Joshua 6

Lahu Bible Edited © Thailand Bible Society and Bible Society of Myanmar, 2010, 2020.

← Chapter 5 Jump to: Chapter 7 →

1Iˉsaˍreˍlaˆ chaw hui lo‸ la maˇ gaˬ tuˬ, Yeˍriˆhkoˇ venˇ hta‸ hkʼa deh‸ yeˬ chaweh hoˆ taˍ leh, chaw teˇ gʼaˇ ka‸ tawˆ tawˆ lo‸ lo‸ te maˇ hpeh‸ ve yoˬ.

2Gʼuiˬsha Yawˇsuˆ hta‸ kʼoˆ piˇ ve, Yeˍriˆhkoˇ venˇ leh venˇ oˇ ve hkʼaw chehˇ ve jawˇmawˇ leh ma‸ yaˇ hkʼa peu-eˬ ngaˬ nawˬ hta‸ chiˇ a‸ laˇ tuˬ yoˬ.

3Nawˬ leh nawˬ ve ma‸ yaˇ teˇ hpaˍ, venˇ oˇ ve hta‸ teˇ nyi teˇ pawˆ, hkaw‸ nyi hkʼa gaˬ gʼa caw ve yoˬ.

4Behˬheh ma yuˬ taˍ ve paw hkuˇ suhˍ gʼaˇ lehˬ, ka ti‸ shaˉ caˆ ta kʼoˍ gʼuˇ suhˍ gʼa kʼai tuˬ yoˬ. Suhˍ nyi teˇ nyi gaˬ htaˇ, nawˬ leh nawˬ ve ma‸ yaˇ teˇ hpaˍ venˇ hta‸ suhˍ caw gʼa caw leh, paw hkuˇ teˇ hpaˍ lehˬ a shu yawˇ ve behˬheh ma hta‸ gʼa meuˆ ve yoˬ.

5Yawˇ hui lehˬ, awˬ hkawˇ teˇ hkawˇ tiˉ te leh zuhˬ chaweh gʼa meuˆ ve yoˬ. Awˬ hkawˇ oˇ ve hta‸ nawˬ hui gʼa kaˇ ve teˇ yanˇ, chaw hkʼa peu-eˬ awˬ hkawˇ bvuhˬ chaweh gʼa kuˬ ve yoˬ. Oˇ htaˇ lanˇ venˇ teˇ hpaˍ paˆ ce sheˬ leh, nawˬ hui venˇ hkʼaw lo‸-e hpeh‸ tuˬ yoˬ, teh‸ Yawˇsuˆ hta‸ kʼoˆ piˇ ve yoˬ.

6Hkʼe te leh Yawˇsuˆ paw hkuˇ teˇ hpaˍ hta‸ kuˬ leh, Nawˬ hui ka ti‸ shaˉcaˆ ta kʼoˍ hta‸ gʼa taˆ ve yoˬ. Awˬ nu ve paw hkuˇ suhˍ gʼaˇ lehˬ, behˬheh ma yuˬ leh oˇ ve awˬ gʼuˇ suhˍ gʼa kʼai ve yoˬ, teh‸ yawˇ hui hta‸ kʼoˆ piˇ ve yoˬ.

7Oˇ ve hkʼaw‸ nawˉ Yawˇsuˆ lehˬ, yawˇ ve chaw teˇ hpaˍ venˇ hta‸ caw tuˬ tawˇ piˇ ve yoˬ. Ma‸ yaˇ teˇ hpaˍ hpaˍ ka ti‸ shaˉ caˆ taˍ kʼoˍ hta‸ ha‸ shaˉ tuˬ gʼuˇ suhˍ kʼai ve yoˬ.

8Yawˇsuˆ tawˇ piˇ ve hkʼe, paw hkuˇ oˇ ve teˇ hpaˍ lehˬ, behˬ heh ma meuˆ leh ka ti‸ shaˉ caˆ ta kʼoˍ gʼuˇ suhˍ kʼai ve yoˬ.

9Ma‸ yaˇ teˇ hpaˍ lehˬ, paw hkuˇ gʼuˇ suhˍ kʼai ve yoˬ. Teˇ hpaˍ hpaˍ ta kʼoˍ hkʼaˇ suh gʼa‸ kʼai ve yoˬ. Yawˇ hui kʼai chehˇ ve teˇ yanˇ, behˬheh ma hkawˇ bvuhˬ tawˆ la chehˇ ve yoˬ.

10Ya‸ hkʼaˇ, Yawˇsuˆ lehˬ yawˇ tawˇ maˇ piˇ ve ceh ceh, chaw teˇ gʼaˇ ka‸ maˇ gʼa kuˬ tuˬ kʼoˆ piˇ taˍ ve yoˬ.

11Hkʼe te leh yawˇ lehˬ paw hkuˇ teˇ hpaˍ hta‸ ka ti‸ shaˉ caˆ ta kʼoˍ taˆ leh venˇ hta‸ teˇ caw caw tcuh ve yoˬ. Oˇ hkʼe te taˉ peuˬ hkʼaw‸ nawˉ, yawˇ hui deh chehˇ taˍ kuiˬ lo kʼaw‸ kʼaw‸ la ve yoˬ.

12Shawˉ pawˍ mvuhˇ shawˉ teˇ na‸ Yawˇsuˆ tu la leh, paw hkuˇ teˇ hpaˍ hta‸ ka ti‸ shaˉ caˆ ta kʼoˍ kʼaw‸ taˆ kʼai tcuh ve yoˬ.

13Behˬ heh ma yuˬ taˍ ve paw hkuˇ suhˍ gʼaˇ lehˬ yawˇ hui gʼuˇ suhˍ behˬheh ma meuˆ kʼai ve yoˬ. Ma‸ yaˇ teˇ hpaˍ hpaˍ yawˇ hui gʼuˇ suhˍ kʼai leh, teˇ hpaˍ hpaˍ awˬ hkʼaˇ suh gʼa‸ kʼai ve yoˬ. Yawˇ hui kʼai chehˇ ve teˇ yanˇ, behˬheh ma meuˆ hkawˇ bvuhˬ tawˆ la chehˇ ve yoˬ.

14Yawˇ hui lehˬ, nyiˇ nyi teˇ nyi htawˇ venˇ hta‸ teˇ caw ca kʼaw‸ caw taˉ peuˬ leh, yawˇ hui deh chehˇ kuiˬ lo kʼaw‸ la ve yoˬ. Hkaw‸ nyi hkʼa gaˬ yawˇ hui oˇ hkʼe te ve yoˬ.

15Suhˍ nyi teˇ nyi gaˬ htaˇ, yawˇ hui teˇ na‸ tu leh ponˬ laˬ htaˇ te jaw ve hkʼe te leh venˇ hta‸ suhˍ caw caw ve yoˬ. Venˇ hta‸ suhˍ caw caw ve lehˬ chi ve teˇ nyi ceh tiˉ yoˬ.

16Suhˍ caw teˇ caw gaˬ leh paw hkuˇ teˇ hpaˍ behˬ heh ma maˇ meuˆ sheˍ gʼuˇ suhˍ, Yawˇsuˆ lehˬ yawˇ ve chaw teˇ hpaˍ hta‸ gʼaˇ hte‸ kuˬ tcuh leh kʼoˆ ve, Gʼuiˬsha lehˬ venˇ chi nawˬ hui hta‸ chiˇ a‸ laˇ taˍ peuˬ ve yoˬ.

17Venˇ leh venˇ oˇ ve awˬ hkʼaw lo hkʼa cawˬ taˍ ve awˬ ceuˬ hkʼa peu-eˬ ve hta‸ gʼa te luˬ te sheˆ piˇ ve yoˬ. Meh maˍ lanˉ Raˍhaˆ leh yawˇ ve yehˬ yaˇ kʼa yaˇ teˇ hpaˍ hta‸ ceh tiˉ gʼa ponˬ piˇ ve yoˬ. Awˬ lawn kʼo, yawˇ lehˬ ngaˬ hui ve chaw jaˆ teˇ hpaˍ hta‸ yuˬ faˉ taˍ laˇ ve yoˬ.

18Ya‸ hkʼaˇ, nawˬ hui lehˬ te‸ chiˉ mawˇ maˇ gʼa yuˬ. Nawˬ hui yuˬ ve kʼo, Iˉsaˍreˍlaˆ chaw hui awˬ hkʼoˆ lo kawˆ tuˬ dawˇ haˍ tuˬ leh, luˬ ve sheˆ ve awˬ ceuˬ gaˬ la tuˬ yoˬ.

19Ya‸ hkʼaˇ, hpu, shi, kuiˇ leh sho yuˬ te taˍ ve awˬ ceuˬ teˇ hpaˍ lehˬ, Gʼuiˬsha awˬ pon teˇ kaˬ lo gʼa fuiˍ teh taˍ ve yoˬ. Oˇ ve teˇ hpaˍ lehˬ Gʼuiˬsha ve mawˇ gʼa hpeh‸ piˇ tuˬ yoˬ, teh‸ Iˉsaˍreˍlaˆ chaw hui hta‸ kʼoˆ piˇ ve yoˬ.

20Oˇ ve hkʼaw‸ nawˉ paw hkuˇ teˇ hpaˍ behˬ heh ma meuˆ ve yoˬ. Iˉsaˍreˍlaˆ chaw teˇ hpaˍ awˬ hkawˇ oˇ ve hta‸ gʼa kaˇ ve teˇ yanˇ, yawˇ hui gʼaˇ hte‸ kuˬ leh lanˇ venˇ teˇ hpaˍ paˆ ce sheˬ ve yoˬ. Hkʼe te leh yawˇ hui venˇ hkʼaw lo‸-e ve yoˬ.

21Venˇ hkʼaw chehˇ taˍ ve hawˉ hkʼaˆ, yaˇ miˇ, chaw mawˇ, yaˇ ehˉ hkʼa peu-eˬ ve hta‸ yawˇ hui tiˇ pehˍ ve yoˬ. Yawˇ hui ve nuˇ, yawˬ, piˉlaˬ teˇ hpaˍ hta‸ htawˇ tiˇ pehˍ ve yoˬ.

22Yawˇsuˆ lehˬ, chaw jaˆ oˇ ve nyiˇ gʼaˇ hta‸ kuˬ yuˬ leh, Nawˬ huiˉ maˬ ka ti‸ te piˇ taˍ ve hkʼe, chi beu‸ meh maˬ lanˉ ve yehˬ hkʼaw lo‸-e leh, yawˇ ve yehˬ yaˇ kʼa yaˇ teˇ hpaˍ hta‸ shiˍ tawˆ la piˇ-oˆ, teh‸ yawˇ huiˉ maˬ hta‸ kʼoˆ piˇ ve yoˬ.

23Hkʼe te leh yawˇ huiˉ maˬ kʼai leh Raˍhaˆ hta‸ maˇ kʼoˆ, yawˇ ve awˬ pa aw e, awˬ viˉ awˬ nyi leh yehˬ yaˇ kʼa yaˇ teˇ hpaˍ hta‸ maˇ kʼoˆ, shiˍ tawˆ la piˇ ve yoˬ. Yawˇ hui lehˬ chaw oˇ ve hkʼa peu-eˬ hta‸ shiˍ veu leh, yawˇ hui deh chehˇ kuiˬ awˬ paˇ lo teh taˍ ve yoˬ.

24Oˇ hkʼe te peuˬ hkʼaw‸ nawˉ, yawˇ hui lehˬ venˇ hta‸ aˬ miˍ tuˉ baˬ ve yoˬ. Ya‸ hkʼaˇ, hpu, shi, kuiˇ, leh sho yuˬ te taˍ ve mawˇ teˇ hpaˍ hta‸yuˬ laˬ leh Gʼuiˬsha aw pon fuiˍ teh taˍ ve yoˬ.

25Yawˇsuˆ lehˬ, meh maˬlanˉ Raˍhaˆ leh yawˇ ve awˬ ceuˬ awˬ hkʼaˇ teˇ hpaˍ ve a sha‸ hta‸ ponˬ piˇ ve yoˬ. Awˬ lawn kʼo, yawˇ lehˬ Yeˍriˆhkoˇ venˇ hta‸ ca jaˆ nyi tuˬ Yawˇsuˆ kʼai peu taˍ ve chaw jaˆ oˇ ve nyiˇ gʼaˇ hta‸ yuˬ faˉ taˍ piˇ ve pa taw yoˬ. (Hkʼe te leh yawˇve awˬ ceuˬ awˬ hkʼaˇ teˇ hpaˍ ya‸ nyi hkʼa gaˬ Iˉsaˍreˍ laˆ chaw hui ve mvuhˇmiˬ hkʼaw chehˇ taˍ sheˍ ve yoˬ.)

26Oˇ ve hkʼaw‸ nawˉ, Yawˇsuˆ shaˍti‸ piˇ leh kʼoˆ ve, Ya‸ nyi hkʼaw‸ nawˉ Yeˍriˆhkoˇ venˇ chi hta‸ kʼaw‸ gu te ve chaw hkʼaˬ ve teˇ gʼaˇ maˇ kʼoˆ, Gʼuiˬsha hkeu ve hta‸ gʼa hkanˍ tuˬ yoˬ. Venˇ chi hta‸ kʼaw‸ gu kawˍ ve chaw hkʼaˬ ve teˇ gʼaˇ maˇ kʼoˆ, yawˇ ve yaˇ paˍ uiˍ mehˉ kʼai tuˬ yoˬ. Venˇ chi ve taˍ meu‸ hpe‸ hta‸ gu te ve chaw hkʼaˬ ve teˇ gʼaˇ maˇ kʼoˆ, yawˇ ve yaˇ paˍ leh mehˉ kʼai tuˬ yoˬ, teh‸ kʼoˆ ve yoˬ.

27Gʼuiˬsha lehˬ Yawˇsuˆ geh chehˇ ve pa taw, mvuhˇmiˬ hkʼaˬ ti chi ti lo yawˇ ve awˬ meh bvuhˬ kʼai ve yoˬ.

← Chapter 5 Jump to: Chapter 7 →