1 Samuel 5

Lahu Bible Edited © Thailand Bible Society and Bible Society of Myanmar, 2010, 2020.

← Chapter 4 Jump to: Chapter 6 →

1Hpiˇliˇtiˆ chaw lehˬ, Gʼuiˬsha ve ka ti‸ shaˉ caˆ ta kʼoˍ hta‸ gʼa peuˬ hkʼaw‸ nawˉ, ta kʼoˍ oˇ ve hta‸ Eˇbaˍneˍzaˍ venˇ lo te leh Aˍshoˆ venˇ lo yuˬ kʼai ve yoˬ.

2Yawˇ hui lehˬ ta kʼoˍ oˇ ve hta‸ yawˇ hui ve gʼuiˬsha Daˍgonˍ ve bon yehˬ lo yuˬ kʼai leh, shaˉ ho‸ oˇ ve awˬ paˇ lo teh taˍ ve yoˬ.

3Shawˉ pawˍ mvuhˇ htiˇ la ve teˇ yanˇ, Daˍgonˍ shaˉ ho‸ lonˉ oˇ ve lehˬ, Gʼuiˬsha ve ka ti‸ shaˉ caˆ ta kʼoˍ gʼuˇ suhˍ lo boˆ taˍ laˇ ve hta‸ Aˍshoˆ venˇ yaˇ teˇ hpaˍ gʼa mawˬ ve yoˬ. Hkʼe te leh, yawˇ hui shaˉ ho‸ lonˉ oˇ ve hta‸ hkʼa deh‸ kʼaw‸ cawˍ tu piˇ ve yoˬ.

4Shawˉ pawˍ teˇ nyi mvuhˇ htiˇ la ve teˇ yanˇ, shaˉ ho‸ lonˉ oˇ ve lehˬ Gʼuiˬsha ve ka ti‸ shaˉ caˆ ta kʼoˍ gʼuˇ suhˍ lo teˇ pawˆ kʼaw‸ paiˍ taˍ laˇ ve hta‸ yawˇ hui gʼa mawˬ ve yoˬ. Yawˇ ve oˉ kʼoˍ leh la‸ sheh nyiˇ paˉ paˉ cheˆ kʼai leh, yehˬmiˉhpe‸ lo ce taˍ ve yoˬ.

5Chi hta‸ pa taw, Daˍgonˍ ve paw hkuˇ teˇ hpaˍ leh shaˉ ho‸ oˇ ve hta‸ oˉ kʼoˍ ca pui la ve chaw teˇ hpaˍ, yehˬmiˉhpe‸ oˇ ve hta‸ maˇ naˆ toˇ leh, awˬ hkʼoˆ lo ceh ngaˉ kʼoˇ kʼai ve yoˬ.

6Gʼuiˬsha lehˬ Aˍshoˆ venˇ hkʼaw chehˇ ve chaw hui hta‸ hehnˇ chaweh ciˍ yanˍ piˇ leh, yawˇ hui hta‸ kawˆ jaˇ piˇ lawˬ ve yoˬ. Yawˇ lehˬ venˇ yaˇ oˇ ve teˇ hpaˍ leh, venˇ oˇ ve awˬ paˇ awˬ kui lo chehˇ ve chaw hui hta‸ shaˉ chuˇ lonˉ teˇ hpaˍ tawˆ la piˇ ve yoˬ.

7Chi hkʼe hpeh‸ la chehˇ ve hta‸ chaw oˇ ve teˇ hpaˍ gʼa mawˬ ve teˇ yanˇ, Iˉsaˍ reˍlaˆ ve Gʼuiˬsha lehˬ, ngaˬ hui leh ngaˬ hui ve Daˍgonˍ gʼuiˬsha hta‸ ciˍ yanˍ laˇ chehˇ ve yoˬ. Ka ti‸ shaˉ caˆ ta kʼoˍ chi ve hta‸ ngaˬ hui geh teh taˍ maˇ hpeh‸, teh‸ kʼoˆ ve yoˬ.

8Hkʼe te leh, yawˇ hui lehˬ Iˉsaˍreˍlaˆ Gʼuiˬsha ve ka ti‸ shaˉ caˆ ta kʼoˍ hta‸ ngaˬ hui hkʼaˬ hkʼe gʼa te tuˬ le, teh‸ yawˇ hui hta‸ na nyi ve yoˬ. Oˇ htaˇ yawˇ hui lehˬ, Ta kʼoˍ oˇ ve hta‸ Gaˍtaˆ venˇ lo yuˬ kʼai-o, teh‸ kʼoˆ ve yoˬ. Hkʼe te leh, yawˇ hui ta kʼoˍ oˇ ve hta‸ Gaˍtaˆ venˇ lo yuˬ kʼai ve yoˬ.

9Ta kʼoˍ oˇ ve venˇ oˇ ve hkʼaw gaˬ la ve teˇ yanˇ, Gʼuiˬsha lehˬ venˇ yaˇ oˇ ve teˇ hpaˍ hta‸ ciˍ yanˍ piˇ leh yawˇ hui hta‸ kawˆ jaˇ piˇ lawˬ ve yoˬ. Gʼuiˬsha lehˬ venˇ oˇ ve hkʼaw chehˇ taˍ ve chaw mawˇ yaˇ nehˬ hkʼa peu-eˬ ve hta‸ shaˉ chuˇ lonˉ teˇ hpaˍ tawˆ la piˇ ve yoˬ.

10Hkʼe te leh, yawˇ hui lehˬ ka ti‸ shaˉ caˆ ta kʼoˍ oˇ ve hta‸ Eˇkaˍronˍ venˇ lo kʼaw‸ yuˬ kʼai ve yoˬ. Ta kʼoˍ oˇ ve gaˬ la ve teˇ yanˇ, venˇ yaˇ teˇ hpaˍ gʼaˇ hte‸ kuˬ leh, Ngaˬ hui hta‸ tiˇ pehˍ laˇ tuˬ yawˇ hui lehˬ Iˉsaˍreˍlaˆ Gʼuiˬsha ve ka ti‸ shaˉ caˆ ta kʼoˍ hta‸ choˬ kaˬ lo yuˬ veu laˇ peuˬ, teh‸ kʼoˆ ve yoˬ.

11Hkʼe te leh, yawˇ hui Hpiˇliˇtiˆ jawˇmawˇ oˇ ve teˇ hpaˍ hta‸ teˇ pawˆ ca kʼaw‸ kuˬ leh, Iˉsaˍreˍlaˆ Gʼuiˬsha ve ka ti‸ shaˉ caˆ ta kʼoˍ chi, ngaˬ hui leh ngaˬ hui ve miˇ yaˇ teˇ hpaˍ hta‸ maˇ gʼa tiˇ pehˍ laˇ tuˬ, yawˇ hui ve mvuhˇmiˬ lo ca kʼaw‸ yuˬ kʼoˬ piˇ-oˆ, teh‸ yawˇ hui hta‸ kʼoˆ piˇ ve yoˬ. Gʼuiˬsha lehˬ, venˇ yaˇ oˇ ve teˇ hpaˍ hta‸ htawˇ hehnˇ chaweh ciˍ yanˍ piˇ chehˇ ve pa taw yawˇ hui kawˆ jaˇ ve yoˬ.

12Maˇ suh-e ve chaw teˇ hpaˍ lehˬ, shaˉ chuˇ lonˉ tawˆ ve hta‸ gʼa hkanˍ ve pa taw, yawˇ hui ve gʼuiˬsha teˇ hpaˍ geh bon gʼaˇ hte‸ lawˬ ve yoˬ.

← Chapter 4 Jump to: Chapter 6 →