Joshua 17

Lahu Bible Edited © Thailand Bible Society and Bible Society of Myanmar, 2010, 2020.

← Chapter 16 Jump to: Chapter 18 →

1Maˍnaˍseˍ lehˬ Yoˇseh‸ ve yaˇ paˍ uiˍ hpeh‸ ve pa taw, yawˇ hta‸ htawˇ mvuhˇmiˬ teˇ peˆ pehˬ piˇ taˍ ve yoˬ. Maˍnaˍseˍ ve yaˇ paˍ uiˍ, Giˇlaˆ awˬ pa Maˍhkiˇraˆ lehˬ, ma‸ yaˇ teˇ gʼaˇ hpeh‸ leh, Giˇlaˆ mvuhˇmiˬ leh Baˍshanˍ mvuhˇmiˬ hta‸ gʼa ve yoˬ.

2Maˍnaˍseˍ ve awˬ nu ve yaˇ teˇ hpaˍ hpeh‸ ve Aˍbeˍ saˍ, Heˍlehˆ, Aˍsaˍreˍlaˆ, Sheˍhkenˍ, Heˍhpaˍ leh Sheˍmiˆdaˆ hui hta‸ htawˇ, mvuhˇmiˬ pehˬ piˇ taˍ ve yoˬ. Chaw chi ve teˇ hpaˍ lehˬ Yoˇseh‸ ve awˬ hawehˍ Maˍnaˍseˍ ve yaˇ teˇ hpaˍ hpeh‸ leh, awˬ hoˉ awˬ naˬ teˇ hpaˍ hpeh‸ ve yoˬ.

3Ya‸ hkʼaˇ, Maˍnaˍseˍ, Maˍhkiˇraˆ, Giˇlaˆ, Heˍhpaˍ hui ve awˬ ceuˬ awˬ hkʼaˇ Zeˍlawˇhpaˆ lehˬ, yaˇ paˍ teˇ gʼaˇ ka‸ maˇ cawˬ. Yawˇ lehˬ yaˇ miˇ ceh tiˉ cawˬ ve yoˬ. Yawˇ ve yaˇ miˇ teˇ hpaˍ lehˬ, Maˍlaˍ, Noˇaˍ, Hawˇlaˍ, Miˆlaˍhkaˍ, Tiˇraˍzaˍ hui hpeh‸ ve yoˬ.

4Yawˇ hui lehˬ paw hkuˇ Eˇlaˍsaˍ, Nunˍ ve yaˇ paˍ Yawˇsuˆ leh Iˉsaˍreˍlaˆ chaw awˬ hoˉ awˬ naˬ teˇ hpaˍ geh laˬ leh kʼoˆ ve, Ngaˬ hui hta‸ htawˇ mvuhˇmiˬ piˇ laˇ tuˬ Gʼuiˬsha lehˬ Moˉseˍ hta‸ kʼoˆ piˇ taˍ ve yoˬ, teh‸ yawˇ hui hta‸ kʼoˆ piˇ ve yoˬ. Hkʼe te leh Gʼuiˬsha kʼoˆ taˍ ve hkʼe, yawˇ hui teˇ hpaˍ hta‸ htawˇ mvuhˇmiˬ pehˬ piˇ ve yoˬ.

5Hkʼe te leh Maˍnaˍseˍ lehˬ, Yawˇdanˍ Iˉ kaˆ lawˬ coˇ paˉ hpawˇ lo yawˇ gʼa taˍ peuˬ ve Giˇlaˆ leh Baˍshanˍ mvuhˇmiˬ awˬ hkʼoˆ, awˬ nu ve mvuhˇmiˬ teˇ hpaˍ hta‸ htawˇ kʼaw‸ gʼa ve yoˬ.

6Awˬ lawn kʼo, Maˍnaˍseˍ ve yaˇ paˍ yaˇ miˇ teˇ hpaˍ htawˇ, mvuhˇmiˬ pehˬ gʼa taˍ ve pa taw yoˬ. Awˬ nu ve Maˍnaˍseˍ awˬ ceuˬ awˬ hkʼaˇ teˇ hpaˍ hta‸ Giˇlaˆ mvuhˇmiˬ pehˬ piˇ ve yoˬ.

7Maˍnaˍseˍ chaw hui gʼa ve mvuhˇmiˬ lehˬ, Aˍshaˍ venˇ hta‸ te leh Sheˍhkenˍ venˇ mvuhˇ nyi tawˆ hpawˇ lo cawˬ ve Meˆmeˍtaˆ venˇ lo hkʼa gaˬ hpeh‸ ve yoˬ. Oˇ kaˬ lo kʼaw‸ te leh awˬ hawˉ hpawˇ lo cawˬ ve Enˍtaˍhpawˍ chaw hui ve mvuhˇmiˬ lo hkʼa gaˬ hpeh‸ ve yoˬ.

8Taˍpawˍ mvuhˇmiˬ lehˬ, Maˍnaˍseˍ chaw hui ve mvuhˇmiˬ hpeh‸ ve yoˬ. Ya‸ hkʼaˇ, miˬ tcuhˉ paˇ lo cawˬ ve Taˍpawˍ venˇ lehˬ, Eˇhpaˍrenˍ chaw hui ve venˇ hpeh‸ ve yoˬ.

9Oˇ ve hkʼaw‸ nawˉ, yawˇ hui ve miˬ tcuhˉ lehˬ, Kaˍnaˆ iˉ kaˆ lawˬ hkʼaˇ suh kʼaw‸ ya‸-e ve yoˬ. Iˉ kaˆ lawˬ oˇ ve awˬ hawˉ paˉ lo cawˬ ve venˇ teˇ hpaˍ lehˬ, Maˍnaˍseˍ chaw hui ve mvuhˇmiˬ hkʼaw lo‸-e taˍ ve htawˇ, Eˇhpaˍrenˍchaw hui ve venˇ hpeh‸ ve yoˬ. Maˍnaˍseˍ chaw hui ve miˬtcuhˉ lehˬ iˉ kaˆ lawˬ oˇ ve awˬ na hpawˇ lo kʼaw‸ te taˆ-e leh Awˬ kʼaw ji ve laˇ tsuhˇ gʼuiˬ lo hkʼa gaˬ hpeh‸ ve yoˬ.

10Eˇhpaˍrenˍ chaw hui ve mvuhˇmiˬ lehˬ, awˬ hawˉ hpawˇ lo cawˬ leh, Maˍnaˍseˍ hui ve mvuhˇmiˬ lehˬ awˬ na hpawˇ lo cawˬ ve yoˬ. Awˬ kʼaw ji ve laˇ tsuhˇ gʼuiˬ lehˬ yawˇ hui ve miˬ tcuhˉ hpeh‸ ve yoˬ. Awˬ na hpawˇ lo ve miˬ tcuhˉ lehˬ Aˍshaˍ venˇ lo hkʼa gaˬ hpeh‸ leh, awˬ hawˉ hpawˇ ve lehˬ Iˉsaˍhkaˍ venˇ lo hkʼa gaˬ hpeh‸ ve yoˬ.

11Iˉsaˍhkaˍ leh Aˍshaˍ venˇ awˬ kaˍ lo cawˬ ve Behˆshanˍ venˇ leh awˬ nu ve venˇ ehˉ teˇ hpaˍ, Dawˇraˆ venˇ leh awˬ nu ve venˇ ehˉ teˇ hpaˍ, Enˍdawˇraˆ leh awˬ nu ve venˇ ehˉ teˇ hpaˍ, Taˍnehˆ leh awˬ nu ve venˇ ehˉ teˇ hpaˍ, Mehˆgiˇdoˍ leh awˬ nu ve venˇ ehˉ teˇ hpaˍ htawˇ Maˍnaˍseˍ chaw hui ve venˇ hpeh‸ ve yoˬ.

12Ya‸ hkʼaˇ, Maˍnaˍseˍ chaw hui lehˬ venˇ yaˇ oˇ ve teˇ hpaˍ hta‸ gʼa‸ kʼoˬ piˇ maˇ gʼa ve pa taw, Hkaˍnaˍniˆ chaw teˇ hpaˍ oˇ kaˬ lo chehˇ taˍ ve yoˬ.

13Iˉsaˍreˍlaˆ chaw teˇ hpaˍ lehˬ, awˬ gʼaˇ uiˍ jaˇ ve htawˇ, chaw oˇ ve hkʼa peu-eˬ hta‸ maˇ gʼa‸ kʼoˬ piˇ. Yawˇ hui hta‸ awˬ ceˬ te tcuh ve yoˬ.

14Yoˇseh‸ ve awˬ ceuˬ awˬ hkʼaˇ teˇ hpaˍ Yawˇsuˆ geh laˬ leh kʼoˆ ve, Gʼuiˬsha ngaˬ hui hta‸ bon na‸ laˇ leh ngaˬ hui chaw maˇ jaˇ peuˬ ve htawˇ, aˬ hto‸ ma pa taw nawˬ lehˬ ngaˬ hui hta‸ mvuhˇmiˬ teˇ peˆ ceh tiˉ pe‸ laˇ ve le, teh‸ yawˇ hta‸ kʼoˆ piˇ ve yoˬ.

15Oˇ htaˇ Yawˇsuˆ kʼoˆ ve, Nawˬ hui chaw maˇ jaˇ leh Eˇhpaˍrenˍ chaw hui gʼa taˍ ve mvuhˇmiˬ hkʼaw ceh tiˉ chehˇ maˇ daw ve kʼo, Hpeˍraˍziˆ chaw, Yeˍhpenˍ chaw hui ve mvuhˇmiˬ hkʼaw ca chehˇ-oˆ, teh‸ yawˇ hui hta‸ kʼoˆ piˇ ve yoˬ.

16Yoˇseh‸ ve awˬ ceuˬ awˬ hkʼaˇ teˇ hpaˍ kʼaw‸ kʼoˆ ve, Eˇhpaˍrenˍ mvuhˇmiˬ lehˬ ngaˬ hui awˬ pon a ciˉ i jaˇ ve yoˬ. Ya‸ hkʼaˇ, hkʼaw hkʼoˆ lo chehˇ ve Hkaˍnaˍniˆ chaw, Behˆshanˍ venˇ leh Yeˍzaˍreˍlaˆ venˇ hkʼaw chehˇ ve Hkaˍnaˍniˆ chaw teˇ hpaˍ lehˬ, sho te taˍ ve iˉ mvuhˇ lawˬ maˇ maˇ cawˬ ve yoˬ, teh‸ kʼaw‸ kʼoˆ piˇ ve yoˬ.

17Oˇ htaˇ Yawˇsuˆ Eˇhpaˍrenˍ chaw leh Maˍnaˍseˍ chaw hui hta‸kʼaw‸ kʼoˆ piˇ ve, Nawˬ hui lehˬ chaw maˇ jaˇ leh awˬ gʼaˇ uiˍ jaˇ ve yoˬ. Nawˬ hui lehˬ awˬ nu ve mvuhˇmiˬ teˇ hpaˍ hta‸ htawˇ gʼa tuˬ yoˬ.

18Hkʼaw hkʼoˆ lo cawˬ ve mvuhˇmiˬ teˇ hpaˍ lehˬ, nawˬ hui ve mvuhˇmiˬ hpeh‸ tuˬ yoˬ. Mvuhˇmiˬ oˇ ve lehˬ hteunˍ lonˉ hpeh‸ ve htawˇ, hkʼa deh‸ htu baˬ hpawˇ baˬ leh ca chehˇ-oˆ. Hkaˍnaˍniˆ chaw teˇ hpaˍ lehˬ, sho iˉ mvuhˇ law hkʼa biˇ cawˬ leh awˬ gʼaˇ uiˍ jaˇ ve htawˇ, nawˬ hui yawˇ hui hta‸ gʼa‸ kʼoˬ piˇ gʼa tuˬ yoˬ, teh‸ yawˇ hui hta‸ kʼoˆ piˇ ve yoˬ.

← Chapter 16 Jump to: Chapter 18 →