Joshua 3

Lahu Bible Edited © Thailand Bible Society and Bible Society of Myanmar, 2010, 2020.

← Chapter 2 Jump to: Chapter 4 →

1Oˇ ve hkʼaw‸ nawˉ, Aˍhkeˇshaˍ teh‸ kʼoˆ ve chehˇ kuiˬ lo Yawˇsuˆ leh Iˉsaˍreˍlaˆ chaw teˇ hpaˍ teˇ na‸ tu leh, Yawˇdanˍ iˉ kaˆ lawˬ lo kʼai ve yoˬ. Oˇ kaˬ lo yawˇ hui teˇ pawˆ kʼaw‸ haˉ ve yoˬ.

2Shehˆ nyi ponˬ peuˬ hkʼaw‸ nawˉ, awˬ hoˉ awˬ naˬ teˇ hpaˍ Iˉsaˍreˍlaˆ chaw hui haˉ chehˇ kuiˬ lo kʼai leh kʼoˆ ve,

3Paw hkuˇ teˇ hpaˍ Gʼuiˬsha ve ka ti‸ shaˉ caˆ ta kʼoˍ hta‸ taˆ kʼai chehˇ ve hta‸ nawˬ hui gʼa mawˬ ve teˇ yanˇ, nawˬ hui htawˇ a shu yawˇ ve mawˇ gu leh yawˇ hui hkʼaˇ suh gʼa‸ kʼai-o.

4Awˬ lawn kʼo, nawˬ hui choˬ kaˬ teˇ pawˆ ka‸ maˇ gaˬ jaw sheˍ ve pa taw, yawˇ hui ya‸ kʼaw shiˍ maˍ laˇ tuˬ yoˬ. Ya‸ hkʼaˇ, ka ti‸ shaˉ caˆ ta kʼoˍ awˬ paˇ neˇ lo taˇ kʼai. Ta kʼoˍ hkʼaw‸ nawˉ paˉ Awˇ hpaˍlonˍ hkʼe vuiˇ kuiˬ lo chehˇ taˍ-o, teh‸ Iˉsaˍreˍlaˆ chaw hui hta‸ kʼoˆ piˇ ve yoˬ.

5Yawˇsuˆ kʼoˆ ve, Nawˬ hui awˬ to hta‸ da‸ kehˬ tuˬ te taˍ-o‸. Awˬ lawn kʼo, shawˉ pawˍ Gʼuiˬsha nawˬ hui hta‸ anˇ tuˬ te maˍ la tuˬ yoˬ, teh‸ Iˉsaˍreˍlaˆ chaw hui hta‸ kʼoˆ piˇ ve yoˬ.

6Oˇ ve hkʼaw‸ nawˉ Yawˇsuˆ lehˬ, ka ti‸ shaˉ caˆ ta kʼoˍ hta‸ taˆ leh chaw moˍ lonˉ gʼuˇ suhˍ kʼai tuˬ paw hkuˇ teˇ hpaˍ hta‸ kʼoˆ piˇ ve yoˬ. Yawˇ hui lehˬ Yawˇsuˆ kʼoˆ ve hkʼe te ve yoˬ.

7Oˇ htaˇ Gʼuiˬsha Yawˇsuˆ hta‸ kʼoˆ piˇ ve, Ya‸ nyi ngaˬ te tuˬ ve kanˉ chi hta‸ pa taw, Iˉsaˍreˍlaˆ chaw hkʼa peu-eˬ nawˬ hta‸ chaw uiˍ teˇ gʼaˇ hkʼe shawˍ taˍ leh, ngaˬ Moˉseˍ geh chehˇ ve hkʼe nawˬ geh htawˇ chehˇ taˍ ve hta‸ yawˇ hui gʼa mawˬ gʼa shiˍ tuˬ yoˬ.

8Chi hta‸ pa taw, ka ti‸ shaˉ caˆ ta kʼoˍ hta‸ taˆ kʼai chehˇ ve paw hkuˇ teˇ hpaˍ iˉ kaˆ lawˬ lo gaˬ ve teˇ yanˇ iˉ kaˆ lawˬ hkʼaw huˉ taˍ tuˬ yawˇ hui hta‸ kʼoˆ piˇ-oˆ, teh‸ Yawˇsuˆ hta‸ kʼoˆ piˇ ve yoˬ.

9Oˇ ve hkʼaw‸ nawˉ Yawˇsuˆ chaw moˍ lonˉ hta‸ kʼoˆ piˇ ve, Nawˬ hui ve Gʼuiˬsha kʼoˆ laˇ tuˬ ve tawˇ hta‸ hkʼa deh‸ na taˍ-o‸.

10Nawˬ hui awˬ gʼuˇ suhˍ kʼai chehˇ ve teˇ yanˇ, Yawˇ lehˬ Hkaˍnaˍniˆ chaw, Hiˇtiˆ chaw, Hiˇviˆ chaw, Hpeˍraˍziˆ chaw, Giˇgaˍshiˆ chaw, Aˍmawˇriˆ chaw leh Yeˍbuˇshiˆ chaw hui hta‸ gʼa‸ kʼoˬ piˇ tuˬ yoˬ.

11Gʼuiˬsha ve ka ti‸ shaˉ caˆ ta kʼoˍ lehˬ, nawˬ hui gʼuˇ suhˍ Yawˇdanˍ iˉ kaˆ lawˬ hta‸ hkanˍ tawˆ-e chehˇ ve teˇ yanˇ, Gʼuiˬsha nawˬ hui geh chehˇ taˍ ve hta‸ nawˬ hui gʼa shiˍ tuˬ yoˬ.

12Chi hta‸pa taw, Iˉsaˍreˍlaˆ chaw teˇ chi nyiˇ ceuˬ cawˬ ve hkʼe, chaw teˇ chi nyiˇ gʼaˇ hta‸ leuˆ yuˬ taˍ-o‸.

13Gʼuiˬsha ve ka ti‸ shaˉcaˆ ta kʼoˍ hta‸ taˆ kʼai chehˇ ve paw hkuˇ teˇ hpaˍ, iˉ kaˆ lawˬ hkʼaw naˆ keu ve teˇ yanˇ, Yawˇdanˍ iˉ kaˆ lawˬ jehˇ sheˬ leh, awˬ na hpawˇ lo ya‸ la chehˇ ve iˉ kaˆ teˇ hpaˍ teˇ kaˬ lo ceh tiˉ teunˇ chehˇ tuˬ yoˬ, teh‸ yawˇ hui hta‸ kʼoˆ piˇ ve yoˬ.

14Awˬ yanˇ oˇ ve lehˬ caˬ gʼeu‸ ve awˬ yanˇ hpeh‸ leh iˉ kaˆ uiˍ jaˇ ve awˬ yanˇ hpeh‸ ve yoˬ. Hkʼe te leh Iˉsaˍreˍlaˆ chaw teˇ hpaˍ Yawˇdanˍ iˉ kaˆ lawˬ hta‸ hkanˍ tuˬ kʼai ve teˇ yanˇ, paw hkuˇ teˇ hpaˍ lehˬ ka ti‸ shaˉ caˆ ta kʼoˍ hta‸ taˆ leh yawˇ hui gʼuˇ suhˍ kʼai ve yoˬ.

15Yawˇ hui Yawˇdanˍ iˉ kaˆ lawˬ lo gaˬ leh, iˉ kaˆ lawˬ hkʼaw naˆ keu ve teˇ yanˇ,

16iˉ kaˆ ya‸ la chehˇ ve jehˇ sheˬ leh, Zeˍraˍtanˍ venˇ awˬ paˇ lo cawˬ ve Aˍdanˍ venˇ lo hkʼa gaˬ iˉ kaˆ teunˇ taˆ-e ve yoˬ. Awˬ hawˉ hpawˇ Suh ve laˇ tsuhˇ gʼuiˬ hkʼaw ya‸-e chehˇ ve iˉ kaˆ fiˍ kʼai ve yoˬ.

17Yawˇ hui goˇ lehˍ ve miˬguiˬ hkʼoˆ juˇ kʼai chehˇ ve teˇ yanˇ, Gʼuiˬsha ve ka ti‸ shaˉ caˆ ta kʼoˍ taˆ taˍ ve paw hkuˇ teˇ hpaˍ lehˬ, chaw oˇ ve hkʼa peu-eˬ iˉ kaˆ lawˬ coˇ paˉ lo tawˆ-e gaˬ peuˬ htaˇ hkʼa gaˬ, Yawˇdanˍ iˉ kaˆ lawˬ awˬ kʼaw ji lo huˉ taˍ ve yoˬ.

← Chapter 2 Jump to: Chapter 4 →