Joshua 20

Lahu Bible Edited © Thailand Bible Society and Bible Society of Myanmar, 2010, 2020.

← Chapter 19 Jump to: Chapter 21 →

1Oˇ ve hkʼaw‸ nawˉ, Gʼuiˬsha Yawˇsuˆ hta‸ chi hkʼe kʼoˆ piˇ ve yoˬ.

2Ngaˬ Moˉseˍ hta‸ teˇ caˉ te leh nawˬ hui hta‸ kʼoˆ piˇ taˍ peuˬ ve hkʼe, ponˬ ve venˇ teˇ hpaˍ hta‸ leuˆ yuˬ tuˬ, Iˉsaˍreˍlaˆ chaw teˇ hpaˍ hta‸ kʼoˆ piˇ-oˆ.

3Venˇ oˇ ve teˇ hpaˍ lehˬ, maˇ dawˇ maˇ gaˇ ve awˬ hkʼaw lo shu hta‸ gʼa tiˇ pehˍ cawˇ ve chaw teˇ gʼaˇ, gʼuiˇ hpaw-e leh ca hpaw va‸ taˍ kuiˬ venˇ hpeh‸ ve yoˬ.

4Yawˇ lehˬ venˇ oˇ ve teˇ maˬ maˬ lo gʼuiˇ hpaw-e leh, venˇ yehˬmiˉhpe‸ lo cawˬ ve suhˉ jehˬ kuiˬ lo kʼai leh, hkʼa hpeh‸ la ve awˬ lawn awˬ hoˉ awˬ naˬ teˇ hpaˍ hta‸ gʼa kʼoˆ maˍ piˇ ve yoˬ. Oˇ htaˇ, yawˇ hui lehˬ chaw oˇ ve hta‸ venˇ hkʼaw ha‸ yuˬ leh, oˇ kaˬ lo chehˇ tcuh piˇ hpeh‸ ve yoˬ.

5Yawˇ hta‸ tiˇ pehˍ tuˬ gʼa‸ ca toˇ ve chaw teˇ hpaˍ oˇ kaˬ lo gaˬ ve htawˇ, venˇ yaˇ oˇ ve teˇ hpaˍ lehˬ chaw oˇ ve hta‸ yawˇ hui ve la‸ sheh hkʼaw lo maˇ gʼa chiˇ a‸ piˇ. Awˬ lawn kʼo, yawˇ lehˬ nyi ma zuhˆ ve hkʼaw chaw hta‸ gʼa tiˇ pehˍ peuˬ ve maˇ heˆ. Maˇ dawˇ maˇ gaˇ ve hkʼaw gʼa te ya‸ peuˬ ve pa taw yoˬ.

6Shu yawˇ hta‸ suhˉ jehˬ peuˬ leh, oˇ kaˬ lo paw hkuˇ te chehˇ ve chaw suh peuˬ htaˇ hkʼa gaˬ, yawˇ lehˬ venˇ oˇ ve hkʼaw lo tiˉ gʼa chehˇ taˍ ve yoˬ. Oˇ ve hkʼaw‸ nawˉ, yawˇ lehˬ yawˇ ve venˇ lo kʼaw‸ kʼo‸-e hpeh‸ ve yoˬ.

7Hkʼe te leh, yawˇ hui lehˬ Naˍtaˍliˆ chaw hui ve mvuhˇmiˬ, Gaˍliˍlehˇ hkʼaw cawˬ ve Keˍdeˍ shaˆ venˇ, Eˇhpaˍrenˍ chaw hui ve mvuhˇmiˬ hkʼaw cawˬ ve Sheˍhkenˍ venˇ, Yuˇda‸ mvuhˇmiˬ hkʼaw cawˬ ve Heˍbronˍ teh‸ kʼoˆ ve Kiˇriˇyaˆtaˍbaˆ venˇ chi teˇ hpaˍ hta‸ leuˆ yuˬ ve yoˬ.

8Chi hkʼoˆ ka‸, Yawˇdanˍ iˉ kaˆ lawˬ mvuhˇ nyi tawˆ hpawˇ leh Yeˍriˆhkoˇ venˇ mvuhˇ nyi tawˆ hpawˇ, Ruˇbenˍ chaw hui ve mvuhˇmiˬ hkʼaw cawˬ ve Beˍzaˍ venˇ hta‸ maˇ kʼoˆ, Gaˆ chaw hui ve mvuhˇmiˬ, Giˇlaˆ hkʼaw cawˬ ve Raˍmoˆ venˇ hta‸ maˇ kʼoˆ, Maˍnaˍseˍ chaw hui ve mvuhˇmiˬ, Baˍshanˍ hkʼaw cawˬ ve Goˍlanˍ venˇ hta‸ maˇ kʼoˆ, leuˆ yuˬ taˍ ve yoˬ.

9Venˇ chi teˇ hpaˍ lehˬ, Iˉsaˍreˍlaˆ chaw leh yawˇ hui geh chehˇ taˍ ve awˬ nu ve mvuhˇmiˬ yaˇ teˇ hpaˍ awˬ pon leuˆ yuˬ taˍ ve venˇ teˇ hpaˍ hpeh‸ ve yoˬ. Maˇ dawˇ maˇ gaˇ ve hkʼaw chaw hta‸ gʼa tiˇ pehˍ peuˬ ve chaw lehˬ, venˇ oˇ ve teˇ hpaˍ lo hpaw-e hpeh‸ ve yoˬ. Yawˇ hta‸ tiˇ pehˍ tuˬ gʼa‸ ca la ve chaw teˇ hpa lehˬ, yawˇ hta‸ tiˇ pehˍ piˇ maˇ hpeh‸. Yawˇ lehˬ, oˇ kaˬ lo shu suhˉ jehˬ ve hta‸ gʼa hkanˍ tuˬ yoˬ.

← Chapter 19 Jump to: Chapter 21 →