Joshua 13

Lahu Bible Edited © Thailand Bible Society and Bible Society of Myanmar, 2010, 2020.

← Chapter 12 Jump to: Chapter 14 →

1Yawˇsuˆ lehˬ chi beu‸ mawˇ la peuˬ. Hkʼe te leh Gʼuiˬsha yawˇ hta‸ kʼoˆ piˇ ve, Nawˬ lehˬ mawˇ jaˇ peuˬ. Ya‸ hkʼaˇ, nawˬ gʼa bawˆ yuˬ tuˬ sheˍ ve mvuhˇmiˬ cawˬ maˇ jaˇ sheˍ.

2Mvuhˇmiˬ oˇ ve teˇ hpaˍ lehˬ, Hpiˇliˇtiˆ mvuhˇmiˬ, Geˍsuˇriˆ mvuhˇmiˬ hpeh‸ ve yoˬ.

3(Eˇjiˇtu‸ miˬ tcuhˉ Shiˉloˍ iˉ kaˆ lawˬ hta‸ te leh, awˬ na hpawˇ Eˇkaˍronˍ venˇ lo hka gʼaˬ, awˬ kaˍ lo cawˬ taˍ ve mvuhˇmiˬ oˇ ve teˇ hpaˍ lehˬ, Hkaˍnaˍniˆ chaw hui ve mvuhˇmiˬ teh‸ shawˍ taˍ ve yoˬ. Hpiˇliˇtiˆ chaw hui ve jawˇmawˇ teˇ hpaˍ lehˬ, Gaˍsaˍ, Aˍcoˆ, Aˍshaˆkeˍlonˍ, Gaˍtaˆ, Eˇkaˍronˍ venˇ chi teˇ hpaˍ awˬ hkʼaw lo maˇ kʼoˆ, awˬ hawˉ hpawˇ Aˍvinˍ chaw hui ve mvuhˇmiˬ hkʼaw maˇ kʼoˆ chehˇ taˍ ve yoˬ.)

4Siˉdonˍ chaw hui uˉ peunˍ chehˇ ve Maˍraˍ mvuhˇmiˬ hta‸ te leh, Aˍmawˇriˆ chaw hui ve miˬ tcuhˉ Aˍ hpehˆ venˇ lo hkʼa gaˬ, Hkaˍnaˍniˆ mvuhˇmiˬ hkʼa peu-eˬ,

5mvuhˇ nyi tawˆ hpawˇ Heˍraˍmonˍ hkʼaw hkuiˉ puiˍ lo cawˬ ve Baˍlaˍgaˆ venˇ hta‸ te leh Haˍmaˆ venˇ lo kʼai ve ya‸ kʼaw hpuiˇ lo cawˬ ve Geˍbaˍlaˆ mvuhˇmiˬ leh Leˍbaˍnonˍ mvuhˇmiˬ hta‸ maˇ kʼoˆ, bawˆ yuˬ tuˬ cawˬ sheˍ ve yoˬ.

6Leˍbaˍnonˍ hkʼaw hta‸ te leh Miˆsaˍraˆhpawˇtaˍmenˍ venˇ lo hkʼa gaˬ, hkʼaw hkʼoˆ lawˬ hkʼoˆ lo chehˇ ve Siˉdonˍ chaw hui hta‸ ngaˬ gʼa‸ kʼoˬ laˇ tuˬ yoˬ. Ngaˬ nawˬ hta‸ kʼoˆ piˇ taˍ peuˬ ve hkʼe, nawˬ lehˬ Iˉsaˍ reˍlaˆ chaw hui hta‸ mvuhˇmiˬ oˇ ve gʼa pehˬ piˇ tuˬ yoˬ.

7Chi hta‸ pa taw, cawˬ taˍ sheˍ ve Iˉsaˍreˍlaˆ chaw kʼawˇ ceuˬ leh, Maˍnaˍseˍ chaw teˇ hkoˇ ve hta‸ mvuhˇmiˬ oˇ ve pehˬ piˇ-oˆ, teh‸ Gʼuiˬsha Yawˇsuˆ hta‸ kʼoˆ piˇ ve yoˬ.

8Ruˇbenˍ, Gaˆ leh Maˍnaˍseˍ chaw teˇ hkoˇ lehˬ, Yawˇ danˍ lawˬ mvuhˇ nyi tawˆ hpawˇ lo cawˬ ve mvuhˇmiˬ hta‸ gʼa ve yoˬ. Chi ve lehˬ, Gʼuiˬsha ve awˬ ceˬ paˍ Moˉseˍ yawˇ hui hta‸ piˇ taˍ ve mvuhˇmiˬ hpeh‸ ve yoˬ.

9Yawˇ hui ve mvuhˇmiˬ lehˬ, Aˍnonˍ miˬ tawˬ kuiˬ paˇ lo cawˬ ve Aˍyawˍ venˇ hta‸ te leh, Diˇbonˍ venˇ lo hkʼa gaˬ, awˬ kaˍ lo cawˬ ve Maˍdeˍbaˆ mvuhˇmiˬ hkʼa peu-eˬ hpeh‸ ve yoˬ.

10Aˍmawˇriˆ jawˇmawˇ Siˉhonˍ uˉ peunˍ ve mvuhˇmiˬ hkʼa peu-eˬ,

11Giˇlaˆ mvuhˇmiˬ, Geˍsuˇriˆ chaw leh Maˍhkaˍtiˆ chaw hui chehˇ taˍ ve mvuhˇmiˬ, Heˍraˍmonˍ hkʼaw hkʼa peu-eˬ, Taˍlaˍkaˆ mvuhˇmiˬ lo hkʼa gaˬ, awˬ kaˍ lo cawˬ ve Baˍshanˍ mvuhˇmiˬ hkʼa peu-eˬ,

12Yeˍhpenˍ chaw ceuˬ hkʼaw lo cawˬ taˉ ve chaw, Aˍshaˆtaˍroˆ venˇ leh Eˍdiˆ venˇ hta‸ uˉ peunˍ ve Awˇgaˆ ve mvuhˇmiˬ hkʼa peu-eˬ, yawˇ hui ve mvuhˇmiˬ hpeh‸ la ve yoˬ. Moˉseˍ lehˬ mvuhˇmiˬ chi teˇ hpaˍ hta‸ bawˆ yuˬ leh, chaw oˇ ve teˇ hpaˍ hta‸ gʼa‸ kʼoˬ piˇ taˍ ve yoˬ.

13Ya‸ hkʼaˇ, Iˉsaˍreˍlaˆ chaw hui lehˬ, Geˍsuˇriˆ chaw leh Maˍhkaˍtiˆ chaw hui hta‸ maˇ gʼa‸ kʼoˬ piˇ. Hkʼe te leh chaw oˇ ve teˇ hpaˍ, Iˉsaˍreˍlaˆ chaw hui geh chehˇ taˍ ve yoˬ.

14Moˉseˍ lehˬ, Leˍviˆ chaw hui hta‸ mvuhˇmiˬ maˇ piˇ. Gʼuiˬsha Moˉseˍ hta‸ kʼoˆ piˇ taˍ ve hkʼe, yawˇ hui lehˬ Gʼuiˬsha hta‸ tuˉ tanˇ piˇ ve awˬ ceuˬ hta‸ gʼa caˇ ve yoˬ.

15Moˉseˍ lehˬ, Ruˇbenˍ awˬ ceuˬ awˬ hkʼaˇ teˇ hpaˍ hta‸ mvuhˇmiˬ pehˬ piˇ ve yoˬ.

16Yawˇ hui ve mvuhˇmiˬ lehˬ, Aˍnonˍ miˬ tawˬ kuiˬ paˇ lo cawˬ ve Aˍyawˍ venˇ hta‸ te leh Meˍdeˍbaˍ venˇ lo hkʼa gaˬ awˬ kaˍ lo cawˬ ve venˇ chi teˇ hpaˍ hpeh‸ ve yoˬ.

17Heˍsaˍbonˍ, Diˇbonˍ, Baˍmoˆbaˍlaˆ, Behˇbaˍlaˆmonˍ,

18Yaˍhaˆ, Keˍdaˍmoˆ, Maˍhpaˆ,

19Kiˇriˇyaˆtenˍ, Siˆbaˍmaˍ, hkʼaw hkʼoˆ lo cawˬ ve Zaˍyehˆsaˍhaˍ,

20Behˆpeˍguˇraˆ, Piˉsaˍgaˍ hkʼaw tcuhˉ lonˉ, Behˆyeˍsiˇmoˆ venˇ,

21hkʼaw hkʼoˆ lo cawˬ ve venˇ teˇ hpaˍ leh Heˍsaˍbonˍ venˇ hkʼaw jawˇmawˇ te chehˇ ve Aˍmawˇriˆ jawˇmawˇ Siˉhonˍ ve venˇ hkʼa peu-eˬ hpeh‸ ve yoˬ. Moˉseˍ lehˬ, jawˇmawˇ chi hta‸ tiˇ pehˍ piˇ ve yoˬ. Yawˇ lehˬ Meˇdiˍanˍ mvuhˇmiˬ hta‸ uˉ peunˍ chehˇ ve Eˇviˆ, Yeˍkanˍ, Zuˇraˆ, Huˇraˆ, Yaˍbaˆ hui hta‸ htawˇ tiˇ pehˍ piˇ ve yoˬ. Chaw chi teˇ hpaˍ lehˬ, Siˉhonˍ awˬ hawˉ ve jawˇmawˇ ehˉ teˇ hpaˍ hpeh‸ ve yoˬ.

22Bawˇraˆ ve yaˇ, mawˉ paˍ te chehˇ ve Baˍlanˍ hta‸ htawˇ Iˉsaˍreˍlaˆ chaw hui tiˇ pehˍ piˇ ve yoˬ.

23Yawˇdanˍ iˉ kaˆ lawˬ lehˬ, Ruˇbenˍ chaw hui ve miˬ tcuhˉ hpeh‸ ve yoˬ. Venˇ chi ve teˇ hpaˍ lehˬ Ruˇbenˍ chaw hui hta‸ piˇ taˍ ve venˇ teˇ hpaˍ hpeh‸ ve yoˬ.

24Moˉseˍ lehˬ, Gaˆ awˬ ceuˬ awˬ hkʼaˇ hta‸ htawˇ mvuhˇmiˬ pehˬ piˇ ve yoˬ.

25Yawˇ hui ve mvuhˇmiˬ lehˬ, Yaˍzaˍ venˇ leh Giˇlaˆ venˇ hkʼa peu-eˬ, Raˍbaˆ venˇ mvuhˇ nyi tawˆ hpawˇ lo cawˬ ve Aˍyawˍ venˇ lo hkʼa gaˬ, Aˍmawˇriˆ chaw hui ve mvuhˇmiˬ teˇ hkoˇ,

26Heˍsaˍbonˍ venˇ hta‸ te leh Raˍmaˍmiˆsaˍpaˍ venˇ leh Beˍtawˇninˍ venˇ lo hkʼa gaˬ, Maˍhaˍnenˍ venˇ hta‸ te leh Lawˍdeˍbaˍ venˇ lo hkʼa gaˬ,

27Yawˇdanˍ miˬ tawˬ kuiˬ lo cawˬ ve Beˍtaˍranˍ venˇ, Beˍniˆmaˍraˆ venˇ, Suˇkoˆ leh Zaˍhponˍ venˇ, Heˍsaˍbonˍ venˇ hkʼaw chehˇ ve jawˇmawˇ Siˉhonˍ uˉ peunˍ chehˇ ve awˬ nu ve mvuhˇmiˬ hkʼa peu-eˬ hpeh‸ ve yoˬ. Yawˇ hui ve miˬ tcuhˉ lehˬ, Yawˇdanˍ iˉ kaˆ lawˬ hpeh‸ leh awˬ na hpawˇ lo Gaˍliˍlehˇ gʼuiˬ po lo hkʼa gaˬ hpeh‸ ve yoˬ. Yawˇ hui ve mvuhˇmiˬ lehˬ mvuhˇ nyi tawˆ hpawˇ lo cawˬ maˇ ve yoˬ.

28Venˇ chi ve teˇ hpaˍ lehˬ, Gaˆ chaw hui hta‸ piˇ taˍ ve venˇ teˇ hpaˍ hpeh‸ ve yoˬ.

29Moˉseˍ lehˬ, Maˍnaˍseˍ awˬ ceuˬ awˬ hkʼaˇ teˇ hkoˇ ve hta‸ htawˇ mvuhˇmiˬ pehˬ piˇ ve yoˬ.

30Yawˇ hui ve mvuhˇmiˬ lehˬ, Maˍhaˍnenˍ venˇ hta‸ te leh, jawˇmawˇ Awˇgaˆ uˉ peunˍ chehˇ ve Baˍshanˍ mvuhˇmiˬ hkʼa peu-eˬ, Yeˍraˆ uˉ peunˍ ve venˇ 60 venˇ,

31Giˇlaˆ mvuhˇmiˬ teˇ hkoˇ leh Baˍshanˍ mvuhˇmiˬ hkʼaw jawˇmawˇ Awˇgaˆ uˉ peunˍ chehˇ ve Aˍshaˆtaˍroˆ venˇ leh Eˍdiˆ venˇ teˇ hpaˍ hpeh‸ ve yoˬ. Mvuhˇmiˬ chi teˇ hpaˍ lehˬ, Maˍnaˍseˍ ve yaˇ Maˍhkiˇraˆ ve awˬ ceuˬ awˬ hkʼaˇ teˇ hpaˍ hta‸ pehˬ piˇ taˍ ve mvuhˇmiˬ hpeh‸ ve yoˬ.

32Chi ve lehˬ, Mawˇbaˆ miˬ tawˬ kuiˬ lo Moˉseˍ Yeˍriˆhkoˇ venˇ leh Yawˇdanˍ iˉ kaˆ lawˬ mvuhˇ nyi tawˆ hpawˇ lo cawˬ ve mvuhˇmiˬ hta‸ yawˇ hkʼaˬ hkʼe te pehˬ piˇ taˍ ve awˬ lawn hpeh‸ ve yoˬ.

33Ya‸ hkʼaˇ, Moˉseˍ lehˬ Leˍviˆ chaw hui hta‸ mvuhˇmiˬ maˇ pehˬ piˇ. Iˉsaˍreˍlaˆ ve jawˇmawˇ Gʼuiˬsha lehˬ, yawˇ hui ve awˬ shinˉ hpeh‸ ve yoˬ, teh‸ yawˇ hui hta‸ kʼoˆ piˇ ve yoˬ.

← Chapter 12 Jump to: Chapter 14 →