1 Samuel 28

Lahu Bible Edited © Thailand Bible Society and Bible Society of Myanmar, 2010, 2020.

← Chapter 27 Jump to: Chapter 29 →

1Oˇ ve hkʼaw‸ nawˉ maˇ maw maw Hpiˇliˇtiˆ chaw teˇ hpaˍ lehˬ, Iˉsaˍreˍlaˆ chaw hui hta‸ ma‸ ca bawˆ tuˬ ma‸ yaˇ shawˍ chehˇ ve yoˬ. Oˇ htaˇ Aˍhkiˆ lehˬ, Nawˬ leh nawˬ ve ma‸ yaˇ teˇ hpaˍ ngaˬ geh ma‸ gʼa ga bawˆ laˇ tuˬ yoˬ, teh‸ Daˍviˆ hta‸ kʼoˆ piˇ ve yoˬ.

2Daˍviˆ htawˇ, Hpeh‸ ve yoˬ. Ngaˬ lehˬ nawˬ ve awˬ ceˬ hpeh‸ leh, ngaˬ hkʼaˬ hkʼe te puiˉ ve hta‸ nawˬ gʼa mawˬ tuˬ yoˬ, teh‸ yawˇ hta‸ kʼaw‸ kʼoˆ piˇ ve yoˬ. Oˇ htaˇ Aˍhkiˆ lehˬ, Da‸ ve yoˬ. Ngaˬ nawˬ hta‸ hkʼaˬ htaˆ ka‸ ngaˬ ve a sha‸ shaw paˍ te tcuh laˇ tuˬ yoˬ, teh‸ yawˇ hta‸ kʼoˆ piˇ ve yoˬ.

3Awˬ yanˇ oˇ ve hkʼaw, Saˍmo-eˍlaˆ lehˬ suh peuˬ. Hkʼe te leh, Iˉsaˍreˍlaˆ chaw hkʼa peu-eˬ gʼaˇ hte‸ kuˬ haw paˆ hawˬ leh, yawˇ hta‸ Raˍmaˆ venˇ hkʼaw tuˍ piˇ ve yoˬ. Sawˉlu‸ lehˬ, mawˉ paˍ hkʼa peu-eˬ ve hta‸ Iˉsaˍreˍlaˆ mvuhˇmiˬ hkʼaw gʼa‸ kʼoˬ piˇ taˍ peuˬ ve yoˬ.

4Oˇ htaˇ, Hpiˇliˇtiˆ chaw teˇ hpaˍ ma‸ moˍ shawˍ veu laˇ leh, Shuˆnenˍ venˇ paˇ lo deh chehˇ taˍ ve yoˬ. Sawˉlu‸ lehˬ yawˇ ve ma‸ yaˇ teˇ hpaˍ hta‸ shiˍ veu laˇ leh, Giˇlaˍbawˇ hkʼaw hkʼoˆ lo deh chehˇ taˍ ve yoˬ.

5Sawˉlu‸ lehˬ, Hpiˇliˇtiˆ ma‸ moˍ lonˉ hta‸ gʼa mawˬ ve teˇ yanˇ kawˆ jaˇ ve yoˬ.

6Hkʼe te leh, yawˇ hkʼaˬ hkʼe te cawˇ ve awˬ lawn Gʼuiˬsha hta‸ na nyi ve yoˬ. Ya‸ hkʼaˇ, Gʼuiˬsha lehˬ zuh‸ maˆ ve hkʼaw maˇ kʼoˆ, Uˇrenˍ hta‸ cuˇ ve hkʼaw maˇ kʼoˆ, yawˇ ve tcuh kaˍ paˍ hta‸ cuˇ ve hkʼaw maˇ kʼoˆ, yawˇ hta‸ maˇ kʼaw‸ yaw hkʼaw‸ piˇ.

7Oˇ htaˇ Sawˉlu‸ lehˬ, Ngaˬ hta‸ mawˉ puiˉ ve yaˇ miˇ teˇ gʼaˇ ca laˇ-oˆ. Ngaˬ yawˇ geh kʼai leh ca jehˬ da‸ nyi tuˬ yoˬ, teh‸ yawˇ ve ma‸ poˍ lonˉ teˇ hpaˍ hta‸ kʼoˆ piˇ ve yoˬ. Enˍdawˇraˆ venˇ hkʼaw lo mawˉ puiˉ ve yaˇ miˇ teˇ gʼaˇ chehˇ taˍ ve yoˬ, teh‸ yawˇ hui yawˇ hta‸ kʼaw‸ yaw hkʼaw‸ piˇ ve yoˬ.

8Hkʼe te leh, Sawˉlu‸ lehˬ yawˇ ve veu‸ kʼaˇ hta‸ kʼehˆ baˬ leh, awˬ nu ve veu‸ kʼaˇ hta‸ kʼaw‸ deh peuˬ hkʼaw‸ nawˉ, mehˆ muiˉ naˆ la htaˇ yawˇ ve chaw nyiˇ gʼaˇ hta‸ shiˍ veu leh, yaˇ miˇ oˇ ve geh kʼai ve yoˬ. Yawˇ oˇ kaˬ lo gaˬ htaˇ, Hkʼaˬ hkʼe hpeh‸ la tuˬ ve awˬ lawn, neˇ teˇ hpaˍ hta‸ cuˇ leh a ciˉ na nyi laˇ-oˆ. Ngaˬ kʼoˆ laˇ tuˬ ve chaw teˇ gʼaˇ ve aw ha hta‸ a ciˉ kuˬ tawˆ laˇ-oˆ, teh‸ yaˇ miˇ hta‸ kʼoˆ piˇ ve yoˬ.

9Yaˇ miˇ oˇ ve kʼaw‸ yaw hkʼaw‸ leh kʼoˆ ve, Jawˇmawˇ Sawˉlu‸ hkʼaˬ hkʼe te taˍ peuˬ ve hta‸ nawˬ shiˍ taˍ ve yoˬ. Mawˉ puiˉ ve chaw hui hta‸ Iˉsaˍreˍlaˆ mvuhˇmiˬ hkʼaw yawˇ gʼa‸ kʼoˬ taˍ ve yoˬ. Ngaˬ lehˬ tiˇ pehˍ ve hta‸ gʼa hkanˍ tuˬ aˬ hto‸ ma pa taw nawˬ ngaˬ hta‸ va ca htaw na la ve le, teh‸ kʼoˆ ve yoˬ.

10Oˇ htaˇ Sawˉlu‸ ka ti‸ te leh kʼoˆ ve, Nawˬ chi hkʼe te laˇ ve pa taw ciˍ yanˍ ve hta‸ gʼa hkanˍ tuˬ ve maˇ heˆ, teh‸ te‸ chehˇ ve Gʼuiˬsha hta‸ cuˇ leh ngaˬ hkanˍ ve yoˬ, teh‸ yawˇ hta‸ kʼoˆ piˇ ve yoˬ.

11Oˇ htaˇ yaˇ miˇ oˇ ve lehˬ, Nawˬ awˬ pon ngaˬ a shu hta‸ gʼa kuˬ laˇ tuˬ ve le, teh‸ Sawˉlu‸ hta‸ na nyi ve yoˬ. Saˍmo-eˍlaˆ hta‸ kuˬ laˇ-oˆ, teh‸ yawˇ kʼaw‸ yaw hkʼaw‸ piˇ ve yoˬ.

12Yaˇ miˇ oˇ ve Saˍmo-eˍlaˆ hta‸ gʼa mawˬ ve teˇ yanˇ gʼaˇ hte‸ kuˬ leh, Nawˬ aˬ hto‸ ma pa taw ngaˬ hta‸ cuˇ yiˍ te laˇ ve le. Nawˬ lehˬ jawˇmawˇ Sawˉlu‸ hpeh‸ ve yoˬ, teh‸ Sawˉlu‸ hta‸ kʼoˆ piˇ ve yoˬ.

13Oˇ htaˇ jawˇmawˇ lehˬ, Taˇ kawˆ. Nawˬ a shu hta‸ gʼa mawˬ ve le, teh‸ yawˇ hta‸ na nyi ve yoˬ. Miˬguiˬ awˬ hkʼaw lo awˬ ha teˇ maˬ taˆ la chehˇ ve hta‸ ngaˬ gʼa mawˬ ve yoˬ, teh‸ yaˇ miˇ oˇ ve yawˇ hta‸ kʼoˆ piˇ ve yoˬ.

14Awˬ ha oˇ ve aˬ hto‸ ma hta‸ shuˍ le, teh‸ yawˇ yaˇ miˇ hta‸ kʼaw‸ na nyi ve yoˬ. Awˬ ha oˇ ve lehˬ mawˇ jaˇ peuˬ ve chaw mawˇ teˇ gʼaˇ ve awˬ ha hpeh‸ ve yoˬ. Yawˇ awˬ to hta‸ aˉ po‸ lonˉ teˇ hkʼoˆ hawˆ taˍ ve yoˬ, teh‸ yawˇ hta‸ kʼoˆ piˇ ve yoˬ. Awˬ ha oˇ ve Saˍmo-eˍlaˆ hpeh‸ ve hta‸ Sawˉlu‸ shiˍ ve pa taw, yawˇ miˬ chaˇ hkʼoˆ boˆ taˍ ve yoˬ.

15Oˇ htaˇ Saˍmo-eˍlaˆ lehˬ, Aˬ hto‸ ma pa taw nawˬ ngaˬ hta‸ kuˬ leh te sho‸ sha‸ laˇ ve le, teh‸ Sawˉlu‸ hta‸ na nyi ve yoˬ. Sawˉlu‸ kʼaw‸ yaw hkʼaw‸ leh, Ngaˬ lehˬ dawˇ tui‸ gaˇ tui‸ jaˇ ve yoˬ. Hpiˇliˇ ti‸ chaw teˇ hpaˍ chi beu‸ ngaˬ hta‸ ca bawˆ la chehˇ ve yoˬ. Gʼuiˬsha ve tcuh kaˍ paˍ teˇ hpaˍ hta‸ cuˇ leh maˇ kʼoˆ, zuh‸ maˆ ve hkʼaw maˇ kʼoˆ, yawˇ ngaˬ hta‸ maˇ kʼaw‸ yaw hkʼaw‸ laˇ-o. Chi hta‸ pa taw, ngaˬ hkʼaˬ hkʼe te cawˇ ve hta‸ hto laˇ tuˬ nawˬ hta‸ kuˬ ve yoˬ, teh‸ yawˇ hta‸ kʼoˆ piˇ ve yoˬ.

16Oˇ htaˇ Saˍmo-eˍlaˆ kʼoˆ ve, Gʼuiˬsha nawˬ hta‸ chiˇ baˬ peuˬ leh, yawˇ lehˬ nawˬ ve canˇ paˍ hpeh‸ la peuˬ. Nawˬ aˬ hto‸ ma pa taw ngaˬ hta‸ kʼaw‸ kuˬ chehˇ sheˍ ve le.

17Gʼuiˬsha ngaˬ hta‸ cuˇ leh nawˬ hta‸ kʼoˆ piˇ taˍ peuˬ ve hkʼe te taˍ peuˬ. Yawˇ lehˬ mvuhˇmiˬ hta‸ nawˬ ve la‸ sheh hkʼaw yuˬ tawˆ leh, Daˍviˆ hta‸ piˇ taˍ peuˬ.

18Nawˬ lehˬ Gʼuiˬsha ve tawˇ hta‸ ponˬ leuˉ leh, Aˍmaˍlehˆ chaw leh yawˇ hui ve mawˇ jeˬ hkʼa peu-eˬ ve hta‸ maˇ te luˬ piˇ. Chi hta‸ pa taw, Gʼuiˬsha lehˬ chi beu‸ nawˬ hta‸ chi hkʼe te laˇ chehˇ ve yoˬ.

19Yawˇ lehˬ nawˬ awˬ to leh Iˉsaˍreˍlaˆ chaw hui hta‸ Hpiˇliˇtiˆ chaw hui ve la‸ sheh hkʼaw chiˇ a‸ piˇ tuˬ yoˬ. Shawˉ pawˍ kʼo, nawˬ leh nawˬ ve yaˇ teˇ hpaˍ ngaˬ geh gʼa ca chehˇ la tuˬ yoˬ. Gʼuiˬsha lehˬ Iˉsaˍreˍlaˆ chaw hui hta‸ htawˇ Hpiˇliˇtiˆ chaw hui ve la‸ sheh hkʼaw lo chiˇ a‸ piˇ tuˬ yoˬ, teh‸ yawˇ hta‸ kʼoˆ piˇ ve yoˬ.

20Sawˇlu‸ lehˬ tawˇ oˇ ve teˇ hpaˍ hta‸ gʼa kaˇ ve teˇ yanˇ kawˆ jaˇ leh miˬ chaˇ hkʼoˆ lo paiˍ ve yoˬ. Yawˇ lehˬ teˇ nyi teˇ haˉ caˇ tuˬ maˇ gʼa caˇ ve pa taw gʼaˇ nuˇ jaˇ ve yoˬ.

21Sawˉlu‸ kawˆ jaˇ chehˇ ve hta‸ yaˇ miˇ oˇ ve gʼa mawˬ ve teˇ yanˇ yawˇ geh kʼai leh, Jawˇmawˇ-oˬ, nawˬ te tcuh laˇ ve hkʼe ngaˬ a sha‸ tanˇ leh te laˇ taˍ peuˬ ve yoˬ.

22Chi beu‸ ngaˬ kʼoˆ ve hkʼe a ciˉ te sheˍ. Choˬ kaˬ lo caˇ tuˬ cawˬ taˍ ve yoˬ. Nawˬ awˬ gʼaˇ cawˬ la leh kʼo‸-e gaˬ tuˬ, caˇ tuˬ chi teˇ hpaˍ hta‸ caˇ loˬ, teh‸ yawˇ hta‸ kʼoˆ piˇ ve yoˬ.

23Ya‸ hkʼaˇ Sawˉlu‸ lehˬ, Ngaˬ te‸ chiˉ maˇ caˇ gaˇ, teh‸ kʼoˆ ve yoˬ. Yawˇ ve ma‸ ponˍ lonˉ teˇ hpaˍ htawˇ, yawˇ awˍ caˇ tuˬ ga hpoˆ kʼoˆ piˇ ve pa taw, tu la leh ku-iˍ hkʼoˆ mui taˍ ve yoˬ.

24Yaˇ miˇ oˇ ve lehˬ, yawˇ hu taˍ ve nuˇ ehˉ teˇ hkeh tiˇ leh awˍ chiˇ te peuˬ hkʼaw‸ nawˉ, diˇ maˇ keu ve hkaoˍ monˉ hta‸ htawˇ haˆ haˆ te ve yoˬ.

25Oˇ hkʼe te peuˬ hkʼaw‸ nawˉ, caˇ tuˬ oˇ ve teˇ hpaˍ Sawˉlu‸ leh yawˇ ve ma‸ poˍ lonˉ teˇ hpaˍ hta‸ caˍ piˇ ve yoˬ. Yawˇ hui caˇ taˉ leh oˇ ve teˇ haˉ tawˆ kʼai ve yoˬ.

← Chapter 27 Jump to: Chapter 29 →