, teh‸ yawˇ hta‸ kʼoˆ piˇ ve yoˬ.

18Yawˇ huiˉ maˬ teˇ gʼaˇ hta‸ teˇ gʼaˇ awˬ chawˇ te da‸ tuˬ ka ti‸ kʼaw‸ te ve yoˬ. Hkʼe te peuˬ hkʼaw‸ nawˉ, Daˍviˆ Hawˉreˍsaˆ hkʼaw chehˇ taˉ leh, Yawˇnaˆtanˍ yawˇ ve aˉ hkʼaw lo kʼaw‸ kʼo‸-e ve yoˬ.

19Ziˇhpaˆ teh‸ kʼoˆ ve heh puiˉ hkʼaw lonˉ hkʼaw chehˇ ve chaw teˇ hpaˍ hpaˍ, Giˇbaˍ venˇ lo Sawˉlu‸ geh kʼai leh, Daˍviˆ lehˬ Yuˇda‸ chaw hui ve mvuhˇmiˬ awˬ hawˉ hpawˇ teˇ tawn lo cawˬ ve Haˍhkiˇlaˆ hkʼaw hkʼoˆ lo va‸ chehˇ taˍ ve yoˬ.

20Nawˬ yawˇ hta‸ hkʼaˬ ma hpeh yuˬ gaˇ chehˇ ve hta‸ ngaˬ hui shiˍ ve yoˬ. Chi hta‸ pa taw, ngaˬ hui ve mvuhˇmiˬ lo laˬ-o‸. Nawˬ yawˇ hta‸ hpeh yuˬ gʼa tuˬ ngaˬ hui ga laˇ tuˬ yoˬ, teh‸ yawˇ hta‸ kʼoˆ piˇ ve yoˬ.

21Sawˉlu‸ yawˇ hui hta‸ kʼaw‸ yaw hkʼaw‸ piˇ leh kʼoˆ ve, Nawˬ hui ngaˬ hta‸ chi hkʼe ca ga laˇ ve pa taw, Gʼuiˬsha nawˬ hui hta‸ awˬ bon na‸ piˇ-oˆ.

22Yawˇ oˇ kaˬ lo hkʼa deh‸ chehˇ tehˬ ve hta‸ gʼa shiˍ tuˬ, nawˬ hui teˇ pawˆ hkʼa deh‸ ca kʼaw‸ jaˆ nyi-o. Yawˇ hta‸ oˇ kaˬ lo a shu teˇ gʼaˇ gʼa mawˬ ve, leh yawˇ hkʼaˬ ve teˇ kaˬ lo chehˇ ve hta‸ hkʼa deh‸ ca kʼaw‸ cha nyi-o. Yawˇ lehˬ, laˆ jaˇ ve chaw hpeh‸ ve hta‸ ngaˬ shiˍ taˍ ve yoˬ.

23Yawˇ hkʼaˬ lo va‸ chehˇ taˍ ve hta‸ hkʼa deh‸ ca nyi leh, ngaˬ hta‸ teˇ pawˆ ca kʼaw‸ hto laˇ-oˆ. Yawˇ lehˬ oˇ kaˬ lo chehˇ taˍ sheˍ ve kʼo, ngaˬ nawˬ hui geh kʼai leh, yawˇ hta‸ gʼa‸ yuˬ tuˬ yoˬ. Yuˇda‸ mvuhˇmiˬ teˇ kaˬ peuˬ teˇ kaˬ yawˇ hta‸ gʼa gʼa‸ yuˬ ve htawˇ te‸ chiˉ maˇ heˆ, teh‸ yawˇ hui hta‸ kʼoˆ piˇ ve yoˬ.

24Hkʼe te leh, yawˇ hui lehˬ Sawˉlu‸ gʼuˇ suhˍ Ziˇhpaˆ hteunˍ lo kʼai ve yoˬ. Daˍviˆ leh yawˇ ve ma‸ yaˇ teˇ hpaˍ lehˬ, hteunˍ lonˉ oˇ ve awˬ hawˉ hpawˇ teˇ tawn lo cawˬ ve Mawˇnaˆ teh‸ kʼoˆ ve hteunˍ hkʼaw lo chehˇ taˍ ve yoˬ.

25Sawˉlu‸ leh yawˇ ve ma‸ yaˇ teˇ hpaˍ lehˬ, Daˍviˆ hta‸ ca hpfuhˆ tuˬ tawˆ kʼai ve yoˬ. Awˬ lawn chi hta‸ Daˍviˆ gʼa kaˇ ve teˇ yanˇ, Mawˇnaˆ hteunˍ lonˉ hkʼaw cawˬ ve haˉ hpawˇ hkʼaw lo va‸ taˍ ve yoˬ. Awˬ lawn chi hta‸ Sawˉlu‸ gʼa kaˇ ve teˇ yanˇ, yawˇ Daˍviˆ hkʼaˇ suh gʼa‸ yuˬ kʼai ve yoˬ.

26Sawˉlu‸ leh yawˇ ve ma‸ yaˇ teˇ hpaˍ lehˬ, haˉ hpawˇ oˇ ve choˬ paˉ hpawˇ lo chehˇ taˍ leh, Daˍviˆ leh yawˇ ve ma‸ yaˇ teˇ hpaˍ lehˬ, haˉ hpawˇ oˇ paˉ hpawˇ lo chehˇ taˍ ve yoˬ. Sawˉlu‸ ve ma‸ yaˇ teˇ hpaˍ yawˇ hui hta‸ ca hoˆ la chehˇ ve pa taw, hpaw tawˆ-e gaˬ tuˬ coˇ caˇ chehˇ ve yoˬ.

27Oˇ htaˇ chaw teˇ gʼaˇ Sawˉlu‸ geh gʼuiˇ laˬ leh, Jawˇmawˇ-oˬ, haˆ kʼaw‸ la-o. Hpiˇliˇtiˆ chaw teˇ hpaˍ ngaˬ hui ve mvuhˇmiˬ hta‸ ca bawˆ la chehˇ ve yoˬ, teh‸ kʼoˆ piˇ ve yoˬ.

28Hkʼe te leh, Sawˉlu‸ Daˍviˆ hta‸ baˬ taˉ leh, Hpiˇliˇtiˆ chaw hui hta‸ ca bawˆ-e tuˬ hpfuhˆ kʼo‸-e ve yoˬ. Chi hta‸ pa taw, chehˇ kuiˬ oˇ ve hta‸ Hpaˆ da‸ kuiˬ haˉ hpawˇ, teh‸ meh ve yoˬ.

29Daˍviˆ oˇ kaˬ lo kʼaw‸ tawˆ kʼai leh, Eˍgaˍdiˆ teh‸ kʼoˆ ve chehˇ kuiˬ lo ca kʼaw‸ va‸ taˍ ve yoˬ.

← Chapter 22 Jump to: Chapter 24 →