1 Samuel 25

Lahu Bible Edited © Thailand Bible Society and Bible Society of Myanmar, 2010, 2020.

1Saˍmo-eˍlaˆ suh-e leh, Iˉsaˍreˍlaˆ chaw hkʼa peu-eˬ teˇ geh hpawnˬ laˬ leh kuˬ hawˬ paˆ hawˬ ve yoˬ. Oˇ ve hkʼaw‸ nawˉ, yawˇ hui yawˇ hta‸ Raˍmaˆ venˇ hkʼaw tuˍ piˇ ve yoˬ. Daˍviˆ lehˬ, Paˍranˍ teh‸ kʼoˆ ve hteunˍ lo kʼai ve yoˬ.

2Oˇ kaˬ lo Kaˍlehˆ ve awˬ ceuˬ awˬ hkʼaˇ, Naˍbaˍlaˆ teh‸ kʼoˆ ve chaw teˇ gʼaˇ cawˬ ve yoˬ. Yawˇ lehˬ, Kaˍmeˍlaˆ venˇ hkʼaw chehˇ ve yoˬ. Yawˇ lehˬ paw sha jaˇ ve chaw hpeh‸ leh, yawˬ 3 hinˉ leh aˉ che‸ teˇ hinˉ cawˬ ve yoˬ.

3Yawˇ ve awˬ miˇ ma lehˬ, Aˍbiˆgeˍlaˆ teh‸ meh ve yoˬ. Yawˇ lehˬ cuˇ yiˍ cawˬ leh awˬ hkiˇ awˬ naˬ da‸ ve yaˇ miˇ hpeh‸ ve yoˬ. Ya‸ hkʼaˇ, yawˇ ve awˬ hpawˇ lehˬ nyi ma maˇ da‸ leh haiˬve chaw hpeh‸ ve yoˬ. Yawˇ lehˬ Kaˍmeˍlaˆ venˇ hkʼaw lo yawˬ mvuh nuˆ chehˇ taˍ ve yoˬ.

4Daˍviˆ lehˬ heh puiˉ hkʼaw lo chehˇ taˍ leh, awˬ lawn oˇ ve hta‸ gʼa kaˇ ve yoˬ.

5Hkʼe te leh, yawˇ chaw haˉ paˍ teˇ chi gʼaˇ hta‸ kuˬ yuˬ leh, Nawˬ hui Kaˍmeˍlaˆ venˇ lo Naˍbaˍlaˆ geh kʼai-o.

6Yawˇ hta‸ mawˬ ve kʼo, Daˍviˆ nawˬ hta‸ chi hkʼe kʼoˆ feu laˇ ve yoˬ, teh‸ kʼoˆ piˇ-oˆ. Awˬ chawˇ-oˬ, nawˬ leh nawˬ ve yehˬ yaˇ kʼa yaˇ teˇ hpaˍ geh dawˇ sha tuˬ cawˬ piˇ-oˆ.

7Nawˬ yawˬ mvuh nuˆ chehˇ ve awˬ hkawˇ hta‸ ngaˬ gʼa kaˇ ve yoˬ. Nawˬ ve yawˬ hawˉ shehˍ hpaˇ teˇ hpaˍ lehˬ, ha lehˬ dawˇ sha ve hkʼaw ngaˬ hui geh chehˇ taˍ ve yoˬ. Ngaˬ hui yawˇ hui hta‸ te‸ chiˉ maˇ te piˇ. Yawˇ hui Kaˍmeˍlaˆ venˇ hkʼaw chehˇ taˍ htaˇ, yawˇ hui ve ceˇ teˇ hkeh ka‸ maˇ mehˉ.

8Nawˬ maˇ yonˍ kʼo, yawˇ hui hta‸ na nyi-o. Yawˇ hui nawˬ hta‸ oˇ hkʼe kʼoˆ laˇ tuˬ yoˬ. Ngaˬ peu laˇ ve chaw chi teˇ hpaˍ hta‸ hkʼa deh‸ ha‸ yuˬ piˇ-oˆ. Awˬ lawn kʼo, pawehˇ te ve awˬ nyi gaˬ la htaˇ, ngaˬ hui venˇ hkʼaw laˬ tuˬ yoˬ. Nawˬ piˇ laˇ hpeh‸ ve mawˇ teˇ hpaˍ, nawˬ ve awˬ ceˬ teˇ hpaˍ leh, nawˬ ve awˬ chawˇ Daˍviˆ hta‸ a ciˉ piˇ laˇ-oˆ, teh‸ yawˇ hta‸ ca kʼoˆ piˇ tcuh ve yoˬ.

9Daˍviˆ ve chaw teˇ hpaˍ Naˍbaˍlaˆ geh kʼai leh Daˍviˆ ve tawˇ oˇ ve hkʼa peu-eˬ yawˇ hta‸ kʼoˆ piˇ ve yoˬ. Peuˬ hkʼaw‸ nawˉ, yawˇ hui oˇ kaˬ lo law taˍ ve yoˬ.

10Oˇ htaˇ Naˍbaˍlaˆ lehˬ, Daˍviˆ kʼoˆ ve a shu le. Awˬ meh chi hta‸ ngaˬ teˇ pawˆ ka‸ maˇ kaˇ jaw. Chi beu‸ ve awˬ yanˇ hkʼaw, hpaw toˇ chehˇ ve awˬ ceˬ laiˉ gʼaˇ cawˬ ve yoˬ.

11Chi hkʼe chehˇ kuiˬ awˬ ti maˇ cawˬ leh hpaw toˇ chehˇ ve chaw hui hta‸ ngaˬ ve hkaoˍmonˇ, iˉ kaˆ leh shaˍ caˍ piˇ tuˬ ve maˇ heˆ, teh‸ yawˇ hui hta‸ kʼoˆ piˇ ve yoˬ.

12Daˍviˆ ve chaw teˇ hpaˍ Daˍviˆ geh kʼaw‸ kʼo‸-e leh, Naˍbaˍlaˆ kʼoˆ ve tawˇ oˇ ve hkʼa peu-eˬ yawˇ hta‸ kʼaw‸ hto piˇ ve yoˬ.

13Oˇ htaˇ Daˍviˆ lehˬ, Nawˬ hui ve aˉhtaw pfuhˇ-oˆ, teh‸ yawˇ hui hta‸ kʼoˆ piˇ leh, yawˇ hui hkʼa peu-eˬ a shu yawˇ ve aˉhtaw yuˬ pfuhˇ ve yoˬ. Daˍviˆ htawˇ aˉhtaw yuˬ pfuhˇ peuˬ hkʼaw‸ nawˉ, yawˇ ve ma‸ yaˇ 400 gʼaˇ hta‸ shiˍ leh tawˆ kʼai ve yoˬ. Awˬ nu ve ma‸ yaˇ 200 gʼaˇ lehˬ oˇ kaˬ lo shaw chehˇ taˉ ve yoˬ.

14Naˍbaˍlaˆ ve awˬ ceˬ paˍ teˇ gʼaˇ, Naˍbaˍlaˆ miˇ ma Aˍbiˇgeˍlaˆ geh kʼai leh kʼoˆ ve, Daˍviˆ lehˬ heh puiˉ hkʼaw lo chehˇ taˍ leh, yawˇ ve chaw teˇ hpaˍ hta‸ ngaˬ hui ve awˬ shehˍ hpaˇ geh kʼai peu ve yoˬ. Ya‸ hkʼaˇ, yawˇ lehˬ chaw oˇ ve teˇ hpaˍ hta‸ maˇ shawˍ maˇ caˆ kʼoˆ piˇ ve yoˬ. Awˬ lawn chi hta‸ nawˬ gʼa kaˇ peuˬ laˇ.

15Chaw oˇ ve teˇ hpaˍ lehˬ, ngaˬ hui hta‸ hkʼa deh‸ ga laˇ ve yoˬ. Yawˇ hui teˇ pawˆ ka‸ ngaˬ hui hta‸ maˇ te sho‸ sha‸ laˇ jaw. Heh puiˉ hkʼaw lo ngaˬ hui teˇ hpaˍ yawˇ hui geh chehˇ taˍ htaˇ, ngaˬ hui ve mawˇ te‸ chiˉ ka‸ maˇ mehˉ jaw.

16Ngaˬ hui yawˬ hawˉ chehˇ ve teˇ yanˇ, mvuhˇ law‸ kʼaw mvuhˇ hpeu‸ yawˇ hui ha‸ shaˉ laˇ chehˇ ve yoˬ.

17Awˬ lawn chi teˇ hpaˍ hta‸ jehˬ da‸ leh yawˇ hui hta‸ hkʼaˬ hkʼe kʼaw‸ te piˇ cawˇ ve hta‸ dawˇ nyi cawˇ ve yoˬ. Oˇ hkʼe maˇ te kʼo, ngaˬ hui ve awˬ shehˍ hpaˇ leh yawˇ ve yehˬ yaˇ kʼa yaˇ teˇ hpaˍ awˬ pon dawˇ haˍ tuˬ cawˬ ve yoˬ. Yawˇ lehˬ nyi ma maˇ da‸ ve chaw hpeh‸ ve pa taw, shu kʼoˆ ve tawˇ hta‸ maˇ na gʼa puiˉ, teh‸ Aˍbiˆgeˍlaˆ hta‸ kʼoˆ piˇ ve yoˬ.

18Oˇ htaˇ, Aˍbiˆgeˬlaˆ lehˬ hkaoˍmonˇ 200 shiˍ, a pehˉ meuˇ gʼuiˬ nyiˇ punˇ, piˬ taˍ ve yawˬ ehˉ ngaˇ hkeh, sha ma hu taˍ ve nyiˇ hkʼawˍ lawˇ, a pehˉ meuˇ shiˍ awˬ goˇ teˇ ha kʼoˍ, maˉ nawˆ shiˍ hkaoˍmonˇ te taˍ ve nyiˇ ha shiˍ, piˉ laˬ hkʼoˆ tsuh‸ keu ve yoˬ.

19Oˇ hkʼe te peuˬ hkʼaw‸ nawˉ, Nawˬ hui ngaˬ gʼuˇ suhˍ kʼai-o. Ngaˬ nawˬ hui hkʼaˇ suh gʼa‸ laˬ tuˬ yoˬ, teh‸ yawˇ ve awˬ ceˬ paˍ teˇ hpaˍ hta‸ kʼoˆ piˇ ve yoˬ. Yawˇ oˇ hkʼe te ve awˬ lawn yawˇ ve awˬ hpawˇ hta‸ maˇ hto piˇ.

20Yawˇ piˉ laˬ ciˇ leh hkʼaw hkʼoˆ ya‸-e chehˇ ve teˇ yanˇ, Daˍviˆ leh yawˇ ve ma‸ yaˇ teˇ hpaˍ hta‸ hpuˇ da‸ ve yoˬ.

21Daˍviˆ lehˬ, Aˬ hto‸ ma pa taw choˬ kaˬ heh puiˉ hkʼaw lo chaw oˇ ve hpaˇ ve mawˇ hta‸ ngaˬ gʼa ha‸ shaˉ piˇ tuˬ le. Yawˇ ve mawˇ te‸ chiˉ maˇ mehˉ. Ngaˬ yawˇ hta‸ chi taw ga piˇ chehˇ ve htawˇ, yawˇ ngaˬ hta‸ chi hkʼe maˇ shawˍ maˇ caˆ kʼoˆ laˇ ve yoˬ.

22Mvuhˇ maˇ htiˇ sheˍ htaˇ, chaw oˇ ve hkʼa peu-eˬ hta‸ ngaˬ maˇ tiˇ pehˍ piˇ ve kʼo, Gʼuiˬsha ngaˬ hta‸ tiˇ pehˍ laˇ piˇ-oˆ, teh‸ yawˇ ve nyi ma hkʼaw dawˇ chehˇ ve yoˬ.

23Aˍbiˆgeˬlaˆ lehˬ Daˍviˆ hta‸ gʼa mawˬ ve teˇ yanˇ, piˉ laˬ hkʼoˆ haˆ ya‸-e ve yoˬ.

24Yawˇ Daˍviˆ hkui paˇ lo boˆ taˍ leh kʼoˆ ve, Jawˇmawˇ-oˬ, awˬ bon te leh ngaˬ ve tawˇ hta‸ na sheˍ. Venˇbaˆ oˇ ve ngaˬ awˬ hkʼoˆ lo gaˬ la piˇ-oˆ.

25Te‸ chiˉ tcuhˉ kuiˬ maˇ cawˬ ve Naˍbaˍlaˆ hkawˇ hta‸ taˇ na. Yawˇ ve awˬ meh chaw luˬ paˍ, teh‸ kʼoˆ ve hkʼe, yawˇ lehˬ chaw luˬ paˍ hpeh‸ tehˬ ve yoˬ. Jawˇmawˇ-oˬ, nawˬ peu laˇ ve chaw oˇ ve teˇ hpaˍ hta‸ ngaˬ maˇ gʼa mawˬ.

26Nawˬ shu hta‸ maˇ gʼa kʼaw‸ te hkʼaw‸ leh, nawˬ ve canˇ paˍ teˇ hpaˍ hta‸ maˇ gʼa tiˇ pehˍ piˇ tuˬ, Gʼuiˬsha nawˬ hta‸ tawˍ taˍ laˇ chehˇ ve yoˬ. Nawˬ ve canˇ paˍ teˇ hpaˍ leh, nawˬ hta‸ hkʼa te luˬ gaˇ ve chaw hkʼa peu-eˬ, Naˍbaˍlaˆ hkʼa shuˍ ciˍ yanˍ ve hta‸ gʼa hkanˍ tuˬ yoˬ, teh‸ te‸ chehˇ ve Gʼuiˬsha awˬ meh hta‸ cuˇ leh ngaˬ hkanˍ ve yoˬ.

27Jawˇmawˇ-oˬ, chi beu‸ ngaˬ yuˬ veu laˇ ve la‸ shawnˍ chi teˇ hpaˍ hta‸ a ciˉ ha‸ yuˬ leh, nawˬ ve chaw teˇ hpaˍ hta‸ caˍ piˇ-oˆ.

28Jawˇmawˇ-oˬ, ngaˬ te ya‸ taˍ ve venˇbaˆ teˇ ceuˬ ceuˬ cawˬ ve kʼo, awˬ bon te leh ngaˬ ve venˇbaˆ hta‸ a ciˉ hpehˇ laˇ-oˆ. Gʼuiˬsha lehˬ, nawˬ leh nawˬ ve awˬ ceuˬ awˬ hkʼaˇ teˇ hpaˍ hta‸ jawˇmawˇ te tcuh tuˬ ve yoˬ. Awˬ lawn kʼo, nawˬ lehˬ yawˇ ve ma‸ hta‸ bawˆ chehˇ leh, nawˬ a sha‸ te‸ chehˇ ve teˇ co, haiˬ ve kanˉ hta‸ te tuˬ ve maˇ heˆ.

29Nawˬ hta‸ tiˇ pehˍ gaˇ ve chaw teˇ gʼaˇ gʼaˇ cawˬ ve kʼo, chaw teˇ gʼaˇ yawˇ ve awˬ hpfuhˇ hkʼaˆ ve mawˇ hta‸ ha‸ shaˉ chehˇ ve hkʼe, Gʼuiˬsha nawˬ hta‸ ha‸ shaˉ laˇ tuˬ yoˬ. Chaw teˇ gʼaˇ haˉ pui shiˍ hta‸ hawˉ ma hkʼaw keu bawˆ baˬ ve hkʼe, Gʼuiˬsha lehˬ nawˬ ve canˇ paˍ teˇ hpaˍ hta‸ oˇ hkʼe te gʼawˆ baˬ piˇ tuˬ yoˬ.

30Gʼuiˬsha nawˬ hta‸ piˇ laˇ tuˬ ka ti‸ te taˍ ve awˬ bon oˇ ve teˇ hpaˍ nawˬ hta‸ piˇ laˇ leh, nawˬ Iˉsaˍreˍlaˆ ve jawˇmawˇ hpeh‸ la ve teˇ yanˇ,

31nawˬ shu hta‸ gʼa tiˇ pehˍ peuˬ ve leh, nawˬ nyi ma gʼa zuhˆ peuˬ ve hta‸ kʼaw‸ dawˇ nyi leh dawˇ haˍ tuˬ maˇ heˆ. Jawˇmawˇ-oˬ, Gʼuiˬsha nawˬ hta‸ awˬ bon na‸ laˇ ve teˇ yanˇ, ngaˬ hta‸ a ciˉ dawˇ nawˇ laˇ-oˆ, teh‸ yawˇ hta‸ kʼoˆ piˇ ve yoˬ.

32Daˍviˆ yawˇ hta‸ kʼoˆ piˇ ve, Ya‸ nyi ngaˬ hta‸ hpuˇ da‸ tuˬ, choˬ kaˬ lo nawˬ hta‸ peu laˇ shehˍ hpaˇ Iˉsaˍreˍlaˆ ve Jawˇmawˇ Gʼuiˬsha hta‸ chiˇ mvuh-o.

33Ya‸ nyi ngaˬ nyi ma zuhˆ ve hkʼaw chaw teˇ hpaˍ hta‸ maˇ gʼa tiˇ pehˍ piˇ tuˬ, chi hkʼe te laˇ ve nawˬ ve dawˇ shiˍ puiˉ ve nyi ma awˬ pon Gʼuiˬsha hta‸ chiˇ mvuh-o.

34Nawˬ hta‸ maˇ gʼa te luˬ tuˬ, Gʼuiˬsha ngaˬ hta‸ tawˍ taˍ ve yoˬ. Nawˬ ngaˬ hta‸ choˬ kaˬ lo haˆ maˇ ca hpuˇ da‸ la ve hkʼe kʼo, shawˉ pawˍ mvuhˇ shawˉ Naˍbaˍ laˆ leh yawˇ ve chaw teˇ hpaˍ suh peuˬ tuˬ yoˬ, teh‸ te‸ chehˇ ve Gʼuiˬsha ve awˬ meh hkʼaw ngaˬ hkanˍ hpeh‸ ve yoˬ, teh‸ yawˇ hta‸ kʼoˆ piˇ ve yoˬ.

35Oˇ ve hkʼaw‸ nawˉ, Daˍviˆ lehˬ yawˇ piˇ laˇ ve la‸shawnˍ teˇ hpaˍ hta‸ ha‸ yuˬ leh, Nawˬ ve aˉ hkʼaw lo kʼo‸-e loˬ. Taˇ dawˇ haˍ. Nawˬ heuˆ gaˇ ve hkʼe ngaˬ te laˇ tuˬ yoˬ, teh‸ yawˇ hta‸ kʼoˆ piˇ ve yoˬ.

36Oˇ htaˇ, Aˍbiˇgeˍlaˆ Naˍbaˍlaˆ geh kʼai ve yoˬ. Yawˇ lehˬ jawˇmawˇ awˬ pon caˇ tuˬ gu ve hkʼe hti caˇ hti dawˬ chehˇ taˍ ve yoˬ. Yawˇ tzuhˬ bvuhˆ chehˇ ve pa taw, mvuhˇ htiˇ la htaˇ hkʼa gaˬ yawˇ hta‸ te‸ chiˉ maˇ kʼoˆ piˇ.

37Yawˇ tzuhˬ bvuhˆ ve na-e la ve teˇ yanˇ, yawˇ hta‸ awˬ lawn hkʼa peu-eˬ kʼaw‸ hto maˍ piˇ ve yoˬ. Oˇ htaˇ yawˇ teˇ cawˬ haˉ awˬ to teˇ hkoˇ baˉ suh sheˬ ve yoˬ.

38Oˇ ve hkʼaw‸ nawˉ 10 nyi hkʼe gaˬ leh Gʼuiˬsha ciˍ yanˍ piˇ ve pa taw yawˇ suh-e ve yoˬ.

39Naˍbaˍlaˆ suh-e ve awˬ hkawˇ hta‸ Daˍviˆ gʼa kaˇ ve teˇ yanˇ, Gʼuiˬsha hta‸ chiˇ mvuh-o. Ngaˬ hta‸ maˇ shawˍ maˇ caˆ te laˇ ve awˬ tan Gʼuiˬsha yawˇ hta‸ kʼaw‸ te hkʼaw‸ piˇ leh ngaˬ maˇ gʼa te ya‸ tuˬ Gʼuiˬsha ngaˬ hta‸ tawˍ taˍ laˇ ve yoˬ. Yawˇ te taˍ ve haiˬ ve kanˉ awˬ pon Gʼuiˬsha yawˇ hta‸ ciˍ yanˍ piˇ peuˬ, teh‸ kʼoˆ ve yoˬ. Oˇ ve hkʼaw‸ nawˉ Daˍviˆ lehˬ, Aˍbiˆgeˍlaˆ hta‸ heuˆ tuˬ yawˇ hta‸ ca na tcuh ve yoˬ.

40Yawˇ ve awˬ ceˬ paˍ teˇ hpaˍ Kaˍmeˍlaˆ venˇ hkʼaw yaˇ miˇ oˇ ve geh kʼai leh, Daˍviˆ nawˬ hta‸ heuˆ gaˇ ve pa taw, ngaˬ hui hta‸ ca shiˍ peu laˇ ve yoˬ, teh‸ yawˇ hta‸ kʼoˆ piˇ ve yoˬ.

41Oˇ htaˇ, Aˍbiˆgeˍlaˆ miˬ chaˇ hkʼoˆ lo boˆ taˍ leh, Ngaˬ lehˬ yawˇ ve awˬ ceˬ ma hpeh‸ ve yoˬ. Yawˇ ve awˬ ceˬ paˍ teˇ hpaˍ ve hkui sheh hta‸ tsuhˇ piˇ tuˬ ngaˬ gu taˍ peuˬ, teh‸ kʼoˆ ve yoˬ.

42Yawˇ teˇ cawˬ haˉ tu la leh, yawˇ ve piˉ laˬ hta‸ ciˇ ve yoˬ. Yawˇ ve awˬ ceˬ ma ngaˇ gʼaˇ hta‸ kuˬ yuˬ peuˬ hkʼaw‸ nawˉ, Daˍviˆ geh kʼai leh yawˇ ve awˬ miˇ ma hpeh‸ la ve yoˬ.

43Daˍviˆ lehˬ Yeˍzaˍreˍlaˆ venˇ yaˇ Aˍhiˆnonˍ hta‸ heuˆ taˍ peuˬ ve awˬ hkʼoˆ, Aˍbiˆgeˍlaˆ hta‸ htawˇ kʼaw‸ heuˆ ve yoˬ.

44Awˬ yanˇ oˇ ve hkʼaw Sawˉlu‸ lehˬ, Daˍviˆ miˇ ma Miˆhkaˍlaˆ hta‸ Gaˍlenˍ venˇ hkʼaw chehˇ ve Lehˇshaˆ ve yaˇ paˍ Paˍlaˍtiˆ hta‸ piˇ ve yoˬ.

← Chapter 24 Jump to: Chapter 26 →