Joshua 5

Lahu Bible Edited © Thailand Bible Society and Bible Society of Myanmar, 2010, 2020.

← Chapter 4 Jump to: Chapter 6 →

1Yawˇdanˍ iˉ kaˆ lawˬ mvuhˇ nyi kʼehˬ hpawˇ lo chehˇ ve Aˍmawˇriˆ jawˇmawˇ hkʼa peu-eˬ leh, Awˬ kʼaw ji ve laˇ tsuhˇ gʼuiˬ paˇ lo chehˇ ve Hkaˍnaˍniˆ jawˇmawˇ hkʼa peu-eˬ, Iˉsaˍreˍlaˆ chaw hui Yawˇdanˍ Iˉ kaˆ lawˬ hta‸ hkanˍ tawˆ-e chehˇ ve teˇ yanˇ, Gʼuiˬsha lehˬ iˉ kaˆ lawˬ oˇ ve hta‸ goˇ kʼai piˇ ve awˬ lawn hta‸ yawˇ hui gʼa kaˇ ve yoˬ. Hkʼe te leh yawˇ hui kawˆ jaˇ, dawˇ haˍ jaˇ ve yoˬ.

2Oˇ htaˇ Gʼuiˬsha lehˬ, Haˉ pui shiˍ hta‸ hkʼa deh‸ shiˍ leh, Iˉsaˍreˍlaˆ chaw hui hta‸ awˬ guiˬ meuˇ shoˍ piˇ-oˆ, teh‸ Yawˇsuˆ hta‸ kʼoˆ piˇ ve yoˬ.

3Hkʼe te leh Yawˇsuˆ lehˬ haˉ pui shiˍ hta‸ hkʼa deh‸ gu shiˍ peuˬ hkʼaw‸ nawˉ, Awˬ guiˬ meuˇ shoˍ ve hkʼaw pui teh‸ kʼoˆ ve chehˇ kuiˬ lo, yawˇ hui hta‸ awˬ guiˬ meuˇ shoˍ piˇ ve yoˬ.

4Yawˇ chi hkʼe te piˇ ve lehˬ, yawˇ hui Eˇjiˇtu‸ mvuhˇmiˬ hkʼaw tawˆ la htaˇ, a sha‸ gaˬ peuˬ leh ma‸ bawˆ puiˉ la peuˬ ve hawˉ hkʼaˆ paˍ hkʼa peu-eˬ, heh puiˉ hkʼaw lo suh peuˬ sheˍ ve pa taw yoˬ.

5Eˇjiˇtu‸ mvuhˇmiˬ hkʼaw tawˆ la taˍ ve hawˉ hkʼaˆ paˍ teˇ gʼaˇ le le awˬ guiˬ meuˇ shoˍ taˍ peuˬ ve htawˇ, heh puiˉ hkʼaw lo paw la taˍ ve chaw teˇ hpaˍ lehˬ teˇ gʼaˇ ka‸ awˬ guiˬ meuˇ maˇ gʼa shoˍ sheˍ.

6Iˉsaˍreˍlaˆ chaw teˇ hpaˍ lehˬ, heh puiˉ hkʼaw lo 40 hkʼaw‸ gʼa caw toˇ chehˇ ve yoˬ. Awˬ lawn kʼo, yawˇ hui Gʼuiˬsha ve tawˇ hkawˇ hta‸ maˇ na yuˬ ve pa taw yoˬ. Gʼuiˬsha lehˬ, yawˇ hui ve awˬ puˍ awˬ pi hui hta‸ piˇ tuˬ ka ti‸ te taˍ ve hkuiˇ jaˇ da‸ jaˇ ve mvuhˇmiˬ oˇ ve yawˇ hui hta‸ maˇ mawˬ tcuh piˇ ve yoˬ.

7Yawˇ hui ve yaˇ teˇ hpaˍ lehˬ, heh puiˉ hkʼaw lo caw toˇ chehˇ htaˇ, teˇ gʼaˇ ka‸ awˬ guiˬ meuˇ maˇ gʼa shoˍ sheˍ. Hkʼe te leh, chaw awˬ suhˉ chi ve teˇ moˍ hta‸ Yawˇsuˆ awˬ guiˬ meuˇ shoˍ piˇ ve yoˬ.

8Chaw hkʼa peu-eˬ ve hta‸ awˬ guiˬ meuˇ shoˍ piˇ peuˬ hkʼaw‸ nawˉ, yawˇ hui na-e la htaˇ hkʼa gaˬ oˇ kaˬ lo ceh tiˉ deh chehˇ taˍ ve yoˬ.

9Oˇ ve hkʼaw‸ nawˉ Gʼuiˬsha lehˬ, Nawˬ hui Eˇjiˇtu‸ mvuhˇmiˬ hkʼaw shu ceˬ gʼa te ve ya‸ taw tuˬ uiˍ ve awˬ vuiˬ chi hta‸ ya‸ nyi ngaˬ yuˬ baˬ laˇ peuˬ, teh‸ Yawˇsuˆ hta‸ kʼoˆ piˇ ve yoˬ. Hkʼe te leh, chehˇ kuiˬ oˇ ve hta‸ Giˇlaˍgaˍ teh‸ meh piˇ leh, ya‸ nyi hkʼa gaˬ oˇ hkʼe meh taˍ sheˍ ve yoˬ.

10Iˉsaˍreˍlaˆ chaw teˇ hpaˍ lehˬ, Yeˍriˆhkoˇ venˇ awˬ paˇ lo cawˬ ve Giˇlaˍgaˍ miˬ tawˬ kuiˬ lo chehˇ taˍ htaˇ, ha pa oˇ ve 14 nyi mvuhˇ hpeu‸ hta‸ tanˬ leh, paˍsaˍhkaˍ pawehˇ te chehˇ taˍ ve yoˬ.

11Awˬ hkʼaw‸ nawˉ teˇ nyi yawˇ hui lehˬ, Hkaˍnanˍ mvuhˇmiˬ hkʼaw tawˆ ve diˇ maˇ keu ve hkaoˍmonˇ leh hu taˍ ve sha ma hta‸ gʼa caˇ ve yoˬ.

12Oˇ ve hkʼaw‸ nawˉ, maˍnaˆshiˍ maˇ kʼaw‸ ce la ve yoˬ. Hkʼe te leh Iˉsaˍreˍlaˆ chaw teˇ hpaˍ maˍnaˆshiˍ hta‸ maˇ gʼa kʼaw‸ caˇ ve yoˬ. Oˇ ve teˇ nyi hta‸ te leh, yawˇ hui lehˬ Hkaˍnanˍ mvuhˇmiˬ hkʼaw tawˆ ve awˬ shiˍ awˬ nu teˇ hpaˍ hta‸ ceh tiˉ kʼaw‸ caˇ kʼai ve yoˬ.

13Yawˇsuˆ lehˬ Yeˍriˆhkoˇ venˇ awˬ paˇ neˇ lo gaˬ la ve teˇ yanˇ, yawˇ mehˆ gʼuˇ suhˍ lo aˉhtaw pfuhˇ leh huˉ chehˇ taˍ ve chaw teˇ gʼaˇ hta‸ gʼa mawˬ ve yoˬ. Hkʼe te leh Yawˇsuˆ yawˇ awˬ paˇ lo jiˆ kʼai leh, Nawˬ lehˬ ngaˬ hui ve ma‸ yaˇ teˇ gʼaˇ hpeh‸ ve laˇ, teh‸ yawˇ hta‸ na nyi ve yoˬ.

14Chaw oˇ ve lehˬ, Nawˬ kʼoˆ ve hkʼe maˇ heˆ. Ngaˬ lehˬ Gʼuiˬsha ve ma‸ moˍ ma‸ cuˇ ve awˬ hoˉ teˇ gʼaˇ hpeh‸ ve yoˬ, teh‸ yawˇ hta‸ yaw hkʼaw‸ piˇ ve yoˬ. Oˇ htaˇ Yawˇsuˆ yawˇ mehˆ gʼuˇ suhˍ lo hkui tcuhˉ teh leh, Jawˇmawˇ-oˬ, ngaˬ lehˬ nawˬ ve awˬ ceˬ yoˬ. Nawˬ ngaˬ hta‸ aˬ hto‸ ma te tcuh laˇ gaˇ ve le, teh‸ kʼoˆ piˇ ve yoˬ.

15Gʼuiˬsha ve ma‸ moˍ ma‸ cuˇ ve awˬ hoˉ oˇ ve lehˬ, Nawˬ ve hkuiˉ nuˆ hta‸ kʼehˆ baˬ-o‸. Awˬ lawn kʼo, nawˬ lehˬ da‸ kehˬ jaˇ ve chehˇ kuiˬ hkʼaw huˉ chehˇ ve yoˬ, teh‸ yawˇ hta‸ kʼoˆ piˇ ve yoˬ. Hkʼe te leh Yawˇsuˆ lehˬ yawˇ kʼoˆ ve hkʼe te ve yoˬ.

← Chapter 4 Jump to: Chapter 6 →