Joshua 4

Lahu Bible Edited © Thailand Bible Society and Bible Society of Myanmar, 2010, 2020.

← Chapter 3 Jump to: Chapter 5 →

1Iˉsaˍreˍlaˆ chaw hkʼa peu-eˬ, Yawˇdanˍ lawˬ hta‸ hkanˍ tawˆ-e peuˬ ve teˇ yanˇ, Gʼuiˬsha Yawˇsuˆ hta‸ chi hkʼe kʼoˆ piˇ ve yoˬ.

2Iˉsaˍreˍlaˆ chaw teˇ chi nyiˇ ceuˬ cawˬ ve hkʼe chaw teˇ chi nyiˇ gʼaˇ hta‸ leuˆ yuˬ leh,

3Yawˇdanˍ lawˬ awˬ kʼaw ji, paw hkuˇ teˇ hpaˍ huˉ chehˇ taˍ kuiˬ lo cawˬ ve haˉ pui shiˍ teˇ chi nyiˇ shiˍ hta‸ gʼawˆ yuˬ tcuh leh, ya‸ puiˉ nawˬ hui ca haˉ tuˬ ve chehˇ kuiˬ lo teh taˍ-o‸, teh‸ Yawˇsuˆ hta‸ kʼoˆ piˇ ve yoˬ.

4Oˇ htaˇ Yawˇsuˆ lehˬ, yawˇ leuˆ yuˬ taˍ ve chaw teˇ chi nyiˇ gʼaˇ hta‸ kuˬ yuˬ leh,

5Nawˬ hui Yawˇdanˍ iˉ kaˆ lawˬ hkʼaw Gʼuiˬsha ve ka ti‸ shaˉ caˆ ta kʼoˍ gʼuˇ suhˍ lo kʼai leh, Iˉsaˍreˍlaˆ chaw teˇ chi nyiˇ ceuˬ awˬ pon haˉ pui shiˍ teˇ chi nyiˇ shiˍ ca gʼawˆ taˆ veu laˇ-oˆ.

6Haˉ pui shiˍ chi ve teˇ hpaˍ lehˬ, Gʼuiˬsha hkʼaˬ hkʼe te laˇ taˍ peuˬ ve hta‸ dawˇ nawˇ tuˬ awˬ pon hpeh‸ ve yoˬ. Awˬ hkʼaw‸ nawˉ nawˬ hui ve yaˇ teˇ hpaˍ lehˬ, Haˉ pui chi teˇ hpaˍ aˬ hto‸ ma tcuhˉ kuiˬ cawˬ le, teh‸ na nyi laˇ ve kʼo,

7Gʼuiˬsha ve ka ti‸ shaˉ caˆ ta kʼoˍ Yawˇ danˍ lawˬ hta‸ hkanˍ ve teˇ yanˇ, iˉ kaˆ ya‸ la chehˇ ve jehˇ sheˬ ve yoˬ. Haˉ pui shiˍ chi ve teˇ hpaˍ lehˬ, awˬ lawn oˇ ve hta‸ dawˇ nawˇ tuˬ awˬ pon hpeh‸ ve yoˬ, teh‸ yawˇ hui hta‸ gʼa kʼoˆ maˍ piˇ tuˬ yoˬ, teh‸ Yawˇsuˆ yawˇ hui hta‸ kʼoˆ piˇ ve yoˬ.

8Chaw oˇ ve teˇ hpaˍ lehˬ, Yawˇsuˆ kʼoˆ ve hkʼe te ve yoˬ. Iˉsaˍ reˍlaˆ chaw 12 ceuˬ awˬ pon yawˇ hui Yawˇdanˍ iˉ kaˆ lawˬ awˬ kʼaw ji lo cawˬ ve haˉ pui 12 shiˍ gʼawˆ taˆ veu laˇ leh, yawˇ hui deh kuiˬ lo teh taˍ ve yoˬ.

9Paw hkuˇ teˇ hpaˍ Gʼuiˬsha ve ka ti‸ shaˉ caˆ ta kʼoˍ taˆ leh huˉ chehˇ taˍ kuiˬ Yawˇdanˍ iˉ kaˆ lawˬ awˬ kʼaw ji lo, Yawˇsuˆ lehˬ haˉ pui shiˍ 12 shiˍ kʼaw‸ gʼawˆ hpoˆ tcuh ve yoˬ. (Haˉ pui hpoˆ oˇ ve ya‸ nyi hkʼa gaˬ oˇ kaˬ lo cawˬ taˍ sheˍ ve yoˬ.)

10Gʼuiˬsha Yawˇsuˆ hta‸ te tcuh ve kanˉ hkʼa peu-eˬ hta‸ te peuˬ htaˇ hkʼa gaˬ, paw hkuˇ teˇ hpaˍ lehˬ, Yawˇdanˍ iˉ kaˆ lawˬ awˬ kʼaw ji lo ceh tiˉ huˉ taˍ ve yoˬ. Chi hkʼe te tuˬ, Moˉseˍ tawˇ piˇ taˉ ve yoˬ. Oˇ ve teˇ yanˇ, chaw yaˇ teˇ hpaˍ haˆ haˆ hkanˍ tawˆ-e ve yoˬ.

11Yawˇ hui hkʼa peu-eˬ hkanˍ tawˆ-e peuˬ ve teˇ yanˇ, Gʼuiˬsha ve ka ti‸ shaˉ caˆ ta kʼoˍ taˆ taˍ ve paw hkuˇ teˇ hpaˍ chaw moˍ lonˉ gʼuˇ suhˍ kʼaw‸ kʼai ve yoˬ

12Ruˇbenˍ, Gaˆ, leh Maˍnaˍseˍ awˬ ceuˬ awˬ hkʼaˇ teˇ hkoˇ ve lehˬ, shu awˬ gʼuˇ suhˍ hkanˍ tawˆ-e ve yoˬ. Yawˇ hui lehˬ Moˉseˍ kʼoˆ piˇ taˍ ve hkʼe, ma‸ bawˆ tuˬ hkʼa deh‸ gu taˍ ve yoˬ.

13Gʼuiˬsha mehˆ gʼuˇ suhˍ ma‸ bawˆ tuˬ hkʼa deh‸ gu taˍ ve chaw awˇ meunˍ gʼaˇ Yeˍriˆhkoˇ venˇ paˇ lo hkanˍ tawˆ-e ve yoˬ.

14Oˇ ve teˇ nyi Gʼuiˬsha te ve kanˉ hta‸ pa taw, Iˉsaˍreˍlaˆ chaw teˇ hpaˍ Yawˇsuˆ hta‸ chaw uiˍ teˇ gʼaˇ hkʼe shawˍ taˍ ve yoˬ. Yawˇ hui Moˉseˍ hta‸ yawˆ yan ve hkʼe, Yawˇsuˆ a sha‸ leh htaˇ hkʼa gaˬ yawˇ hui yawˇ hta‸ yawˆ yan ve yoˬ.

15Oˇ ve hkʼaw‸ nawˉ Gʼuiˬsha lehˬ, Ka ti‸ shaˉ caˆ ta kʼoˍ taˆ taˍ ve paw hkuˇ teˇ hpaˍ hta‸ Yawˇ danˍ iˉ kaˆ lawˬ hkʼaw tawˆ la tuˬ kʼoˆ piˇ-oˆ, teh‸ Yawˇsuˆ hta‸ kʼoˆ piˇ ve yoˬ. Hkʼe te leh Yawˇ suˆ yawˇ hui hta‸ tawˆ la tuˬ kʼoˆ piˇ ve yoˬ.

18Paw hkuˇ teˇ hpaˍ iˉ kaˆ hkʼaw tawˆ la ve teˇ yanˇ, iˉ kaˆ teˇ hpaˍ ponˬ laˬ htaˇ hkʼe kʼaw‸ ya‸-e ve yoˬ.

19Iˉsaˍreˍlaˆ chaw teˇ hpaˍ, Yawˇdanˍ lawˬ hta‸ awˉ lawˉ peuˇ ve teˇ ha pa 12 nyi htaˇ hkanˍ tawˆ-e leh, Yeˍriˆhkoˇ venˇ mvuhˇ nyi tawˆ hpawˇ Giˇlaˍgaˍ teh‸ kʼoˆ ve chehˇ kuiˬ lo deh chehˇ taˍ ve yoˬ.

20Yawˇdanˍ iˉ kaˆ lawˬ hkʼaw gʼawˆ veu laˇ ve haˉ pui shiˍ teˇ chi nyiˇ shiˍ hta‸ Yawˇsuˆ oˇ kaˬ lo duˇ ti leh kʼoˆ ve,

21Awˬ hkʼaw‸ nawˉ nawˬ hui ve yaˇ teˇ hpa, Haˉ pui shiˍ chi ve teˇ hpaˍ aˬ hto‸ ma le, teh‸ na nyi laˇ tuˬ yoˬ.

22Iˉsaˍreˍlaˆ chaw hui lehˬ, Yawˇdanˍ iˉ kaˆ lawˬ hkʼaw goˇ lehˍ ve miˬguiˬ hkʼoˆ ya‸ kʼaw juˇ kʼai ve awˬ lawn nawˬ hui gʼa kʼoˆ maˍ piˇ tuˬ yoˬ.

23Nawˬ hui ve Jawˇmawˇ Gʼuiˬsha lehˬ, laˇ tsuhˇ gʼuiˬ hkʼaw goˇ lehˍ ve miˬguiˬ tawˆ la piˇ ve hkʼe, Yawˇ danˍ iˉ kaˆ lawˬ hta‸ htawˇ nawˬ hui hkanˍ tawˆ-e peuˬ htaˇ hkʼa gaˬ, yawˇ goˇ kʼai piˇ ve yoˬ.

24Awˬ ceuˬ chi ve hta‸ pa taw, miˬguiˬ hkʼoˆ chehˇ ve chaw hkʼa peu-eˬ Gʼuiˬsha ve kanˇ paˆ hta‸ gʼa mawˬ gʼa shiˍ leh, nawˬ hui lehˬ Gʼuiˬsha hta‸ co co taiˍ taiˍ taˍ uiˍ taˍ mvuh piˇ tuˬ yoˬ, teh‸ Iˉsaˍreˍlaˆ chaw hui hta‸ kʼoˆ piˇ ve yoˬ.

← Chapter 3 Jump to: Chapter 5 →