Joshua 1

Lahu Bible Edited © Thailand Bible Society and Bible Society of Myanmar, 2010, 2020.

Jump to: Chapter 2 →

1Gʼuiˬsha ve awˬ ceˬ paˍ Moˉseˍ suh peuˬ hkʼaw‸ nawˉ, Moˉseˍ hta‸ ga piˇ chehˇ ve Nunˍ ve yaˇ paˍ Yawˇsuˆ hta‸ Gʼuiˬsha chi hkʼe kʼoˆ piˇ ve yoˬ.

2Ngaˬ ve awˬ ceˬ paˍ Moˉseˍ suh peuˬ. Chi hta‸ pa taw, nawˬ leh Iˉsaˍreˍlaˆ chaw hkʼa peu-eˬ chi beu‸ hkʼa deh‸ gu taˍ-o‸. Yawˇdanˍ iˉ kaˆ lawˬ hta‸ hkanˍ leh, ngaˬ nawˬ hui hta‸ piˇ laˇ taˍ ve mvuhˇmiˬ hkʼaw lo‸-e loˬ.

3Ngaˬ Moˉseˍ hta‸ kʼoˆ piˇ taˍ peuˬ ve hkʼe, chi beu‸ nawˬ hui kʼai chehˇ ve mvuhˇmiˬ oˇ ve hkʼa peu-eˬ, ngaˬ nawˬ hui hta‸ piˇ laˇ taˍ peuˬ ve yoˬ.

4Nawˬ hui ve miˬ tcuhˉ lehˬ, awˬ hawˉ hpawˇ lo cawˬ ve hteunˍ lonˉ hta‸ te leh, awˬ na hpawˇ Leˍbaˍnonˍ hkʼaw tcuhˉ lo hkʼa gaˬ, mvuhˇ nyi tawˆ hpawˇ Uˉhpaˍraˆ gʼuiˬ ma hta‸ te leh, mvuhˇ nyi kʼehˬ hpawˇ Awˬ kʼaw ji ve laˇ tsuhˇ gʼuiˬ lo hkʼa gaˬ hpeh‸ ve yoˬ.

5Nawˬ a sha‸ te‸ chehˇ sheˍ ve teˇ co-e, chaw teˇ gʼaˇ ka‸ nawˬ hta‸ bawˆ gʼaˇ tuˬ ve maˇ heˆ. Ngaˬ Moˉseˍ geh chehˇ ve hkʼe nawˬ geh htawˇ chehˇ tuˬ yoˬ. Ngaˬ nawˬ hta‸ teˇ pawˆ ka‸ chiˇ baˬ laˇ tuˬ ve maˇ heˆ.

6Awˬ gʼaˇ yuˬ tawˆ leh ha‸ hanˉ ve nyi ma cawˬ piˇ-oˆ. Awˬ lawn kʼo, yawˇ hui ve awˬ puˍ awˬ pi hui hta‸ piˇ tuˬ ngaˬ ka ti‸ te taˍ ve mvuhˇmiˬ oˇ ve awˬ hkʼaw lo, nawˬ lehˬ chaw chi teˇ hpaˍ hta‸ gʼa shiˍ kʼai piˇ tuˬ yoˬ.

7Ngaˬ ve awˬ ceˬ paˍ Moˉseˍ nawˬ hui hta‸ piˇ laˇ taˍ ve awˬliˇtawˇhkawˇ hkʼa peu-eˬ ve hta‸ hkʼa deh‸ na yuˬ chehˇ tuˬ shaˍ ti‸ taˍ-o‸. Awˬliˇtawˇhkawˇ oˇ ve teˇ maˬ hta‸ ka‸ taˇ chiˇ baˬ. Oˇ hkʼe te ve kʼo, nawˬ hui kʼai kuiˬ teˇ kaˬ le le awˬ hkʼaw lo uiˍ la da‸ la tuˬ yoˬ.

8Nawˬ hui bon lawˬ ve teˇ yanˇ, awˬliˇtawˇhkawˇ bvuh‸ taˍ ve li‸ daw hta‸ hkʼaˬ htaˆ ka‸ gʼaw tcuhˉ taˍ-o‸. Oˇ ve hta‸ nawˬ hui teˇ nyi teˇ haˉ le henˇ yuˬ leh, oˇ kaˬ lo bvuh‸ taˍ ve hkʼe hkʼa deh‸ na yuˬ leh, a sha‸ te‸ chehˇ-oˆ. Oˇ hkʼe te ve kʼo, nawˬ hui uiˍ la maˇ la leh nawˬ hui hkʼa te ve kanˉ teˇ ceuˬ le le uiˍ la da‸ la tuˬ yoˬ.

9Awˬ gʼaˇ yuˬ tawˆ leh ha‸ hanˉ ve nyi ma cawˬ piˇ-oˆ, teh‸ ngaˬ kʼoˆ taˍ ve tawˇ hkawˇ hta‸ dawˇ nawˇ tcuhˉ taˍ-o‸. Taˇ kawˆ. Nyi ma taˇ luˬ. Awˬ lawn kʼo, ngaˬ nawˬ ve Jawˇmawˇ Gʼuiˬsha lehˬ, nawˬ kʼai kuiˬ teˇ kaˬ le le awˬ hkʼaw lo nawˬ geh chehˇ taˍ ve yoˬ, teh‸ Yawˇsuˆ hta‸ kʼoˆ piˇ ve yoˬ.

10Oˇ ve hkʼaw‸ nawˉ, Yawˇsuˆ Iˉsaˍreˍlaˆ chaw awˬ hoˉ awˬ naˬ teˇ hpaˍ hta‸ kuˬ yuˬ leh, Iˉsaˍreˍlaˆ chaw hui hta‸ chi hkʼe ca kʼoˆ piˇ tcuh ve yoˬ.

11Nawˬ hui ve mawˇ teˇ hpaˍ hta‸ hkʼa deh‸ gu taˍ-o‸. Awˬ lawn kʼo, shehˆ nyi awˬ hkʼaw lo nawˬ hui lehˬ Yawˇdanˍ iˉ kaˆ lawˬ hta‸ hkanˍ leh, Gʼuiˬsha nawˬ hui hta‸ piˇ laˇ taˍ ve mvuhˇmiˬ hkʼaw gʼa lo‸-e tuˬ yoˬ, teh‸ yawˇ hui hta‸ ca kʼoˆ piˇ tcuh ve yoˬ.

12Yawˇsuˆ lehˬ, Ruˇbenˍ, Gaˆ, leh Maˍnaˍseˍ awˬ ceuˬ awˬ hkʼaˇ teˇ hkoˇ ve hta‸ chi hkʼe kʼoˆ piˇ ve yoˬ.

13Nawˬ hui ve Gʼuiˬsha lehˬ, Yawˇdanˍ gʼuiˬ mvuhˇ nyi tawˆ hpawˇ lo cawˬ ve mvuhˇmiˬ chi nawˬ hui hta‸ piˇ laˇ tuˬ yoˬ, teh‸ Gʼuiˬsha ve awˬ ceˬ paˍ Moˉseˍ nawˬ hui hta‸ kʼoˆ piˇ taˍ peuˬ ve hta‸ dawˇ nawˇ-oˆ.

14Nawˬ hui ve miˇ yaˇ leh ceˇ caˬ teˇ hpaˍ hta‸ choˬ kaˬ lo gʼa teh taˉ tuˬ yoˬ. Ya‸ hkʼaˇ, nawˬ hui ve ma‸ yaˇ teˇ hpaˍ lehˬ, nawˬ hui ve awˬ viˉ awˬ nyi Iˉsaˍreˍlaˆ chaw teˇ hpaˍ gʼuˇ suhˍ lo kʼai leh, yawˇ hui awˬ pon ma‸ gʼa ga bawˆ piˇ tuˬ yoˬ.

15Yawˇ hui teˇ hpaˍ lehˬ, nawˬ hui ve Gʼuiˬsha yawˇ hui hta‸ piˇ taˍ ve Yawˇdanˍ gʼuiˬ mvuhˇ nyi kʼehˬ hpawˇ lo cawˬ ve mvuhˇmiˬ hkʼaw gaˬ peuˬ ve teˇ yanˇ, nawˬ hui lehˬ Gʼuiˬsha ve awˬ ceˬ paˍ Moˉseˍ nawˬ hui hta‸ piˇ laˇ taˍ ve Yawˇdanˍ gʼuiˬ mvuhˇ nyi tawˆ hpawˇ lo cawˬ ve mvuhˇmiˬ lo kʼaw‸ la leh oˇ kaˬ lo gʼa chehˇ tuˬ yoˬ, teh‸ yawˇ hui hta‸ kʼoˆ piˇ ve yoˬ.

16Yawˇ hui kʼaw‸ yaw hkʼaw‸ leh kʼoˆ ve, Nawˬ ngaˬ hui hta‸ kʼoˆ laˇ ve awˬ ceuˬ hkʼa peu-eˬ ve hta‸ ngaˬ hui na yuˬ leh, nawˬ kʼai tcuh laˇ kuiˬ teˇ kaˬ le le lo ngaˬ hui kʼai tuˬ yoˬ.

17Ngaˬ hui Moˉseˍ ve tawˇ hta‸ na yuˬ ve hkʼe nawˬ ve tawˇ hta‸ htawˇ na yuˬ tuˬ yoˬ. Gʼuiˬsha lehˬ Moˉseˍ geh chehˇ ve hkʼe nawˬ geh htawˇ chehˇ piˇ-oˆ.

18Nawˬ hta‸ tawˇ gʼawˬ da‸ ve chaw leh, nawˬ ve tawˇ hta‸ maˇ na yuˬ ve chaw hkʼaˬ ve teˇ gʼaˇ maˇ kʼoˆ tiˇ pehˍ ve hta‸ gʼa hkanˍ tuˬ yoˬ. Awˬ gʼaˇ yuˬ tawˆ leh ha‸ hanˉ ve nyi ma cawˬ piˇ-oˆ, teh‸ Yawˇsuˆ hta‸ kʼaw‸ yaw hkʼaw‸ piˇ ve yoˬ

Jump to: Chapter 2 →