1 Samuel 31

Lahu Bible Edited © Thailand Bible Society and Bible Society of Myanmar, 2010, 2020.

← Chapter 30 Jump to:

1Hpiˇliˇtiˆ chaw leh Iˉsaˍreˍlaˆ chaw teˇ hpaˍ, Giˇlaˍbawˇ hkʼaw hkʼoˆ lo bawˆ da‸ ve yoˬ. Oˇ kaˬ lo Iˉsaˍreˍlaˆ chaw maˇ maˇ suh-e leh, awˬ nu ve chaw teˇ hpaˍ gʼuiˇ hpaw-e ve yoˬ.

2Hpiˇliˇtiˆ chaw teˇ hpaˍ lehˬ, Sawˉlu‸ leh yawˇ ve yaˇ teˇ hpaˍ hta‸ gʼa‸ mi la leh, yawˇ ve yaˇ Yawˆnaˆtanˍ, Aˍbiˆnaˍdaˆ leh Maˍlaˍhkiˇshuˆ hui hta‸ tiˇ pehˍ piˇ ve yoˬ.

3Sawˉ lu‸ yawˇ chehˇ taˍ kuiˬ awˬ paˇ awˬ kui lo ma‸ bawˆ hehnˇ jaˇ la leh, Sawˉlu‸ hta‸ htawˇ hkaˆ ce heuˆ sheˬ ve yoˬ.

4Yawˇ naˬ jaˇ ve pa taw, Gʼuiˬsha hta‸ maˇ shiˍ ve Hpiˇliˇtiˆ chaw chi teˇ hpaˍ ngaˬ hta‸ maˇ shawˍ maˇ caˆ maˇ gʼa te leh maˇ gʼa tiˇ pehˍ laˇ tuˬ, nawˬ ve aˉhtaw gʼawˬ tawˆ leh ngaˬ hta‸ tiˇ pehˍ laˇ-o, teh‸ yawˇ ve la‸ caˉ pfuhˇ shehˍ hpaˇ hta‸ kʼoˆ piˇ ve yoˬ. Ya‸ hkʼaˇ, chaw oˇ ve kawˆ jaˇ ve pa taw, yawˇ kʼoˆ ve hkʼe te maˇ haˆ. Hkʼe te leh, Sawˉlu‸ yawˇ ve aˉhtaw gʼawˬ tawˆ leh, yawˇ hkʼaˇ yawˇ juˆ pehˍ ve yoˬ.

5Chaw oˇ ve lehˬ, Sawˉlu‸ suh peuˬ ve hta‸ gʼa mawˬ ve teˇ yanˇ, yawˇ awˬ to hta‸ yawˇ kʼaw‸ juˆ leh Sawˉlu‸ geh teˇ geh suh-e ve yoˬ.

6Hkʼe te leh, Sawˉlu‸ awˬ to, yawˇ ve yaˇ shehˆ gʼaˇ leh yawˇ ve la‸ caˉ pfuhˇ paˍ hui suh-e ve yoˬ. Oˇ ve teˇ nyi Sawˉlu‸ ve chaw hkʼa peu-eˬ htawˇ suh-e peuˬ ve yoˬ.

7Yeˍzaˍreˍlaˆ lawˬ hkʼo‸ coˇ paˉ hpawˇ lo leh, Yawˇdanˍ iˉ kaˆ lawˬ mvuhˇ nyi tawˆ hpawˇ lo chehˇ taˍ ve Iˉsaˍreˍlaˆ chaw teˇ hpaˍ, Sawˉlu‸ leh yawˇ ve yaˇ paˍ shehˆ gʼaˇ suh-e leh, Iˉsaˍreˍlaˆ ma‸ yaˇ teˇ hpaˍ gʼuiˇ hpaw-e chehˇ ve hta‸ gʼa mawˬ ve teˇ yanˇ, yawˇ hui a shu yawˇ ve venˇ hta‸ baˬ taˉ leh gʼuiˇ hpaw-e ve yoˬ. Hkʼe te leh, Hpiˇliˇtiˆ chaw teˇ hpaˍ laˬ leh venˇ oˇ ve teˇ hpaˍ hkʼaw chehˇ sheˬ ve yoˬ.

8Bawˆ da‸ peuˬ hkʼaw‸ nawˉ, shawˉ pawˍ hkʼe teˇ nyi Hpiˇliˇtiˆ chaw teˇ hpaˍ la‸ caˉ ca gʼawˆ tuˬ tawˆ kʼai ve teˇ yanˇ, yawˇ hui Giˇlaˍbawˇ hkʼaw hkʼoˆ lo Sawˉ lu‸ leh yawˇ ve yaˇ paˍ shehˆ gʼaˇ ve awˬ to hta‸ gʼa mawˬ ve yoˬ.

9Yawˇ hui Sawˉlu‸ ve oˉ kʼoˍ hta‸ tawˆ cheˆ leh, yawˇ ve la‸ caˉ teˇ hpaˍ hta‸ yuˬ peuˬ hkʼaw‸ nawˉ, yawˇ hui ma‸ bawˆ gʼaˇ ve awˬ lawn Hpiˇliˇtiˆ mvuhˇmiˬ lo chaw hta‸ hpehˇ peu leh, yawˇ hui ve shaˉ ho‸ teˇ hpaˍ leh mvuhˇmiˬ yaˇ teˇ hpaˍ hta‸ ca kʼaw‸ hto piˇ tcuh ve yoˬ.

10Oˇ ve hkʼaw‸ nawˉ, yawˇ hui lehˬ Sawˉlu‸ ve la‸ caˉ teˇ hpaˍ hta‸ yawˇ hui ve gʼuiˬsha ma Aˍshaˆtaˍrehˆ ve bon yehˬ hkʼaw teh taˍ ve yoˬ. Sawˉlu‸ ve awˬ to hta‸ yawˇ hui yuˬ leh, Behˆshanˍ lanˇ venˇ hkʼoˆ hpeh chiˇ taˍ ve yoˬ.

11Hpiˇliˇtiˆ chaw teˇ hpaˍ Sawˉlu‸ hta‸ hkʼaˬ hkʼe te piˇ ve awˬ lawn hta‸ Giˇlaˆ mvuhˇmiˬ, Yaˍbehˆ venˇ hkʼaw chehˇ ve chaw teˇ hpaˍ gʼa kaˇ ve teˇ yanˇ,

12ha‸ hanˉ jaˇ ve chaw teˇ hpaˍ teˇ haˉ tanˇ hkuinˇ Behˆshanˍ venˇ lo kʼai ve yoˬ. Yawˇ hui Sawˉlu‸ leh yawˇ ve yaˇ teˇ hpaˍ ve awˬ to hta‸ yuˬ kʼaw‸ la leh, Yaˍbehˆ venˇ hkʼaw aˬ miˍ tuˉ baˬ ve yoˬ.

13Oˇ hkʼe te peuˬ hkʼaw‸ nawˉ, yawˇ hui awˬ mu‸ ku teˇ hpaˍ hta‸ yuˬ leh, venˇ hkʼaw cawˬ ve ma‸ kehˇ cehˬ hawˉ lo tuˍ piˇ ve yoˬ. Hkʼe te peuˬ hkʼaw‸ nawˉ, suhˍ nyi hkʼa gaˬ yawˇ hui caˇ tuˬ ce chehˇ taˍ ve yoˬ.

← Chapter 30 Jump to: