Joshua 10

Lahu Bible Edited © Thailand Bible Society and Bible Society of Myanmar, 2010, 2020.

1Yawˇsuˆ lehˬ, Yeˍriˆhkoˇ venˇ leh Jawˇmawˇ hta‸ te luˬ piˇ ve hkʼe, Aˍiˆ venˇ leh jawˇmawˇ hta‸ htawˇ te luˬ te sheˆ piˇ ve awˬ lawn hta‸Yeˍruˆsaˍlehnˍ venˇ hta‸ uˉ peunˍ chehˇ ve jawˇmawˇ Aˍdoˇniˆseˍdehˆ gʼa kaˇ ve yoˬ. Chi hkʼoˆ, Giˇbonˍ chaw teˇ hpaˍ lehˬ, Iˉsaˍreˍlaˆ chaw hui geh shaˉ caˆ caˇ leh yawˇ hui geh chehˇ taˍ peuˬ ve awˬ lawn hta‸ htawˇ yawˇ gʼa kaˇ ve yoˬ.

2Oˇ htaˇ, Yeˍruˆsaˍlehnˍ venˇ yaˇ teˇ hpaˍ kawˆ jaˇ ve yoˬ. Awˬ lawn kʼo, Giˇbonˍ venˇ lehˬ Aˍiˆ venˇ a‸ kehˉ uiˍ leh, awˬ nu ve venˇ lonˉ teˇ hpaˍ hkʼe taw uiˍ ve yoˬ. Yawˇ hui ve ma‸ yaˇ teˇ hpaˍ htawˇ cheuˬ ve ma‸ yaˇ teˇ hpaˍ hpeh‸ ve yoˬ.

3Chi hta‸ pa taw Aˍdoˇniˆseˍdehˆ lehˬ, Heˍbronˍ mvuhˇmiˬ ve jawˇmawˇ Hawˇhanˍ, Yaˍmoˆ mvuhˇmiˬ jawˇmawˇ Piˇranˍ, Laˍhkiˇsaˆ mvuhˇmiˬ jawˇmawˇ Yaˍhpi-aˍ, Eˇgaˍlonˍ mvuhˇmiˬ jawˇmawˇ Deˍbiˇraˆ hui geh tawˇ chi hkʼe shanˍ feu piˇ ve yoˬ.

4Giˇbonˍ venˇ yaˇ teˇ hpaˍ lehˬ, Yawˇsuˆ leh Iˉsaˍreˍlaˆ chaw hui hta‸ awˬ chawˇ te da‸ taˍ peuˬ ve pa taw, ngaˬ hui yawˇ hui teˇ hpaˍ hta‸ ca bawˆ-a veuˬ. Laˬ-o‸. Ngaˬ hta‸ a ciˉ ga laˇ-oˆ, teh‸ kʼoˆ feu piˇ ve yoˬ.

5Yeˍruˆsaˍlehnˍ jawˇmawˇ, Heˍbronˍ jawˇmawˇ, Yaˍmoˆ jawˇmawˇ Laˍhkiˇsaˆ jawˇmawˇ leh Eˇgaˍlonˍ jawˇmawˇ, Aˍmawˇriˆ jawˇmawˇ chi ve ngaˇ gʼaˇ lehˬ, a shu yawˇ ve ma‸ moˍ shawˍ veu laˇ leh, Giˇbonˍ venˇ hta‸ ca bawˆ la ve yoˬ.

6Oˇ htaˇ Giˇbonˍ venˇ yaˇ teˇ hpaˍ lehˬ, Giˇlaˍgaˍ lo chehˇ taˍ ve Yawˇsuˆ geh tawˇ chi hkʼe shanˍ feu piˇ ve yoˬ. Jawˇmawˇ-oˬ, ngaˬ hui hta‸ a ciˉ taˇ chiˇ baˬ laˇ-oˆ. Awˬ lawn kʼo, hkʼaw hkʼoˆ lo chehˇ ve Aˍmawˇriˆ jawˇmawˇ hkʼa peu-eˬ ngaˬ hui hta‸ ca bawˆ la tuˬ gaˬ la taˍ peuˬ, teh‸ shanˍ feu piˇ ve yoˬ.

7Hkʼe te leh, Yawˇsuˆ lehˬ yawˇ ve ma‸ yaˇ hkʼa peu-eˬ ve hta‸ shiˍ leh Giˇlaˍgaˍ hkʼaw tawˆ kʼai ve yoˬ.

8Oˇ htaˇ Gʼuiˬsha lehˬ, Yawˇ hui hta‸ taˇ kawˆ. Ngaˬ nawˬ hta‸ gʼaˇ shehˍ hpaˇ hpeh‸ la piˇ taˍ peuˬ ve yoˬ. Yawˇ hui teˇ gʼaˇ ka‸ nawˬ hta‸ tawˍ taˍ laˇ gʼa tuˬ ve maˇ heˆ, teh‸ Yawˇsuˆ hta‸ kʼoˆ piˇ ve yoˬ.

9Yawˇsuˆ lehˬ, Giˇlaˍgaˍ lo tu leh teˇ haˉ tanˇ hkuinˇ kʼai peuˬ hkʼaw‸ nawˉ, yawˇ hui hta‸ la‸ haˉ lo‸ bawˆ piˇ ve yoˬ.

10Yawˇ hui Iˉsaˍreˍlaˆ chaw teˇ hpaˍ hta‸ gʼa mawˬ ve teˇ yanˇ, Gʼuiˬsha lehˬ yawˇ hui hta‸ kawˆ ve nyi ma cawˬ la piˇ ve yoˬ. Iˉsaˍreˍlaˆ chaw teˇ hpaˍ lehˬ, Giˇbonˍ venˇ hkʼaw lo chaw oˇ ve teˇ hpaˍ hta‸ tiˇ pehˍ piˇ leh, Beˍtawˇronˍ kʼaˍ le‸ hta‸ hpanˍ kʼai peuˬ hkʼaw‸ nawˉ, awˬ hawˉ hpawˇ lo cawˬ ve Aˍzeˍkaˍ venˇ leh Meˍkeˍdaˍ venˇ lo hkʼa gaˬ, yawˇ hui hkʼaˇ suh gʼa‸ yuˬ kʼai ve yoˬ.

11Yawˇ hui lehˬ Beˍtawˇronˍ kʼaˍ le‸ hta‸ hpanˍ kʼai leh Aˍzeˍkaˍ venˇ hpawˇ lo gʼuiˇ hpaw-e chehˇ ve teˇ yanˇ, Gʼuiˬsha lehˬ mvuhˇ naw ma hkʼoˆ lo uiˍ jaˇ ve vaˇ shiˍ teˇ hpaˍ ce la piˇ leh, yawˇ hui hta‸ teˍ pehˍ piˇ lawˬ ve yoˬ. Iˉsaˍreˍlaˆ chaw hui tiˇ pehˍ ve a‸ kehˉ vaˇ shiˍ ce teˍ leh suh-e ve chaw maˇ jaˇ ve yoˬ.

12Iˉsaˍreˍlaˆ chaw hui Aˍmawˇriˆ chaw hui hta‸ ma‸ bawˆ gʼaˇ ve teˇ nyi htaˇ, Yawˇsuˆ Gʼuiˬsha hta‸ tawˇ yaw piˇ ve yoˬ. Yawˇ kʼoˆ ve, Mvuhˇ nyi-oˬ, Giˇbonˍ venˇ hkʼoˆ lo maˇ kʼoˆ, ha pa-oˬ, Aˍjaˍlonˍ lawˬ hkʼo‸ awˬ hkʼoˆ lo maˇ kʼoˆ, chehˇ taˍ-o‸, teh‸ Iˉsaˍreˍlaˆ chaw mehˆ gʼuˇ suhˍ kʼoˆ ve yoˬ.

13Hkʼe te leh Iˉsaˍreˍlaˆ chaw teˇ hpaˍ canˇ paˍ hta‸ bawˆ gʼaˇ peuˬ htaˇ hkʼa gaˬ, mvuhˇ nyi leh ha pa jehˇ taˍ ve yoˬ. Awˬ lawn chi hta‸ Yawˇsuˆ ve li‸ daw awˬ hkʼaw lo bvuh‸ keu taˍ ve yoˬ. Mvuhˇ nyi lehˬ, mvuhˇ naw ma awˬ kʼaw ji teˇ hkʼaˇ lo jehˇ sheˬ leh, teˇ nyi tanˇ vanˇ mvuhˇ nyi maˇ lo‸-e ve yoˬ.

14Gʼuiˬsha chaw yaˇ ve tawˇ hta‸ na yuˬ leh, Iˉsaˍreˍlaˆ chaw hui awˬ pon ma‸ bawˆ piˇ ve chi hkʼe ve awˬ nyi teˇ nyi ka‸ maˇ cawˬ jaw sheˍ.

15Oˇ ve hkʼaw‸ nawˉ, Yawˇsuˆ leh yawˇ ve ma‸ yaˇ hkʼa peu-eˬ yawˇ hui deh chehˇ taˍ kuiˬ Giˇlaˍ gaˍ lo kʼaw‸ kʼo‸-e ve yoˬ.

16Aˍmawˇriˆ jawˇmawˇ oˇ ve ngaˇ gʼaˇ gʼuiˇ hpaw-e leh Maˍkeˍdaˍ teh‸ kʼoˆ ve haˉ hpawˇ hkʼaw ca va‸ taˍ ve yoˬ.

17Yawˇ hui oˇ kaˬ lo va‸ chehˇ ve awˬ lawn shu Yawˇsuˆ hta‸ hto piˇ ve yoˬ.

18Oˇ htaˇ Yawˇsuˆ kʼoˆ ve, Haˉ kʼoˍ awˬ hkʼoˇ meuˇ lo haˉ pui shiˍ lonˉ hpfuhˆ tsuhˇ leh, ma‸ yaˇ teˇ hpaˍ hta‸ shaw tcuh taˍ-o‸.

19Ya‸ hkʼaˇ, nawˬ hui oˇ kaˬ lo taˇ chehˇ taˍ. Canˇ paˍ teˇ hpaˍ hkʼaˇ suh gʼa‸ yuˬ-o‸. Yawˇ hui ve venˇ lo taˇ kʼaw‸ gaˬ tcuh piˇ. Gʼuiˬsha lehˬ nawˬ hui hta‸ gʼaˇ shehˍ hpaˇ hpeh‸ la piˇ taˍ peuˬ, teh‸ yawˇ hui hta‸ kʼoˆ piˇ ve yoˬ.

20Yawˇsuˆ leh Iˉsaˍreˍlaˆ chaw teˇ hpaˍ yawˇ hui hta‸ tiˇ pehˍ piˇ ve yoˬ. Ma‸ bawˆ kuiˬ lo maˇ suh-e ve chaw teˇ hpaˍ lehˬ, a shu yawˇ ve venˇ lo gʼuiˇ kʼo‸-e leh ca va‸ taˍ ve yoˬ.

21Oˇ ve hkʼaw‸ nawˉ, Yawˇsuˆ ve ma‸ yaˇ hkʼa peu-eˬ Yawˇsuˆ chehˇ taˍ kuiˬ Maˍkeˍdaˍ teh‸ kʼoˆ ve chehˇ kuiˬ lo kʼaw‸ la ve yoˬ. Chaw teˇ gʼaˇ ka‸ Iˉsaˍreˍlaˆ chaw hui hta‸ te‸ chiˉca kʼoˆ maˇ haˆ ve yoˬ.

22Oˇ ve hkʼaw‸ nawˉ Yawˇsuˆ lehˬ, Haˉ kʼoˍ hta‸ hpaw leh jawˇmawˇ oˇ ve ngaˇ gʼaˇ ngaˬ geh shiˍ laˬ-o‸, teh‸ kʼoˆ ve yoˬ.

23Hkʼe te leh yawˇ hui haˉ kʼoˍ hta‸ hpaw leh Yeˍruˆsaˍlehnˍ jawˇmawˇ, Heˍbronˍ jawˇmawˇ, Yaˍmoˆ jawˇmawˇ, Laˍhkiˇsaˆ jawˇmawˇ leh Eˇgaˍlonˍ jawˇmawˇ hui hta‸ shiˍ tawˆ la ve yoˬ.

24Jawˇmawˇ oˇ ve teˇ hpaˍ hta‸ Yawˇsuˆ geh shiˍ gaˬ laˬ ve teˇ yanˇ, Yawˇsuˆ lehˬ yawˇ ve ma‸ yaˇ hkʼa peu-eˬ ve hta‸ kuˬ yuˬ leh, yawˇ hui ve kʼawˍ peˍ hta‸ naˆ tinˍ taˍ tuˬ yawˇ ve ma‸ poˍ teˇ hpaˍ hta‸ tawˇ piˇ ve yoˬ. Hkʼe te leh yawˇ hui oˇ hkʼe te ve yoˬ.

25Oˇ ve hkʼaw‸ nawˉ Yawˇsuˆ lehˬ, Taˇ kawˆ. Nyi ma taˇ luˬ. Awˬ gʼaˇ yuˬ tawˆ leh ha‸ hanˉ ve nyi ma cawˬ piˇ-oˆ. Awˬ lawn kʼo, Gʼuiˬsha lehˬ nawˬ hui ve canˇ paˍ hkʼa peu-eˬ hta‸ chi hkʼe te piˇ tuˬ yoˬ, teh‸ yawˇ hui hta‸ kʼoˆ piˇ ve yoˬ.

26Peuˬ hkʼaw‸ nawˉ, Yawˇsuˆ lehˬ jawˇmawˇ oˇ ve ngaˇ gʼaˇ hta‸ tiˇ pehˍ leh, mvuhˇ hpeu‸ la htaˇ hkʼa gaˬ suhˆ cehˬ hkʼoˆ lo hpeh yu taˍ ve yoˬ.

27Mvuhˇ nyi lo‸-e ve teˇ yanˇ, Yawˇsuˆ tawˇ piˇ leh yawˇ hui lehˬ suh taˍ ve awˬ to oˇ ve teˇ hpaˍ hta‸ yuˬ ya‸ peuˬ hkʼaw‸ nawˉ, yawˇ hui va‸ taˍ kuiˬ haˉ kʼoˍ hkʼaw baˬ keu ve yoˬ. Haˉ kʼoˍ oˇ ve awˬ hkʼoˇ meuˇ lo haˉ pui shiˍ lonˉ teˇ hpaˍ hpfuhˆ tsuhˇ taˍ leh, oˇ ve teˇ hpaˍ ya‸ nyi hkʼa gaˬ cawˬ taˍ she‸ ve yoˬ.

28Oˇ ve teˇ nyi tiˉ awˬ hkʼaw lo, Yawˇsuˆ lehˬ Maˍkeˍdaˍ venˇ leh venˇ oˇ ve hta‸ uˉ peunˍ chehˇ ve jawˇmawˇ hta‸ bawˆ yuˬ ve yoˬ. Venˇ oˇ ve awˬ hkʼaw lo chehˇ ve chaw hkʼa peu-eˬ hta‸ yawˇ tiˇ pehˍ piˇ ve yoˬ. Yeˍriˆhkoˇ jawˇmawˇ hta‸ te piˇ ve hkʼa shuˍ, Maˍkeˍdaˍ jawˇmawˇ hta‸ htawˇ oˇ hkʼe te piˇ ve yoˬ.

29Oˇ ve hkʼaw‸ nawˉ, Yawˇsuˆ leh yawˇ ve ma‸ yaˇ teˇ hpaˍ lehˬ, Maˍkeˍdaˍ venˇ lo tu leh Liˆbaˍnaˍ venˇ lo kʼai leh, venˇ oˇ ve hta‸ htawˇ bawˆ yuˬ ve yoˬ.

30Gʼuiˬsha lehˬ, venˇ oˇ ve leh venˇ oˇ ve hta‸ uˉ peunˍ chehˇ ve jawˇmawˇ hta‸ Iˉsaˍreˍlaˆ chaw hui ve la‸ sheh hkʼaw chiˇ a‸ piˇ ve yoˬ. Venˇ oˇ ve hkʼaw chehˇ ve chaw hkʼa peu-eˬ ve hta‸ yawˇ tiˇ pehˍ piˇ ve yoˬ. Yeˍriˆhkoˇ jawˇmawˇ hta‸ te piˇ ve hkʼa shuˍ, jawˇmawˇ oˇ ve hta‸ htawˇ te piˇ ve yoˬ.

31Oˇ hkʼe te peuˬ hkʼaw‸ nawˉ, Yawˇsuˆ leh yawˇ ve ma‸ yaˇ teˇ hpaˍ Liˆbaˍnaˍ lo kʼaw‸ tu leh Laˍhkiˇshaˆ venˇ lo kʼai ve yoˬ. Venˇ oˇ ve hta‸ yawˇ hui caw hoˆ taˍ leh bawˆ yuˬ ve yoˬ.

32Yawˇ hui ma‸ bawˆ ve nyiˇ nyi teˇ nyi gaˬ htaˇ, Gʼuiˬsha lehˬ venˇ oˇ ve hta‸ htawˇ Iˉsaˍreˍlaˆ chaw hui ve la‸ sheh hkʼaw chiˇ a‸ piˇ ve yoˬ. Liˆbaˍnaˍ venˇ hta‸ te piˇ ve hkʼa shuˍ, yawˇ lehˬ venˇ yaˇ oˇ ve hkʼa peu-eˬ hta‸ tiˇ pehˍ piˇ ve yoˬ.

33Oˇ htaˇ Geˍzaˍraˆ mvuhˇmiˬ ve jawˇmawˇ Hawˇranˍ lehˬ, Laˍhkiˇshaˆ venˇ hta‸ ca ga la tuˬ gaˬ la ve yoˬ. Ya‸ hkʼaˇ Yawˇsuˆ lehˬ, yawˇ hui hkʼa peu-eˬ hta‸ tiˇ pehˍ piˇ ve yoˬ. A sha‸ te‸ chehˇ taˉ ve chaw teˇ gʼaˇ ka‸ maˇ cawˬ.

34Oˇ ve hkʼaw‸ nawˉ, Yawˇsuˆ leh yawˇ ve ma‸ yaˇ teˇ hpaˍ lehˬ, Laˍhkiˇshaˆ venˇ lo tu leh Eˇgaˍlonˍ venˇ lo kʼai ve yoˬ. Venˇ oˇ ve hta‸ yawˇ hui caw hoˆ taˍ leh bawˆ yuˬ ve yoˬ.

35Oˇ ve teˇ nyi tiˉ awˬ hkʼaw lo yawˇ hui venˇ oˇ ve hta‸ bawˆ gʼaˇ leh, Laˍhkiˇshaˆ venˇ hta‸ te piˇ ve hkʼa shuˍ, venˇ oˇ ve hkʼaw chehˇ ve chaw hkʼa peu-eˬ ve hta‸ tiˇ pehˍ piˇ ve yoˬ.

36Oˇ ve hkʼaw‸ nawˉ, Yawˇsuˆ leh yawˇ ve ma‸ yaˇ teˇ hpaˍ Eˇgaˍlonˍ venˇ lo tu leh hkʼaw hkʼoˆ lo cawˬ ve Heˍbronˍ venˇ hta‸ bawˆ yuˬ ve yoˬ.

37Venˇ oˇ ve hta‸ uˉ peunˍ chehˇ ve jawˇmawˇ leh, venˇ yaˇ hkʼa peu-eˬ ve hta‸ maˇ kʼoˆ, venˇ oˇ ve awˬ paˇ awˬ kui lo cawˬ ve awˬ nu ve venˇ yaˇ teˇ hpaˍ hta‸ htawˇ maˇ kʼoˆ, yawˇ hui tiˇpehˍ piˇ ve yoˬ. Eˇgaˍlonˍ venˇ hta‸ te piˇ ve hkʼa shuˍ, venˇ oˇ ve hta‸ htawˇ te piˇ ve yoˬ.

38Oˇ ve hkʼaw‸ nawˉ, Yawˇsuˆ leh yawˇ ve ma‸ yaˇ teˇ hpaˍ Deˍbiˇraˆ venˇ lo kʼaw‸ hpfuhˆ kʼaw‸ la leh, venˇ oˇ ve hta‸ htawˇ bawˆ yuˬ ve yoˬ.

39Venˇ oˇ ve hta‸ uˉ peunˍ chehˇ ve jawˇmawˇ leh, awˬ nu ve venˇ teˇ hpaˍ hta‸ bawˆ yuˬ ve yoˬ. Chaw hkʼa peu-eˬ hta‸ yawˇ hui tiˇ pehˍ ve yoˬ. Heˍbronˍ, Liˆbaˍnaˍ venˇ leh, venˇ oˇ ve teˇ hpaˍ hta‸ uˉ peunˍ chehˇ ve jawˇmawˇ teˇ hpaˍ hta‸ te piˇ ve hkʼa shuˍ, Yawˇsuˆ lehˬ Deˍbiˇraˆ venˇ leh venˇ oˇ ve hta‸ uˉ peunˍ chehˇ ve jawˇmawˇ hta‸ oˇ hkʼe te piˇ ve yoˬ.

40Oˇ hkʼe te leh, Yawˇsuˆ lehˬ mvuhˇmiˬ hkʼa peu-eˬ hta‸ bawˆ gʼaˇ ve yoˬ. Yawˇ lehˬ mvuhˇmiˬ oˇ ve teˇ tawn lo chehˇ taˍ ve jawˇmawˇ teˇ hpaˍ hta‸ bawˆ gʼaˇ taˍ peuˬ ve yoˬ. Yawˇ lehˬ chaw teˇ gʼaˇ hta‸ ka‸ maˇ ponˬ piˇ. Awˬ lawn kʼo, chi hkʼe te tuˬ Iˉsaˍreˍlaˆ ve Gʼuiˬsha kʼoˆ taˍ ve pa taw yoˬ.

41Yawˇsuˆ lehˬ, Kaˍdeˍshaˆbaˍnaˍ venˇ hta‸ te leh laˇ tsuhˇ gʼuiˬ pfuhˍ lo cawˬ ve Gaˍsaˍ venˇ lo hkʼa gaˬ, Gawˍshenˍ mvuhˇmiˬ hta‸ te leh Giˇbonˍ venˇ awˬ na hpawˇ teˇ tawn lo hkʼa gaˬ, chaw oˇ ve teˇ hpaˍ hta‸ te luˬ te sheˆ piˇ ve yoˬ.

42Iˉsaˍreˍlaˆ ve Gʼuiˬsha lehˬ Iˉsaˍreˍlaˆ chaw hpawˇ lo chehˇ taˍ leh ma‸ bawˆ chehˇ ve pa taw, Yawˇsuˆ lehˬ mvuhˇmiˬ oˇ ve teˇ hpaˍ teˇ pawˆ tiˉ bawˆ yuˬ ve yoˬ.

43Oˇ hkʼe te taˉ peuˬ hkʼaw‸ nawˉ, Yawˇsuˆ leh yawˇ ve ma‸ yaˇ teˇ hpaˍ yawˇ hui deh chehˇ taˍ kuiˬ Giˇlaˍ gaˍ lo kʼaw‸ la ve yoˬ.

← Chapter 9 Jump to: Chapter 11 →