1 Samuel 20

Lahu Bible Edited © Thailand Bible Society and Bible Society of Myanmar, 2010, 2020.

1Oˇ ve hkʼaw‸ nawˉ, Daˍviˆ lehˬ Raˍmaˆ venˇ paˇ lo cawˬ ve Naˍyoˆ venˇ hkʼaw tu leh Yawˇnaˆtanˍ geh kʼai ve yoˬ. Yawˇ Yawˇnaˆtanˍ hta‸ kʼoˆ piˇ ve, Ngaˬ aˬ hto‸ ma te ya‸ kuiˬ cawˬ leh, nawˬ pa ngaˬ hta‸ chi taw taw tiˇ pehˍ gaˇ ve le, teh‸ yawˇ hta‸ kʼoˆ piˇ ve yoˬ.

2Yawˇnaˆtanˍ kʼaw‸ yaw hkʼaw‸ leh kʼoˆ ve, Nawˬ gʼa suh tuˬ ve hta‸ Gʼuiˬsha nyi ma maˇ cawˇ. Ngaˬ pa lehˬ, yawˇ hkʼa te ve kanˉ teˇ ceuˬ le le, ngaˬ hta‸ hto laˇ chehˇ ve yoˬ. Teˇ ceuˬ ka‸ yawˇ ngaˬ hta‸ maˇ faˉ taˍ. Nawˬ kʼoˆ ve lehˬ maˇ cawˇ, teh‸ yawˇ hta‸ kʼoˆ piˇ ve yoˬ.

3Daˍviˆ kʼaw‸ kʼoˆ ve, Nawˬ ngaˬ hta‸ hkʼaˬ ma ha‸ ve nawˬ pa hkʼa deh‸ shiˍ taˍ ve yoˬ. Hkʼe te leh, nawˬ nyi ma luˬ puiˉ-aˆ teh‸ dawˇ hkiˉ ve pa taw yawˇ te tuˬ ve kanˉ teˇ hpaˍ nawˬ hta‸ maˇ hto laˇ ve yoˬ. Ngaˬ aˬ laˬ hkʼe kʼo gʼa suh peuˬ, teh‸ Gʼuiˬsha hta‸ cuˇ leh hkanˍ ve yoˬ, teh‸ yawˇ hta‸ kʼoˆ piˇ ve yoˬ.

4Oˇ htaˇ Yawˇnaˆtanˍ lehˬ, Nawˬ heuˆ gaˇ ve hkʼe ngaˬ te laˇ tuˬ yoˬ, teh‸ Daˍviˆ hta‸ kʼoˆ piˇ ve yoˬ.

5Daˍviˆ kʼoˆ ve, Shawˉ paw kʼo ha pa tawˬ ve pawehˇ te tuˬ ve awˬ yanˇ gaˬ peuˬ leh, ngaˬ lehˬ jawˇmawˇ geh teˇ geh gʼa mui caˇ tuˬ ve yoˬ. Hkʼe te leh, ngaˬ nawˬ geh a hkaw-anˬ lawˬ taˉ leh, hpa‸ nyi mvuhˇ hpeu‸ hkʼa gaˬ heh puiˉ hkʼaw lo ca va‸ taˍ tuˬ yoˬ.

6Nawˬ pa ngaˬ hta‸ ca ve kʼo, Ngaˬ nawˬ geh a hkaw-anˬ lawˬ taˉ leh Behˍlehˍ hehnˍ venˇ lo ngaˬ ve yehˬ yaˇ kʼa yaˇ teˇ hpaˍ geh teˇ geh Gʼuiˬsha hta‸ ca tuˉ tanˇ kʼai peuˬ, teh‸ a ciˉ kʼoˆ piˇ-oˆ.

7Yawˇ lehˬ, Te‸ chiˉ maˇ heˆ, teh‸ kʼoˆ ve kʼo ngaˬ gʼa ponˬ tuˬ yoˬ. Ya‸ hkʼaˇ, yawˇ nyi ma zuhˆ ve kʼo, yawˇ ngaˬ hta‸ te luˬ tuˬ dawˇ cheˆ taˍ peuˬ ve hta‸ nawˬ gʼa shiˍ tuˬ yoˬ.

8Nawˬ ngaˬ hta‸ te taˍ ve ka ti‸ hta‸ dawˇ nawˇ leh chi hkʼe a ciˉ te laˇ-oˆ. Maˇ heˆ leh ngaˬ venˇbaˆ cawˬ ve kʼo, nawˬ awˬ to ngaˬ hta‸ tiˇ pehˍ laˇ-oˆ. Aˬ hto‸ ma pa taw, nawˬ pa hta‸ gʼa te tcuh tuˬ ve le, teh‸ yawˇ hta‸ kʼoˆ piˇ ve yoˬ.

9Yawˇnaˆtanˍ kʼaw‸ yaw hkʼaw‸ leh kʼoˆ ve, Nawˬ oˇ hkʼe taˇ dawˇ. Ngaˬ pa nawˬ hta‸ te luˬ gaˇ ve hta‸ ngaˬ hkʼa deh‸ shiˍ ve hkʼe kʼo, ngaˬ nawˬ hta‸ maˇ hto laˇ leh hkʼe leˇ chehˇ taˍ tuˬ ve laˇ, teh‸ kʼoˆ ve yoˬ.

10Oˇ htaˇ Daˍviˆ kʼoˆ ve, Nawˬ pa nawˬ hta‸ tawˇ hehnˇ chaweh kʼaw‸ yaw hkʼaw‸ laˇ ve kʼo, a shu ngaˬ hta‸ ca kʼaw‸ hto laˇ tuˬ ve le, teh‸ Yawˇnaˆtanˍ hta‸ na nyi ve yoˬ.

11Oˇ htaˇ Yawˇnaˆtanˍ lehˬ, Laˬ-o‸. Ngaˬ huiˉ maˬ heh puiˉ hkʼaw lo kʼai-a veuˬ, teh‸ Daˍviˆ hta‸ kʼoˆ piˇ ve yoˬ. Hkʼe te leh yawˇ huiˉ maˬ tawˆ kʼai ve yoˬ.

12Yawˇnaˆtanˍ Daˍviˆ hta‸ kʼoˆ piˇ ve, Iˉsaˍreˍlaˆ ve Jawˇmawˇ Gʼuiˬsha lehˬ, ngaˬ huiˉ maˬ awˬ kaˍ lo shaˉ hkiˆ hpeh‸ piˇ-oˆ. Shawˉ pawˍ chi teˇ yanˇ leh hpa‸ nyi teˇ nyi awˬ hkʼaw lo, ngaˬ pa hta‸ ngaˬ na nyi tuˬ yoˬ. Yawˇ nawˬ hta‸ te luˬ gaˇ ve nyi ma cawˬ ve kʼo, ngaˬ nawˬ geh tawˇ shanˍ feu laˇ tuˬ yoˬ.

13Yawˇ nawˬ hta‸ te luˬ tuˬ dawˇ taˍ leh, nawˬ gʼa ponˬ tuˬ ngaˬ nawˬ hta‸ tawˇ maˇ shanˍ feu laˇ ve kʼo, Gʼuiˬsha ngaˬ hta‸ tiˇ pehˍ laˇ piˇ-oˆ. Gʼuiˬsha ngaˬ pa geh chehˇ ve hkʼe, nawˬ geh htawˇ chehˇ piˇ-oˆ.

14Ngaˬ a sha‸ te‸ chehˇ ve ceh ceh, nawˬ ka ti‸ te taˍ ve hkʼe ngaˬ hta‸ ka ti‸ yeˬ piˇ-o. Ngaˬ gʼa suh-e puiˉ ve kʼo,

15ngaˬ ve yehˬ yaˇ kʼa yaˇ teˇ hpaˍ hta‸ a ciˉ ha kʼaˉ piˇ-oˆ. Gʼuiˬsha lehˬ, nawˬ ve canˇ paˍ hkʼa peu-eˬ ve hta‸ te luˬ te sheˆ piˇ peuˬ htaˇ hkʼa gaˬ,

16ngaˬ huiˉ maˬ te da‸ taˍ ve ka ti‸ hta‸ taˇ luˬ kʼai piˇ. Ka ti‸ chi hta‸ nawˬ te luˬ ve kʼo, Gʼuiˬsha nawˬ hta‸ ciˍ yanˍ laˇ tuˬ yoˬ, teh‸ kʼoˆ ve yoˬ.

17Yawˇnaˆtanˍ lehˬ, Daˍviˆ yawˇ hta‸ ha‸ tuˬ ka ti‸ teˇ pawˆkʼaw‸ te tcuh ve yoˬ. Awˬ lawn kʼo, Yawˇnaˆtanˍ lehˬ yawˇ ve awˬ to hta‸ ha‸ ve hkʼe, Daˍviˆ hta‸ ha‸ jaˇ ve yoˬ.

18Oˇ ve hkʼaw‸ nawˉ, Yawˇnaˆtanˍ Daˍviˆ hta‸ kʼoˆ piˇ ve, Shawˉ pawˍ kʼo ha pa tawˬ ve pawehˇ te tuˬ yoˬ. Nawˬ pawehˇ te kuiˬ lo maˇ chehˇ taˍ ve kʼo, nawˬ mehˉ kʼai ve hta‸ shu gʼa shiˍ tuˬ yoˬ.

19Leuˉ leh hpa‸ nyi gaˬ kʼo, nawˬ mehˉ kʼai ve hta‸ chaw teˇ gʼaˇ le le hkʼa deh‸ gʼa shiˍ tuˬ yoˬ. Chi hta‸ pa taw, ponˬ laˬ htaˇ nawˬ va‸ taˍ jaw ve haˉ pui hpoˆ oˇ ve awˬ baˬ lo ca kʼaw‸ va‸ taˍ-o‸.

20Haˉ pui hpoˆ oˇ ve lo ngaˬ hkaˆ ce shehˆ maˬ bawˆ peu laˇ tuˬ yoˬ.

21Peuˬ hkʼaw‸ nawˉ, hkaˆ ce oˇ ve teˇ hpaˍ hta‸ ca nyi tuˬ ngaˬ ve awˬ ceˬ paˍ teˇ gʼaˇ hta‸ kʼai tcuh tuˬ yoˬ. Oˇ htaˇ ngaˬ lehˬ, Nyi loˬ. Hkaˆ ce teˇ hpaˍ choˬ hpawˇ lo ce taˍ ve yoˬ. Gʼawˆ yuˬ-o‸, teh‸ kʼoˆ piˇ ve kʼo nawˬ lehˬ dawˇ haˍ tuˬ maˇ cawˬ. Kʼaw‸ la hpeh‸ ve yoˬ. Gʼuiˬsha hta‸ cuˇ leh ngaˬ hkanˍ ve yoˬ.

22Ya‸ hkʼaˇ, ngaˬ lehˬ awˬ ceˬ paˍ oˇ ve hta‸, Hkaˆ ce teˇ hpaˍ oˇ paˉ hpawˇ lo ce taˍ ve yoˬ, teh‸ kʼoˆ piˇ ve kʼo, nawˬ hpaw-e loˬ. Awˬ lawn kʼo, Gʼuiˬsha nawˬ hta‸ hpaw-e tcuh laˇ chehˇ ve yoˬ.

23Ya‸ hkʼaˇ, ngaˬ huiˉ maˬ teˇ gʼaˇ hta‸ teˇ gʼaˇ te da‸ taˍ ve ka ti‸ hta‸ maˇ gʼa te luˬ tuˬ, Gʼuiˬsha lehˬ ngaˬ huiˉ maˬ awˬ kaˍ lo shaˉ hkiˆ hpeh‸ ve yoˬ, teh‸ Daˍ viˆ hta‸ kʼoˆ piˇ ve yoˬ.

24Hkʼe te leh, Daˍviˆ heh puiˉ hkʼaw lo ca va‸ taˍ ve yoˬ. Ha pa tawˬ ve pawehˇ te ve teˇ yanˇ, Sawˉlu‸ lehˬ hti caˇ hti dawˬ kuiˬ lo laˬ leh,

25yawˇ mui jaw kuiˬ gʼo‸ pa paˇ lo mui ve yoˬ. Aˍbaˍnaˍ yawˇ awˬ paˇ lo mui leh, Yawˇnaˆtanˍ leh jawˇmawˇ hta‸ mehˆ hpfuhˇ tawˍ da‸ leh mui ve yoˬ. Ya‸ hkʼaˇ, Daˍviˆ hta‸ maˇ mawˬ.

26Oˇ ve teˇ nyi Sawˉlu‸ te‸ chiˉ maˇ kʼoˆ. Yawˇ maˇ da‸ maˇ kehˬ leh teˇ ceuˬ ceuˬ hpeh‸ ve hehˉ teh‸ dawˇ ve yoˬ.

27Ha pa tawˬ ve pawehˇ te peuˬ hkʼaw‸ nawˉ teˇ nyi htawˇ, Daˍviˆ hta‸ maˇ mawˬ. Hkʼe te leh Sawˉlu‸ lehˬ, Aˬ hto‸ ma pa taw Daˍviˆ aˉ nyi ya‸ nyi hti caˇ hti dawˬ kuiˬ lo maˇ laˬ ve le, teh‸ Yawˆnaˆtanˍ hta‸ na nyi ve yoˬ.

28Yawˇnaˆtanˍ kʼaw‸ yaw hkʼaw‸ leh kʼoˆ ve, Yawˇ Behˍlehˍhehnˍ lo kʼaw‸ kʼo‸-e tuˬ ngaˬ geh a hkaw-anˬ lawˬ laˇ ve yoˬ.

29Yawˇ kʼoˆ ve, Ngaˬ hta‸ a hkaw-anˬ a ciˉ pe‸ laˇ-oˆ. Awˬ lawn kʼo, ngaˬ ve yehˬ yaˇ kʼa yaˇ teˇ hpaˍ Gʼuiˬsha hta‸ tuˉ tanˇ tuˬ gu chehˇ leh, ngaˬ viˉ paˍ teˇ hpaˍ ngaˬ hta‸ kʼaw‸ la tuˬ kʼoˆ laˇ ve yoˬ. Chi hta‸ pa taw, nawˬ lehˬ ngaˬ ve awˬ chawˇ hpeh‸ ve kʼo, ngaˬ viˉ ngaˬ nyi teˇ hpaˍ hta‸ ca kʼaw‸ hpuˇ da‸ tuˬ ngaˬ hta‸ a ciˉ kʼo‸-e tcuh laˇ-oˆ, teh‸ ngaˬ hta‸ kʼoˆ laˇ ve yoˬ. Hkʼe te leh, yawˇ ya‸ nyi hti caˇ hti dawˬ kuiˬ lo maˇ gaˬ la ve yoˬ, teh‸ kʼoˆ piˇ ve yoˬ.

30Oˇ htaˇ, Sawˉlu‸ Yawˇnaˆtanˍ hta‸ nyi ma zuhˆ jaˇ leh kʼoˆ ve, Nawˬ chaw luˬ paˍ yoˬ. Nawˬ Daˍviˆ hpawˇ chehˇ ve hta‸ chi beu‸ ngaˬ gʼa shiˍ peuˬ. Nawˬ lehˬ, nawˬ hkʼaˇ nawˬ ve awˬ me‸ awˬ hponˇ leh, nawˬ e ve awˬ me‸ awˬ hponˇ hta‸ te luˬ chehˇ ve yoˬ.

31Daˍviˆ a sha‸ te‸ chehˇ ve teˇ co, nawˬ lehˬ mvuhˇmiˬ chi ve hkʼaw jawˇmawˇ gʼa te taˉ tuˬ ve maˇ heˆ. Chi beu‸ yawˇ hta‸ gʼa‸ ca leh, cho kaˬ lo shiˍ veu laˇ-oˆ. Yawˇ gʼa suh tuˬ yoˬ, teh‸ kʼoˆ ve yoˬ.

32Oˇ htaˇ, Yawˇnaˆtanˍ lehˬ, Aˬ hto‸ ma pa taw yawˇ gʼa suh tuˬ ve le. Yawˇ aˬ hto‸ ma te ya‸ kuiˬ cawˬ le, teh‸ yawˇ hta‸ kʼaw‸ na nyi ve yoˬ.

33Oˇ htaˇ Sawˉlu‸ lehˬ, Yawˇnaˆtanˍ hta‸ gehˇ yuˬ leh baˬ hpehˇ ve yoˬ. Hkʼe te leh, yawˇ ve awˬ pa lehˬ Daˍviˆ hta‸ tiˇ pehˍ tuˬ dawˇ cheˆ taˍ ve hta‸ shiˍ la ve yoˬ.

34Hkʼe te leh, yawˇ nyi ma zuhˆ jaˇ ve pa taw, hti caˇ hti dawˬ kuiˬ hkʼaw te‸ chiˉ maˇ caˇ maˇ dawˬ taˉ leh tawˆ kʼai ve yoˬ. Yawˇ awˬ pa lehˬ, Daˍviˆ hta‸ maˇ shawˍ maˇ caˆ te ve pa taw, yawˇ hpeh‸ bawˬ jaˇ ve yoˬ.

35Shawˉ pawˍ mvuhˇ shawˉ Yawˆnaˆtanˍ tu la leh, yawˇ huiˉ maˬ kʼoˆ da‸ taˍ ve hkʼe, Daˍviˆ hta‸ hpuˇ da‸ tuˬ heh puiˉ hkʼaw lo kʼai ve yoˬ. Yawˇ geh yaˇ paˍ teˇ gʼaˇ shiˍ kʼai ve yoˬ.

36Oˇ htaˇ yawˇ lehˬ, Chi beu‸ ngaˬ bawˆ peu tuˬ ve hkaˆ ce hta‸ ca nyi gʼawˆ-e lo, teh‸ yaˇ paˍ oˇ ve hta‸ kʼoˆ piˇ ve yoˬ. Yaˇ paˍ oˇ ve kʼai chehˇ htaˇ, yawˇ lehˬ hkaˆ ce teˇ maˬ hta‸ yawˇ gʼuˇ suhˍ lo bawˆ peu piˇ ve yoˬ.

37Hkaˆ ce oˇ ve ce taˍ kuiˬ lo yaˇ paˍ oˇ ve gaˬ ve teˇ yanˇ Yawˇnaˆtanˍ lehˬ, Hkaˆ ce nawˬ gʼuˇ suhˍ lo cawˬ taˍ ve yoˬ.

38Oˇ kaˬ lo taˇ huˉ chehˇ. Haˆ ca gʼawˆ veu laˇ-oˆ, teh‸ yawˇ hta‸ kʼoˆ piˇ ve yoˬ. Yaˇ paˍ oˇ ve hkaˆ ce hta‸ gʼawˆ veu laˇ leh yawˇ geh kʼaw‸ la ve yoˬ.

39Yaˇ paˍ oˇ ve lehˬ, yawˇ ve awˬ shehˍ hpaˇ aˬ hto‸ ma te chehˇ ve hta‸ maˇ shiˍ. Yawˇnaˆtanˍ leh Daˍviˆ ceh tiˉ shiˍ ve yoˬ.

40Yawˇnaˆtanˍ lehˬ, yawˇ ve la‸ caˉ teˇ hpaˍ yaˇ paˍ oˇ ve hta‸ piˇ leh aˉ hkʼaw lo yuˬ kʼo‸-e tcuh ve yoˬ.

41Yaˇ paˍ oˇ ve kʼo‸-e peuˬ hkʼaw‸ nawˉ, Daˍviˆ lehˬ yawˇ va‸ chehˇ taˍ kuiˬ lo tawˆ la ve yoˬ. Yawˬ miˬ chaˇ hkʼoˆ lo paˍ zuh‸ taˍ leh shehˆ pawˆ hkʼa gaˬ oˉ kʼoˍ pui ve yoˬ. Yawˇnaˆtanˍ yawˇ huiˉ maˬ kʼuˉ da‸ taˍ leh gʼaˇ hte‸ hawˬ ve yoˬ. Daˍviˆ lehˬ, Yawˇnaˆtanˍ a‸ kehˉ hpeh‸ bawˬ jaˇ ve yoˬ.

42Oˇ ve hkʼaw‸ nawˉ, Yawˇnaˆtanˍ Daˍviˆ hta‸ kʼoˆ piˇve, Gʼuiˬsha nawˬ geh chehˇ piˇ-oˆ. Ngaˬ huiˉ maˬ leh ngaˬ huiˉ maˬ ve awˬ ceuˬ awˬ hkʼaˇ teˇ hpaˍ, ngaˬ huiˉ maˬ teˇ gʼaˇ hta‸ teˇ gʼaˇ te da‸ taˍ ve ka ti‸ hta‸ maˇ gʼa te luˬ tuˬ, Gʼuiˬsha lehˬ ngaˬ huiˉ maˬ awˬ kaˍ lo shaˉ hkiˆ hpeh‸ piˇ-oˆ, teh‸ kʼoˆ ve yoˬ. Oˇ hkʼe kʼoˆ peuˬ hkʼaw‸ nawˉ, Daˍviˆ hpaw-e ve yoˬ. Yawˆnaˆtanˍ htawˇ venˇ hkʼaw lo kʼaw‸ kʼo‸-e ve yoˬ.

← Chapter 19 Jump to: Chapter 21 →