1 Samuel 14

Lahu Bible Edited © Thailand Bible Society and Bible Society of Myanmar, 2010, 2020.

1Teˇ nyi htaˇ Yawˇnaˆtanˍ lehˬ, Ngaˬ huiˉ maˬ Hpiˇliˇtiˆ chaw hui deh chehˇ taˍ kuiˬ lo kʼai-a veuˬ, teh‸ yawˇ ve la‸ caˉ pfuhˇ paˍ hta‸ kʼoˆ piˇ ve yoˬ. Ya‸ hkʼaˇ, awˬ lawn chi Yawˇnaˆ tanˍ yawˇ ve awˬ pa hta‸ maˇ hto piˇ.

2Sawˇlu‸ lehˬ Giˇbaˍ venˇ hta‸ maˇ vuiˇ maˇ neˇ kuiˬ lo cawˬ ve Miˆgonˍ teh‸ kʼoˆ ve chehˇ kuiˬ lo aˉ ci ku cehˬ hawˉ deh chehˇ taˍ ve yoˬ. Yawˇ geh ma‸ yaˇ 600 gʼaˇ chehˇ taˍ ve yoˬ.

3(Awˬ yanˇ oˇ ve hkʼaw Gʼuiˬsha ve ka ti‸ shaˉ caˆ ta kʼoˍ hta‸ taˆ chehˇ ve chaw lehˬ, Shiˉlonˍ venˇ hkʼaw paw hkuˇ te chehˇ ve Eˇliˆ leh Hpiˇneˍhaˆ ve awˬ hawehˍ, Iˉhkaˍboˆ awˬ viˉ paˍ Aˍhiˆtaˆ ve yaˇ Aˍhiˇyaˆ hpeh‸ ve yoˬ.) Yawˇnaˆ tanˍ tawˆ kʼai ve hta‸ chaw teˇ gʼaˇ ka‸ maˇ shiˍ.

4Yawˇnaˆtanˍ Hpiˇliˇtiˆ chaw hui deh chehˇ kuiˬ lo kʼai ve ya‸ kʼaw hpuiˇ lo haˉ pui shiˍ lonˉ teˇ hpawˇ teˇ maˬ cawˬ taˍ ve yoˬ. Haˉ pui shiˍ lonˉ oˇ ve teˇ maˬ lehˬ Bawˇzehˆ teh‸ kʼoˆ leh, teˇ maˬ lehˬ, Seˍneˍ teh‸ kʼoˆ ve yoˬ.

5Haˉ pui shiˍ teˇ maˬ lehˬ kʼaˍ le‸ awˬ na hpawˇ Miˆmaˆ venˇ hpawˇ lo cawˬ leh, teˇ maˬ lehˬ kʼaˍ le‸ awˬ hawˉ hpawˇ Geˍbaˍ venˇ hpawˇ lo cawˬ ve yoˬ.

6Oˇ htaˇ Yawˇnaˆtanˍ yawˇ ve ma‸ yaˇ hta‸ kʼoˆ piˇ ve, Ngaˬ huiˉ maˬ buiˇshaˆaˉnaˆ chaw hpeh‸ ve Hpiˇliˇtiˆ chaw hui deh chehˇ taˍ kuiˬ lo kʼai-a veuˬ. Gʼuiˬsha ngaˬ huiˉ maˬ hta‸ ga laˇ tuˬ yoˬ hehˉ. Yawˇ ga laˇ ve kʼo, ngaˬ huiˉ maˬ nyiˇ gʼaˇ tiˉ hpeh‸ ve ka‸ chaw teˇ gʼaˇ ka‸ tawˍ taˍ laˇ gʼa tuˬ ve maˇ heˆ, teh‸ yawˇ hta‸ kʼoˆ piˇ ve yoˬ.

7Oˇ htaˇ yawˇ ve ma‸ yaˇ lehˬ, Nawˬ te gaˇ ve hkʼe te-o. Ngaˬ nawˬ geh chehˇ taˍ ve yoˬ, teh‸ yawˇ hta‸ kʼaw‸ yaw hkʼaw‸ piˇ ve yoˬ.

8Yawˇnaˆtanˍ kʼaw‸ kʼoˆ ve, Da‸ ve yoˬ. Ngaˬ huiˉ maˬ gʼuˇ suhˍ kʼai leh shaw chehˇ ve chaw oˇ ve teˇ hpaˍ hta‸ ngaˬ huiˉ maˬ awˬ to ca maw piˇ shaˬ.

9Yawˇ hui lehˬ ngaˬ huiˉ maˬ hta‸ teˇ hkui law taˍ laˇ tuˬ kʼoˆ laˇ ve kʼo, yawˇ hui ngaˬ huiˉ maˬ geh gaˬ la htaˇ hkʼa gaˬ law taˍ piˇ-a.

10Ya‸ hkʼaˇ, yawˇ hui lehˬ ngaˬ huiˉ maˬ hta‸ yawˇ hui geh taˆ la tuˬ kʼoˆ laˇ ve kʼo, yawˇ hui geh kai-a. Awˬ lawn kʼo, chi ve lehˬ Gʼuiˬsha ngaˬ huiˉ maˬ hta‸ gʼaˇ shehˍ hpaˇ hpeh‸ la piˇ tuˬ ve awˬ heˆ hpeh‸ ve yoˬ, teh‸ kʼoˆ ve yoˬ.

11Hkʼe te leh, yawˇ huiˉ maˬ lehˬ Hpiˇliˇtiˆ chaw yawˇ huiˉ maˬ hta‸ mawˬ hpeh‸ kuiˬ lo hpanˍ kʼai ve yoˬ. Oˇ htaˇ Hpiˇliˇtiˆ chaw teˇ hpaˍ lehˬ, Nyi loˬ. Heˍbrehˇ chaw teˇ hpaˍ yawˇ hui va‸ chehˇ taˍ kuiˬ haˉ kʼoˍ hkʼaw tawˆ la chehˇ ve yoˬ, teh‸ kʼoˆ ve yoˬ.

12Hkʼe te leh, Hpiˇliˇtiˆ chaw teˇ hpaˍ lehˬ, Choˬ kaˬ lo taˆ la-o. Nawˬ huiˉ maˬ hta‸ kʼoˆ laˇ tuˬ cawˬ ve yoˬ, teh‸ Yawˇnaˆtanˍ leh yawˇ ve ma‸ yaˇ hta‸ kʼoˆ piˇ ve yoˬ. Oˇ htaˇ Yawˇnaˆtanˍ lehˬ, Ngaˬ hkʼaˇ suh laˬ-o‸. Gʼuiˬsha lehˬ Iˉsaˍreˍlaˆ chaw hui hta‸ gʼaˇ shehˍ hpaˇ hpeh‸ la piˇ taˍ peuˬ, teh‸ yawˇ ve ma‸ yaˇ hta‸ kʼoˆ piˇ ve yoˬ.

13Hkʼe te leh Yawˇnaˆtanˍ yawˇ ve ma‸ yaˇ yawˇ hui geh gaˆ taˆ-e leh, Hpiˇliˇtiˆ chaw oˇ ve teˇ hpaˍ hta‸ tiˇ pehˍ piˇ ve yoˬ.

14Oˇ ve teˇ nyi Yawˇnaˆtanˍ leh yawˇ ve ma‸ yaˇ lehˬ, caˬ nyiˇ hpoˆ miˬ hkʼe hui ve chehˇ kuiˬ lo chaw 20 gʼaˇ hta‸ tiˇ pehˍ piˇ ve yoˬ.

15Awˬ baˬ hpawˇ lo shaw chehˇ ve Hpiˇliˇtiˆ ma‸ yaˇ teˇ hpaˍ leh ta‸ hkʼaw chehˇ taˍ ve ma‸ yaˇ hkʼa peu-eˬ kawˆ jaˇ ve yoˬ. Miˬ htawˇ hiˆ la leh chaw hkʼa peu-eˬ kawˆ jaˇ ve yoˬ.

16Beˍyaˍmenˍ chaw hui ve mvuhˇmiˬ, Giˇbaˍ venˇ hkʼaw shaw chehˇ ve Sawˉlu‸ ve ma‸ yaˇ teˇ hpaˍ lehˬ, Hpiˇliˇtiˆ chaw hui gʼuiˇ hpaw-e chehˇ ve hta‸ gʼa mawˬ ve yoˬ.

17Oˇ htaˇ Sawˉlu‸ lehˬ, A shu mehˉ kʼai ve naˍ, ma‸ yaˇ teˇ hpaˍ hta‸ gʼaw nyi-o, teh‸ yawˇ ve chaw teˇ hpaˍ hta‸ tawˇ piˇ ve yoˬ. Hkʼe te leh, yawˇ hui ma‸ yaˇ teˇ hpaˍ hta‸ gʼaw nyi ve teˇ yanˇ, Yawˇnaˆtanˍ leh yawˇ ve la‸ caˉ pfuhˇ shehˍ hpaˇ mehˉ kʼai taˍ ve hta‸ gʼa mawˬ ve yoˬ.

18Oˇ htaˇ Sawˉlu‸ lehˬ, Gʼuiˬsha ve ka ti‸ shaˉ caˆ ta kʼoˍ hta‸ choˬ kaˬ lo yuˬ veu laˇ-oˆ, teh‸ Aˍbiˇyaˆ hta‸ kʼoˆ piˇ ve yoˬ. (Awˬ yanˇ oˇ ve hkʼaw, ka ti‸ shaˉ caˆ ta kʼoˍ oˇ ve lehˬ Iˉsaˍreˍlaˆ chaw hui gʼuˇ suhˍ lo chehˇ taˍ ve yoˬ.)

19Sawˉlu‸ paw hkuˇ hta‸ tawˇ yaw piˇ chehˇ ve teˇ yanˇ, Hpiˇliˇtiˆ chaw teˇ hpaˍ shaˬ te shaˬ kawˆ jaˇ leh gʼuiˇ hpaw-e chehˇ ve yoˬ. Hkʼe te leh Sawˉlu‸ lehˬ, Teˇ hkui law sheˍ, teh‸ paw hkuˇ hta‸ kʼoˆ piˇ ve yoˬ.

20Oˇ ve hkʼaw‸ nawˉ, Sawˉlu‸ lehˬ yawˇ ve ma‸ yaˇ teˇ hpaˍ hta‸ shiˍ veu leh Hpiˇ liˇtiˆ chaw hui hta‸ ca bawˆ-e ve yoˬ. Hpiˇliˇtiˆ chaw hui kawˆ jaˇ ve pa taw, awˬ chawˇ chawˇ kʼaw‸ chaw da‸ chehˇ ve yoˬ.

21Ponˬ laˬ htaˇ Hpiˇliˇtiˆ chaw hui hpawˇ lo chehˇ taˍ ve Iˉsaˍreˍlaˆ chaw teˇ hpaˍ htawˇ nyi ma kʼaw‸ pa leh, Sawˉlu‸ leh Yawˇnaˆtanˍ hta‸ ca kʼaw‸ pawnˇ la ve yoˬ.

22Eˇhpaˍrenˍ mvuhˇmiˬ hkʼaw hkʼoˆ lawˬ hkʼoˆ lo ca va‸ chehˇ taˍ ve Iˉsaˍreˍlaˆ chaw teˇ hpaˍ lehˬ, Hpiˇliˇtiˆ chaw gʼuiˇ hpaw-e chehˇ ve awˬ hkawˇ gʼa kaˇ ve yoˬ. Hkʼe te leh, yawˇ hui htawˇ ya‸ la leh, Hpiˇliˇtiˆ chaw hui hta‸ ga gʼa‸ bawˆ ve yoˬ.

23Oˇ ve teˇ nyi Gʼuiˬsha Iˉsaˍreˍlaˆ chaw hui hta‸ ponˬ piˇ ve yoˬ. Yawˇ hui lehˬ Baˍtaˍvenˍ venˇ oˇ paˉ hpawˇ lo hkʼa gaˬ canˇ paˍ teˇ hpaˍ hta‸ gʼa‸ yuˬ kʼai ve yoˬ.

24Oˇ ve teˇ nyi Iˉsaˍreˍlaˆ chaw teˇ hpaˍ awˍ meu‸ jaˇ ve yoˬ. Awˬ lawn kʼo Sawˉ lu‸ lehˬ, Ngaˬ ve canˇ paˍ hta‸ maˇ gʼa kʼaw‸ te hkʼaw‸ piˇ sheˍ ve ceh ceh, ya‸ nyi caˇ tuˬ caˇ ve chaw lehˬ hkeu ve hta‸ gʼa hkanˍ tuˬ yoˬ, teh‸ kʼoˆ piˇ taˍ ve pa taw yoˬ. Hkʼe te leh, chaw oˇ ve teˇ hpaˍ lehˬ teˇ nyi tanˇ vanˇ caˇ tuˬ te‸ chiˉ maˇ caˇ.

25Yawˇ hui hkʼa peu-eˬ suhˆ tsuh cawˬ kuiˬ lo hpawnˬ laˬ ve yoˬ. Oˇ kaˬ lo pehˇ gʼuiˬ hkʼa biˇ cawˬ ve hta‸ yawˇ hui gʼa mawˬ ve yoˬ.

26Suhˆ tsuh cawˬ kuiˬ lo pehˇ gʼuiˬ hkʼa biˇ cawˬ taˍ ve htawˇ, yawˇ hui lehˬ Sawˉ lu‸ hkeu ve hta‸ kawˆ ve pa taw, chaw teˇ gʼaˇ ka‸ pehˇ gʼuiˬ hta‸ yuˬ caˇ maˇ haˆ.

27Ya‸ hkʼaˇ, Yawˇnaˆtanˍ lehˬ yawˇ awˬ pa oˇ hkʼe kʼoˆ taˍ ve tawˇ hta‸ maˇ gʼa kaˇ. Hkʼe te leh, yawˇ ve gehˇ tuˇ pehˇ nawˉ diˬ hkʼaw juˆ keu leh oˇ kaˬ lo ngawˉ taˍ ve pehˇ gʼuiˬ hta‸ caˇ ve yoˬ. Oˇ htaˇ, yawˇ teˇ cawˬ haˉ awˬ gʼaˇ kʼaw‸ biˇ la ve yoˬ.

28Oˇ htaˇ ma‸ yaˇ teˇ gʼaˇ lehˬ, Ngaˬ hui teˇ gʼaˇ le le htawˇ awˬ meu‸ leh gʼaˇ nuˇ jaˇ chehˇ ve yoˬ. Ya‸ hkʼaˇ nawˬ pa lehˬ, Ya‸ nyi caˇ tuˬ caˇ ve chaw hkeu ve hta‸ gʼa hkanˍ tuˬ yoˬ, teh‸ ngaˬ hui hta‸ kʼoˆ laˇ taˍ ve yoˬ, teh‸ yawˇ hta‸ kʼoˆ piˇ ve yoˬ.

29Yawˇnaˆtanˍ kʼaw‸ yaw hkʼaw‸ leh kʼoˆ ve, Ngaˬ pa teˇ gʼaˇ kanˉ te kʼo hkʼa deh‸ maˇ dawˇ nyi puiˉ. Chi beu‸ ngaˬ pehˇ gʼuiˬ a ciˉ gʼa caˇ leh hkʼaˬ ma awˬ gʼaˇ kʼaw‸ cawˬ la peuˬ ve hta‸ nyi sheˍ.

30Ya‸ nyi ngaˬ hui ve chaw teˇ hpaˍ canˇ paˍ hta‸ bawˆ da‸ chehˇ ve teˇ yanˇ, a shu yawˇ pfuhˇ taˍ ve caˇ tuˬ hta‸ caˇ ve hkʼe kʼo, hkʼaˬ ma awˬ gʼaˇ cawˬ tuˬ ve le. Yawˇ hui Hpiˇliˇtiˆ chaw hkʼaˬ ma ma hta‸ tiˇ pehˍ gʼa tuˬ ve hta‸ dawˇ nyi sheˍ, teh‸ kʼoˆ ve yoˬ.

31Oˇ ve teˇ nyi Iˉsaˍreˍlaˆ chaw teˇ hpaˍ lehˬ, Miˆmaˆ venˇ hta‸ te leh Aˍjaˍlonˍ venˇ lo hkʼa gaˬ, Hpiˇliˇtiˆ chaw hui hta‸ bawˆ gʼaˇ ve yoˬ. Iˉsaˍreˍlaˆ chaw teˇ hpaˍ gʼaˇ nuˇ leh awˍ meu‸ jaˇ peuˬ ve yoˬ.

32Hkʼe te leh, yawˇ hui canˇ paˍ teˇ hpaˍ geh bawˆ yuˬ gʼa taˍ ve yawˬ leh nuˇ teˇ hpaˍ hta‸ tiˇ pehˍ leh, awˬ suhˍ geh teˇ geh caˇ ve yoˬ.

33Oˇ htaˇ, chaw teˇ hpaˍ hpaˍ Sawˉlu‸ geh kʼai leh, Nyi loˬ. Nawˬ ve chaw teˇ hpaˍ shaˍ hta‸ awˬ suhˍ geh teˇ geh caˇ leh, Gʼuiˬsha hta‸ te ya‸ chehˇ ve yoˬ, teh‸ yawˇ hta‸ kʼoˆ piˇ ve yoˬ. Oˇ htaˇ Sawˉlu‸ kʼoˆ ve, Nawˬ hui lehˬ shaˍ ti‸ maˇ cawˬ ve chaw teˇ hpaˍ hpeh‸ ve yoˬ. Choˬ kaˬ ngaˬ geh haˉ pui shiˍ lonˉ teˇ maˬ hpfuhˆ veu laˇ-oˆ.

34Peuˬ hkʼaw‸ nawˉ, chaw oˇ ve teˇ hpaˍ geh kʼai leh, yawˇ hui ve nuˇ, yawˬ teˇ hpaˍ choˬ kaˬ lo gʼa‸ veu laˇ tuˬ ca kʼoˆ piˇ-oˆ. Yawˇ hui lehˬ, shaˍ hta‸ awˬ suhˍ geh teˇ geh caˇ leh, Gʼuiˬsha hta‸ maˇ gʼa te ya‸ tuˬ, nuˇ, yawˬ, oˇ ve teˇ hpaˍ hta‸ choˬ kaˬ lo tiˇ pehˍ leh gʼa te caˇ ve yoˬ, teh‸ yawˇ hui hta‸ kʼoˆ piˇ ve yoˬ. Hkʼe te leh, oˇ ve teˇ haˉ yawˇ hui nuˇ hkʼa peu-eˬ ve hta‸ oˇ kaˬ lo gʼa‸ veu laˇ leh tiˇ pehˍ ve yoˬ.

35Sawˇlu‸ lehˬ oˇ kaˬ lo Gʼuiˬsha hta‸ tuˉ tanˇ kuiˬ teˇ maˬ te ve yoˬ. Chi lehˬ, Sawˉlu‸ awˉ lawˉ peuˇ teˇ pawˆ te ve tuˉ tanˇ kuiˬ hpeh‸ ve yoˬ.

36Oˇ ve hkʼaw‸ nawˉ Sawˉlu‸ lehˬ, Hkeu‸, mvuhˇ hpeu‸ htaˇ ngaˬ hui Hpiˇliˇtiˆ chaw hui hta‸ ca bawˆ leh, yawˇ hui hkʼa peu-eˬ ve hta‸ te luˬ te sheˆ piˇ-a veuˬ, teh‸ yawˇ ve ma‸ yaˇ teˇ hpaˍ hta‸ kʼoˆ piˇ ve yoˬ. Oˇ htaˇ yawˇ ve ma‸ yaˇ teˇ hpaˍ lehˬ, Nawˬ te gaˇ ve hkʼe te-o, teh‸ yawˇ hta‸ kʼaw‸ yaw hkʼaw‸ piˇ ve yoˬ. Ya‸ hkʼaˇ paw hkuˇ lehˬ, Ngaˬ hui Gʼuiˬsha hta‸ awˉ lawˉ na nyi shaˍ, teh‸ kʼoˆ ve yoˬ.

37Hkʼe te leh Sawˉlu‸ Gʼuiˬsha hta‸ na nyi leh, Ngaˬ Hpiˇliˇtiˆ chaw hui hta‸ gʼa ca bawˆ tuˬ laˇ. Nawˬ ngaˬ hta‸ gʼaˇ shehˍ hpaˇ hpeh‸ la piˇ tuˬ ve laˇ, teh‸ kʼoˆ ve yoˬ. Ya‸ hkʼaˇ, oˇ ve teˇ nyi Gʼuiˬsha yawˇ hta‸ maˇ kʼaw‸ yaw hkʼaw‸ piˇ.

38Oˇ htaˇ, Sawˉlu‸ Iˉsaˍreˍlaˆ awˬ hoˉ awˬ naˬ teˇ hpaˍ hta‸ kʼoˆ piˇ ve, Ya‸ nyi a shu teˇ gʼaˇ venˇbaˆ te taˍ ve hta‸ gʼa shiˍ tuˬ, nawˬ hui choˬ kaˬ hpawnˬ la-o.

39Ngaˬ yaˇ paˍ Yawˇnaˆtanˍ awˬ to ka‸ venˇbaˆ te taˍ ve kʼo, yawˇ hta‸ ka‸ tiˇ pehˍ piˇ tuˬ yoˬ, teh‸ Iˉsaˍreˍlaˆ chaw hui ve htaiˍ hkʼaw‸ shehˍ hpaˇ, te‸ chehˇ ve Gʼuiˬsha mehˆ gʼuˇ suhˍ ngaˬ ka ti‸ te ve yoˬ, teh‸ kʼoˆ ve yoˬ. Ya‸ hkʼaˇ, chaw teˇ gʼaˇ ka‸ te‸ chiˉ maˇ kʼaw‸ yaw hkʼaw‸ piˇ.

40Oˇ htaˇ Sawˉlu‸ lehˬ, Nawˬ hui hkʼa peu-eˬ oˇ paˉ hpawˇ lo huˉ taˍ-o‸. Yawˇnaˆ tanˍ ngaˬ huiˉ maˬ choˬ hpawˇ lo huˉ taˍ tuˬ yoˬ, teh‸ yawˇ hui hta‸ kʼoˆ piˇ ve yoˬ. Nawˬ te gaˇ ve hkʼe te-o, teh‸ yawˇ hui yawˇ hta‸ kʼoˆ piˇ ve yoˬ.

41Oˇ htaˇ Sawˉlu‸ Gʼuiˬsha hta‸ kʼoˆ piˇ ve, Iˉsaˍreˍlaˆ ve jawˇmawˇ Gʼuiˬsha-oˬ, aˬ hto‸ ma pa taw nawˬ ya‸ nyi ngaˬ hta‸ maˇ kʼaw‸ yaw hkʼaw‸ laˇ ve le. Gʼuiˬsha-oˬ Yawˇnaˆtanˍ ngaˬ huiˉ maˬ venˇbaˆ cawˬ ve kʼo, Uˇrenˍ hta‸ cuˇ leh kʼaw‸ yaw hkʼaw‸ laˇ-oˆ. Iˉsaˍreˍlaˆ chaw hui venˇbaˆ cawˬ ve kʼo, Tuˇmenˍ hta‸ cuˇ leh kʼaw‸ yaw hkʼaw‸ laˇ-oˆ, teh‸ kʼoˆ ve yoˬ. Oˇ htaˇ Yawˇnaˆtanˍ leh Sawˉlu‸ venˇbaˆ cawˬ ve hta‸ hpeu‸ maˍ laˇ leh, Iˉsaˍreˍlaˆ chaw teˇ hpaˍ hpawˇ lo venˇbaˆ maˇ cawˬ ve hta‸ gʼa shiˍ ve yoˬ.

42Oˇ htaˇ Sawˉlu‸ lehˬ, Yawˇnaˆtanˍ ngaˬ huiˉ maˬ awˬ kaˍ lo suhˉ jehˬ laˇ-oˆ, teh‸ kʼoˆ ve yoˬ. Hkʼe te leh, Yawˇnaˆtanˍ venˇbaˆ cawˬ ve hta‸ kʼaw‸ hpeu‸ tawˆ la ve yoˬ.

43Oˇ htaˇ Sawˉlu‸ lehˬ, Nawˬ aˬ hto‸ ma te ve le, teh‸ Yawˇnaˆtanˍ hta‸ na nyi ve yoˬ. Yawˇnaˆtanˍ kʼoˆ ve, Ngaˬ pehˇ gʼuiˬ a ciˉ caˇ ve yoˬ. Chi beu‸ ngaˬ suh tuˬ gu taˍ peuˬ, teh‸ kʼoˆ ve yoˬ.

44Oˇ htaˇ Sawˉlu‸ lehˬ, Nawˬ hta‸ maˇ tiˇ pehˍ ve kʼo, Gʼuiˬsha ngaˬ hta‸ tiˇ pehˍ laˇ piˇ-oˆ, teh‸ yawˇ hta‸ kʼoˆ piˇ ve yoˬ.

45Ya‸ hkʼaˇ, Iˉsaˍreˍlaˆ chaw moˍ lonˉ Sawˇlu‸ hta‸ kʼoˆ piˇ ve, Iˉsaˍreˍlaˆ chaw awˬ pon ma‸ bawˆ gʼaˇ shehˍ hpaˇ Yawˇnaˆtanˍ hta‸ gʼa tiˇ pehˍ piˇ tuˬ ve laˇ. Nawˬ oˇ hkʼe maˇ gʼa te. Yawˇ ve uˉ hkeh mvuh teˇ mvuh ka‸ maˇ gʼa mehˉ piˇ, teh‸ te‸ chehˇ ve Gʼuiˬsha awˬ meh hta‸ cuˇ leh ngaˬ hui ka ti‸ te ve yoˬ. Ya‸ nyi yawˇ te peuˬ ve kanˉ lehˬ, Gʼuiˬsha hta‸ cuˇ leh te taˍ ve yoˬ, teh‸ kʼoˆ ve yoˬ. Hkʼe te leh, chaw oˇ ve teˇ hpaˍ lehˬ Yawˇnaˆtanˍ hta‸ maˇ gʼa tiˇ pehˍ tuˬ tawˍ taˍ ve yoˬ.

46Sawˉlu‸ htawˇ, Hpiˇliˇtiˆ chaw hui hta‸ maˇ ca kʼaw‸ bawˆ-o. Yawˇ hui hkʼa peu-eˬ a shu yawˇ ve mvuhˇmiˬ lo kʼaw‸ kʼo‸-e ve yoˬ.

47Sawˉlu‸ lehˬ Iˉsaˍreˍlaˆ chaw hui ve jawˇmawˇ hpeh‸ la peuˬ hkʼaw‸ nawˉ, yawˇ hui awˬ paˇ awˬ kuiˬ lo chehˇ ve Mawˇbaˆ chaw, Aˍmonˍ chaw, Eˇdonˍ chaw, Zawˇbaˆ jawˇmawˇ teˇ hpaˍ leh, Hpiˇliˇti‸ chaw hui hta‸ ma‸ ca bawˆ ve yoˬ. Ma‸ ca bawˆ ve teˇ pawˆ le le yawˇ lehˬ gʼaˇ shehˍ hpaˇ hpeh‸ ve yoˬ.

48Yawˇ lehˬ ha‸ hanˉ jaˇ leh Aˍmaˍlehˆ chaw hui hta‸ htawˇ bawˆ gʼaˇ ve yoˬ. Yawˇ lehˬ, Iˉsaˍ reˍlaˆ chaw hui hta‸ canˇ paˍ ve la‸ sheh hkʼaw ponˬ piˇ ve yoˬ.

49Sawˉlu‸ ve yaˇ teˇ hpaˍ lehˬ, Yawˇnaˆtanˍ, Iˉsaˍviˍ, Maˍlaˍhkiˇshaˆ hui hpeh‸ ve yoˬ. Yawˇ ve yaˇ miˇ teˇ hpaˍ lehˬ, Meˍraˆ leh Miˇhkaˍlaˆ hui hpeh‸ ve yoˬ.

50Yawˇ ve awˬ miˇ ma lehˬ, Aˍhiˆmanˍ ve yaˇ miˇ Aˍhiˆnonˍ hpeh‸ ve yoˬ. Yawˇ ve ma‸ poˍ lonˉ lehˬ yawˇ ve aˉ shuˍ paˍ Neˍraˆ ve yaˇ Aˍbaˍnaˍ hpeh‸ ve yoˬ.

51Sawˉlu‸ awˬ pa Kiˇshaˆ leh Aˍbaˍnaˍ awˬ paˍ Neˍraˆ lehˬ Aˍbiˍlaˆ ve yaˇ teˇ hpaˍ hpeh‸ ve yoˬ.

52Sawˉlu‸ a sha‸ te‸ chehˇ ve teˇ co, yawˇ lehˬ Hpiˇliˇtiˆ chaw hui hta‸ gʼaˇ hte‸ bawˆ da‸ chehˇ ve yoˬ. Hkʼe te leh, ha‸ hanˉ ve chaw teˇ gʼaˇ le le ve hta‸ yawˇ kuˬ yuˬ leh yawˇ ve ma‸ yaˇ te tcuh ve yoˬ.

← Chapter 13 Jump to: Chapter 15 →