Joshua 22

Lahu Bible Edited © Thailand Bible Society and Bible Society of Myanmar, 2010, 2020.

← Chapter 21 Jump to: Chapter 23 →

1Oˇ ve hkʼaw‸ nawˉ, Yawˇsuˆ lehˬ Ruˇbenˍ, Gaˆ, leh Maˍnaˍseˍ chaw teˇ hkoˇ hta‸ yawˇ geh kuˬ yuˬ leh chi hkʼe kʼoˆ piˇ ve yoˬ.

2Nawˬ hui lehˬ, Gʼuiˬsha ve awˬ ceˬ paˍ Moˉseˍ kʼoˆ laˇ taˍ ve awˬ ceuˬ hkʼa peu-eˬ leh, ngaˬ ve tawˇ hta‸ hkʼa deh‸ na yuˬ leh te taˍ peuˬ ve yoˬ.

3Ya‸ nyi hkʼa gaˬ nawˬ hui ve awˬ viˉ awˬ nyi hpeh‸ ve Iˉsaˍreˍlaˆ chaw hui hta‸ maˇ chiˇ baˬ. Nawˬ hui Gʼuiˬsha ve tawˇ hta‸ hkʼa deh‸ na yuˬ chehˇ taˍ ve yoˬ.

4Chi beu‸ Gʼuiˬsha lehˬ, yawˇ ka ti‸ cawˬ taˍ ve hkʼe, nawˬ hui ve awˬ viˉ awˬ nyi Iˉsaˍreˍlaˆ chaw hui hta‸ mvuhˇmiˬ hkʼaw gawˬ lehˍ chehˇ tcuh taˍ peuˬ. Chi hta‸ pa taw, Gʼuiˬsha ve awˬ ceˬ paˍ Moˉseˍ nawˬ hui hta‸ piˇ taˍ ve Yawˇdanˍ gʼuiˬ coˇ paˉ hpawˇ lo cawˬ ve nawˬ hui ve mvuhˇmiˬ lo kʼo‸-e loˬ.

5Gʼuiˬsha ve awˬ ceˬ paˍ Moˉseˍ nawˬ hui hta‸ piˇ laˇ taˍ ve awˬliˇtawˇhkawˇ teˇ hpaˍ hta‸ hkʼa deh‸ na yuˬ chehˇ tuˬ shaˍ ti‸ taˍ-o‸. Nawˬ hui ve nyi ma awˬ tawˬ hkʼa gaˬ, Gʼuiˬsha hta‸ ha‸ leh yawˇ a loˍ cawˇ ve kanˉ hta‸ te-o. Yawˇ ve awˬliˇtawˇhkawˇ teˇ hpaˍ hta‸ na yuˬ leh, ka ti‸ yeˬ chehˇ ve chaw hpeh‸ piˇ-oˆ, teh‸ yawˇ hui hta‸ kʼoˆ piˇ ve yoˬ.

6Oˇ hkʼe kʼoˆ piˇ peuˬ hkʼaw‸ nawˉ, Yawˇsuˆ yawˇ hui hta‸ bon na‸ piˇ leh yawˇ hui hta‸ kʼo‸-e peu ve yoˬ. Hkʼe te leh, yawˇ hui a shu yawˇ ve chehˇ kuiˬ lo kʼo‸-e ve yoˬ.

7Moˉseˍ lehˬ, Baˍshanˍ mvuhˇmiˬ hkʼaw cawˬ ve mvuhˇmiˬ, Maˍnaˍseˍ chaw teˇ hkoˇ hta‸ piˇ ve yoˬ. Ya‸ hkʼaˇ, Yawˇsuˆ lehˬ awˬ nu ve Maˍnaˍseˍ chaw teˇ hkoˇ hta‸ awˬ nu ve chaw ceuˬ teˇ hpaˍ geh teˇ geh, Yawˇdanˍ iˉ kaˆ lawˬ mvuhˇ nyi kʼehˬ hpawˇ lo cawˬ ve mvuhˇmiˬ piˇ ve yoˬ. Yawˇsuˆ lehˬ, chaw oˇ ve teˇ hpaˍ hta‸ awˬ bon na‸ piˇ leh kʼo‸-e tcuh chehˇ ve teˇ yanˇ,

8yawˇ yawˇ hui hta‸ chi hkʼe kʼoˆ piˇ ve yoˬ. Nawˬ hui lehˬ, chi beu‸ paw sha jaˇ ve hkʼaw gʼa kʼo‸-e tuˬ ve yoˬ. Chi beu‸ nawˬ hui geh hpu, shi, kuiˇ, sho, ceˇ caˬ leh veu‸ kʼaˇ teˇ hpaˍ maˇ maˇ cawˬ taˍ peuˬ. Nawˬ hui ve canˇ paˍ teˇ hpaˍ geh gʼa taˍ ve mawˇ jeˬ chi teˇ hpaˍ, nawˬ hui ve awˬ viˉ awˬ nyi Iˉsaˍreˍlaˆ chaw hui hta‸ htawˇ pehˬ piˇ-oˆ, teh‸ yawˇ hui hta‸ kʼoˆ piˇ ve yoˬ.

9Oˇ ve hkʼaw‸ nawˉ, Ruˇbenˍ, Gaˆ, leh Maˍnaˍseˍ chaw teˇ hkoˇ lehˬ, a shu yawˇ ve chehˇ kuiˬ lo kʼo‸-e ve yoˬ. Yawˇ hui lehˬ awˬ nu ve Iˉsaˍreˍlaˆ chaw hui hta‸ Hkaˍnanˍ mvuhˇmiˬ hkʼaw cawˬ ve Shiˉlonˍ venˇ hkʼaw hpaˆ da‸ taˉ leh, Gʼuiˬsha Moˉseˍ hta‸ teˇ caˉ te leh yawˇ hui hta‸ piˇ taˍ ve Giˇlaˆ mvuhˇmiˬ lo kʼo‸-e ve yoˬ.

10Yawˇ hui Yawˇdanˍ iˉ kaˆ lawˬ paˇ lo cawˬ ve Geˍliˍlawˇ teh‸ kʼoˆ ve chehˇ kuiˬ lo gaˬ ve teˇ yanˇ, yawˇ hui uiˍ jaˇ ve tuˉ tanˇ kuiˬ teˇ maˬ te ve yoˬ.

11Awˬ nu ve Iˉsaˍreˍlaˆ Chaw teˇ hpaˍ lehˬ, awˬ lawn oˇ ve hta‸ gʼa kaˇ leh kʼoˆ ve, Na sheˍ. Ruˇbenˍ, Gaˆ leh Maˍnaˍseˍ chaw teˇ hkoˇ ve lehˬ, Yawˇdanˍ iˉ kaˆ lawˬ paˇ lo cawˬ ve Geˍliˍlawˇ teh‸ kʼoˆ ve chehˇ kuiˬ lo tuˉ tanˇ kuiˬ teˇ maˬ te taˍ peuˬ, teh‸ kʼoˆ ve yoˬ.

12Iˉsaˍreˍlaˆ chaw teˇ hpaˍ lehˬ awˬ lawn chi hta‸ gʼa kaˇ ve teˇ yanˇ, yawˇ hui hta‸ ca bawˆ tuˬ Shiˉlonˍ venˇ lo hpawnˬ laˬ ve yoˬ.

13Oˇ htaˇ, Iˉsaˍreˍlaˆ chaw teˇ hpaˍ lehˬ paw hkuˇ Eˇlaˍsaˍ ve yaˇ paˍ Hpiˇneˍhaˆ hta‸ Giˇlaˆ mvuhˇmiˬ hkʼaw chehˇ taˍ ve Ruˇbenˍ, Gaˆ leh Maˍnaˍseˍ chaw teˇ hkoˇ geh kʼai peu ve yoˬ.

14Iˉsaˍreˍlaˆ chaw teˇ ceuˬ awˬ hkʼaw lo ve awˬ hoˉ teˇ gʼaˇ, hkʼa peu-eˬ teˇ chi gʼaˇ Hpiˇneˍhaˆ geh kʼai ve yoˬ.

15Yawˇ hui Giˇlaˆ mvuhˇmiˬ hkʼaw gaˬ la leh, Ruˇbenˍ, Gaˆ leh Maˍnaˍseˍ chaw teˇ hkoˇ ve hta‸ kʼoˆ piˇ ve,

16Aˬ hto‸ ma pa taw, nawˬ hui lehˬ Iˉsaˍreˍlaˆ chaw hui ve Gʼuiˬsha mehˆ gʼuˇ suhˍ cha‸ chiˆ ve kanˉ hta‸ te ve le. Aˬ hto‸ ma pa taw, nawˬ hui Gʼuiˬsha hta‸ hpfuhˆ leh tuˉ tanˇ kuiˬ oˇ ve hta‸ ca te taˍ ve le. Nawˬ hui lehˬ, Gʼuiˬsha hta‸ baˬ taˉ peuˬ.

17Peˍawˇ teh‸ kʼoˆ ve chehˇ kuiˬ lo Gʼuiˬsha lehˬ yawˇ ve chaw teˇ hpaˍ hta‸ hkʼaˬ hkʼe te ciˍ yanˍ piˇ ve hta‸ dawˇ nawˇ-oˆ. Venˇbaˆ oˇ ve hta‸ pa taw, ya‸ nyi hkʼa gaˬ ngaˬ hui gʼa hkanˍ chehˇ sheˍ ve yoˬ. Oˇ ve lehˬ, venˇbaˆ hpeh‸ ve maˇ heˆ laˇ.

18Chi beu‸ nawˬ hui Gʼuiˬsha hta‸ baˬ taˉ tuˬ ve laˇ. Ya‸ nyi nawˬ hui Gʼuiˬsha hta‸ hpfuhˆ ve kʼo, yawˇ lehˬ shawˉ pawˍ kʼo, Iˉsaˍreˍlaˆ chaw hkʼa peu-eˬ ve hta‸ nyi ma zuhˆ tuˬ ve yoˬ.

19Nawˬ hui ve mvuhˇmiˬ hkʼaw Gʼuiˬsha hta‸ oˉ kʼoˍ pui tuˬ te maˇ keunˍ teh‸ dawˇ ve kʼo, Gʼuiˬsha ve aˉ po kʼo bon yehˬ cawˬ taˍ ve ngaˬ hui ve mvuhˇmiˬ lo laˬ-o‸. Ngaˬ hui ve mvuhˇmiˬ teˇ hpaˍ hpaˍ hta‸ nawˬ hui lawˬ yuˬ hpeh‸ ve yoˬ. Ngaˬ hui ve Gʼuiˬsha ve tuˉ tanˇ kuiˬ awˬ hkʼoˆ, awˬ nu ve tuˉ tanˇ kuiˬ kʼaw‸ te leh, Gʼuiˬsha hta‸ maˇ kʼoˆ, ngaˬ hui hta‸ maˇ kʼoˆ taˇ hpfuhˆ loˬ.

20Zeˍraˆ ve yaˇ paˍ Aˍhkanˍ lehˬ, Gʼuiˬsha te luˬ tcuh ve mawˇ hta‸ hkʼawˇ yuˬ taˍ ve pa taw, Iˉsaˍreˍlaˆ chaw hkʼa peu-eˬ ciˍ yanˍ ve hta‸ gʼa hkanˍ ve hta‸ dawˇ nawˇ-oˆ. Aˍhkanˍ venˇbaˆ te ve pa taw, yawˇ teˇ gʼaˇ tiˉ gʼa suhˍ ve maˇ heˆ, teh‸ yawˇ hui hta‸ kʼoˆ piˇ ve yoˬ.

21Ruˇbenˍ, Gaˆ, leh Maˍnaˍseˍ chaw teˇ hkoˇ lehˬ, Iˉsaˍreˍlaˆ chaw awˬ hoˉ awˬ naˬ teˇ hpaˍ hta‸ chi hkʼe kʼaw‸ yaw hkʼaw‸ piˇ ve yoˬ.

22Kanˇ paˆ uiˍ ve teˇ gʼaˇ lehˬ, Gʼuiˬsha hpeh‸ ve yoˬ. Yawˇ lehˬ Jawˇmawˇ hpeh‸ ve yoˬ. Kanˇ paˆ uiˍ ve teˇ gʼaˇ lehˬ, Gʼuiˬsha hpeh‸ ve yoˬ. Yawˇ lehˬ Jawˇmawˇ hpeh‸ ve yoˬ. Aˬ hto‸ ma pa taw, ngaˬ hui chi hkʼe gʼa te peuˬ ve hta‸ yawˇ shiˍ chehˇ leh, nawˬ hui htawˇ gʼa shiˍ tuˬ ve yoˬ. Ngaˬ hui Gʼuiˬsha hta‸ hpfuhˆ leh yawˇ hta‸ ka ti‸ maˇ yeˬ ve kʼo, ngaˬ hui hta‸ a sha‸ taˇ te‸ chehˇ tcuh laˇ-oˆ.

23Ngaˬ hui lehˬ, Gʼuiˬsha ve tawˇ hkawˇ hta‸ maˇ na yuˬ leh, ngaˬ hui awˬ pon tuˉ tanˇ kuiˬ gʼa te taˍ peuˬ ve hkʼe kʼo, Gʼuiˬsha ngaˬ hui hta‸ ciˍ yanˍ laˇ piˇ-oˆ.

24Ngaˬ hui chi hkʼe gʼa te taˍ ve lehˬ, ngaˬ hui kawˆ ve hta‸ pa taw yoˬ. Awˬ lawn kʼo, awˬ hkʼaw‸ nawˉ nawˬ hui ve awˬ yaˇ awˬ duˬ teˇ hpaˍ lehˬ, ngaˬ hui ve awˬ yaˇ awˬ duˬ teˇ hpaˍ hta‸, Nawˬ hui lehˬ Iˉsaˍreˍlaˆ chaw hui ve Gʼuiˬsha hta‸ hkʼaˬ hkʼe caˉ da‸ ve le.

25Gʼuiˬsha lehˬ, ngaˬ hui Ruˇbenˍ, Gaˆ leh ngaˬ hui awˬ kaˍ lo Yawˇdanˍ iˉ kaˆ lawˬ hta‸ teh taˍ ve yoˬ. Nawˬ hui lehˬ Gʼuiˬsha hta‸ caˉ da‸ ve chaw hpeh‸ ve maˇ heˆ, teh‸ kʼoˆ laˇ tuˬ yoˬ. Oˇ htaˇ, nawˬ hui ve awˬ yaˇ awˬ duˬ teˇ hpaˍ lehˬ, ngaˬ hui ve awˬ yaˇ awˬ duˬ teˇ hpaˍ Gʼuiˬsha hta‸ oˉ kʼoˍ maˇ gʼa pui tuˬ, tawˍ taˍ laˇ tuˬ yoˬ.

26Chi hta‸ pa taw, ngaˬ hui tuˉ tanˇ kuiˬ teˇ maˬ te taˍ ve yoˬ. Ya‸ hkʼaˇ, oˇ kaˬ lo ca tuˉ tanˇ tuˬ awˬ pon te taˍ ve maˇ heˆ.

27Ngaˬ hui hkʼa peu-eˬ leh ngaˬ hui ve awˬ yaˇ awˬ duˬ hkʼa peu-eˬ ve lehˬ, Gʼuiˬsha hta‸ tuˉ tanˇ leh oˉ kʼoˍ pui ve chaw teˇ hpaˍ hpeh‸ ve hta‸ gʼa shiˍ tuˬ, te taˍ ve awˬ heˆ ceh hpeh‸ ve yoˬ. Nawˬ hui lehˬ, Gʼuiˬsha hta‸ caˉ da‸ ve chaw teˇ hpaˍ hpeh‸ ve maˇ heˆ, teh‸ nawˬ hui ve awˬ yaˇ awˬ duˬ teˇ hpaˍ ngaˬ hui ve awˬ yaˇ awˬ duˬ teˇ hpaˍ hta‸ maˇ gʼa kʼoˆ laˇ tuˬ awˬ pon ceh dawˇ leh te taˍ ve yoˬ.

28Ngaˬ hui ve dawˇ law kuiˬ lehˬ, teˇ nyi yawˇ hui ngaˬ hui ve yaˇ teˇ hpaˍ hta‸ chi hkʼe kʼoˆ laˇ puiˉ ve kʼo, Nyi sheˍ, Ngaˬ hui ve awˬ puˍ awˬ pi teˇ hpaˍ lehˬ, Gʼuiˬsha ve tuˉ tanˇ kuiˬ hta‸ shuˍ da‸ ve tuˉ tanˇ kuiˬ teˇ maˬ te taˍ ve yoˬ. Tuˉ tanˇ kuiˬ chi lehˬ, tuˉ tanˇ tuˬ awˬ pon te taˍ ve maˇ heˆ. Ngaˬ hui lehˬ, chaw teˇ ceuˬ tiˉ hpeh‸ ve hta‸ gʼa shiˍ tuˬ te taˍ ve awˬ heˆ ceh tiˉ hpeh‸ ve yoˬ, teh‸ kʼoˆ tuˬ awˬ pon yoˬ.

29Ngaˬ hui lehˬ Gʼuiˬsha hta‸ hpfuhˆ leh yawˇ ve tawˇ hta‸ maˇ na yuˬ gaˇ ve pa taw, tuˉ tanˇ kuiˬ chi hta‸ te taˍ ve maˇ heˆ. Gʼuiˬsha ve aˉ po kʼo bon yehˬ hkʼaw cawˬ ve tuˉ tanˇ kuiˬ oˇ ve teˇ maˬ maˇ heˆ kʼo, awˬ kaˍ awˬ nu ve tuˉ tanˇ kuiˬ hta‸ ca te tuˬ ve maˇ heˆ, teh‸ yawˇ hui hta‸ kʼaw‸ kʼoˆ piˇ ve yoˬ.

30Paw hkuˇ Hpiˇneˍhaˆ leh yawˇ geh kʼai taˍ ve Iˉsaˍreˍlaˆ chaw awˬ hoˉ awˬ naˬ teˇ hpaˍ lehˬ, Ruˇbenˍ, Gaˆ leh Maˍnaˍseˍ chaw hui yaw hkʼaw‸ laˇ ve tawˇ hta‸ gʼa kaˇ ve teˇ yanˇ, ha lehˬ jaˇ ve yoˬ.

31Oˇ htaˇ, paw hkuˇ Eˇlaˍsaˍ ve yaˇ paˍ Hpiˇneˍhaˆ kʼoˆ ve, Nawˬ hui Gʼuiˬsha hta‸ maˇ hpfuhˆ ve pa taw, Gʼuiˬsha lehˬ ngaˬ hui geh chehˇ taˍ ve hta‸ chi beu‸ ngaˬ hui gʼa shiˍ peuˬ. Gʼuiˬsha ciˍ yanˍ ve hta‸ maˇ gʼa hkanˍ tuˬ, nawˬ hui lehˬ Iˉsaˍreˍlaˆ chaw hui hta‸ ponˬ piˇ taˍ peuˬ, teh‸ Ruˇbenˍ, Gaˆ leh Maˍnaˍseˍ chaw hui hta‸ kʼoˆ piˇ ve yoˬ.

32Oˇ ve hkʼaw‸ nawˉ, Hpiˇneˍhaˆ leh Iˉsaˍreˍlaˆ chaw awˬ hoˉ awˬ naˬ teˇ hpaˍ, Giˇlaˆ mvuhˇmiˬ hkʼaw chehˇ ve Ruˇbenˍ, Gaˆ chaw hui hta‸ hpaˆ da‸ taˉ leh Iˉsaˍreˍla chaw hui chehˇ kuiˬ Hkaˍnanˍ mvuhˇmiˬ lo kʼaw‸ kʼo‸-e ve yoˬ. Hkʼa hpeh‸ la peuˬ ve awˬ lawn hkʼa peu-eˬ, yawˇ hui hta‸ kʼaw‸ hto maˍ piˇ ve yoˬ.

33Yawˇ hui hto maˍ piˇ ve awˬ lawn hta‸ Iˉsaˍreˍlaˆ chaw teˇ hpaˍ gʼa kaˇ ve teˇ yanˇ, yawˇ hui ha lehˬ jaˇ ve yoˬ. Yawˇ hui Gʼuiˬsha hta‸ chiˇ mvuh leh, Ruˇbenˍ, Gaˆ chaw hui ve mvuhˇmiˬ hta‸ ca te luˬ piˇ tuˬ maˇ kʼaw‸ jehˬ da‸-o.

34Ruˇbenˍ, Gaˆ chaw teˇ hpaˍ lehˬ tuˉ tanˇ kuiˬ oˇ ve hta‸, Shaˉ hkiˆ teh‸ meh piˇ ve yoˬ. Awˬ lawn kʼo, Gʼuiˬsha lehˬ Jawˇmawˇ hpeh‸ ve hta‸ tuˉ tanˇ kuiˬ oˇ ve shaˉ hkiˆ hpeh‸ ve yoˬ, teh‸ kʼoˆ ve yoˬ.

← Chapter 21 Jump to: Chapter 23 →