1 Samuel 18

Lahu Bible Edited © Thailand Bible Society and Bible Society of Myanmar, 2010, 2020.

← Chapter 17 Jump to: Chapter 19 →

1Sawˉlu‸ leh Daˍviˆ na‸ uˉ te da‸ peuˬ hkʼaw‸ nawˉ, Sawˉlu‸ ve yaˇ paˍ Yawˇnaˆtanˍ Daˍviˆ hta‸ nyi ma cawˇ jaˇ leh, yawˇ awˬ to hta‸ ha‸ ve hkʼe Daˍviˆ hta‸ ha‸ ve yoˬ.

2Oˇ ve teˇ nyi hta‸ te leh Sawˉlu‸ lehˬ, Daˍviˆ hta‸ yawˇ geh ceh tiˉ chehˇ tcuh taˍ ve yoˬ. Yawˇ hta‸ aˉ hkʼaw lo maˇ kʼaw‸ kʼo‸-e tcuh-o.

3Yawˇnaˆtanˍ lehˬ Daˍviˆ hta‸ ha‸ jaˇ ve pa taw, suh htaˇ hkʼa gaˬ yawˇ hta‸ awˬ chawˇ te tuˬ ka ti‸ te ve yoˬ.

4Yawˇ veu‸ chehˇ ve veu‸ kʼaˇ hta‸ kʼehˆ leh Daˍviˆ hta‸ piˇ ve awˬ hkʼoˆ, yawˇ ve aˉhtaw, hkaˆ leh haˍ pi caˆ teˇ hpaˍ htawˇ yawˇ hta‸ piˇ ve yoˬ.

5Daˍviˆ lehˬ, Sawˉlu‸ hkʼa te tcuh ve kanˉ hkʼa peu-eˬ ve hta‸ hkʼa deh‸ na yuˬ leh te piˇ ve pa taw, Sawˉlu‸ yawˇ hta‸ yawˇ ve ma‸ poˍ te tcuh ve yoˬ. Sawˉlu‸ chi hkʼe te piˇ ve hta‸ yawˇ ve ma‸ yaˇ leh ma‸ poˍ hkʼa peu-eˬ nyi ma cawˇ ve yoˬ.

6Daˍviˆ lehˬ, Gawˇliˇya‸ hta‸ tiˇ pehˍ peuˬ hkʼaw‸ nawˉ, ma‸ yaˇ teˇ hpaˍ venˇ hkʼaw lo kʼaw‸ la chehˇ ve teˇ yanˇ, Iˉsaˍreˍlaˆ mvuhˇmiˬ hkʼaw chehˇ ve yaˇ miˇ teˇ hpaˍ, Sawˉlu‸ hta‸ ca ha‸ yuˬ tuˬ tawˆ la ve yoˬ.

7Yawˇ hui tinˍ hteˆ, kʼaˍ hkʼeˆ, kʼa muiˬ hkawˇ kʼa leh kʼoˆ ve, Sawˉlu‸ lehˬ chaw awˬ hinˉ gʼaˇ hta‸ tiˇ pehˍ ve yoˬ. Ya‸ hkʼaˇ, Daˍviˆ lehˬ chaw awˬ meunˍ gʼaˇ hta‸ tiˇ pehˍ ve yoˬ, teh‸ kʼoˆ ve yoˬ.

8Chi hta‸ Sawˉlu‸ gʼa kaˇ ve teˇ yanˇ, yawˇ nyi ma maˇ sha. Yawˇ nyi ma zuhˆ leh kʼoˆ ve, Chaw oˇ ve teˇ hpaˍ lehˬ Daˍviˆ chaw awˬ meunˍ gʼaˇ hta‸ tiˇ pehˍ leh, ngaˬ lehˬ chaw awˬ hinˉ gʼaˇ hta‸ ceh tiˇ pehˍ ve yoˬ, teh‸ kʼoˆ chehˇ ve yoˬ. Maˇ maw maw yawˇ hui yawˇ hta‸ jawˇmawˇ te tcuh tuˬ yoˬ, teh‸ kʼoˆ ve yoˬ.

9Oˇ ve teˇ nyi hta‸ te leh, yawˇ Daˍviˆ hta‸ hkawehˉ ve nyi ma cawˬ la ve yoˬ.

10Awˬ hkʼaw‸ nawˉ teˇ nyi, maˇ da‸ ve awˬ ha Sawˉlu‸ awˬ hkʼoˆ kʼaw‸ ya‸ la ve yoˬ. Hkʼe te leh, yawˇ lehˬ hawˉ yehˬ hkʼaw chaw gʼuˇ hkʼe te chehˇ ve yoˬ. Daˍviˆ lehˬ ponˬ laˬ htaˇ hkʼe tinˍ hteˆ chehˇ leh, Sawˉlu‸ lehˬ gehˇ teˇ maˬ yuˬ taˍ ve yoˬ.

11Oˇ htaˇ Sawˉlu‸ lehˬ, Ngaˬ yawˇ hta‸ juˆ pehˍ shaˍ, teh‸ kʼoˆ leh yawˇ hta‸ gehˇ nyiˇ pawˆ yuˬ baˬ hpehˇ ve yoˬ. Ya‸ hkʼaˇ, Daˍviˆ hta‸ maˇ heuˆ.

12Gʼuiˬsha yawˇ hta‸ chiˇ baˬ peuˬ leh, Daˍviˆ geh chehˇ ve hta‸ yawˇ gʼa shiˍ ve pa taw, Sawˉlu‸ Daˍviˆ hta‸ kawˆ la ve yoˬ

13Hkʼe te leh, yawˇ Daˍviˆ hta‸ chaw teˇ hinˉ gʼaˇ awˬ hkʼoˆ ma‸ poˍ lonˉ te tcuh leh, ma‸ ca bawˆ tcuh ve yoˬ. Daˍviˆ lehˬ, yawˇ ve ma‸ yaˇ teˇ hpaˍ hta‸ shiˍ veu leh ma‸ bawˆ kuiˬ lo kʼai ve yoˬ.

14Gʼuiˬsha yawˇ geh chehˇ taˍ ve pa taw, yawˇ ma‸ bawˆ ve teˇ pawˆ le le gʼaˇ ve yoˬ.

15Daˍviˆ lehˬ, ma‸ bawˆ gʼaˇ puiˉ jaˇ ve hta‸ Sawˉlu‸ gʼa mawˬ ve teˇ yanˇ, yawˇ leuˉ leh Daˍviˆ hta‸ kawˆ jaˇ la ve yoˬ.

16Daˍviˆ lehˬ da‸ ve awˬ hoˉ teˇ gʼaˇ hpeh‸ ve pa taw, Iˉsaˍreˍlaˆ leh Yuˇda‸ mvuhˇmiˬ hkʼaw chehˇ ve chaw hkʼa peu-eˬ yawˇ hta‸ ha‸ ve yoˬ.

17Oˇ htaˇ Sawˉlu‸ lehˬ, Nawˬ ha‸ hanˉ ve hkʼaw ngaˬ ve kanˉ hta‸ te leh, Gʼuiˬsha ve ma‸ hta‸ bawˆ ve kʼo, ngaˬ ve yaˇ miˇ uiˍ Meˍraˆ nawˬ hta‸ piˇ laˇ tuˬ yoˬ, teh‸ Daˍviˆ hta‸ kʼoˆ piˇ ve yoˬ. (Chi hkʼe te ve hkʼaw, Hpiˇliˇtiˆ chaw teˇ hpaˍ Daˍviˆ hta‸ tiˇ pehˍ leh, yawˇ awˬ to Daˍviˆ hta‸ tiˇ pehˍ tuˬ maˇ loˍ, teh‸ Sawˉ lu‸ dawˇ taˍ ve yoˬ)

18Ya‸ hkʼaˇ Daˍviˆ leh, Jawˇmawˇ ve awˬ maˉ paˍ gʼa te tuˬ, ngaˬ leh ngaˬ ve yehˬ yaˇ kʼa yaˇ teˇ hpaˍ lehˬ hkʼaˬ hkʼe ve chaw hpeh‸ ve le, teh‸ kʼaw‸ yaw hkʼaw‸ piˇ ve yoˬ.

19Ya‸ hkʼaˇ, Meˍraˆ Daˍviˆ hta‸ heuˆ tcuh piˇ tuˬ awˬ yanˇ gaˬ la htaˇ, Sawˉlu‸ lehˬ yawˇ ve yaˇ miˇ hta‸ Maˍhawˉlaˆ venˇ yaˇ Aˍdreˍlaˆ hta‸ piˇ sheˬ ve yoˬ.

20Ya‸ hkʼaˇ, Sawˉlu‸ ve yaˇ miˇ Miˆhkaˍlaˆ lehˬ Daˍviˆ hta‸ ha‸ jaˇ ve yoˬ. Awˬ lawn chi hta‸ Sawˉlu‸ gʼa kaˇ ve teˇ yanˇ, yawˇ ha lehˬ jaˇ ve yoˬ.

21Daˍviˆ hta‸ ngaˬ ve yaˇ miˇ Miˆhkaˍlaˆ piˇ tuˬ yoˬ. Chi hkʼe te ve hkʼaw, yawˇ lehˬ Daˍviˆ hta‸ va htaw leh, yawˇ lehˬ Hpiˇliˇtiˆ chaw hui ve la‸ sheh hkʼaw gʼa suh tuˬ yoˬ, teh‸ Sawˉlu‸ dawˇ taˍ ve yoˬ. Oˇ htaˇ Sawˉlu‸ lehˬ, Nawˬ ngaˬ maˉ paˍ hpeh‸ la tuˬ yoˬ, teh‸ Daˍviˆ hta‸ nyiˇ pawˆ teˇ pawˆ kʼaw‸ kʼoˆ piˇ ve yoˬ.

22Hkʼe te leh, Sawˉlu‸ yawˇ ve ma‸ poˍ lonˉ teˇ hpaˍ hta‸ kuˬ yuˬ leh, Jawˇmawˇ lehˬ nawˬ hta‸ nyi ma cawˇ leh ma‸ poˍ lonˉ teˇ hpaˍ htawˇ nawˬ hta‸ ha‸ ve yoˬ. Chi beu‸ nawˬ lehˬ yawˇ ve yaˇ miˇ hta‸ heuˆ tuˬ ve awˬ yanˇ da‸ jaˇ ve yoˬ, teh‸ Daˍviˆ hta‸ ca kʼoˆ piˇ tcuh ve yoˬ.

23Hkʼe te leh, yawˇ hui awˬ lawn chi Daˍviˆ hta‸ ca hto piˇ ve yoˬ. Oˇ htaˇ Daˍviˆ lehˬ, Ngaˬ hkʼe ve te‸ chiˉ awˬ me‸ awˬ hponˇ maˇ cawˬ ve chaw haˍ chaw gʼawˇ yaˇ teˇ gʼaˇ, jawˇmawˇ ve awˬ maˉ paˍ gʼa te ve lehˬ sha ve kanˉ hpeh‸ ve teh‸ nawˬ hui dawˇ ve laˇ, teh‸ yawˇ hui hta‸ kʼaw‸ yaw hkʼaw‸ piˇ ve yoˬ.

24Hkʼe te leh, ma‸ poˍ lonˉ oˇ ve teˇ hpaˍ lehˬ Daˍviˆ kʼoˆ ve tawˇ oˇ ve teˇ hpaˍ Sawˉlu‸ hta‸ ca kʼaw‸ hto piˇ ve yoˬ.

25Oˇ htaˇ Sawˉlu‸ kʼoˆ ve, Yawˇ ve yaˇ miˇ awˬ pon jawˇmawˇ heuˆ gaˇ ve awˬ ceuˬ lehˬ, yawˇ ve canˇ paˍ Hpiˇliˇtiˆ chaw hui ve awˬ guiˬ meuˇ teˇ ha maˬ ceh tiˉ yoˬ, teh‸ Daˍviˆ hta‸ ca kʼaw‸ hto piˇ-oˆ, teh‸ yawˇ hui hta‸ kʼoˆ piˇ ve yoˬ. (Chi hkʼe te ve hkʼaw, Daˍviˆ hta‸ Hpiˇliˇtiˆ chaw hui tiˇ pehˍ piˇ tuˬ yoˬ, teh‸ Sawˉ lu‸ dawˇ taˍ ve yoˬ.)

26Sawˉlu‸ ve ma‸ poˍ lonˉ teˇ hpaˍ lehˬ Sawˉlu‸ kʼoˆ ve tawˇ oˇ ve teˇ hpaˍ Daˍviˆ hta‸ ca kʼaw‸ kʼoˆ piˇ ve yoˬ. Daˍviˆ lehˬ, jawˇmawˇ ve awˬ maˉ paˍ gʼa hpeh‸ la tuˬ ve hta‸ shiˍ ve teˇ yanˇ ha lehˬ jaˇ ve yoˬ. Chi hta‸ pa taw la‸ kʼawˍ toˆ tuˬ ve awˬ nyi maˇ tiˍ sheˍ gʼuˇ suhˍ,

27Daˍviˆ leh yawˇ ve ma‸ yaˇ teˇ hpaˍ tawˆ kʼai leh Hpiˇliˇtiˆ chaw nyiˇ ha gʼaˇ hta‸ tiˇ pehˍ ve yoˬ. Yawˇ jawˇmawˇ ve awˬ maˉ paˍ hpeh‸ la tuˬ, chaw oˇ ve teˇ hpaˍ ve awˬ guiˬ meuˇ shawˆ veu laˇ leh, jawˇmawˇ gʼuˇ suhˍ gʼaw maˍ piˇ ve yoˬ. Hkʼe te leh, Sawˉlu‸ lehˬ Daˍviˆ hta‸ yawˇ ve yaˇ miˇ Miˆhkaˍlaˆ piˇ ve yoˬ.

28Gʼuiˬsha Daˍviˆ geh chehˇ leh, yawˇ ve yaˇ miˇ Miˆhkaˍlaˆ htawˇ Daˍviˆ hta‸ ha‸ jaˇ ve hta‸ chi teˇ pawˆ Sawˉlu‸ hkʼa deh‸ gʼa shiˍ ve yoˬ.

29Hkʼe te leh, yawˇ Daˍviˆ hta‸ leuˉ leh kawˆ jaˇ ve yoˬ. Yawˇ a sha‸ te‸ chehˇ ve teˇ co, yawˇ lehˬ Daˍviˆ ve canˇ paˍ hpeh‸ la ve yoˬ.

30Hpiˇliˇtiˆ chaw teˇ hpaˍ yawˇ hui hta‸ teˇ hkui teˇ hkui ca bawˆ la ve yoˬ. Teˇ pawˆ le le Daˬviˆ lehˬ awˬ nu ve ma‸ poˍ lonˉ teˇ hpaˍ a‸ kehˉ ma‸ bawˆ cheuˬ jaˇ ve yoˬ. Hkʼe te leh, yawˇ ve awˬ meh bvuhˬ jaˇ ve yoˬ.

← Chapter 17 Jump to: Chapter 19 →