Joshua 11

Lahu Bible Edited © Thailand Bible Society and Bible Society of Myanmar, 2010, 2020.

← Chapter 10 Jump to: Chapter 12 →

1Chi hkʼe hpeh‸ la ve hta‸ Haˍzawˇ jawˇmawˇ Yaˍbenˍ gʼa kaˇ ve yoˬ. Oˇ htaˇ yawˇ lehˬ, Maˍdonˍ jawˇmawˇ Yawˇbaˆ, Shiˉmaˍronˍ jawˇmawˇ leh Aˍhkaˍshaˆ jawˇmawˇ hui hta‸ maˇ kʼoˆ,

2awˬ na hpawˇ lo chehˇ ve jawˇmawˇ teˇ hpaˍ, Cheˍneˍrawˆ venˇ awˬ hawˉ hpawˇ Yawˇdanˍ miˬ tawˬ kuiˬ lo chehˇ ve jawˇmawˇ teˇ hpaˍ, leh Dawˇraˆ venˇ paˇ lo chehˇ ve jawˇmawˇ teˇ hpaˍ geh lo maˇ kʼoˆ,

3Yawˇ danˍ iˉ kaˆ lawˬ choˬ hpawˇ oˇ hpawˇ lo chehˇ ve Hkaˍnaˍniˆ chaw, Aˍmawˇriˆ chaw, Hiˇtiˆ chaw, Hpeˍraˍziˆ chaw, Yeˍbuˇsiˆ chaw leh Miˆsaˍpaˍ mvuhˇmiˬ Heˍraˍmonˍ hkʼaw hkuiˉ puiˍ lo chehˇ ve Hiˇviˆ chaw hui hta‸ maˇ kʼoˆ, tawˇ shanˍ feu piˇ ve yoˬ.

4Yawˇ hui lehˬ a shu yawˇ ve ma‸ yaˇ shawˍ veu laˇ ve yoˬ. Ma‸ yaˇ oˇ ve teˇ hpaˍ lehˬ, laˇ tsuhˇ gʼuiˬ pfuhˍ lo caw ve shehˇ shiˍ hkʼa shuˍ maˇ jaˇ ve yoˬ. Yawˇ hui lehˬ iˉ mvuhˇ leh iˉ mvuhˇ lawˬ maˇ maˇ cawˬ ve yoˬ.

5Jawˇmawˇ oˇ ve hkʼa peu-eˬ teˇ geh pawnˇ da‸ leh, Iˉsaˍreˍlaˆ chaw hui hta‸ bawˆ tuˬ, Meˍronˍ teh‸ kʼoˆ ve iˉ kaˆ lawˬ paˇ lo deh chehˇ taˍ ve yoˬ.

6Oˇ htaˇ Gʼuiˬsha Yawˇsuˆ hta‸ kʼoˆ piˇ ve, Taˇ kawˆ. Shawˉ pawˍ chi teˇ yanˇ gaˬ kʼo, Iˉsaˍ reˍlaˆchaw hui awˬ pon ngaˬ yawˇ hui hta‸ tiˇ pehˍ piˇ tuˬ yoˬ. Nawˬ lehˬ yawˇ hui ve iˉ mvuhˇ teˇ hpaˍ ve hkui kuˇ caˆ hta‸ gʼa tawˆ cheˆ leh, yawˇ hui ve iˉ mvuhˇ lawˬ teˇ hpaˍ hta‸ aˬ miˍ gʼa tuˉ baˬ piˇ tuˬ yoˬ, teh‸ Yawˇsuˆ hta‸ kʼoˆ piˇ ve yoˬ.

7Hkʼe te leh Yawˇsuˆ leh yawˇ ve ma‸ yaˇ teˇ hpaˍ, Meˍronˍ teh‸ kʼoˆ ve iˉ kaˆ lawˬ paˇ lo deh chehˇ taˍ ve chaw oˇ ve teˇ hpaˍ hta‸ ca bawˆ-e ve yoˬ.

8Gʼuiˬsha lehˬ, Iˉsaˍreˍlaˆ chaw hui hta‸ gʼaˇ shehˍ hpaˇ hpeh‸ piˇ lawˬ ve yoˬ. Yawˇ hui lehˬ chaw oˇ ve teˇ hpaˍ hta‸ awˬ na hpawˇ lo cawˬ ve Siˉdonˍ venˇ leh Miˆsaˍraˆ hpawˇtaˍmenˍ venˇ lo hkʼa gaˬ maˇ kʼoˆ, mvuhˇ nyi tawˆ hpawˇ lo cawˬ ve Miˆsaˍpaˍ lawˬ hkʼo‸ lo hkʼa gaˬ maˇ kʼoˆ, gʼa‸ yuˬ kʼoˬ piˇ ve yoˬ. Canˇ paˍ teˇ gʼaˇ ka‸ maˇ cawˬ taˉ htaˇ hkʼa gaˬ yawˇ hui gʼa‸ yuˬ leh te luˬ te sheˆ piˇ ve yoˬ.

9Yawˇsuˆ lehˬ Gʼuiˬsha kʼoˆ piˇ taˍ ve hkʼe, iˉ mvuhˇ teˇ hpaˍ ve hkui kuˇ caˆ hta‸ tawˆ cheˆ piˇ leh, yawˇ hui ve iˉ mvuhˇ lawˬ teˇ hpaˍ hta‸ aˬ miˍ tuˉ baˬ piˇ ve yoˬ.

10Oˇ ve hkʼaw‸ nawˉ, Yawˇsuˆ kʼaw‸ hpfuhˆ kʼaw‸ la leh Haˍzawˇ venˇ hta‸ bawˆ yuˬ leh venˇ oˇ ve hta‸ uˉ peunˍ chehˇ ve jawˇmawˇ hta‸ tiˇ pehˍ piˇ ve yoˬ. (Awˬ yanˇ oˇ ve awˬ hkʼaw lo Haˍzawˇ venˇ lehˬ awˬ nu ve venˇ teˇ hpa a‸ kehˉ awˬ gʼaˇ uiˍ jaˇ ve yoˬ.)

11Yawˇ hui lehˬ chaw hkʼa peu-eˬ ve hta‸ tiˇ pehˍ piˇ leh, a sha‸ te‸ chehˇ taˉ ve chaw teˇ gʼaˇ ka‸ maˇ cawˬ. Venˇ hta‸ htawˇ aˬ miˍ tuˉ baˬ piˇ ve yoˬ.

12Yawˇsuˆ lehˬ jawˇmawˇ oˇ ve teˇ hpaˍ leh yawˇ hui ve venˇ hkʼa peu-eˬ hta‸ bawˆ yuˬ ve yoˬ. Gʼuiˬsha ve awˬ ceˬ paˍ Moˉseˍ kʼoˆ piˇ taˍ ve hkʼe, yawˇ lehˬ chaw hkʼa peu-eˬ ve hta‸ tiˇ pehˍ piˇ ve yoˬ.

13Ya‸ hkʼaˇ, Iˉsaˍreˍlaˆ chaw teˇ hpaˍ lehˬ, Haˍzawˇ venˇ maˇ heˆ kʼo hkʼaw pui hkʼoˆ lo cawˬ ve awˬ nu ve venˇ teˇ maˬ hta‸ ka‸ aˬ miˍ maˇ tuˉ baˬ piˇ.

14Iˉsaˍreˍlaˆ chaw teˇ hpaˍ lehˬ, venˇ oˇ ve teˇ hpaˍ awˬ hkʼaw lo cawˬ taˍ ve awˬ hpfuhˇ hkʼaˆ ve mawˇ jeˬ leh, ceˇ caˬ hkʼa peu-eˬ ve hta‸ a shu yawˇ heuˆ gaˇ ve hkʼe yuˬ ve yoˬ. Ya‸ hkʼaˇ yawˇ hui lehˬ, chaw yaˇ hkʼa peu-eˬ ve hta‸ tiˇ pehˍ piˇ leh, a sha‸ te‸ chehˇ taˉ ve chaw teˇ gʼaˇ ka‸ maˇ cawˬ.

15Gʼuiˬsha lehˬ yawˇ ve awˬ ceˬ paˍ Moˉseˍ hta‸ tawˇ piˇ leh, yawˇ lehˬ tawˇ oˇ ve hkʼa peu-eˬ Yawˇsuˆ hta‸ teˇ caˉ kʼaw‸ kʼoˆ piˇ ve yoˬ. Gʼuiˬsha Moˉseˍ hta‸ te tcuh ve kanˉ hkʼa peu-eˬ ve hta‸ Yawˇsuˆ na yuˬ leh te ve yoˬ.

16Eˇdonˍ venˇ paˇ lo cawˬ ve Haˍlehˆ hkʼaw hta‸ te leh, awˬ hawˉ hpawˇ Heˍraˍmonˍ hkʼaw hkuiˉ puiˍ, Leˍbaˍnonˍ miˬ tawˬ kuiˬ lo cawˬ ve Baˍlaˍgaˆ venˇ lo hkʼa gaˬ,

17Gawˇshenˍ mvuhˇmiˬ leh Yawˇdanˍ miˬ tawˬ kuiˬ hkʼa peu-eˬ ve hta‸ Yawˇsuˆ bawˆ yuˬ ve yoˬ. Yawˇ lehˬ, mvuhˇmiˬ oˇ ve teˇ hpaˍ hta‸ uˉ peunˍ chehˇ ve jawˇmawˇ hkʼa peu-eˬ hta‸ tiˇ pehˍ piˇ ve yoˬ.

18Yawˇsuˆ lehˬ, awˬ yanˇ maw chaweh jawˇmawˇ oˇ ve teˇ hpaˍ hta‸ gʼa bawˆ da‸ chehˇ ve yoˬ.

19Giˇbonˍ venˇ hkʼaw chehˇ ve Hiˇviˆ chaw teˇ hpaˍ maˇ heˆ kʼo, awˬ nu ve venˇ yaˇ teˇ hpaˍ Iˉsaˍreˍlaˆ chaw teˇ hpaˍ hta‸ shaˉ caˆ maˇ ca caˇ la. Awˬ nu ve venˇ hkʼa peu-eˬ hta‸ yawˇ hui bawˆ yuˬ ve yoˬ.

20Chaw oˇ ve hkʼa peu-eˬ hta‸ luˬ kʼai sheˆ kʼai piˇ tuˬ, Gʼuiˬsha lehˬ yawˇ hui teˇ hpaˍ Iˉsaˍreˍlaˆ chaw hta‸ bawˆ da‸ gaˇ ve nyi ma cawˬ la piˇ ve yoˬ. Chi hkʼe te tuˬ Gʼuiˬsha Moˉseˍ hta‸ kʼoˆ piˇ taˍ ve yoˬ.

21Oˇ ve hkʼaw‸ nawˉ Yawˇsuˆ lehˬ, Heˍbronˍ, Deˍbiˇraˆ, Aˍnaˆ venˇ teˇ hpaˍ leh Iˉsaˍreˍlaˆ mvuhˇmiˬ hkʼaw hkʼoˆ lawˬ hkʼoˆ lo chehˇ ve awˬ gʼaˇ uiˍ jaˇ ve Aˍnaˍkaˆ chaw hui hta‸ ca bawˆ leh te luˬ te sheˆ piˇ ve yoˬ.

22Iˉsaˍreˍlaˆ chaw hui ve mvuhˇmiˬ hkʼaw Aˍnaˍkaˆ chaw teˇ gʼaˇ ka‸ maˇ cawˬ taˉ ve yoˬ. Ya‸ hkʼaˇ, yawˇ hui teˇ hpaˍ hpaˍ Gaˍsaˍ venˇ, Gaˍtaˆ venˇ Aˍcoˆ venˇ chi teˇ hpaˍ hkʼaw chehˇ taˍ sheˍ ve yoˬ.

23Gʼuiˬsha Moˉseˍ hta‸ kʼoˆ piˇ taˍ ve hkʼe, Yawˇsuˆ lehˬ mvuhˇmiˬ oˇ ve hkʼa peu-eˬ hta‸ bawˆ yuˬ ve yoˬ. Oˬ ve hkʼaw‸ nawˉ Yawˇsuˆ lehˬ, Iˉsaˍreˍlaˆ chaw teˇ hpaˍ a shu yawˇ ve chaw ceuˬ cawˬ ve hkʼe, yawˇ hui hta‸ mvuhˇmiˬ pehˬ piˇ ve yoˬ. Oˇ hkʼe te pehˬ piˇ peuˬ hkʼaw‸ nawˉ, yawˇ hui ma‸ maˇ kʼaw‸ bawˆ leh jehˇ taˍ ve yoˬ.

← Chapter 10 Jump to: Chapter 12 →