Joshua 23

Lahu Bible Edited © Thailand Bible Society and Bible Society of Myanmar, 2010, 2020.

← Chapter 22 Jump to: Chapter 24 →

1Gʼuiˬsha lehˬ, Iˉsaˍreˍlaˆ chaw hui hta‸ mvuhˇmiˬ hkʼaw gawˬ lehˍ chehˇ tcuh piˇ peuˬ hkʼaw‸ nawˉ, awˬ hkʼaw‸ awˬ yanˇ maw la ve teˇ yanˇ, Yawˇsuˆ htawˇ mawˇ la peuˬ ve yoˬ.

2Oˇ htaˇ yawˇ lehˬ, Iˉsaˍreˍlaˆ chaw awˬ hoˉ awˬ naˬ hkʼa peu-eˬ ve hta‸ kuˬ hpawnˬ leh, yawˇ hui hta‸ chi hkʼe kʼoˆ piˇ ve yoˬ. Ngaˬ lehˬ, chi beu‸ mawˇ jaˇ peuˬ.

3Gʼuiˬsha lehˬ, nawˬ hui awˬ pon choˬ kaˬ lo chehˇ ve chaw teˇ hpaˍ hta‸ hkʼaˬ hkʼe te piˇ taˍ ve hta‸ nawˬ hui gʼa mawˬ taˍ peuˬ. Nawˬ hui ve Gʼuiˬsha lehˬ, nawˬ hui awˬ pon ma‸ bawˆ laˇ chehˇ ve yoˬ.

4Chi hta‸ pa taw, na ta sheˍ. Mvuhˇ nyi tawˆ hpawˇ lo cawˬ ve Yawˇ danˍ iˉ kaˆ lawˬ hta‸ te leh, mvuhˇ nyi kʼehˬ hpawˇ lo cawˬ ve Awˬ kʼaw ji ve laˇ tsuhˇ gʼuiˬ lo hkʼa gaˬ, cawˬ taˍ sheˍ ve mvuhˇmiˬ teˇ hpaˍ leh ngaˬ bawˆ yuˬ taˍ peuˬ ve mvuhˇmiˬ teˇ hpaˍ, ngaˬ nawˬ hui hta‸ hkʼa deh‸ pehˬ piˇ taˍ peuˬ.

5Gʼuiˬsha lehˬ mvuhˇmiˬ oˇ ve teˇ hpaˍ hkʼaw chehˇ taˍ ve chaw hui hta‸ gʼa‸ kʼoˬ laˇ tuˬ yoˬ. Gʼuiˬsha ka ti‸ cawˬ taˍ ve hkʼe, mvuhˇmiˬ oˇ ve teˇ hpaˍ yawˇ nawˬ hui hta‸ piˇ laˇ tuˬ yoˬ.

6Chi hta‸ pa taw, Moˉseˍ ve awˬliˇtawˇhkawˇ li‸ daw hkʼaw bvuh‸ taˍ ve hkʼa peu-eˬ hta‸ hkʼa deh‸ na yuˬ leh te-o.

7Nawˬ hui lehˬ, nawˬ hui geh chehˇ taˍ ve chaw hui hta‸ awˬ chawˇ te leh, yawˇ hui ve awˬ meh hta‸ cuˇ leh maˇ gʼa hkanˍ tuˬ, awˬliˇtawˇhkawˇ teˇ maˬ hta‸ ka‸ taˇ chiˇ baˬ taˉ.

8Chi beu‸ hkʼa shuˍ, hkʼaˬ htaˆ ka‸ Gʼuiˬsha hta‸ ka ti‸ yeˬ chehˇ-oˆ.

9Gʼuiˬsha lehˬ, awˬ gʼaˇ uiˍ jaˇ ve chaw ceuˬ teˇ hpaˍ hta‸ gʼa‸ kʼoˬ piˇ taˍ peuˬ. Ya‸ nyi hkʼa gaˬ chaw oˇ ve teˇ hpaˍ nawˬ hui hta‸ tawˍ da‸ tuˬ te maˇ hpeh‸ sheˍ.

10Gʼuiˬsha lehˬ ka ti‸ cawˬ taˍ ve hkʼe, nawˬ hui awˬ pon ma‸ bawˆ laˇ chehˇ ve pa taw, nawˬ hui teˇ gʼaˇ tiˉ hpeh‸ ve htawˇ, chaw teˇ hinˉ gʼaˇ hta‸ gʼa‸ kʼoˬ piˇ gʼa tuˬ yoˬ.

11Nawˬ hui ve Jawˇmawˇ Gʼuiˬsha hta‸ ha‸ tuˬ, hkʼaˬ htaˆ ka‸ dawˇ nawˇ tcuhˉ taˍ-o‸.

12Nawˬ hui lehˬ, awˬ hkʼaw nawˉ hpfuhˆ kʼo‸-e leh, awˬ nu ve chaw ceuˬ teˇ hpaˍ hta‸ awˬ chawˇ te ve hkʼaw yawˇ hui hta‸ heuˆ ve kʼo,

13Gʼuiˬsha lehˬ chaw chi teˇ hpaˍ hta‸ gʼa‸ kʼoˬ laˇ tuˬ ve maˇ heˆ ve hta‸ hkʼa deh‸ shiˍ taˍ-o‸. Yawˇ hui lehˬ nawˬ hui awˬ pon kawˆ tuˬ uiˍ ve miˬ kʼoˍ leh, va teˇ hpaˍ hkʼa shuˍ hpeh‸ leh, jaw‸ laˇ ve leh mehˆ shiˍ hkʼaw aˉ chuˇ tcuhˍ laˇ ve hta‸ gʼa hkanˍ ve hkʼe hpeh‸ tuˬ yoˬ. Chi ve lehˬ, Gʼuiˬsha nawˬ hui hta‸ piˇ laˇ taˍ ve da‸ jaˇ ve mvuhˇmiˬ chi hkʼaw nawˬ hui gʼa tawˆ kʼai htaˇ hkʼa gaˬ hpeh‸ tuˬ yoˬ.

14Chi beu‸ ngaˬ lehˬ suh la paˇ neˇ peuˬ ve yoˬ. Gʼuiˬsha lehˬ ka ti‸ cawˬ taˍ ve hkʼe, nawˬ hui hta‸ da‸ ve awˬ bon laiˉ ceuˬ na‸ laˇ taˍ peuˬ ve hta‸ nawˬ hui teˇ gʼaˇ le le hkʼa deh‸ shiˍ taˍ ve yoˬ. Yawˇ ka ti‸ te taˍ ve awˬ ceuˬ hkʼa peu-eˬ hta‸ yawˇ te biˇ peuˬ. Yawˇ ve ka ti‸ teˇ maˬ ka‸ maˇ luˬ kʼai.

15Yoˬ, Gʼuiˬsha lehˬ ka ti‸ cawˬ taˍ ve hkʼe, nawˬ hui hta‸ da‸ ve awˬ bon laiˉ ceuˬ na‸ laˇ taˍ peuˬ.

16Ya‸ hkʼaˇ, nawˬ hui lehˬ Gʼuiˬsha kʼoˆ taˍ ve hkʼe, yawˇ ve ka ti‸ tawˇ hkawˇ teˇ hpaˍ hta‸ maˇ na yuˬ leh awˬ kaˍ awˬ nu ve gʼuiˬsha teˇ hpaˍ hta‸ oˉ kʼoˍ ca pui ve kʼo, yawˇ nawˬ hui hta‸ piˇ laˇ taˍ ve da‸ jaˇ ve mvuhˇmiˬ chi hkʼaw, nawˬ hui teˇ gʼaˇ ka‸ maˇ cawˬ taˉ htaˇ hkʼa gaˬ, yawˇ nawˬ hui hta‸ ciˍ yanˍ laˇ tuˬ ve yoˬ, teh‸ yawˇ hui hta‸ kʼoˆ piˇ ve yoˬ.

← Chapter 22 Jump to: Chapter 24 →