Joshua 2

Lahu Bible Edited © Thailand Bible Society and Bible Society of Myanmar, 2010, 2020.

← Chapter 1 Jump to: Chapter 3 →

1Oˇ ve hkʼaw‸ nawˉ Yawˇsuˆ lehˬ, Yeˍriˆhkoˇ venˇ hta‸ ca jaˆ nyi tuˬ chaw nyiˇ gʼaˇ hta‸ yawˇ hui deh chehˇ taˍ kuiˬ Aˍhkeˇshaˍ teh‸ kʼoˆ ve chehˇ kuiˬ hkʼaw tawˆ kʼai tcuh ve yoˬ. Yawˇ huiˉ maˬ tawˆ kʼai leh, Raˍhaˆ meh ve meh maˬ lanˉ ve yehˬ hkʼaw gaˬ la ve yoˬ.

2Yeˍriˆhkoˇ venˇ hta‸ uˉ peunˍ chehˇ ve jawˇmawˇ lehˬ, Iˉsaˍreˍlaˆ chaw teˇ hpaˍ yawˇ hui ve mvuhˇmiˬ hta‸ ca jaˆ nyi la tuˬ oˇ kaˬ lo gaˬ la taˍ peuˬ ve awˬ hkawˇ gʼa kaˇ ve yoˬ.

3Hkʼe te leh, jawˇmawˇ lehˬ Raˍhaˆ geh chaw hta‸ hpehˇ peu leh, Nawˬ ve yehˬ hkʼaw lo gaˬ la taˍ ve chaw oˇ ve teˇ hpaˍ, ngaˬ hui ve mvuhˇmiˬ hta‸ ca jaˆ nyi la tuˬ gaˬ la taˍ ve yoˬ. Chi hta‸ pa taw, chaw oˇ ve teˇ hpaˍ hta‸ shiˍ tawˆ la-o, teh‸ Raˍhaˆ hta‸ ca kʼoˆ piˇ tcuh ve yoˬ.

4Ya‸ hkʼaˇ yaˇ miˇ oˇ ve kʼaw‸ yaw hkʼaw‸ leh kʼoˆ ve, Chaw teˇ hpaˍ hpaˍ ngaˬ ve yehˬ hkʼaw lo‸ la ve yoˬ. Ya‸ hkʼaˇ, yawˇ hui hkʼaˬ lo laˬ ve hta‸ ngaˬ maˇ shiˍ.

5Mvuhˇ nyi lo‸-e leh lanˇ venˇ yehˬ miˉ hoˆ la paˇ neˇ htaˇ yawˇ hui kʼaw‸ tawˆ kʼai ve yoˬ. Yawˇ hui hkʼaˬ lo kʼai toˇ ve hta‸ ngaˬ maˇ na nyi nawˇ. Ya‸ hkʼaˇ, nawˬ hui haˆ haˆ gʼa‸ yuˬ ve kʼo, yawˇ hui hta‸ gʼa‸ me tuˬ sheˍ ve yoˬ, teh‸ kʼaw‸ yaw hkʼaw‸ piˇ ve yoˬ.

6(Yawˇ lehˬ, chaw jaˆ oˇ ve nyiˇ gʼaˇ hta‸ yehˬ hkʼoˆ lo shiˍ taˆ-e leh, chi gʼawˇ yuˬ beh taˍ ve yoˬ.)

7Jawˇmawˇ ve ma‸ yaˇ teˇ hpaˍ tawˆ kʼai peuˬ hkʼaw‸ nawˉ, lanˇ venˇ yehˬ miˉ htawˇ hoˆsheˬ ve yoˬ. Yawˇ hui lehˬYawˇdanˍ iˉ kaˆ lawˬ lo hkʼa gaˬ chaw jaˆ oˇ ve nyiˇ gʼaˇ hta‸ gʼa‸ ca kʼai ve yoˬ.

8Chaw jaˆ oˇ ve nyiˇ gʼaˇ maˇ zuh‸ sheˍ gʼuˇ suhˍ, Raˍhaˆ yawˇ huiˉ maˬ geh taˆ-e leh kʼoˆ ve,

9Gʼuiˬsha lehˬ mvuhˇmiˬ chi nawˬ hui hta‸ piˇ laˇ taˍ peuˬ ve hta‸ ngaˬ shiˍ ve yoˬ. Venˇ yaˇ hkʼa peu-eˬ nawˬ hui hta‸ kawˆ jehˇ chehˇ ve yoˬ.

10Nawˬ hui Eˇjiˇtu‸ mvuhˇmiˬ hkʼaw tawˆ la chehˇ ve teˇ yanˇ, nawˬ hui gʼuˇ suhˍ lo cawˬ ve laˇ tsuhˇ gʼuiˬ nyi hta‸ Gʼuiˬsha hkʼaˬ hkʼe te fiˍ kʼai piˇ ve awˬ lawn hta‸ ngaˬ hui gʼa kaˇ taˍ peuˬ ve yoˬ. Yawˇdanˍ gʼuiˬ mvuhˇ nyi tawˆ hpawˇ lo chehˇ ve Aˍmawˇriˆ jawˇmawˇ Siˉhonˍ leh Awˇgaˆ hta‸ nawˬ hui hkʼaˬ hkʼe te tiˇ pehˍ piˇ ve awˬ lawn hta‸ htawˇ ngaˬ hui gʼa kaˇ taˍ peuˬ ve yoˬ.

11Awˬ lawn oˇ ve teˇ hpaˍ hta‸ ngaˬ hui gʼa kaˇ ve teˇ yanˇ kawˆ jaˇ ve yoˬ. Nawˬ hui hta‸ pa taw, chaw teˇ gʼaˇ le le dawˇ haˍ jaˇ chehˇ ve yoˬ. Nawˬ hui ve Jawˇmawˇ Gʼuiˬsha lehˬ, miˬguiˬ mvuhˇ naw ma ve Gʼuiˬsha hpeh‸ ve yoˬ.

12Chi beu‸ ngaˬ nawˬ huiˉ maˬ hta‸ ha‸ shaˉ piˇ ve hkʼe, nawˬ hui htawˇ ngaˬ ve yehˬ kʼa hta‸ ha‸ shaˉ laˇ tuˬ Gʼuiˬsha hta‸ cuˇ leh a ciˉ hkanˍ laˇ-oˆ.

13Ngaˬ pa ngaˬ e, ngaˬ viˉ ngaˬ nyi leh yawˇ hui ve yehˬ yaˇ kʼa yaˇ teˇ hpaˍ hta‸ ponˬ laˇ tuˬ ka ti‸ te laˇ-oˆ. Ngaˬ hui hta‸ a ciˉ taˇ tiˇ pehˍ laˇ-oˆ, teh‸ yawˇ huiˉ maˬ hta‸ kʼoˆ piˇ ve yoˬ.

14Oˇ htaˇ chaw oˇ ve nyiˇ gʼaˇ kʼoˆ ve, Ngaˬ huiˉ maˬ kʼoˆ ve hkʼe maˇ te ve kʼo, Gʼuiˬsha ngaˬ huiˉ maˬ hta‸ tiˇ pehˍ laˇ piˇ-oˆ. Ngaˬ huiˉ maˬ aˬ hto‸ ma ca te la ve awˬ lawn nawˬ shu hta‸ maˇ hto piˇ ve kʼo, mvuhˇmiˬ chi ve Gʼuiˬsha ngaˬ hui hta‸ piˇ laˇ ve teˇ yanˇ, ngaˬ hui nawˬ hta‸ ponˬ laˇ tuˬ yoˬ, teh‸ yaˇ miˇ oˇ ve hta‸ kʼaw‸ kʼoˆ piˇ ve yoˬ.

15Raˍhaˆ ve yehˬ lehˬ lanˇ venˇ hta‸ te tcuhˉ naw‸ taˍ ve pa taw, yawˇ lehˬ aˉ caˆ hkeh teˇ maˬ hta‸ yuˬ leh, chaw oˇ ve nyiˇ gʼaˇ hta‸ yehˬ miˉ ehˉ hkʼaw hpehˇ ce piˇ ve yoˬ.

16Nawˬ huiˉ maˬ hkʼaw hkʼoˆ lo hpaw taˆ-e loˬ. Oˇ hkʼe maˇ te kʼo, jawˇmawˇ ve ma‸ yaˇ teˇ hpaˍ nawˬ huiˉ maˬ hta‸ ca mawˬ tuˬ yoˬ. Yawˇ hui kʼaw‸ gaˬ la peuˬ htaˇ hkʼa gaˬ, oˇ kaˬ lo shehˆ nyi ca va‸ taˍ-o‸. Oˇ ve hkʼaw‸ nawˉ, nawˬ huiˉ maˬ kʼai gaˇ kuiˬ lo kʼai hpeh‸ ve yoˬ, teh‸ yawˇ huiˉ maˬ hta‸ kʼoˆ piˇ ve yoˬ.

17Oˇ htaˇ yawˇ huiˉ maˬ lehˬ, Nawˬ te tcuh laˇ ve ka ti‸ hta‸ ngaˬ hui ha‸ shaˉ taˍ tuˬ yoˬ.

18Ngaˬ hui nawˬ hui ve mvuhˇmiˬ hta‸ ca bawˆ yuˬ la ve teˇ yanˇ, nyiˉ-ehˍ ve aˉ caˆ hkeh chi ve hta‸ nawˬ ve yehˬ miˉ ehˉ chi hta‸ hpeh taˍ-o‸. Nawˬ pa nawˬ e, nawˬ viˉ nawˬ nyi leh yawˇ hui ve yehˬ yaˇ kʼa yaˇ hkʼa peu-eˬ ve hta‸ nawˬ ve yehˬ hkʼaw shiˍ keu taˍ-o‸.

19Teˇ gʼaˇ gʼaˇ yehˬ hkʼaw tawˆ-e leh gʼa suh puiˉ ve kʼo, chi lehˬ yawˇ ve venˇbaˆ hpeh‸ ve yoˬ. Ngaˬ hui te‸ chiˉ kʼoˆ maˇ gʼa. Ya‸ hkʼaˇ, nawˬ geh teˇ geh yehˬ hkʼaw lo chehˇ taˍ ve chaw teˇ gʼaˇ gʼaˇ teˇ ceuˬ ceuˬ hpeh‸ ve kʼo, oˇ ve lehˬ ngaˬ hui ve venˇbaˆ hpeh‸ tuˬ yoˬ.

20Ya‸ hkʼaˇ, ngaˬ huiˉ maˬ choˬ kaˬ lo aˬ hto‸ ma ca te la ve awˬ lawn nawˬ shu hta‸ hto piˇ ve kʼo, ngaˬ huiˉ maˬ nawˬ hta‸ te piˇ taˍ ve ka ti‸ hta‸ kʼaw‸ dawˇ nawˇ tuˬ ve maˇ heˆ, teh‸ yawˇ hta‸ kʼoˆ piˇ ve yoˬ.

21Yaˇ miˇ oˇ ve htawˇ nyi hkʼaˇ suh leh yawˇ huiˉ maˬ hta‸ tawˆ kʼai tcuh ve yoˬ. Oˇ ve hkʼaw‸ nawˉ, yawˇ lehˬ yehˬ miˉ ehˉ hta‸ nyiˉ-ehˍ ve aˉ caˆ hkeh oˇ ve yuˬ hpeh taˍ ve yoˬ.

22Hkʼe te leh yawˇ huiˉ maˬ hkʼaw hkʼoˆ lo taˆ-e leh ca va‸ taˍ ve yoˬ. Shehˆ nyi hkʼa gaˬ jawˇmawˇ ve ma‸ yaˇ teˇ hpaˍ yawˇ huiˉ maˬ hta‸ gʼa‸ ca chehˇ ve yoˬ. Ya‸ hkʼaˇ yawˇ hui ca maˇ mawˬ. Hkʼe te leh yawˇ hui Yeˍriˆhkoˇ venˇ lo kʼaw‸ kʼo‸-e ve yoˬ.

23Oˇ ve hkʼaw‸ nawˉ, chaw jaˆ oˇ ve nyiˇ gʼaˇ hkʼaw hkʼoˆ lo ya‸ la leh, iˉ kaˆ lawˬ hta‸ hkanˍ peuˬ hkʼaw‸ nawˉ Yawˇsuˆ geh kʼo‸-e ve yoˬ. Hpeh‸ la peuˬ ve awˬ lawn hkʼa peu-eˬ yawˇ hta‸ kʼaw‸ hto maˍ piˇ leh kʼoˆ ve,

24Mvuhˇmiˬ oˇ ve hkʼa peu-eˬ Gʼuiˬsha ngaˬ hui hta‸ piˇ laˇ taˍ peuˬ ve hta‸ ngaˬ huiˉ maˬ hkʼa deh‸ gʼa shiˍ ve yoˬ Awˬ lawn kʼo, chaw oˇ ve hkʼa peu-eˬ ngaˬ hui hta‸ kawˆ jehˇ chehˇ ve yoˬ, teh‸ yawˇ hta‸ kʼoˆ piˇ ve yoˬ.

← Chapter 1 Jump to: Chapter 3 →