Joshua 9

Lahu Bible Edited © Thailand Bible Society and Bible Society of Myanmar, 2010, 2020.

← Chapter 8 Jump to: Chapter 10 →

1Awˬ lawn chi ve hta‸ Yawˇdanˍ iˉ kaˆ lawˬ mvuhˇ nyi kʼehˬ hpawˇ leh, Awˬ kʼaw ji ve laˇ tsuhˇ gʼuiˬ paˇ lo cawˬ ve mvuhˇmiˬ hta‸ te leh Leˍbaˍnonˍ mvuhˇmiˬ lo hkʼa gaˬ ve jawˇmawˇ teˇ hpaˍ gʼa kaˇ ve yoˬ. Jawˇmawˇ oˇ ve teˇ hpaˍ lehˬ, Hiˇtiˆchaw, Aˍmawˇriˆ chaw, Hkaˍnaˍniˆ chaw, Hpeˍraˍziˆ chaw, Hiˇviˆ chaw leh Yeˍbuˇsiˆ chaw hui ve jawˇmawˇ teˇ hpaˍ hpeh‸ ve yoˬ.

2Yawˇ hui lehˬ, Yawˇsuˆ leh Iˉsaˍreˍlaˆ chaw hui hta‸ bawˆ tuˬ teˇ geh hpawnˬ laˬ ve yoˬ.

3Yeˍriˆhkoˇ venˇ leh Aˍiˆ venˇ hta‸ Yawˇsuˆ hkʼaˬ hkʼe te piˇ ve awˬ lawn hta‸ Giˇbonˍ chaw hui gʼa kaˇ ve teˇ yanˇ,

4yawˇ hui yawˇ hta‸ cuˇ yiˍ te piˇ tuˬ jehˬ cheˆ ve yoˬ. Yawˇ hui caˇ tuˬ teˇ hpaˍ hta‸ ca leh, htuˉ pui awˬ piˍ hkʼaw keu peuˬ hkʼaw‸ nawˉ, yawˇ hui ve piˉlaˬ teˇ hpaˍ hta‸ taˆ tcuh ve yoˬ.

5Yawˇ hui hkuiˉ nuˆ awˬ piˍ hta‸ tcuhˉ leh, tzuh‸ keu ve veu‸ kʼaˇ hta‸ veu‸ deh taˍ ve yoˬ. Yawˇ hui lehˬ, goˇ kʼai bvuh‸ kʼai peuˬ ve hkaoˍmonˇ teˇ hpaˍ hta‸ yuˬ kʼai ve yoˬ.

6Oˇ ve hkʼaw‸ nawˉ, Giˇlaˍgaˍ lo deh chehˇ ve Yawˇsuˆ geh kʼai leh, Ngaˬ hui lehˬ vuiˇ jaˇ ve mvuhˇmiˬ lo laˬ taˍ ve yoˬ. Ngaˬ hui teˇ geh shaˉ caˆ caˇ-a veuˬ, teh‸ Yawˇsuˆ leh Iˉsaˍreˍlaˆ chaw hui hta‸ kʼoˆ piˇ ve yoˬ.

7Ya‸ hkʼaˇ, Iˉsaˍreˍlaˆ chaw teˇ hpaˍ kʼoˆ ve, Aˬ hto‸ ma pa taw ngaˬ hui nawˬ hui geh shaˉ caˆ gʼa caˇ tuˬ ve le. Nawˬ hui lehˬ maˇ vuiˇ maˇ neˇ lo chehˇ ve chaw teˇ hpaˍ hpeh‸ ve yoˬ, teh‸ yawˇ hui hta‸ kʼoˆ piˇ ve yoˬ.

8Ngaˬ hui teˇ hpaˍ nawˬ ve awˬ ceˬ te tuˬ yoˬ, teh‸ yawˇ hui Yawˇsuˆ hta‸ kʼoˆ piˇ ve yoˬ. Oˇ htaˇ Yawˇsuˆ lehˬ, Nawˬ hui a shu le. Nawˬ hui hkʼaˬ lo laˬ ve le, teh‸ yawˇ hui hta‸ na nyi ve yoˬ.

9Oˇ htaˇ yawˇ hui kʼoˆ ve, Jawˇmawˇ-oˬ, ngaˬ hui lehˬ vuiˇ jaˇ ve mvuhˇmiˬ lo laˬ taˍ ve yoˬ. Awˬ lawn kʼo, nawˬ hui ve Jawˇmawˇ Gʼuiˬsha awˬ lawn hta‸ ngaˬ hui gʼa kaˇ peuˬ ve yoˬ. Yawˇ Eˇjiˇtu‸ mvuhˇmiˬ hkʼaw te ve kanˉ teˇ hpaˍ awˬ lawn hta‸ maˇ kʼoˆ,

10Yawˇdanˍ iˉ kaˆ lawˬ mvuhˇ nyi tawˆ hpawˇ lo chehˇ ve Heˍsaˍbonˍ mvuhˇmiˬ jawˇmawˇ Siˉhonˍ leh, Baˍshanˍ mvuhˇmiˬ ve jawˇmawˇ Awˇgaˆ hui hta‸ Aˍshaˆtaˍroˆ teh‸ kʼoˆ ve chehˇ kuiˬ lo Yawˇ hkʼaˬ hkʼe te piˇ peuˬ ve awˬ lawn hta‸ maˇ kʼoˆ, ngaˬ hui gʼa kaˇ taˍ peuˬ ve yoˬ.

11Hkʼe te leh ngaˬ hui ve awˬ hoˉ awˬ naˬ teˇ hpaˍ leh mvuhˇ yaˇ miˬ yaˇ hkʼa peu-eˬ, caˇ tuˬ gu leh nawˬ hui geh kʼai peu laˇ ve yoˬ. Ngaˬ hui lehˬ, nawˬ hui ve awˬ ceˬ hpeh‸ ve yoˬ. Chi hta‸ pa taw, ngaˬ hui hta‸ shaˉ caˆ caˇ laˇ-oˆ.

12Ngaˬ hui ve hkaoˍmonˇ chi teˇ hpaˍ hta‸ nyi sheˍ. Ngaˬ hui tawˆ la gehˇ htaˇ hkaoˍmonˇ chi teˇ hpaˍ awˬ suhˉ deˇ deˇ hpeh‸ ve yoˬ. Ya‸ hkʼaˇ nyi sheˍ. Chi beu‸ goˇ kʼai bvuh‸ kʼai peuˬ ve yoˬ.

13Ngaˬ hui ve a pehˉ meuˇ gʼuiˬ keu kuiˬ shaˍ guiˬ kʼuˉ teˇ hpaˍ hta‸ htawˇ nyi sheˍ. Ngaˬ hui tawˆ la gehˇ htaˇ awˬ suhˉ hpeh‸ ve yoˬ. Chi beu‸ tzuh‸ kʼai peuˬ. Ngaˬ hui ya‸ kʼaw toˇ laˬ ve vuiˇ jaˇ peuˬ ve pa taw, ngaˬ hui ve veu‸ kʼaˇ leh hkuiˉ nuˆ teˇ hpaˍ htawˇ tzuh‸ kʼai peu, teh‸ Yawˇsuˆ hta‸ kʼoˆ piˇ ve yoˬ.

14Iˉsaˍreˍlaˆ chaw teˇ hpaˍ lehˬ, hkaoˍmonˇ oˇ ve teˇ hpaˍ hta‸ ha‸ yuˬ ve yoˬ. Ya‸ hkʼaˇ, yawˇ hui Gʼuiˬsha hta‸ maˇ na nyi.

15Hkʼe te leh Yawˇsuˆ yawˇ hui geh shaˉ caˆ caˇ leh, yawˇ hui hta‸ maˇ te luˬ piˇ tuˬ ka ti‸ te ve yoˬ. Iˉsaˍreˍlaˆchaw awˬ hoˉ awˬ naˬ teˇ hpaˍ htawˇ yawˇ hui geh shaˉ caˆ caˇ ve yoˬ.

16Yawˇ hui shaˉ caˆ caˇ peuˬ hkʼaw‸ nawˉ shehˆ nyi gaˬ htaˇ, chaw oˇ ve teˇ hpaˍ lehˬ yawˬ hui hta‸ maˇ vuiˇ maˇ neˇ kuiˬ lo chehˇ ve chaw hpeh‸ ve hta‸ Iˉsaˍreˍlaˆ chaw hui gʼa shiˍ ve yoˬ.

17Hkʼe te leh, Iˉsaˍreˍlaˆchaw teˇ hpaˍ tawˆ kʼai leh shehˆ nyi gaˬ ve teˇ yanˇ, chaw oˇ ve teˇ hpaˍ ve chehˇ kuiˬ Giˇbonˍ, Hkeˍhpiˇraˆ, Beˍroˆ, leh Kiˇyaˍraˆyaˍrenˍ venˇ lo gaˬ la ve yoˬ.

18Ya‸ hkʼaˇ, Iˉsaˍreˍlaˆ chaw teˇ hpaˍ lehˬ yawˇ hui hta‸ tiˇ pehˍ piˇ maˇ hpeh‸. Awˬ lawn kʼo, Yawˇ hui ve awˬ hoˉ awˬ naˬ teˇ hpaˍ lehˬ, Iˉsaˍreˍlaˆ ve Gʼuiˬsha ve awˬ meh hkʼaw lo yawˇ hui hta‸ ka ti‸ te da‸ taˍ peuˬ ve pa taw yoˬ. Hkʼe te leh Iˉsaˍreˍlaˆ chaw teˇ hpaˍ lehˬ, yawˇ hui ve awˬ hoˉ awˬ naˬ teˇ hpaˍ hta‸ nyi ma maˇ sha ve yoˬ.

19Ya‸ hkʼaˇ, Iˉsaˍreˍlaˆ chaw awˬ hoˉ awˬ naˬ teˇ hpaˍ kʼaw‸ yaw hkʼaw‸ leh kʼoˆ ve, Gʼuiˬsha ve awˬ meh awˬ hkʼaw lo ngaˬ hui yawˇ hui hta‸ ka ti‸ gʼa te taˍ peuˬ ve pa taw, yawˇ hui hta‸ te luˬ piˇ maˇ hpeh‸.

20Ngaˬ hui ka ti‸ te taˍ peuˬ ve hkʼe, yawˇ hui hta‸ gʼa te‸ chehˇ piˇ lawˬ ve yoˬ. Ngaˬ hui oˇ hkʼe maˇ te ve kʼo, Gʼuiˬsha ngaˬ hui hta‸ ciˍ yanˍ laˇ tuˬ yoˬ.

21Yawˇ hui hta‸ te‸ chehˇ piˇ-oˆ. Ya‸ hkʼaˇ, yawˇ hui lehˬ ngaˬ hui awˬ pon suhˆ hkaˆ leh iˉ kaˆ gʼa hkʼo laˇ ve yoˬ, teh‸ yawˇ hui hta‸ kʼoˆ maˍ piˇ ve yoˬ.

22Oˇ ve hkʼaw‸ nawˉ, Yawˇsuˆ lehˬ Giˉbonˍ chaw hui hta‸ kuˬ yuˬ leh, Nawˬ hui choˬ kaˬ lo ceh chehˇ taˍ ve htawˇ, aˬ hto‸ ma pa taw vuiˇ jaˇ ve mvuhˇmiˬ lo laˬ taˍ ve yoˬ, teh‸ kʼoˆ leh ngaˬ hui hta‸ heˍ laˇ ve le.

23Nawˬ hui chi hkʼe te ve pa taw, Gʼuiˬsha nawˬ hui hta‸ ciˍ yanˍ laˇ tuˬ yoˬ. Ngaˬ hui ve Gʼuiˬsha ve bon yehˬ awˬ pon nawˬ hui suhˆ gʼa ca laˇ leh iˉ kaˆ gʼa hkʼo laˇ tuˬ yoˬ, teh‸ yawˇ hui hta‸ kʼoˆ piˇ ve yoˬ.

24Yawˇ hui kʼaw‸ yaw hkʼaw‸ leh kʼoˆ ve, Jawˇmawˇ-oˬ, ngaˬ hui chi hkʼe gʼa te ve lehˬ nawˬ hui mvuhˇmiˬ chi hkʼaw lo‸ la ve teˇ yanˇ, mvuhˇmiˬ chi hkʼaw chehˇ ve chaw hkʼa peu-eˬ hta‸ gʼa tiˇ pehˍ piˇ ve yoˬ, teh‸ nawˬ hui ve Gʼuiˬsha lehˬ yawˇ ve awˬ ceˬ paˍ Moˉseˍ hta‸ kʼoˆ piˇ taˍ ve tawˇ hta‸ ngaˬ hui gʼa kaˇ taˍ ve pa taw yoˬ. Ngaˬ hui gʼa suh la ve hta‸ kawˆ jaˇ ve pa taw, chi hkʼe gʼa te taˍ peuˬ ve yoˬ.

25Chi beu‸ ngaˬ hui lehˬ, nawˬ ve kanˇ paˆ awˬ hawˉ lo chehˇ taˍ ve yoˬ. Nawˬ te laˇ gaˇ ve hkʼe ngaˬ hui hta‸ te laˇ-oˆ, teh‸ yawˇ hta‸ kʼaw‸ kʼoˆ piˇ ve yoˬ.

26Hkʼe te leh Yawˇsuˆ yawˇ hui hta‸ ha‸ shaˉ taˍ leh, yawˇ hui hta‸ maˇ tiˇ pehˍ piˇ ve yoˬ.

27Gʼuiˬsha hta‸ tuˉ tanˇ kuiˬ te tuˬ, yawˇ lehˬ chaw oˇ ve teˇ hpaˍ hta‸ awˬ ceˬ hkʼa shuˍ suhˆ hkaˆ tcuh leh iˉ kaˆ hkʼo tcuh ve yoˬ. Ya‸ nyi hkʼa gaˬ chaw oˇ ve teˇ hpaˍ lehˬ, Gʼuiˬsha leuˆ yuˬ ve chehˇ kuiˬ lo tuˉ tanˇ kuiˬ hta‸ te htaˇ, yawˇ hui lehˬ kanˉ oˇ ve teˇ hpaˍ hta‸ gʼa te chehˇ taˍ ve yoˬ.

← Chapter 8 Jump to: Chapter 10 →