Joshua 7

Lahu Bible Edited © Thailand Bible Society and Bible Society of Myanmar, 2010, 2020.

1Gʼuiˬsha te luˬ te sheˆ tcuh ve mawˇ teˇ ceuˬ hta‸ ka‸ taˇ yuˬ, teh‸ kʼoˆ piˇ taˍ ve tawˇ hta‸ Iˉsaˍreˍlaˆ chaw teˇ hpaˍ ponˬ leuˉ ve yoˬ. Aˍhkanˍ lehˬ, mawˇ teˇ hpaˍ hta‸ yuˬ faˉ taˍ ve yoˬ. Yawˇ lehˬ, Yuˇda‸ chaw ceuˬ, Zeˍraˆ, Zaˍbaˍdiˆ leh Kaˍmiˆ hui ve awˬ ceuˬ awˬ hkʼaˇ hpeh‸ ve yoˬ. Chi hta‸ pa taw, Gʼuiˬsha lehˬ Iˉsaˍreˍlaˆ chaw hui hta‸ nyi ma zuhˆ jaˇ ve yoˬ.

2Yawˇsuˆ lehˬ, Yeˍriˆhkoˇ venˇ hkʼaw chehˇ taˍ leh, yawˇ ve chaw teˇ hpaˍ hta‸ Beˍteˍlaˆ venˇ mvuhˇ nyi tawˆ hpawˇ, Beˍtaˍvenˍ venˇ awˬ na paˉ lo cawˬ ve Aˍiˆ venˇ hta‸ ca jaˆ nyi tcuh ve yoˬ.

3Yawˇ hui Yawˇsuˆ geh kʼaw‸ gaˬ la leh kʼoˆ ve, Venˇ oˇ ve hta‸ ca bawˆ yuˬ tuˬ ngaˬ hui hkʼa peu-eˬ kʼai tuˬ maˇ loˍ. Chaw nyiˇ, shehˆ hinˉ hkʼe ceh tiˉ kʼai ka‸ law‸ ve yoˬ. Awˬ lawn kʼo, venˇ oˇ ve lehˬ venˇ ehˉ ceh tiˉ hpeh‸ ve yoˬ, teh‸ yawˇ hta‸ kʼoˆ piˇ ve yoˬ.

4Hkʼe te leh, Iˉsaˍreˍlaˆ chaw shehˆ hinˉ gʼaˇ venˇ oˇ ve hta‸ ca bawˆ tuˬ tawˆ kʼai ve yoˬ. Ya‸ hkʼaˇ, Aˍiˆ venˇ hkʼaw chehˇ ve chaw teˇ hpaˍ yawˇ hui hta‸ gʼa‸ yuˬ kʼoˬ ve yoˬ.

5Canˇ paˍ teˇ hpaˍ lehˬ, yawˇ hui ve chaw 36 gʼaˇ hta‸ tiˇ pehˍ piˇ ve yoˬ. Yawˇ hui lehˬ, Iˉsaˍreˍlaˆ chaw hui hta‸ haˉ kʼoˍ cawˬ kuiˬ lo hkʼa gaˬ gʼa‸ yuˬ laˬ leh tiˇ pehˍ piˇ ve pa taw, Iˉsaˍreˍlaˆ chaw nyi ma luˬ leh kawˆ jaˇ ve yoˬ.

6Oˇ htaˇ, Yawˇsuˆ leh Iˉsaˍreˍlaˆ chaw awˬ hoˉ awˬ naˬ teˇ hpaˍ a shu yawˇ ve veu‸ kʼaˇ hta‸ tzuh‸ suhˍ leh, Gʼuiˬsha ka ti‸ shaˉ caˆ ta kʼoˍ gʼuˇ suhˍ lo boˆ taˍ ve yoˬ. Yawˇ hui lehˬ dawˇ haˍ ve hkʼaw a shu yawˇ ve oˉ kʼoˍ hkʼoˆ je‸ meu-e hkaˆ pfuhˍ leh, mvuhˇ hpeu‸ la htaˇ hkʼa gaˬ oˇ kaˬ lo boˆ chehˇ taˍ ve yoˬ.

7Oˇ ve hkʼaw‸ nawˉ Yawˇsuˆ kʼoˆ ve, Jaw mawˇ Gʼuiˬsha-oˬ, aˬ hto‸ ma pa taw nawˬ ngaˬ hui hta‸ Yawˇdanˍ iˉ kaˆ lawˬ choˬ hpawˇ lo hkanˍ tawˆ la tcuh laˇ ve le. Ngaˬ hui hta‸ Aˍmawˇriˆ chaw hui ve la‸ sheh hkʼaw chiˇ a‸ piˇ tuˬ awˬ pon laˇ. Ngaˬ hui hta‸ te luˬ te sheˆ laˇ tuˬ awˬ pon laˇ. Aˬ hto‸ ma pa taw, ngaˬ hui hta‸ Yawˇdanˍ iˉ kaˆ lawˬ coˇ paˉ hpawˇ lo ceh tiˉ maˇ chehˇ tcuh taˉ laˇ ve le.

8Gʼuiˬsha-oˬ, chi beu‸ Iˉsaˍreˍlaˆ chaw hui canˇ paˍ teˇ hpaˍ mehˆ gʼuˇ suhˍ lo gʼa gʼuiˇ hpaw toˇ chehˇ taˍ peuˬ ve pa taw, ngaˬ hkʼaˬ hkʼe gʼa kʼoˆ tuˬ le.

9Hkaˍnaˍniˆ chaw leh, awˬ nu ve chaw teˇ hpaˍ awˬ lawn chi hta‸ gʼa kaˇ tuˬ ve yoˬ. Yawˇ hui ngaˬ hui hta‸ caw hoˆ taˍ leh, ngaˬ hui hta‸ tiˇ pehˍ laˇ tuˬ ve yoˬ. Nawˬ ve awˬ me‸ awˬ hponˇ maˇ gʼa luˬ tuˬ, nawˬ hkʼaˬ hkʼe kʼaw‸ te tuˬ ve le, teh‸ Gʼuiˬsha hta‸ kʼoˆ piˇ ve yoˬ.

10Oˇ htaˇ Gʼuiˬsha Yawˇsuˆ hta‸ kʼoˆ piˇ ve, Tu la-o. Aˬ hto‸ ma pa taw nawˬ chi hkʼe boˆ chehˇ ve le.

11Iˉsaˍreˍlaˆ chaw teˇ hpaˍ venˇbaˆ te peuˬ. Ngaˬ maˇ te tcuh ve kanˉ hta‸ yawˇ hui te taˍ peuˬ. Ngaˬ te luˬ te sheˆ piˇ tuˬ kʼoˆ piˇ taˍ ve mawˇ teˇ hpaˍ hpaˍ hta‸ yawˇ hui yuˬ taˍ peuˬ. Yawˇ hui lehˬ, heˍ ve hkʼaw mawˇ oˇ ve teˇ hpaˍ hta‸ hkʼawˇ yuˬ leh, yawˇ hui ve mawˇ geh teh taˍ ve yoˬ.

12Chi hta‸ pa taw, Iˉsaˍreˍlaˆ chaw hui canˇ paˍ hta‸ tawˍ da‸ maˇ gʼaˇ ve yoˬ. Yawˇ hui lehˬ, luˬ ve sheˆ ve hta‸ hkanˍ keunˍ ve chaw hpeh‸ la peuˬ ve pa taw, canˇ paˍ mehˆ gʼuˇ suhˍ lo gʼa gʼuiˇ hpaw-e ve yoˬ. Ngaˬ taˇ yuˬ teh‸ kʼoˆ piˇ taˍ ve mawˇ oˇ ve teˇ hpaˍ hta‸ nawˬ maˇ te luˬ piˇ sheˍ ve ceh ceh, ngaˬ nawˬ geh kʼaw‸ chehˇ tuˬ ve maˇ heˆ.

13Tu la-o. Yawˇ hui hta‸ da‸ kehˬ piˇ leh yawˇ hui ngaˬ hta‸ hpuˇ da‸ tuˬ hkʼa deh‸ gu taˍ tuˬ hto piˇ-oˆ. Awˬ lawn kʼo, ngaˬ Iˉsaˍreˍlaˆ ve Gʼuiˬsha yawˇ hui hta‸ chi hkʼe kʼoˆ piˇ tuˬ cawˬ ve yoˬ. Iˉsaˍreˍlaˆ chaw teˇ hpaˍ-oˬ, ngaˬ te luˬ te sheˆ tcuh ve mawˇ teˇ hpaˍ chi beu‸ nawˬ hui geh cawˬ taˍ ve yoˬ. Nawˬ hui mawˇ chi ve teˇ hpaˍ hta‸ maˇ yuˬ baˬ sheˍ ve ceh ceh, canˇ paˍ teˇ hpaˍ hta‸ nawˬ hui tawˍ da‸ hpeh‸ tuˬ ve maˇ heˆ.

14Chi hta‸ pa taw, shawˉ pawˍ kʼo, nawˬ hui a shu yawˇ ve chaw ceuˬ cawˬ ve hkʼe, awˬ moˍ awˬ moˍ gʼa te chehˇ taˍ tuˬ yoˬ. Ngaˬ leuˆ tawˆ ve chaw ceuˬ lehˬ, a shu yawˇ ve awˬ ceuˬ awˬ hkʼaˇ hta‸ shiˍ leh, shu gʼuˇ suhˍ gʼa tawˆ la tuˬ yoˬ. Oˇ ve awˬ hkʼaw lo ngaˬ kʼaw‸ leuˆ tawˆ tuˬ sheˍ ve awˬ ceuˬ awˬ hkʼaˇ teˇ hpaˍ lehˬ, a shu yawˇ ve yehˬ yaˇ kʼa yaˇ hta‸ shiˍ leh shu gʼuˇ suhˍ gʼa tawˆ la tuˬ yoˬ. Ngaˬ teˇ pawˆ kʼaw‸ leuˆ tawˆ tuˬ sheˍ ve yehˬ yaˇ kʼa yaˇ oˇ ve teˇ hpaˍ ve yehˬ shehˍ hpaˇ teˇ hpaˍ lehˬ, shu gʼuˇ suhˍ gʼa tawˆ la tuˬ yoˬ.

15Mawˇ oˇ ve teˇ hpaˍ hta‸ yuˬ taˍ ve chaw hta‸ yawˇ ve yehˬ yaˇ kʼa yaˇ leh yawˇ ve mawˇ jeˬ geh teˇ geh aˬ miˍ gʼa tuˉ baˬ ve yoˬ. Awˬ lawn kʼo, yawˇ lehˬ ya‸ taw tuˬ uiˍ jaˇ ve kanˉ hta‸ te peuˬ leh, ngaˬ ve ka ti‸ hta‸ te luˬ peuˬ ve pa taw yoˬ, teh‸ Yawˇsuˆ hta‸ kʼoˆ piˇ ve yoˬ.

16Yawˇsuˆ mvuhˇ shawˉ teˇ na‸ tu la leh, a shu yawˇ ve chaw ceuˬ cawˬ ve hkʼe, awˬ moˍ awˬ moˍ te shiˍ tawˆ la ve yoˬ. Oˇ htaˇ, Yuˇda‸ awˬ ceuˬ awˬ hkʼaˇ hta‸ leuˆ tawˆ la ve yoˬ.

17Zeˍraˆ ve awˬ ceuˬ awˬ hkʼaˇ hta‸ shu gʼuˇ suhˍ lo shiˍ tawˆ la peuˬ hkʼaw‸ nawˉ, Zaˍbaˍdiˆ ve yehˬ yaˇ kʼa yaˇ teˇ hpaˍ hta‸ kʼaw‸ leuˆ tawˆ la ve yoˬ.

18Zaˍbaˍdiˆ lehˬ, yawˇ ve yehˬ yaˇ kʼa yaˇ hta‸ shu gʼuˇ suhˍ lo kʼaw‸ shiˍ tawˆ la leh, Aˍhkanˍ hta‸ leuˆ tawˆ la ve yoˬ. Yawˇ lehˬ, Yuˇda‸ ve chaw ceuˬ Kaˍmiˇ ve yaˇ hpeh‸ leh, Aˍbaˍdiˆ ve awˬ hawehˍ hpeh‸ ve yoˬ.

19Oˇ htaˇ Yawˇsuˆ Aˍhkanˍ hta‸ kʼoˆ piˇ ve, Ngaˬ yaˇ paˍ-oˬ, Iˉsaˍreˍlaˆ ve Jawˇmawˇ Gʼuiˬsha mehˆ gʼuˇ suhˍ hteˇ ve cawˇ ve hkʼaw nawˬ ve venˇbaˆ hta‸ hpeu‸ maˍ laˇ-oˆ. Nawˬ hkʼaˬ hkʼe te taˍ peuˬ ve chi beu‸ ngaˬ hta‸ hto laˇ-oˆ. Ngaˬ hta‸ te‸ chiˉ taˇ faˉ taˍ, teh‸ kʼoˆ piˇ ve yoˬ.

20Aˍhkanˍ kʼaw‸ yaw hkʼaw‸ leh kʼoˆ ve, Yoˬ, ngaˬ lehˬ Iˉsaˍreˍlaˆ Jawˇmawˇ Gʼuiˬsha hta‸ te ya‸ peuˬ ve yoˬ. Ngaˬ chi hkʼe gʼa te taˍ peuˬ.

21Ngaˬ hui yuˬ gʼa taˍ ve mawˇ teˇ hpaˍ hkʼaw, hpu teˇ cawehˬ hpaˆ leh nyiˇ hkanˉ hkʼe cawˬ ve shi taˬ teˇ maˬ, Baˍbuˍlonˍ mvuhˇmiˬ hkʼaw tawˆ ve da‸ jaˇ ve aˉ po‸ lonˉ teˇ hkʼoˆ hta‸ ngaˬ gʼa mawˬ ve yoˬ. Oˇ ve teˇ hpaˍ hta‸ ngaˬ heuˆ gaˇ ve pa taw yuˬ kʼaw‸ la leh ngaˬ ve aˉ po kʼo hkʼaw duˇ faˉ taˍ ve hta‸ nawˬ gʼa mawˬ tuˬ yoˬ, teh‸ yawˇ hta‸ kʼoˆ piˇ ve yoˬ.

22Yawˇsuˆ lehˬ, chaw hta‸ hpehˇ leh yawˇ ve aˉ po kʼo hkʼaw ca hpfuhˆ nyi tcuh ve teˇ yanˇ, mawˇ oˇ ve teˇ hpaˍ hta‸ awˬ tehˬ awˬ na gʼa mawˬ ve yoˬ.

23Yawˇ hui lehˬ, mawˇ oˇ ve teˇ hpaˍ hta‸ Yawˇsuˆ leh Iˉsaˍreˍlaˆ chaw chi ma ve geh yuˬ veu laˇ leh, Gʼuiˬsha mehˆ gʼuˇ suhˍ teh taˍ ve yoˬ.

24Oˇ ve hkʼaw‸ nawˉ, Yawˇsuˆ leh Iˉsaˍreˍlaˆ chaw teˇ hpaˍ lehˬ, Aˍhkanˍ leh yawˇ hkʼawˇ yuˬ taˍ ve mawˇ oˇ ve teˇ hpaˍ hta‸ maˇ kʼoˆ, yawˇ ve miˇ yaˇ teˇ hpaˍ leh yawˇ ve ceˇ hkʼa peu-eˬ ve hta‸ maˇ kʼoˆ, Dawˇ haˍ ve lawˬ hkʼo‸, lo yuˬ kʼai ve yoˬ.

25Oˇ htaˇ Yawˇsuˆ kʼoˆ ve, Aˬ hto‸ ma pa taw nawˬ ngaˬ hui awˬ hkʼoˆ lo dawˇ haˍ tuˬ gaˬ la piˇ lawˬ ve le. Gʼuiˬsha lehˬ, chi beu‸ nawˬ awˬ hkʼoˆ lo dawˇ haˍ tuˬ kʼaw‸ gaˬ la piˇ tuˬ yoˬ, teh‸ Aˍhkanˍ hta‸ kʼoˆ piˇ ve yoˬ. Hkʼe te leh, Iˉsaˍreˍlaˆ chaw teˇ hpaˍ Aˍhkanˍ leh yawˇ ve yehˬ yaˇ kʼa yaˇ teˇ hpaˍ hta‸ haˉ pui baˬ pehˍ ve yoˬ. Yawˇ ve mawˇ jeˬ teˇ hpaˍ hta‸ htawˇ, aˬ miˍ tuˉ baˬ ve yoˬ.

26Oˇ hkʼe te peuˬ hkʼaw‸ nawˉ, yawˇ awˬ hkʼoˆ hta‸ haˉ pui teˇ hpoˆ lonˉ gʼawˆ hpoˆ piˇ ve yoˬ. Haˉ pui hpoˆ oˇ ve ya‸ nyi hkʼa gaˬ cawˬ taˍ sheˍ ve yoˬ. Hkʼe te leh chehˇ kuiˬ oˇ ve hta‸ ya‸ nyi hkʼaˬ gaˬ, Dawˇ haˍ ve lawˬ hkʼo‸, teh‸ meh piˇ taˍ ve yoˬ. Oˇ ve hkʼaw‸ nawˉ, Gʼuiˬsha nyi ma zuhˆ ve mehˉ kʼai ve yoˬ.

← Chapter 6 Jump to: Chapter 8 →