1 Samuel 9

Lahu Bible Edited © Thailand Bible Society and Bible Society of Myanmar, 2010, 2020.

← Chapter 8 Jump to: Chapter 10 →

1Beˍyaˍmenˍ awˬ ceuˬ awˬ hkʼaˇ awˬ hkʼaw lo, Kiˇshaˆ teh‸ kʼoˆ ve chaw teˇ gʼaˇ cawˬ ve yoˬ. Yawˇ lehˬ, Aˍhpiˆ, Beˍhkawˇraˆ, Zeˍyawˍ, Aˍbiˍlaˆ hui ve awˬ ceuˬ awˬ hkʼaˇ hpeh‸ ve yoˬ. Kiˇshaˆ lehˬ paw sha jaˇ leh, awˬ me‸ awˬ hponˇ cawˬ ve chaw hpeh‸ ve yoˬ.

2Yawˇ lehˬ, Sawˇlu‸ teh‸ kʼoˆ ve yaˇ paˍ teˇ gʼaˇ cawˬ ve yoˬ. Yaˇ paˍ oˇ ve awˬ hkiˇ awˬ naˬ da‸ jaˇ ve chaw haˉ paˍ hpeh‸ ve yoˬ. Iˉsaˍreˍlaˆ chaw awˬ hkʼaw lo, yawˇ hkʼe taw da‸ ve chaw teˇ gʼaˇ ka‸ maˇ cawˬ. Yawˇ lehˬ, awˬ nu ve chaw teˇ hpaˍ a‸ kehˉ teˇ jaˆ hkʼe mvuh ve yoˬ.

3Kiˇshaˆ ve piˉ laˬ teˇ hpaˍ hpaˍ mehˉ kʼai ve yoˬ. Hkʼe te leh yawˇ lehˬ, Nawˬ ve awˬ ceˬ teˇ gʼaˇ hta‸ shiˍ veu leh piˉ laˬ hta‸ ca nyi-o, teh‸ Sawˇlu‸ hta‸ kʼoˆ piˇ ve yoˬ.

4Oˇ htaˇ, yawˇ huiˉ maˬ Eˇhpaˍrenˍ leh Shaˍliˇshaˆ mvuhˇmiˬ lo kʼai ve yoˬ. Ya‸ hkʼaˇ, yawˇ huiˉ maˬ piˉ laˬ hta‸ ca maˇ mawˬ. Hkʼe te leh, yawˇ huiˉ maˬ Saˍ lehnˍ mvuhˇmiˬ hkʼaw ca nyi ve yoˬ. Ya‸ hkʼaˇ ca maˇ mawˬ. Oˇ ve hkʼaw‸ nawˉ, yawˇ huiˉ maˬ Beˍyaˍmenˍ chaw hui ve mvuhˇmiˬ hkʼaw ca nyi kʼai ve yoˬ. Ya‸ hkʼaˇ, ca maˇ mawˬ.

5Yawˇ huiˉ maˬ Zuˇhpaˆ chaw hui ve mvuhˇmiˬ hkʼaw gaˬ la ve teˇ yanˇ, Sawˉlu‸ lehˬ Hkeu‸, ngaˬ huiˉ maˬ aˉ hkʼaw kʼaw‸ kʼo‸-e veuˬ. Ngaˬ pa lehˬ piˉ laˬ teˇ hpaˍ awˬ pon maˇ kʼaw‸ dawˇ haˍ leh, ngaˬ huiˉ maˬ awˬ pon dawˇ haˍ chehˇ naˍ maˇ shiˍ, teh‸ yawˇ ve awˬ ceˬ paˍ hta‸ kʼoˆ piˇ ve yoˬ.

6Oˇ htaˇ yawˇ ve awˬ ceˬ paˍ kʼoˆ ve, Law sheˍ. Venˇ chi hkʼaw da‸ kehˬ ve chaw teˇ gʼaˇ chehˇ taˍ ve yoˬ. Yawˇ hkʼa kʼoˆ ve teˇ hpaˍ awˬ tehˬ awˬ na cawˇ ve pa taw, chaw yaˇ teˇ hpaˍ yawˇ hta‸ taˍ uiˍ leh yawˆ yan chehˇ ve yoˬ. Ngaˬ huiˉ maˬ yawˇ hta‸ ca na nyi shaˍ. Ngaˬ huiˉ maˬ piˉ laˬ oˇ ve teˇ hpaˍ hta‸ hkʼaˬ lo gʼa ca-e tuˬ yawˇ kʼoˆ maˍ laˇ gʼa tuˬ yoˬ hehˉ, teh‸ yawˇ hta‸ kʼoˆ piˇ ve yoˬ.

7Oˇ htaˇ Sawˇ lu‸ lehˬ, Ngaˬ huiˉ maˬ yawˇ geh kʼai ve kʼo, yawˇ hta‸ aˬ hto‸ ma gʼa piˇ tuˬ le. Ngaˬ huiˉ maˬ geh caˇ tuˬ ka‸ peuˬ-oˬ. Yawˇ hta‸ piˇ tuˬ la‸ shawnˍ te‸ chiˉ maˇ cawˬ, teh‸ yawˇ hta‸ kʼaw‸ kʼoˆ piˇ ve yoˬ.

8Oˇ htaˇ awˬ ceˬ paˍ lehˬ, Cho-e‸, ngaˬ geh lo hpu ngaˇ muˇ cawˬ ve yoˬ. Hpu chi yawˇ hta‸ piˇ ve kʼo, yawˇ lehˬ piˉ laˬ hkʼaˬ lo chehˇ taˍ ve ngaˬ huiˉ maˬ hta‸ hto laˇ hpeh‸ tuˬ yoˬ, teh‸ kʼoˆ ve yoˬ.

9Oˇ htaˇ Sawˇlu‸ lehˬ, Hkʼe yoˬ kʼo da‸ ve yoˬ. Hkeu‸, ngaˬ huiˉ maˬ kai-a veuˬ, teh‸ kʼoˆ ve yoˬ. Hkʼe te leh, yawˇ huiˉ maˬ da‸ kehˬ ve chaw oˇ ve chehˇ taˍ kuiˬ venˇ hkʼaw lo‸-e ve yoˬ.

10Yawˇ huiˉ maˬ venˇ lo taˆ-e chehˇ ve teˇ yanˇ, iˉ kaˆ ca hkʼo la ve yaˇ miˇ teˇ hpaˍ hta‸ hpuˇ da‸ ve yoˬ. Oˇ htaˇ yawˇ huiˉ maˬ lehˬ, Mawˬ puiˉ shehˍ hpaˇ venˇ hkʼaw chehˇ aw laˇ, teh‸ na nyi ve yoˬ.

11(Aˬ sho-eˬ ve chaw teˇ hpaˍ lehˬ Gʼuiˬsha hta‸ teˇ ceuˬ ceuˬ na nyi tuˬ cawˬ ve kʼo, Ngaˬ hui mawˬ puiˉ shehˍ hpaˇ geh kʼai-a veuˬ, teh‸ kʼoˆ ve yoˬ. Awˬ lawn kʼo, aˬ sho-eˬ ve chaw teˇ hpaˍ Gʼuiˬsha ve tcuh kaˍ paˍ hta‸, Mawˬ puiˉ shehˍ hpaˇ, teh‸ kʼoˆ ve yoˬ.)

12Oˇ htaˇ yaˇ miˇ oˇ ve teˇ hpaˍ kʼaw‸ yaw hkʼaw‸ leh kʼoˆ ve, Eˇ-a‸, yawˇ chehˇ taˍ ve yoˬ. Nyi loˬ, chi beu‸ yawˇ nawˬ huiˉ maˬ gʼuˇ suhˍ lo kʼai chehˇ taˍ ve yoˬ. Haˆ kʼai loˬ. Chaw yaˇ teˇ hpaˍ ya‸ nyi hkʼaw pui hkʼoˆ lo Gʼuiˬsha hta‸ tuˉ tanˇ piˇ tuˬ ve pa taw, yawˇ chi beu‸ venˇ hkʼaw laˬ chehˇ taˍ ve yoˬ.

13Nawˬ huiˉ maˬ venˇ hkʼaw gaˬ ve teˇ yanˇ, yawˇ hkʼaw hkʼoˆ lo awˍ maˇ ca caˇ sheˍ gʼuˇ suhˍ yawˇ hta‸ gʼa mawˬ tuˬ yoˬ. Yawˇ oˇ kaˬ lo maˇ gaˬ sheˍ ve ceh ceh, chaw teˇ gʼaˇ ka‸ awˍ caˇ tuˬ ve maˇ heˆ. Awˬ lawn kʼo, yawˇ lehˬ tuˉ tanˇ tuˬ hta‸ awˉ lawˉ bon gʼa na‸ piˇ tuˬ sheˍ ve pa taw yoˬ. Oˇ hkʼe te peuˬ hkʼaw‸ nawˉ heh‸, hkehˉ chaw teˇ hpaˍ awˍ caˇ tuˬ yoˬ. Haˆ kʼai loˬ. Nawˬ huiˉ maˬ yawˇ hta‸ oˇ kaˬ lo gʼa hpuˇ da‸ tuˬ yoˬ, teh‸ yawˇ huiˉ maˬ hta‸ kʼoˆ piˇ ve yoˬ.

14Hkʼe te leh, yawˇ huiˉ maˬ venˇ hkʼaw kʼai ve yoˬ. Yawˇ hui kʼai chehˇ ve teˇ yanˇ, Saˍmoeˍ laˆ lehˬ tuˉ tanˇ kuiˬ lo kʼai chehˇ ve hta‸ gʼa mawˬ ve yoˬ.

15Sawˇlu‸ maˇ gaˬ la sheˍ ve awˬ gʼuˇ suhˍ teˇ nyi htaˇ, Gʼuiˬsha Saˍmo-eˍlaˆ hta‸ chi hkʼe kʼoˆ piˇ taˍ ve yoˬ.

16Shawˉ pawˍ chi teˇ yanˇ gaˬ kʼo, Beˍyaˍmenˍ awˬ ceuˬ awˬ hkʼaˇ awˬ hkʼaw lo ve chaw teˇ gʼaˇ hta‸ nawˬ geh peu laˇ tuˬ yoˬ. Ngaˬ ve Iˉsaˍreˍlaˆ chaw hta‸ uˉ peunˍ leh, yawˇ hui hta‸ Hpiˇliˇtiˆ chaw hui ve la‸ sheh hkʼaw ponˬ piˇ tuˬ yawˇ hta‸ naˍ manˇ pfuhˍ piˇ-oˆ. Awˬ lawn kʼo, ngaˬ ve chaw teˇ hpaˍ hkʼaˬ ma gʼa tu‸ gʼa hkanˍ chehˇ ve hta‸ ngaˬ gʼa mawˬ peuˬ leh, yawˇ hui kuˬ hawˬ chehˇ ve awˬ hkawˇ hta‸ htawˇ gʼa kaˇ peuˬ, teh‸ kʼoˆ piˇ ve yoˬ.

17Saˍmo-eˍlaˆ Sawˇlu‸ hta‸ gʼa mawˬ ve teˇ yanˇ, Gʼuiˬsha yawˇ hta‸ kʼoˆ piˇ ve, Ngaˬ nawˬ hta‸ kʼoˆ piˇ taˍ peuˬ ve chaw lehˬ chi hpaˇ yoˬ. Yawˇ lehˬ ngaˬ ve chaw hta‸ gʼa uˉ peunˍ tuˬ yoˬ, teh‸ kʼoˆ ve yoˬ.

18Oˇ htaˇ, Sawˇlu‸ venˇ taˍ meu‸ hpe‸ lo Saˍmo-eˍlaˆ geh jiˆ kʼai leh, Mawˬ puiˉ ve chaw hkʼaˬ lo chehˇ le. Ngaˬ hta‸ a ciˉ hto laˇ-oˆ, teh‸ yawˇ hta‸ kʼoˆ piˇ ve yoˬ.

19Saˍmo-eˍlaˆ yawˇ hta‸ kʼaw‸ yaw hkʼaw‸ leh kʼoˆ piˇ ve, Ngaˬ lehˬ mawˬ puiˉ shehˍ hpaˇ hpeh‸ ve yoˬ. Ngaˬ gʼuˇ suhˍ tuˉ tanˇ kuiˬ lo kʼai-o. Nawˬ huiˉ maˬ ya‸ nyi ngaˬ geh awˍ gʼa caˇ tuˬ yoˬ. Shawˉ pawˍ mvuhˇ htiˇ la htaˇ heh‸, nawˬ huiˉ maˬ ve na nyi hkawˇ hta‸ ngaˬ kʼaw‸ yaw hkʼaw‸ laˇ leh, nawˬ huiˉ maˬ hta‸ kʼo‸-e peu laˇ tuˬ yoˬ.

20Ponˬ laˬ ve shehˆ nyi htaˇ mehˉ kʼai taˍ ve piˉ laˬ teˇ hpaˍ awˬ pon taˇ dawˇ hkiˉ. Awˬ lawn kʼo, piˉ laˬ oˇ ve teˇ hpaˍ hta‸ kʼaw‸ ca mawˬ taˍ peuˬ. Ya‸ hkʼaˇ, Iˉsaˍreˍlaˆ chaw hui heuˆ gaˇ jaˇ chehˇ ve chaw a shu le. Nawˬ leh nawˬ pa ve yehˬ yaˇ kʼa yaˇ teˇ hpaˍ hpeh‸ ve yoˬ, teh‸ yawˇ hta‸ kʼoˆ piˇ ve yoˬ.

21Oˇ htaˇ Sawˇlu‸ kʼoˆ ve, Ngaˬ lehˬ Iˉsaˍreˍlaˆ chaw awˬ hkʼaw lo shu a‸ kehˉ i jaˇ ve chaw ceuˬ hpeh‸ leh, ngaˬ ve yehˬ kʼa htawˇ ngaˬ ve chaw ceuˬ awˬ hkʼaw lo shu a‸ kehˉ i jaˇ ve yehˬ kʼa hpeh‸ ve yoˬ. Aˬ hto‸ ma pa taw, nawˬ ngaˬ hta‸ tawˇ chi hkʼe yaw laˇ chehˇ ve le, teh‸ yawˇ hta‸ kʼoˆ piˇ ve yoˬ.

22Oˇ ve hkʼaw‸ nawˉ Saˍmo-eˍlaˆ lehˬ, Sawˉlu‸ leh yawˇ ve awˬ ceˬ paˍ hta‸ bawehˇ lonˉ teˇ maˬ hkʼaw shiˍ kʼai leh, awˬ me‸ awˬ hponˇ cawˬ ve chehˇ kuiˬ lo mui tcuh ve yoˬ. Oˇ kaˬ lo hkehˉ chaw 30 gʼaˇ chehˇ taˍ ve yoˬ.

23Oˇ htaˇ Saˍmo-eˍlaˆ lehˬ, Ngaˬ nawˬ hta‸ hkʼa deh‸ fuiˍ teh taˍ tuˬ kʼoˆ piˇ taˍ ve caˇ tuˬ, chi beu‸ ngaˬ geh yuˬ veu laˇ-oˆ, teh‸ yawˇ ve awˍ te paˍ hta‸ kʼoˆ piˇ ve yoˬ.

24Hkʼe te leh, awˍ te paˍ oˇ ve lehˬ hkʼa deh‸ fuiˍ teh taˍ ve pfuhˬ teh teˇ paˉ yuˬ veu laˇ leh, Sawˇlu‸ gʼuˇ suhˍ teh piˇ ve yoˬ. Oˇ htaˇ Saˍmo-eˍlaˆ kʼoˆ ve, Nyi loˬ. Choˬ kaˬ lo nawˬ awˬ pon fuiˍ teh taˍ ve caˇ tuˬ gaˬ la peuˬ. Caˇ-oˆ. Awˬ lawn kʼo, ya‸ nyi ngaˬ kuˬ taˍ ve hkehˉ chaw teˇ hpaˍ geh nawˬ awˍ gʼa caˇ tuˬ, caˇ tuˬ chi ve nawˬ awˬ pon fuiˍ teh taˍ laˇ ve yoˬ. Hkʼe te leh, oˇ ve teˇ nyi Sawˉlu‸ Saˍmo-eˍlaˆ geh teˇ geh awˍ caˇ ve yoˬ.

25Yawˇ hui tuˉ tanˇ kuiˬ lo tu leh venˇ hkʼaw kʼaw‸ gaˬ la ve teˇ yanˇ, yawˇ hui Sawˉlu‸ awˬ pon zuh‸ kuiˬ hkʼa deh‸ gu piˇ leh,

26yawˇ oˇ kaˬ lo haˉ ve yoˬ. Mvuhˇ htiˇ la htaˇ Saˍmo-eˍlaˆ Sawˉlu‸ hta‸ kuˬ leh, Tu loˬ. Ngaˬ nawˬ hta‸ kʼaw‸ kʼo‸-e peu laˇ tuˬ yoˬ, teh‸ kʼoˆ ve yoˬ. Sawˉlu‸ tu la leh Saˍmo-eˍlaˆ yawˇ huiˉ maˬ tawˆ kʼai ve yoˬ.

27Ven ˇ baˬ lo gaˬ ve teˇ yanˇ Saˍmo-eˍlaˆ lehˬ, Nawˬ ve awˬ ceˬ paˍ hta‸ ngaˬ huiˉ maˬ gʼuˇ suhˍ kʼai taˍ laˇ tuˬ kʼoˆ piˇ-oˆ, teh‸ Sawˇlu‸ hta‸ kʼoˆ piˇ ve yoˬ. Awˬ ceˬ paˍ oˇ ve tawˆ kʼai ve teˇ yanˇ Saˍmo-eˍlaˆ lehˬ, Nawˬ choˬ kaˬ teˇ hkui chehˇ taˍ sheˍ. Gʼuiˬsha kʼoˆ laˇ ve tawˇ ngaˬ nawˬ hta‸ hto laˇ shaˍ, teh‸ Sawˇlu‸ hta‸ kʼoˆ piˇ ve yoˬ.

← Chapter 8 Jump to: Chapter 10 →