Joshua 18

Lahu Bible Edited © Thailand Bible Society and Bible Society of Myanmar, 2010, 2020.

← Chapter 17 Jump to: Chapter 19 →

1Iˉsaˍreˍlaˆ chaw teˇ hpaˍ mvuhˇmiˬ hta‸ bawˆ gʼaˇ peuˬve teˇ yanˇ, yawˇ hui Shiˉlonˍ venˇ hkʼaw hpawnˬ laˬ leh, oˇ kaˬ lo aˉ po kʼo bon yehˬ hta‸ te ve yoˬ.

2Yawˇ hui awˬ hkʼaw lo mvuhˇmiˬ maˇ gʼa sheˍ ve Iˉsaˍreˍlaˆ chaw suhˍ ceuˬ cawˬ sheˍ ve yoˬ.

3Oˇ htaˇ, Yawˇsuˆ Iˉsaˍreˍlaˆ chaw hui hta‸ kʼoˆ piˇ ve, Nawˬ hui ve awˬ puˬ awˬ pi teˇ hpaˍ ve Gʼuiˬsha nawˬ hui hta‸ piˇ laˇ taˍ ve mvuhˇmiˬ hta‸ nawˬ hui maˇ ca bawˆ yuˬ leh hkʼaˬ maw maw te chehˇ tuˬ sheˍ ve le.

4Nawˬ hui awˬ hkʼaw lo chaw teˇ ceuˬ ve shehˆ ha gʼaˇ ngaˬ hta‸ pe‸ laˇ-oˆ. Ngaˬ yawˇ hui hta‸ hkʼaˬ ti chi ti lo hpehˇ peu leh, yawˇ hui heuˆ gaˇ ve mvuhˇmiˬ hta‸ yawˇ hui hkʼaˇ yawˇ hui ca nyi piˇ. Oˇ hkʼe te taˉ peuˬ kʼo, yawˇ hui ngaˬ geh gʼa kʼaw‸ la ve yoˬ.

5Yawˇ hui lehˬ, mvuhˇmiˬ hta‸ suhˍ taw gʼa pehˬ tuˬ yoˬ. Yuˇda‸ lehˬ awˬ hawˉ hpawˇ teˇ tawn lo gʼa chehˇ leh, Yoˇseh‸ lehˬ awˬ na hpawˇ teˇ tawn lo gʼa chehˇ tuˬ yoˬ.

6Nawˬ hui lehˬ, mvuhˇmiˬ hta‸ suhˍ taw hkʼaˬ hkʼe te pehˬ tuˬ hkʼa deh‸ ca nyi taˉ leh ngaˬ hta‸ gʼa kʼaw‸ hto laˇ ve yoˬ. Oˇ htaˇ ngaˬ Gʼuiˬsha hta‸ na nyi leh, nawˬ hui hta‸ mvuhˇmiˬ pehˬ laˇ tuˬ yoˬ.

7Leˍviˆ chaw teˇ ceuˬ lehˬ, awˬ nu ve chaw ceuˬ teˇ hpaˍ hkʼa shuˍ mvuhˇmiˬ gʼa tuˬ ve maˇ heˆ. Awˬ lawn kʼo, yawˇ hui lehˬ Gʼuiˬsha ve paw hkuˇ gʼa te tuˬ yoˬ. Gaˆ, Ruˇbenˍ leh Maˍnaˍseˍ chaw teˇ hkoˇ lehˬ, Gʼuiˬsha Moˉseˍ hta‸ kʼoˆ piˇ taˍ ve hkʼe, Yawˇdanˍ iˉ kaˆ lawˬ mvuhˇ nyi tawˆ hpawˇ lo cawˬ ve mvuhˇmiˬ hta‸ gʼa taˍ peuˬ, teh‸ yawˇ hui hta‸ kʼoˆ piˇ ve yoˬ.

8Chaw oˇ ve teˇ hpaˍ, mvuhˇmiˬ hta‸ ca nyi tuˬ tawˆ kʼai ve yoˬ. Yawˇsuˆ yawˇ hui hta‸ chi hkʼe kʼoˆ piˇ taˍ ve yoˬ. Mvuhˇmiˬ hkʼaˬ ti chi ti lo kʼai leh hkʼa deh‸ ca toˇ nyi-o. Peuˬ kʼo, ngaˬ geh kʼaw‸ la-o. Oˇ htaˇ, choˬ kaˬ Shiˉlonˍ venˇ hkʼaw lo ngaˬ Gʼuiˬsha hta‸ na nyi leh, nawˬ hui hta‸ mvuhˇmiˬ pehˬ laˇ tuˬ yoˬ, teh‸ kʼoˆ piˇ taˍ ve yoˬ.

9Hkʼe te leh, yawˇ hui tawˆ kʼai leh mvuhˇmiˬ teˇ hpaˍ hta‸ ca toˇ nyi peuˬ hkʼaw‸ nawˉ, li‸ kʼoˆ hkʼaw hkʼa deh‸ bvuh‸ keu taˍ ve yoˬ. Yawˇ hui lehˬ mvuhˇmiˬ hta‸ suhˍ taw pehˬ leh, venˇ teˇ hpaˍ ve awˬ meh hta‸ htawˇ bvuh‸ yuˬ taˍ ve yoˬ. Oˇ hkʼe te peuˬ hkʼaw‸ nawˉ, yawˇ hui Yawˇsuˆ geh Shiˉlonˍ venˇ lo kʼaw‸ la ve yoˬ.

10Hkʼe te leh, Yawˇsuˆ Gʼuiˬsha hta‸ na nyi leh, Iˉsaˍreˍlaˆ chaw hui hta‸ mvuhˇmiˬ pehˬ piˇ ve yoˬ.

11Beˍyaˍmenˍ awˬ ceuˬ awˬ hkʼaˇ teˇ hpaˍ lehˬ, Yuˇda‸ leh Yoˇseh‸ awˬ ceuˬ awˬ hkʼaˇ teˇ hpaˍ gʼa taˍ ve mvuhˇmiˬ awˬ kaˍ lo cawˬ ve mvuhˇmiˬ hta‸ gʼa ve yoˬ.

12Awˬ na hpawˇ lo cawˬ ve yawˇ hui ve miˬ tcuhˉ lehˬ, Yawˇdanˍ iˉ kaˆ lawˬ hta‸ te leh, Yeˍriˆhkoˇ venˇ hta‸ hpanˍ kʼai peuˬ hkʼaw‸ nawˉ, mvuhˇ nyi kʼehˬ hpawˇ Beˍtaˍvenˇ teh‸ kʼoˆ ve heh puiˉ hkʼaw lo hkʼa gaˬ hpeh‸ ve yoˬ.

13Oˇ kaˬ lo kʼaw‸ te leh, Beˍteˍlaˆ teh‸ kʼoˆ ve Luˇzaˆ venˇ lo hkʼa gaˬ hpeh‸ ve yoˬ. Oˇ ve hkʼaw‸ nawˉ, Beˍtawˇronˍ venˇ awˬ hawˉ hpawˇ, hkʼaw hkʼoˆ lo cawˬ ve Aˍtaˍroˆtaˍdaˍ venˇ lo kʼaw‸ te ya‸ la ve yoˬ.

14Oˇ kaˬ lo kʼaw‸ te leh, Beˍtawˇronˍ venˇ awˬ hawˉ hpawˇ lo cawˬ ve hkʼaw lonˉ mvuhˇ nyi kʼehˬ hpawˇ lo kʼaw‸ te ya‸ la leh, Yuˇda‸ chaw hui ve venˇ Kiˇriˆyaˆyaˍrenˍ teh‸ kʼoˆ ve Kiˇriˇyaˆbaˍlaˆ venˇ lo hkʼa gaˬ hpeh‸ ve yoˬ. Chi lehˬ, mvuhˇ nyi kʼehˬ hpawˇ ve miˬ tcuhˉ hpeh‸ ve yoˬ.

15Awˬ hawˉ hpawˇ ve miˬ tcuhˉ lehˬ, Kiˇriˇyaˆyaˍrenˍ venˇ hta‸ te leh mvuhˇ nyi kʼehˬ hpawˇ lo cawˬ ve Neˍhpaˍtawˆ iˉ kaˆ tawˆ kuiˬ lo hkʼa gaˬ hpeh‸ ve yoˬ.

16Oˇ kaˬ lo kʼaw‸ te leh, Yeˍhpenˍ miˬ tawˬ kuiˬ awˬ na hpawˇ Hiˆnonˍ yaˇ paˍ ve miˬ tawˬ kuiˬ teh‸ kʼoˆ ve chehˇ kuiˬ teˇ hkʼaˇ hteˇ leh‸ cawˬ ve hkʼaw lo hkʼa gaˬ hpeh‸ ve yoˬ. Oˇ kaˬ lo kʼaw‸ te leh, Hiˆnonˍ miˬ tawˬ kuiˬ leh Yeˍbuˇsiˆ hkʼaw hta‸ hpaˍ ya‸-e peuˬ hkʼaw‸ nawˉ, Enˍyawˇgeˍlaˆ venˇ lo hkʼa gaˬ hpeh‸ ve yoˬ.

17Oˇ kaˬ lo kʼaw‸ te leh, awˬ na hpawˇ lo cawˬ ve Enˍseˍmehˆ venˇ, leh Aˍduˇminˍ kʼaˍ le‸ teˇ hkʼaˇ hteˇ lehˍ cawˬ ve Geˍliˍlawˇ venˇ lo hkʼa gaˬ hpeh‸ ve yoˬ. Oˇ kaˬ lo kʼaw‸ te leh, Ruˇbenˍ ve yaˇ paˍ Bawˇhanˍ ve haˉ pui shiˍ cawˬ kuiˬ lo kʼaw‸ te ya‸ la ve yoˬ.

18Oˇ ve hkʼaw‸ nawˉ, Beˍteˍraˍbaˆ venˇ awˬ na hpawˇ te leh, Yawˇdanˍ miˬ tawˬ kuiˬ lo hkʼa gaˬ hpeh‸ ve yoˬ.

19Oˇ kaˬ lo kʼaw‸ te leh, Beˍtawˇgaˍlaˆ venˇ awˬ na hpawˇ lo cawˬ ve hkʼaw hta‸ hpanˍ kʼai peuˬ hkʼaw‸ nawˉ, Suh ve laˇ tsuhˇ gʼuiˬ hkʼaw lo‸ la chehˇ ve iˉ kaˆ lawˬ lo hkʼa gaˬ hpeh‸ ve yoˬ. Chi lehˬ awˬ na hpawˇ teˇ tawn ve miˬ tcuhˉ hpeh‸ ve yoˬ.

20Yawˇdanˍ iˉ kaˆ lawˬ lehˬ, mvuhˇ nyi tawˆ hpawˇ ve miˬ tcuhˉ hpeh‸ ve yoˬ. Chi lehˬ, Beˍyaˍmenˍ awˬ ceuˬ awˬ hkʼaˇ teˇ hpaˍ gʼa taˍ ve mvuhˇmiˬ hpeh‸ ve yoˬ.

21Beˍyaˍmenˍ awˬ ceuˬ awˬ hkʼaˇ teˇ hpaˍ gʼa taˍ ve venˇ teˇ hpaˍ lehˬ, Yeˍriˆhkoˇ venˇ, Beˍtawˇgaˍlaˆ, Eˇmeˍkeˍziˆ,

22Beˍtaˍraˍbaˆ, Zeˍmaˍrenˍ, Beˍteˍlaˆ,

23Aˍvinˍ, Paˍraˍ, Awˇhpaˍraˆ,

24Hkeˍhpaˍhaˍmawˇniˆ, Awˇhpaˍniˆ, Beˍbaˆ, hkʼa peu-eˬ teˇ chi nyiˇ venˇ hpeh‸ ve yoˬ. Awˬ nu ve venˇ ehˉ teˇ hpaˍ htawˇ, chi ve hkʼaw lo‸-e taˍ ve yoˬ.

25Giˇbonˍ, Raˍmaˆ, Beˍroˆ,

26Miˆsaˍpaˍ, Hkeˍhpiˇraˆ, Mawˇzaˆ,

27Yeˍkenˍ, Iˉraˆpeˍlaˆ, Taˍraˍlaˆ,

28Zeˍlaˆ, Heˍlaˆ, Yeˍruˆsaˍlehnˍ teh‸ kʼoˆ ve Yeˍbuˇsiˆ, Giˇbaˍ, Kiˇriˇyaˆyaˍrenˍ, hkʼa peu-eˬ teˇ chi awˇ venˇ hpeh‸ ve yoˬ. Awˬ nu ve venˇ ehˉ teˇ hpaˍ htawˇ chi ve hkʼaw lo‸-e taˍ ve yoˬ. Chi ve lehˬ Beˍyaˍmenˍ awˬ ceuˬ awˬ hkʼaˇ teˇ hpaˍ gʼa taˍ ve mvuhˇmiˬ hpeh‸ ve yoˬ.

← Chapter 17 Jump to: Chapter 19 →