Joshua 14

Lahu Bible Edited © Thailand Bible Society and Bible Society of Myanmar, 2010, 2020.

← Chapter 13 Jump to: Chapter 15 →

1Chi ve lehˬ, Hkaˍnanˍ mvuhˇmiˬ hkʼaw lo Iˉsaˍreˍlaˆ chaw hui gʼa taˍ ve mvuhˇmiˬ hpeh‸ ve yoˬ. Paw hkuˇ Eˇliˇzaˬ, Nunˍ ve yaˇ paˍ Yawˇsuˆ leh Iˉsaˍreˍlaˆ chaw awˬ hoˉ awˬ naˬ teˇ hpaˍ, mvuhˇmiˬ oˇ ve hta‸ pehˬ piˇ taˍ ve yoˬ.

2Gʼuiˬsha Moˉseˍ hta‸ kʼoˆ piˇ taˍ ve hkʼe, yawˇ hui lehˬ Iˉsaˍreˍlaˆ chaw kʼawˇ ceuˬ teˇ hkoˇ ve hta‸ kuˇ da‸ tcuh leh, mvuhˇmiˬ pehˬ piˇ ve yoˬ.

3Moˉseˍ lehˬ, Iˉsaˍreˍlaˆ chaw nyiˇ ceuˬ teˇ hkoˇ ve hta‸ Yawˇdanˍ lawˬ mvuhˇ nyi tawˆ hpawˇ ve mvuhˇmiˬ piˇ taˍ ve yoˬ. Ya‸ hkʼaˇ, yawˇ lehˬ Leˍviˆ chaw hui hta‸ mvuhˇmiˬ maˇ piˇ.

4Yoˇseh‸ ve awˬ ceuˬ awˬ hkʼaˇ teˇ hpaˍ hta‸, Maˍnaˍseˍ leh Eˇhpaˍrenˍ teh‸ nyiˇ moˍ pehˬ taˍ ve yoˬ. Leˍviˆ chaw hui lehˬ mvuhˇmiˬ maˇ gʼa. Ya‸ hkʼaˇ, yawˇ hui lehˬ chehˇ kuiˬ venˇ teˇ hpaˍ leh yawˇ hui ve ceˇ caˬ teˇ hpaˍ awˬ pon miˬguiˬ teˇ hpaˍ gʼa taˍ ve yoˬ.

5Gʼuiˬsha Moˉseˍ hta‸ kʼoˆ piˇ taˍ ve hkʼe, yawˇ hui lehˬ mvuhˇmiˬ hta‸ pehˬ da‸ taˍ ve yoˬ.

6Yuˇda‸ awˬ ceuˬawˬ hkʼaˇ teˇ hpaˍ, Giˇlaˍgaˍ lo chehˇ taˍ ve Yawˇsuˆ geh laˬ ve yoˬ. Oˇ htaˇ Keˍnehˆ ve awˬ ceuˬ awˬ hkʼaˇ, Yeˍhpuˇnaˍ ve yaˇ Kaˍlehˆ, Yawˇsuˆ hta‸ kʼoˆ piˇ ve, Kaˍdeˍshaˆbaˍnaˍ venˇ hkʼaw lo ngaˬ huiˉ maˬ ve awˬ lawn Gʼuiˬsha Moˉseˍ hta‸ hkʼaˬ hkʼe kʼoˆ piˇ taˍ ve hta‸ nawˬ shiˍ taˍ ve yoˬ.

7Mvuhˇmiˬ hta‸ ca jaˆ nyi tuˬ, Gʼuiˬsha ve awˬ ceˬ paˍ Moˉseˍ ngaˬ hta‸ Kaˍdeˍshaˆbaˍnaˍ venˇ hkʼaw tawˆ kʼai tcuh laˇ ve teˇ yanˇ, ngaˬ ve a sha‸ 40 hkʼaw‸ gaˬ peuˬ ve yoˬ. Ngaˬ gʼa shiˍ gʼa mawˬ taˉ ve awˬ lawn, ngaˬ yawˇ hta‸ hteˇ lehˍ hto maˍ piˇ ve yoˬ.

8Ya‸ hkʼaˇ, ngaˬ geh kʼai taˍ ve chaw teˇ hpaˍ lehˬ, kawˆ tuˬ kʼoˆ maˍ piˇ ve yoˬ. Ya‸ hkʼaˇ, ngaˬ lehˬ Gʼuiˬsha ve tawˇ hta‸ hkʼa deh‸ na yuˬ ve yoˬ.

9Oˇ htaˇ Moˉseˍ lehˬ, ngaˬ Gʼuiˬsha ve tawˇ hta‸ hkʼa deh‸ na yuˬ peuˬ ve pa taw, ngaˬ leh ngaˬ ve awˬ yaˇ awˬ duˬ teˇ hpaˍ hta‸ ngaˬ gaˬ taˉ ve mvuhˇmiˬ oˇ ve piˇ laˇ tuˬ ka ti‸ te laˇ taˍ ve yoˬ.

10Chi hta‸ pa taw, chi beu‸ dawˇ nyi sheˍ. Gʼuiˬsha Moˉseˍ hta‸ oˇ hkʼe kʼoˆ piˇ taˍ ve chi beu‸ awˇ chi ngaˇ hkʼaw‸ gaˬ peuˬ. Iˉsaˍreˍlaˆ chaw hui heh puiˉ hkʼaw lo te toˇ chehˇ htaˇ, Gʼuiˬsha oˇ hkʼe kʼoˆ taˍ ve yoˬ. Gʼuiˬsha lehˬ ngaˬ hta‸ ya‸ nyi hkʼa gaˬ te‸ chehˇ tcuh laˇ taˍ sheˍ ve yoˬ. Chi beu‸ ngaˬ hta‸ nyi sheˍ. Ngaˬ lehˬ a sha‸ 85 hkʼaw‸ gaˬ peuˬ.

11Ya‸ hkʼaˇ, ngaˬ lehˬ ponˬlaˬ htaˇ hkʼe awˬ gʼaˇ cawˬ chehˇ sheˍ ve yoˬ. Ma‸ bawˆ tuˬ leh ngaˬ te cawˇ ve kanˉ te tuˬ, ngaˬ awˬ gʼaˇ cawˬ chehˇ sheˍ ve yoˬ.

12Chi hta‸ pa taw, oˇ ve teˇ nyi ngaˬ leh ngaˬ ve chaw teˇ hpaˍ ca jaˆ nyi taˉ ve mvuhˇmiˬ oˇ ve, Gʼuiˬsha kʼoˆ taˍ ve hkʼe ngaˬ hta‸ pe‸ laˇ-oˆ. Awˬ gʼaˇ uiˍ jaˇ ve Aˍnaˍkaˆ chaw teˇ hpaˍ lehˬ, hkʼa deh‸ caw ko taˍ ve venˇ lonˉ teˇ hpaˍ hkʼaw chehˇ taˍ ve yoˬ, teh‸ ngaˬ nawˬ hui hta‸ kʼoˆ maˍ piˇ taˍ peuˬ ve yoˬ. Gʼuiˬsha kʼoˆ taˍ ve hkʼe, Yawˇ ngaˬ geh chehˇ ve kʼo, ngaˬ lehˬ chaw oˇ ve teˇ hpaˍ hta‸ gʼa‸ kʼoˬ piˇ gʼa tuˬ yoˬ, teh‸ Yawˇsuˆ hta‸ kʼoˆ piˇ ve yoˬ.

13Oˇ htaˇ Yawˇsuˆ lehˬ, Yeˍhpuˇnaˍ ve yaˇ paˍ Kaˍlehˆ hta‸ awˬ bon na‸ piˇ leh, Heˍbronˍ mvuhˇmiˬ oˇ ve yawˇ hta‸ piˇ ve yoˬ.

14Kaˍlehˆ lehˬ, Gʼuiˬsha ve tawˇ hkawˇ hta‸ hkʼa deh‸ na yuˬ ve pa taw, Heˍbronˍ mvuhˇmiˬ lehˬ Kaˍlehˆ ve awˬ ceuˬ awˬ hkʼaˇ teˇ hpaˍ ve mvuhˇmiˬ hpeh‸ la ve yoˬ.

15Chi hkʼe maˇ hpeh‸ la sheˍ htaˇ, Heˍbronˍ venˇ hta‸ Kiˇriˇyaˆtaˍbaˆ venˇ teh‸ meh taˍ ve yoˬ. (Aˍbaˆ lehˬ, Aˍnaˍkaˆ chaw hui awˬ hkʼaw lo shu a‸ kehˉ uiˍ jaˇ ve chaw teˇ gʼaˇ hpeh‸ ve yoˬ.) Mvuhˇmiˬ hkʼaw chi beu‸ gawˬ lehˍ cawˬ ve yoˬ.

← Chapter 13 Jump to: Chapter 15 →