1 Samuel 17 — Lahu Bible Edited © Thailand Bible Society and Bible Society of Myanmar, 2010, 2020.

1Hpiˇliˇtiˆ chaw teˇ hpaˍ lehˬ, Yuˇda‸ mvuhˇmiˬ hkʼaw cawˬ ve Suˇkoˆ venˇ lo ma‸ bawˆ tuˬ hpoˆ chehˇ ve yoˬ. Yawˇ hui laˬ leh, Suˇkoˆ leh Aˍzeˍkaˍ venˇ awˬ kaˍ lo cawˬ ve Daˍmenˍ teh‸ kʼoˆ ve chehˇ kuiˬ lo deh chehˇ taˍ ve yoˬ.

2Sawˉlu‸ leh yawˇ ve ma‸ yaˇ teˇ hpaˍ lehˬ, Eˍlaˍ teh‸ kʼoˆ ve miˬ tawˬ kuiˬ lo deh chehˇ taˍ leh, Hpiˇliˇtiˆ chaw hui hta‸bawˆ da‸ tuˬ gu chehˇ ve yoˬ.

3Hpiˇliˇtiˆ chaw leh Iˉsaˍreˍlaˆ chaw teˇ hpaˍ lehˬ, lawˬ hkʼo‸ choˬ paˉ coˇ paˉ lo chehˇ taˍ ve yoˬ.

4Gaˍtaˆ venˇ hkʼaw chehˇ ve Hpiˇliˇtiˆ chaw Gawˇliˇya‸ lehˬ, Iˉsaˍreˍlaˆ chaw hui hta‸ tanˬ da‸ tuˬ tawˆ la ve yoˬ. Yawˇ lehˬ hkaw‸ shaw‸ hpaˆ mvuh leh,

5yawˇ hkʼawˆ taˍ ve kuiˇ uˉ tcuhˍ leh kuiˇ veu‸ kʼaˇ lehˬ, 40 cawehˬ hkʼe hawˇ ve yoˬ.

6Yawˇ ve hkui sheh hta‸ htawˇ kuiˇ beh taˍ leh, kuiˇ te taˍ ve gehˇ teˇ maˬ pfuhˇ taˍ ve yoˬ.

7Yawˇ ve gehˇ tuˇ lehˬ, hpa chiˇ ve taˉ behˆ hkʼe hui cawˬ leh, gehˇ lehˬ 6 cawehˬ hkʼe hawˇ ve yoˬ. Ma‸ yaˇ teˇ gʼaˇ lehˬ, yawˇ ve htanˬ tuˬ pfuhˇ leh yawˇ gʼuˇ suhˍ kʼai chehˇ ve yoˬ.

8Gawˇliˇya‸ huˉ taˍ leh Iˉsaˍreˍlaˆ chaw hui hta‸ kʼoˆ piˇ ve, Nawˬ huiˬ aˬ hto‸ ma te chehˇ ve le. Ma‸ bawˆ tuˬ gu chehˇ ve laˇ. Ngaˬ lehˬ Hpiˇliˇtiˆ chaw hpeh‸ ve yoˬ. Nawˬ hui lehˬ Sawˉlu‸ ve awˬ ceˬ hpeh‸ ve yoˬ. Ngaˬ hta‸ ca bawˆ la tuˬ, nawˬ hui awˬ hkʼaw lo chaw teˇ gʼaˇ hta‸ leuˆ yuˬ-o‸.

9Yawˇ ngaˬ hta‸ tiˇ pehˍ gʼa ve kʼo, ngaˬ hui nawˬ hui ve awˬ ceˬ te tuˬ yoˬ. Ngaˬ yawˇ hta‸ tiˇ pehˍ gʼa ve kʼo, nawˬ hui lehˬ ngaˬ hui ve awˬ ceˬ gʼa te tuˬ yoˬ.

10Ngaˬ Iˉsaˍreˍlaˆ chaw hui hta‸ kuˬ chehˇ ve yoˬ. Ngaˬ hta‸ ca bawˆ la tuˬ, chi beu‸ nawˬ hui awˬ hkʼaw lo chaw teˇ gʼaˇ hta‸ leuˆ yuˬ-o‸, teh‸ kʼoˆ ve yoˬ.

11Sawˉlu‸ leh ma‸ yaˇ teˇ hpaˍ tawˇ oˇ ve hta‸ gʼa kaˇ ve teˇ yanˇ kawˆ jaˇ ve yoˬ.

12Eˇhpaˍrenˍ venˇ yaˇ Daˍviˆ ve awˬ pa Yeˍsehˇ lehˬ, yaˇ paˍ 8 gʼaˇ cawˬ ve yoˬ. Sawˉlu‸ jawˇmawˇ te chehˇ ve awˬ yanˇ hkʼaw, yawˇ lehˬ mawˇ jaˇ peuˬ.

13Yawˇ ve yaˇ paˍ uiˍ shehˆ gʼaˇ lehˬ, Sawˉlu‸ ve ma‸ yaˇ te chehˇ ve yoˬ. Yawˇ ve yaˇ paˍ uiˍ lehˬ, Eˇlaˍbaˆ hpeh‸ leh, yaˇ paˍ nyiˇ gʼaˇ teˇ gʼaˇ lehˬ, Aˍbiˆnaˍdaˆ hpeh‸ ve yoˬ. Yaˇ paˍ shehˆ gʼaˇ teˇ gʼaˇ lehˬ, Shaˍmaˍ hpeh‸ ve yoˬ.

14Daˍviˆ lehˬ, yaˇ paˍ leh hpeh‸ leh, yawˇ ve awˬ viˉ paˍ lonˉ shehˆ gʼaˇ Sawˉlu‸ geh chehˇ taˍ ve teˇ yanˇ,

15Daˍviˆ Behˍlehˍhehnˍ venˇ lo teˇ hkui teˇ hkui kʼo‸-e leh, yawˇ awˬ pa ve yawˬ teˇ hpaˍ hta‸ gʼa ca ha‸ shaˉ piˇ chehˇ ve yoˬ.

16Gawˇliˇya‸ lehˬ Iˉsaˍreˍlaˆ chaw hui hta‸ awˇ chi nyi hkʼa gaˬ mvuhˇ shawˉ teˇ pawˆ mvuhˇ hpeu‸ teˇ pawˆ kuˬ piˇ chehˇ ve yoˬ.

17Teˇ nyi htaˇ, Yeˍsehˇ yawˇ ve yaˇ paˍ Daˍviˆ hta‸ kʼoˆ piˇ ve, Sha ma hu taˍ ve teˇ hkʼawˍ lawˇ leh hkaoˍ monˉ teˇ chi shiˍ hta‸ yuˬ veu leh, ma‸ bawˆ kuiˬ lo chehˇ taˍ ve nawˬ viˉ paˍ teˇ hpaˍ geh kʼai-o.

18Nuˇ cuˉ gʼuiˬ awˬ diˬ chi ve teˇ chi shiˍ ma‸ poˍ lonˉ hta‸ yuˬ kʼai piˇ-oˆ. Nawˬ viˉ paˍ teˇ hpaˍ hkʼaˬ hkʼe hpeh‸ chehˇ ve hta‸ ca nyi leh, yawˇ hui chehˇ sha chehˇ ve hta‸ nawˬ gʼa mawˬ taˉ ve awˬ lawn shaˉ hkiˆ teˇ ceuˬ ceuˬ yuˬ hkʼaw‸ veu laˇ-oˆ.

19Jawˇmawˇ Sawˉlu‸, nawˬ viˉ paˍ teˇ hpaˍ leh Iˉsaˍreˍlaˆ ma‸ yaˇ teˇ hpaˍ, Eˇlaˍ miˬ tawˬ kuiˬ lo Hpiˇliˇtiˆ chaw hui hta‸ bawˆ da‸ chehˇ ve yoˬ, teh‸ yawˇ hta‸ kʼoˆ piˇ ve yoˬ.

20Daˍviˆ shawˉ pawˍ teˇ na‸ tu leh, yawˬ hawˉ tuˬ ve chaw ca taˉ peuˬ hkʼaw‸ nawˉ, awˬ pa yawˇ hta‸ kʼoˆ piˇ taˍ ve hkʼe, caˇ tuˬ oˇ ve teˇ hpaˍ hta‸ yuˬ veu leh tawˆ kʼai ve yoˬ. Yawˇ oˇ kaˬ lo gaˬ ve teˇ yanˇ, Iˉsaˍreˍlaˆ chaw teˇ hpaˍ ma‸ bawˆ tuˬ, a shu yawˇ ve chehˇ kuiˬ yuˬ chehˇ ve hta‸ gʼa mawˬ ve yoˬ.

21Hpiˇliˇtiˆ chaw teˇ hpaˍ leh Iˉsaˍreˍlaˆ chaw teˇ hpaˍ mehˆ hpfuhˇ tawˍ da‸ leh bawˆ da‸ tuˬ, chehˇ kuiˬ yuˬ chehˇ taˍ ve yoˬ.

22Daˍviˆ lehˬ caˇ tuˬ oˇ ve teˇ hpaˍ, caˇ tuˬha‸ shaˉ ve awˬ hoˉ hta‸ a‸ piˇ taˉ peuˬ hkʼaw‸ nawˉ, ma‸ bawˆ tuˬ gu chehˇ ve yawˇ ve awˬ viˉ paˍ teˇ hpaˍ geh gʼuiˇ kʼai leh, yawˇ hui hkʼaˬ hkʼe hpeh‸ chehˇ ve awˬ lawn ca na nyi ve yoˬ.

23Yawˇ hui tawˇ yaw da‸ chehˇ ve teˇ yanˇ, ponˬ laˬ htaˇ hkʼa shuˍ Gawˇliˇya‸ tawˆ la leh, Iˉsaˍ reˍlaˆ chaw hui hta‸ kuˬ deˇ ve yoˬ. Daˍviˆ lehˬ, tawˇ oˇ ve hta‸ gʼa kaˇ ve yoˬ.

24Iˉsaˍreˍlaˆ chaw teˇ hpaˍ lehˬ, Gawˇliˇya‸ hta‸ gʼa mawˬ ve teˇ yanˇ kawˆ jaˇ leh gʼuiˇ hpaw-e ve yoˬ.

25Yawˇ hui teˇ gʼaˇ leh teˇ gʼaˇ na‸ uˉ te da‸ leh kʼoˆ ve, Chaw oˇ ve hpaˇ hta‸ nyi sheˍ. Yawˇ kʼoˆ chehˇ ve tawˇ hta‸ htawˇ na sheˍ. Yawˇ hta‸ tiˇ pehˍ gʼa ve chaw hta‸ jawˇmawˇ hpu shi mawˇ jeˬ maˇ maˇ piˇ leh, yawˇ ve yaˇ miˇ htawˇ piˇ tuˬ yoˬ ceˇ. Chi hkʼoˆ ka‸, yawˇ ve awˬ ceuˬ awˬ hkʼaˇ teˇ hpaˍ hta‸ awˬ hkawnˍ ka‸ maˇ keu tcuh ceˇ, teh‸ kʼoˆ ve yoˬ.

26Oˇ htaˇ, Daˍviˆ lehˬ yawˇ awˬ paˇ lo chehˇ taˍ ve chaw hui hta‸ kʼoˆ piˇ ve, Iˉsaˍreˍlaˆ chaw hui hta‸ maˇ shawˍ maˇ caˆ kʼoˆ chehˇ ve Hpiˇliˇtiˆ chaw oˇ ve hta‸ tiˇ pehˍ gʼa ve chaw aˬ hto‸ ma la‸ shawnˍ gʼa tuˬ ve le. Te‸ chehˇ ve Gʼuiˬsha ve ma‸ moˍ hta‸ maˇ shawˍ maˇ caˆ kʼoˆ chehˇ ve buiˇshaˆaˉnaˆ chaw oˇ ve a shu le, teh‸ na nyi ve yoˬ.

27Gawˇliˇya‸ hta‸ tiˇ pehˍ gʼa ve chaw hta‸ jawˇmawˇ hkʼaˬ hkʼe te piˇ tuˬ ve awˬ lawn yawˇ hui yawˇ hta‸ kʼoˆ maˍ piˇ ve yoˬ.

28Daˍviˆ ve awˬ viˉ paˍ lonˉ Eˇlaˍbaˆ lehˬ, yawˇ shu hta‸ na‸ uˉ te da‸ chehˇ ve hkawˇ gʼa kaˇ ve yoˬ. Hkʼe te leh, yawˇ nyi ma zuhˆ jaˇ leh, Nawˬ choˬ kaˬ lo aˬ hto‸ ma te chehˇ ve le. Heh puiˉ hkʼaw lo chehˇ taˍ ve nawˬ ve yawˬ teˇ hpaˍ hta‸ a shu hawˉ chehˇ taˉ ve le. Nawˬ nyi ma uiˍ leh caˆ muiˬ puiˉ ve hta‸ ngaˬ shiˍ ve yoˬ. Nawˬ ma‸ bawˆ ve hta‸ mawˬ gaˇ leh choˬ kaˬ lo laˬ ve yoˬ, teh‸ Daˍviˆ hta‸ deˇ piˇ ve yoˬ.

29Oˇ htaˇ Daˍviˆ lehˬ, Ngaˬ aˬ hto‸ ma te ya‸ ve le. Ngaˬ shu hta‸ tawˇ yaw da‸ tuˬ a hkaw-anˬ maˇ cawˬ leh laˇ, teh‸ yawˇ hta‸ kʼaw‸ kʼoˆ piˇ ve yoˬ.

30Yawˇ awˬ nu ve chaw teˇ gʼaˇ geh kʼaw‸ kʼai leh, oˇ ve hkʼa shuˍ ca kʼaw‸ na nyi ve yoˬ. Yawˇ hkʼa na nyi ve chaw teˇ gʼaˇ le le, yawˇ hta‸ oˇ ve hkʼa shuˍ ceh tiˉ kʼaw‸ yaw hkʼaw‸ piˇ ve yoˬ.

31Chaw teˇ hpaˍ hpaˍ Daˍviˆ kʼoˆ ve tawˇ hta‸ gʼa kaˇ leh, yawˇ hui Sawˉlu‸ hta‸ ca hto piˇ ve yoˬ. Sawˉlu‸ htawˇ yawˇ hta‸ ca kuˬ tcuh ve yoˬ

32Oˇ htaˇ Daˍviˆ lehˬ, Jawˇmawˇ-oˬ, ngaˬ hui teˇ gʼaˇ ka‸ Hpiˇliˇtiˆ chaw oˇ ve hta‸ kawˆ tuˬ maˇ loˍ. Ngaˬ yawˇ hta‸ ca bawˆ tuˬ yoˬ, teh‸ Sawˉlu‸ hta‸ kʼoˆ piˇ ve yoˬ.

33Sawˉlu‸ yawˇ hta‸ kʼoˆ piˇ ve, Nawˬ te maˇ hpeh‸ taˬ. Nawˬ yawˇ hta‸ hkʼaˬ hkʼe te bawˆ tuˬ le. Nawˬ lehˬ yaˇ paˍ ehˉ ceh tiˉ hpeh‸ leh, yawˇ lehˬ ma‸ yaˇ te laˬ ve maw jaˇ peuˬ, teh‸ kʼoˆ ve yoˬ.

34Daˍviˆ kʼaw‸ kʼoˆ ve, Jawˇmawˇ-oˬ, ngaˬ lehˬ ngaˬ pa ve yawˬ teˇ hpaˍ hta‸ hawˉ chehˇ ve yoˬ. Laˇ caˬ shiˉ, maˇ heˆ kʼo, yehˬ miˉ tawˍ teˇ hkeh yawˬ hta‸ ca che‸ la ve teˇ yanˇ,

35ngaˬ awˬ hkʼaˇ suh gʼa‸ yuˬ leh yawˬ ehˉ oˇ ve hta‸ htaiˍ hkʼaw‸ piˇ ve yoˬ. Laˇ caˬ shiˉ, maˇ heˆ kʼo, yehˬ miˉ tawˍ oˇ ve ngaˬ hta‸ hpfuhˆ che‸ la ve teˇ yanˇ, ngaˬ lehˬ yawˇ ve kʼawˍ peˍ hta‸ yuˬ tiˍ taˍ leh tiˇ pehˍ piˇ ve yoˬ.

36Ngaˬ lehˬ, laˇ caˬ shiˉ leh yehˬ miˉ tawˍ teˇ hpaˍ hta‸ tiˇ pehˍ piˇ jaw peuˬ. Te‸ chehˇ ve Gʼuiˬsha ve ma‸ moˍ hta‸ chi hkʼe maˇ shawˍ maˇ caˆ kʼoˆ chehˇ ve buiˇshaˆaˉnaˆ chaw oˇ ve hta‸ htawˇ, ngaˬ oˇ ve hkʼa shuˍ te piˇ tuˬ yoˬ.

37Gʼuiˬsha lehˬ ngaˬ hta‸ laˇ caˬ shiˉ leh yehˬ miˉ tawˍ teˇ hpaˍ ve la‸ sheh hkʼaw lo ponˬ laˇ ve hkʼe, Hpiˇliˇtiˆ chaw oˇ ve hpaˇ ve la‸ sheh hkʼaw lo htawˇ, ngaˬ hta‸ ponˬ laˇ tuˬ yoˬ, teh‸ kʼoˆ ve yoˬ. Oˇ htaˇ Sawˉlu‸ lehˬ, Hkʼe kʼo da‸-aˬ. Nawˬ kʼai loˬ. Gʼuiˬsha nawˬ geh chehˇ piˇ-oˆ, teh‸ kʼoˆ ve yoˬ.

38Sawˉlu‸ lehˬ, Daˍviˆ hta‸ yawˇ ve veu‸ kʼaˇ kʼehˆ feuˉ piˇ ve yoˬ. Kuiˇ te taˍ ve uˉ tcuhˍ Daˍviˆ hta‸ hkʼawˆ piˇ leh, kuiˇ te taˍ ve aˉ po‸ feuˉ piˇ ve yoˬ.

39Daˍviˆ lehˬ, Sawˉlu‸ ve aˉhtaw lonˉ hta‸ taˆ leh, ya‸ kʼaw juˇ nyi ve yoˬ. Ya‸ hkʼaˇ, yawˇ lehˬ veu‸ kʼaˇ oˇ ve teˇ hpaˍ hta‸ teˇ pawˆ ka‸ maˇ veu‸ jaw ve pa taw, Veu‸ kʼaˇ chi teˇ hpaˍ hta‸ yehˇ leh ngaˬ ma‸ bawˆ maˇ hpeh‸, teh‸ Sawˉlu‸ hta‸ kʼoˆ piˇ ve yoˬ.

40Oˇ ve hkʼaw‸ nawˉ, yawˇ ve juˇ fuiˍ taˬ hta‸ yuˬleh, iˉ kaˆ lawˬ kʼaˉ ehˉ hkʼaw da‸ jaˇ ve haˉ pui shiˍ ngaˇ shiˍ hta‸ gʼawˆ yuˬ leh, yawˇ ve miˉ chaw hkʼaw keu ve yoˬ. Yawˇ ve hawˉ ma hta‸ hkʼa deh‸ gu peuˬ hkʼaw‸ nawˉ, Gawˉliˉya‸ hta‸ hpuˇ da‸ tuˬ tawˆ kʼai ve yoˬ.

41Hpiˇliˇtiˆ chaw oˇ ve Daˍviˆ geh laˬ ve yoˬ. Yawˇ ve htanˬ tuˬ pfuhˇ shehˍ hpaˇ htawˇ, yawˇ gʼuˇ suhˍ lo te toˇ chehˇ ve yoˬ. Yawˇ lehˬ awˬ meu-eˇ awˬ meu-eˇ laˬ chehˇ ve yoˬ.

42Yawˇ Daˍviˆ hta‸ gʼa mawˬ ve teˇ yanˇ, gʼuiˬ yawˬ jaˇ ve yoˬ. Awˬ lawn kʼo, yawˇ lehˬ awˬ hkiˇ awˬ naˬ da‸ ve yaˇ paˍ ehˉ ceh tiˉ hpeh‸ ve pa taw yoˬ.

43Hkʼe te leh, yawˇ Daˍviˆ hta‸ kʼoˆ piˇ ve, Aˉ du taˬ oˇ ve aˬ hto‸ ma te tuˬ awˬ pon le. Ngaˬ lehˬ hpuiˇ hpeh‸ ve teh‸ nawˬ dawˇ ve laˇ, teh‸ kʼoˆ ve yoˬ. Hkʼe te leh, yawˇ ve gʼuiˬsha ve awˬ meh hta‸ cuˇ leh, yawˇ Daˍviˆ hta‸ hkeu piˇ ve yoˬ.

44Peuˬ hkʼaw‸ nawˉ, yawˇ Daˍviˆ hta‸ kuˬ leh, Gʼuˇ suhˍ jiˆ laˬ-o‸. Nawˬ ve awˬ to hta‸ ngaˬ ya‸ nyi ngaˆ teˇ hpaˍ leh to nuˇ to shaˆ teˇ hpaˍ hta‸ caˍ piˇ tuˬ yoˬ, teh‸ kʼoˆ ve yoˬ.

45Oˇ htaˇ, Daˍviˆ kʼaw‸ yaw hkʼaw‸ leh kʼoˆ ve, Nawˬ lehˬ aˉhtaw leh gehˇ pfuhˇ veu laˇ leh ngaˬ geh laˬ ve yoˬ. Ya‸ hkʼaˇ, ngaˬ lehˬ nawˬ maˇ shawˍ maˇ caˆ kʼoˆ chehˇ ve Iˉsaˍreˍlaˆ ma‸ moˍ ma‸ cuˇ ve Gʼuiˬsha ve awˬ meh hkʼaw nawˬ geh laˬ ve yoˬ.

46Ngaˬ ve Gʼuiˬsha lehˬ, ya‸ nyi nawˬ hta‸ ngaˬ ve la‸ sheh hkʼaw lo chiˇ a‸ laˇ tuˬ ve yoˬ. Nawˬ ve oˉ kʼoˍ hta‸ ngaˬ tawˆ cheˆ leh, Hpiˇliˇtiˆ ma‸ yaˇ teˇ hpaˍ ve awˬ to hta‸ ngaˆ leh to nuˇ to shaˆ teˇ hpaˍ hta‸ caˍ piˇ tuˬ yoˬ. Iˉsaˍreˍlaˆ chaw hui Gʼuiˬsha teˇ gʼaˇ cawˬ ve hta‸ miˬguiˬ yaˇ hkʼa peu-eˬ gʼa shiˍ tuˬ yoˬ.

47Gʼuiˬsha lehˬ, yawˇ ve chaw teˇ hpaˍ hta‸ ponˬ piˇ tuˬ, aˉhtaw leh gehˇ teˇ hpaˍ hta‸ maˇ loˍ ve awˬ lawn, ya‸ nyi choˬ kaˬ lo chehˇ taˍ ve chaw hkʼa peu-eˬ gʼa mawˬ tuˬ yoˬ. Yawˇ lehˬ, ma‸ bawˆ kuiˬ hkʼaw lo gʼaˇ shehˍ hpaˇ hpeh‸ leh, nawˬ hui hkʼa peu-eˬ ve hta‸ ngaˬ hui ve la‸ sheh hkʼaw chiˇ a‸ laˇ tuˬ yoˬ, teh‸ kʼoˆ ve yoˬ.

48Oˇ htaˇ, Gawˇliˇyaˆ Daˍviˆ geh laˬ ve yoˬ. Hkʼe te leh, Daˍviˆ yawˇ geh gʼuiˇ kʼai ve yoˬ.

49Daˍviˆ lehˬ, yawˇ ve miˉ chaw hkʼaw haˉ pui shiˍ teˇ shiˍ hkaˆ yuˬ leh, Gawˇliˇya‸ hta‸ bawˆ hpehˇ ve yoˬ. Haˉ pui shiˍ oˇ ve Gawˇliˇya‸ ve naˍ kʼa‸ pui hta‸ heuˆ leh, yawˇ miˬ chaˇ hkʼoˆ paiˍ ve yoˬ.

50Daˍviˆ lehˬ aˉhtaw maˇ cawˬ. Hawˉ ma hta‸ yehˇ leh Gawˇliˇya‸ hta‸ bawˆ pehˍ piˇ ve yoˬ.

51Yawˇ Gawˇliˇya‸ geh gʼuiˇ kʼai leh, yawˇ awˬ hkʼoˆ lo taˆ huˉ peuˬ hkʼaw‸ nawˉ, Gawˇliˇya‸ pfuhˇ taˍ ve aˉhtaw hta‸ gʼawˬ tawˆ leh, yawˇ ve oˉ kʼoˉ hta‸ tawˆ cheˆ ve yoˬ. Hpiˇliˇtiˆ chaw teˇ hpaˍ lehˬ, yawˇ hui ve awˬ hoˉ suh-e ve hta‸ gʼa mawˬ ve teˇ yanˇ gʼuiˇ hpaw-e ve yoˬ.

52Iˉsaˍreˍlaˆ chaw leh Yuˇda‸ chaw teˇ hpaˍ gʼaˇ hte‸ kuˬ leh, yawˇ hui hta‸ Gaˍtaˆ venˇ leh Eˇkaˍronˍ venˇ lo hkʼa gaˬ gʼa‸ yuˬ kʼai ve yoˬ. Hpiˇliˇtiˆ chaw teˇ hpaˍ lehˬ, Shaˍrenˍ, Gaˍtaˆ leh Eˇkaˍronˍ venˇ lo kʼai ve ya‸ kaw hpuiˇ lo te luˬ te sheˆ ve hta‸ gʼa hkanˍ ve yoˬ.

53Iˉsaˍreˍlaˆ chaw hui lehˬ, Hpiˇliˇtiˆ chaw hui hta‸ gʼa‸ yuˬ peuˬ hkʼaw‸ nawˉ kʼaw‸ hpfuhˆ kʼaw‸ la leh, yawˇ hui ve fa la teˇ hpaˍ hta‸ hiˉ yuˬ ve yoˬ.

54Daˍviˆ lehˬ, Gawˇliˇya‸ ve oˉ kʼoˍ hta‸ Yeˍruˆsaˍlehnˍ venˇ lo yuˬ kʼai ve yoˬ. Ya‸ hkʼaˇ, yawˇ lehˬ Gawˇliˇya‸ ve la‸ caˉ teˇ hpaˍ hta‸ yawˇ ve aˉ po kʼo hkʼaw teh taˍ ve yoˬ.

55Daˍviˆ Gawˇliˇya‸ hta‸ bawˆ da‸ tuˬ tawˆ kʼai chehˇ ve hta‸ Sawˉlu‸ gʼa mawˬ ve teˇ yanˇ, Yaˇ paˍ-oˇ ve a shu ve yaˇ le, teh‸ yawˇ ve ma‸ poˍ lonˉ Aˍbaˍnaˍ hta‸ na nyi ve yoˬ. Oˇ htaˇ Aˍbaˍnaˍ lehˬ, Jawˇmawˇ-oˬ, ngaˬ maˇ shiˍ, teh‸ yawˇ hta‸ kʼaw‸ yaw hkʼaw‸ piˇ ve yoˬ.

56Hkʼe te kʼo, nawˬ kʼai leh ca chaˬ nyi-o, teh‸ yawˇ hta‸ kʼoˆ piˇ ve yoˬ.

57Daˍviˆ lehˬ Gawˇliˇya‸ hta‸ tiˇ pehˍ peuˬ hkʼaw‸ nawˉ, yawˇ ve oˉ kʼoˍ hta‸ yuˬ leh kʼaw‸ la chehˇ ve teˇ yanˇ, Aˍbaˍnaˍ yawˇ hta‸ Sawˉlu‸ geh shiˍ kʼai ve yoˬ.

58Oˇ htaˇ Sawˉlu‸ lehˬ, Yaˇ paˍ-oˬ, nawˬ a shu ve yaˇ le, teh‸ yawˇ hta‸ na nyi ve yoˬ. Ngaˬ lehˬ, Behˍlehˍhehnˍ venˇ hkʼaw chehˇ ve nawˬ ve awˬ ceˬ paˍ Yeˍsehˇ ve yaˇ hpeh‸ ve yoˬ, teh‸ Sawˇlu‸ hta‸ kʼaw‸ yaw hkʼaw‸ piˇ ve yoˬ.