1 Samuel 19

Lahu Bible Edited © Thailand Bible Society and Bible Society of Myanmar, 2010, 2020.

← Chapter 18 Jump to: Chapter 20 →

1Sawˉlu‸ lehˬ Daˍviˆ hta‸ tiˇ pehˍ tuˬ dawˇ nyi chehˇ ve awˬ lawn yawˇ ve yaˇ paˍ Yawˇnaˆtanˍ leh yawˇ ve ma‸ poˍ lonˉ teˇ hpaˍ hta‸ kʼoˆ piˇ ve yoˬ. Ya‸ hkʼaˇ, Yawˇnaˆtanˍ lehˬ Daˍviˆ hta‸ nyi ma cawˇ jaˇ ve yoˬ.

2Hkʼe te leh, yawˇ Daˍviˆ hta‸ kʼoˆ piˇ ve, Ngaˬ pa lehˬ nawˬ hta‸ tiˇ pehˍ tuˬ coˇ caˇ chehˇ ve yoˬ. Shawˉ pawˍ mvuhˇ shawˉ kʼo, nawˬ shaˍ ti‸ hkʼa deh‸ taˍ leh, teˇ kaˬ kaˬ lo ca va‸ taˍ-o‸.

3Nawˬ va‸ chehˇ taˍ kuiˬ awˬ paˇ lo ngaˬ pa geh ngaˬ kʼai leh, nawˬ ve awˬ lawn ngaˬ yawˇ hta‸ kʼoˆ maˍ piˇ tuˬ yoˬ. Ngaˬ teˇ ceuˬ ceuˬ gʼa kʼaw‸ shiˍ ve kʼo, nawˬ hta‸ kʼaw‸ hto laˇ tuˬ yoˬ, teh‸ yawˇ hta‸ kʼoˆ piˇ ve yoˬ.

4Sawˉlu‸ mehˆ gʼuˇ suhˍ Yawˇnaˆtanˍ Daˍviˆ hta‸ chiˇ mvuhˇ leh kʼoˆ ve, Ngaˬ pa-oˬ, Daˍviˆ hta‸ maˇ da‸ ve awˬ ceuˬ taˇ te piˇ. Yawˇ nawˬ hta‸ teˇ pawˆ ka‸ maˇ te ya‸ jaw. Yawˇ hkʼa te tawˆ la ve kanˉ teˇ hpaˍ lehˬ, nawˬ awˬ pon awˬ bon cawˬ ve kanˉ teˇ hpaˍ ceh tiˉ hpeh‸ ve yoˬ.

5Yawˇ a sha‸ tanˇ leh Gawˇliˇya‸ hta‸ tiˇ pehˍ ve yoˬ. Gʼuiˬsha lehˬ Iˉsaˍreˍlaˆ chaw hui hta‸ gʼaˇ shehˍ hpaˇ hpeh‸ la piˇ taˍ ve yoˬ. Nawˬ chi hta‸ gʼa mawˬ leh ha lehˬ chehˇ ve yoˬ. Aˬ hto‸ ma pa taw, te‸ chiˉ venˇbaˆ maˇ cawˬ ve Daˍviˆ hta‸ nawˬ nyi ma zuhˆ leh tiˇ pehˍ gaˇ ve le, teh‸ kʼoˆ ve yoˬ.

6Yawˇnaˆtanˍ kʼoˆ ve tawˇ hta‸ Sawˉlu‸ gʼa kaˇ ve teˇ yanˇ, yawˇ Daˍviˆ hta‸ maˇ kʼaw‸ tiˇ pehˍ-o, teh‸ Gʼuiˬsha ve awˬ meh hta‸ cuˇ leh hkanˍ ve yoˬ.

7Hkʼe te leh, Yawˇnaˆtanˍ Daˍviˆ hta‸ kuˬ yuˬ leh yawˇ hta‸ awˬ lawn hkʼa peu-eˬ kʼaw‸ hto maˍ piˇ ve yoˬ. Peuˬ hkʼaw‸ nawˉ, yawˇ hta‸ Sawˉlu‸ geh shiˍ kʼai leh, ponˬ laˬ htaˇ hkʼa shuˍ yawˇ kanˉ kʼaw‸ te chehˇ taˍ ve yoˬ.

8Hpiˇliˇtiˆ chaw teˇ hpaˍ Iˉsaˍreˍlaˆ chaw hta‸ ca kʼaw‸ bawˆ la ve yoˬ. Hkʼe te leh, Daˍviˆ yawˇ hui hta‸ ca bawˆ-e ve yoˬ. Hpiˇliˇtiˆ chaw shonˇ jaˇ leh gʼuiˇ hpaw-e ve yoˬ.

9Teˇ nyi htaˇ, maˇ da‸ ve awˬ ha Sawˉlu‸ awˬ hkʼoˆ kʼaw‸ ya‸ la ve yoˬ. Sawˉlu‸ lehˬ, gehˇ teˇ maˬ yuˬ taˍ leh, yawˇ ve hawˉ yehˬ hkʼaw mui chehˇ ve yoˬ. Daˍviˆ lehˬ yawˇ ve tinˍ hta‸ hteˆ chehˇ ve yoˬ.

10Sawˉlu‸ lehˬ, yawˇ ve gehˇ hta‸ yuˬ leh Daˍviˆ hta‸ baˬ hpehˇ ve yoˬ. Ya‸ hkʼaˇ, Daˍviˆ hta‸ maˇ heuˆ. Gʼo‸ pa hta‸ tcuhˉ sheˬ ve yoˬ. Hkʼe te leh Daˍviˆ gʼuiˇ hpaw-e ve yoˬ.

11Sawˉlu‸ lehˬ Daˍviˆ hta‸ tiˇ pehˍ gʼa tuˬ oˇ ve teˇ haˉ yawˇ ve ma‸ yaˇ teˇ hpaˍ hta‸ hpehˇ peu leh, Daˍviˆ ve yehˬ hta‸ ca shaw tcuh taˍ ve yoˬ. Oˇ htaˇ, Daˍviˆ miˇ ma Miˆhkaˍlaˆ lehˬ, Ya‸ puiˉ nawˬ maˇ hpaw-e ve kʼo, shawˉ pawˍ nawˬ gʼa suh tuˬ yoˬ, teh‸ Daˍviˆ hta‸ kʼoˆ piˇ ve yoˬ.

12Hkʼe te leh, yawˇ Daˍviˆ hta‸ yehˬ miˉ ehˉ hkʼaw hpehˇ ce piˇ leh, yawˇ gʼuiˇ hpaw-e ve yoˬ.

13Oˇ hkʼe te peuˬ hkʼaw‸ nawˉ, Daˍviˆ miˇ ma lehˬ yawˇ ve yehˬ hkʼaw cawˬ ve shaˉ ho‸ hta‸ yuˬ leh zuh‸ hpui hkʼoˆ yuˬ teh peuˬ hkʼaw‸ nawˉ, aˉ che‸ awˬ mvuh yuˬ te taˍ ve uˉ gehˇ teˇ maˬ yawˇ ve oˉ kʼoˍ hpawˇ teh leh, aˉ boˆ yuˬ beh piˇ taˍ ve yoˬ.

14Sawˉlu‸ ve ma‸ yaˇ teˇ hpaˍ Daˍviˆ hta‸ hpeh yuˬ tuˬ lo‸-e ve teˇ yanˇ, Daˍviˆ chehˇ haˍ chehˇ ve yoˬ, teh‸ Miˆhkaˍlaˆ yawˇ hui hta‸ kʼoˆ piˇ ve yoˬ.

15Ya‸ hkʼaˇ, Sawˉlu‸ lehˬ Daˍviˆ hta‸ ca kʼaw‸ nyi tuˬ yawˇ hui hta‸ teˇ pawˆ kʼaw‸ kʼai tcuh ve yoˬ. Yawˇ awˬ to leh yawˇ ve ku-iˍ hta‸ ka‸ choˬ kaˬ lo taˆ veu laˇ-oˆ. Ngaˬ yawˇ hta‸ tiˇ pehˍ tuˬ yoˬ, teh‸ yawˇ hui hta‸ kʼoˆ piˇ ve yoˬ.

16Yawˇ hui yehˬ hkʼaw lo‸-e leh, zuh‸ hpui hkʼoˆ lo shaˉ ho‸ teˇ maˬ leh yawˇ ve oˉ kʼoˍ hpawˇ lo aˉ che‸ awˬ mvuh yuˬ te taˍ ve uˉ gehˇ teˇ maˬ teh taˍ ve hta‸ yawˇ hui gʼa mawˬ ve yoˬ.

17Oˇ htaˇ Sawˉlu‸ lehˬ, Aˬ hto‸ ma pa taw nawˬ ngaˬ hta‸ cuˇ yiˍ te leh, ngaˬ ve canˇ paˍ hta‸ ponˬ piˇ ve le, teh‸ Miˆhkaˍlaˆ hta‸ kʼoˆ piˇ ve yoˬ. Yawˇ hta‸ maˇ ga piˇ ve kʼo, yawˇ ngaˬ hta‸ tiˇ pehˍ tuˬ yoˬ teh‸ kʼoˆ laˇ ve yoˬ, teh‸ Miˆhkaˍlaˆ kʼaw‸ yaw hkʼaw‸ piˇ ve yoˬ.

18Daˍviˆ lehˬ, Saˍmo-eˍlaˆ geh Raˍmaˆ venˇ lo gʼuiˇ hpaw-e leh, Sawˇlu‸ yawˇ hta‸ hkʼaˬ hkʼe te laˇ ve awˬ lawn hkʼa peu-eˬ yawˇ hta‸ kʼoˆ maˍ piˇ ve yoˬ. Oˇ ve hkʼaw‸ nawˉ, Saˍmo-eˍlaˆ yawˇ huiˉ maˬ Naˍyoˆ venˇ lo kʼai leh, oˇ kaˬ lo chehˇ taˍ ve yoˬ.

19Daˍviˆ lehˬ Raˍmaˆ venˇ paˇ lo cawˬ ve Naˍyoˆ venˇ hkʼaw chehˇ taˍ ve awˬ lawn Sawˉlu‸ gʼa kaˇ ve yoˬ.

20Hkʼe te leh, Sawˉlu‸ lehˬ yawˇ ve ma‸ yaˇ teˇ hpaˍ hta‸ hpehˇ peu leh Daˍviˆ hta‸ ca hpeh tcuh ve yoˬ. Saˍmo-eˍlaˆ lehˬ, Gʼuiˬsha ve tcuh kaˍ paˍ teˇ moˍ hta‸ shiˍ leh, duiˆ-ehˍ shaˇ-ehˍ kʼaˍ hkʼeˆ chehˇ taˍ ve hta‸ yawˇ hui gʼa mawˬ ve yoˬ. Oˇ htaˇ, Gʼuiˬsha ve Awˬ ha hpu Sawˉlu‸ ve ma‸ yaˇ teˇ hpaˍ awˬ hkʼoˆ lo ya‸ la leh, yawˇ hui htawˇ shu geh teˇ geh ha lehˬ ha kʼa kʼaˍ hkʼeˆ ve yoˬ.

21Awˬ lawn chi hta‸ Sawˉ lu‸ gʼa kaˇ ve teˇ yanˇ, yawˇ ve ma‸ yaˇ a ciˉ maˇ chaweh kʼaw‸ kʼai tcuh ve yoˬ. Yawˇ hui htawˇ oˇ kʼa lo shu geh kʼaˍ hkʼeˆ ve yoˬ. Yawˇ lehˬ, shehˆ pawˆ teˇ pawˆ ma‸ yaˇ teˇ hpaˍ hta‸ kʼaw‸ kʼai tcuh ve yoˬ. Yawˇ hui htawˇ, chaw oˇ ve teˇ hpaˍ hkʼe hpeh‸ sheˬ ve yoˬ.

22Hkʼe te leh, yawˇ awˬ to tu leh Raˍmaˆ venˇ lo kʼai ve yoˬ. Seˍkuˆ teh‸ kʼoˆ ve nanˬ bawˍ awˬ paˇ lo gaˬ ve teˇ yanˇ, Saˍmo-eˍlaˆ leh Daˍviˆ hkʼaˬ lo chehˇ le, teh‸ oˇ kaˬ lo chehˇ ve chaw hui hta‸ na nyi ve yoˬ. Yawˇ huiˉ maˬ Naˍyoˆ venˇ hkʼaw chehˇ taˍ ve yoˬ, teh‸ kʼaw‸ yaw hkʼaw‸ piˇ ve yoˬ.

23Yawˇ oˇ kaˬ lo kʼai chehˇ ve teˇ yanˇ, Gʼuiˬsha ve Awˬ ha hpu yawˇ awˬ hkʼoˆ lo ya‸ la leh, Naˍyoˆ venˇ hkʼaw kʼaˍ hkʼeˆ lo‸-e ve yoˬ.

24Yawˇ ve veu‸ kʼaˇ hkʼa peu-eˬ hta‸ kʼehˆ baˬ leh Saˍmo-eˍlaˆ gʼuˇ suhˍ kʼaˍ hkʼeˆ chehˇ ve yoˬ. Oˇ kaˬ lo yawˇ teˇ nyi teˇ haˉ awˬ kʼu nyi te zuh‸ taˍ ve yoˬ. (Oˇ ve teˇ nyi hta‸ te leh, Sawˉlu‸ htawˇ Gʼuiˬsha ve tcuh kaˍ paˍ hpeh‸ la peuˬ ve laˇ, teh‸ shu kʼoˆ da‸ kʼai ve yoˬ.)

← Chapter 18 Jump to: Chapter 20 →