Joshua 8

Lahu Bible Edited © Thailand Bible Society and Bible Society of Myanmar, 2010, 2020.

1Oˇ ve hkʼaw‸ nawˉ Gʼuiˬsha Yawˇsuˆ hta‸ kʼoˆ piˇ ve, Taˇ kawˆ. Nyi ma taˇ luˬ. Nawˬ ve ma‸ yaˇ hkʼa peu-eˬ hta‸ shiˍ veu leh Aˍiˆ venˇ lo kʼai-o. Venˇ oˇ ve hta‸ uˉ peunˍ chehˇ ve jawˇmawˇ leh yawˇ ve chaw hkʼa peu-eˬ hta‸ ngaˬ nawˬ ve la‸ sheh hkʼaw chiˇ a‸ laˇ tuˬ yoˬ.

2Yeˍriˆhkoˇ venˇ leh jawˇmawˇ hta‸ te piˇ ve hkʼe, Aˍiˆ venˇ leh jawˇmawˇ hta‸ htawˇ oˇ ve hkʼa shuˍ te piˇ-oˆ. Ya‸ hkʼaˇ, chi teˇ pawˆ mawˇ jeˬ leh ceˇ caˬ teˇ hpaˍ hta‸ nawˬ hui yuˬ hpeh‸ ve yoˬ. Yawˇ hui maˇ dawˇ maˇ gaˇ te chehˇ htaˇ, venˇ oˇ ve hta‸ bawˆ yuˬ tuˬ hkʼa deh‸ gu taˍ-o‸, teh‸ Yawˇsuˆ hta‸ kʼoˆ piˇ ve yoˬ.

3Oˇ htaˇ Yawˇsuˆ lehˬ, Aˍiˆ venˇ hta‸ ca bawˆ yuˬ tuˬ hkʼa deh‸ gu taˍ ve yoˬ. Yawˇ lehˬ, ha‸ hanˉ jaˇ ve ma‸ yaˇ shehˆ meunˍ gʼaˇ hta‸ leuˆ yuˬ leh, mvuhˇ hpeu‸ htaˇ tawˆ kʼai tcuh ve yoˬ.

4Yawˇ yawˇ hui hta‸ tawˇ chi hkʼe shanˍ piˇ taˍ ve yoˬ. Nawˬ hui venˇ hta‸ maˇ vuiˇ maˇ neˇ kuiˬ lo ca va‸ taˍ leh venˇ hta‸ bawˆ yuˬ tuˬ hkʼa deh‸ gu taˍ-o‸.

5Ngaˬ leh ngaˬ ve chaw teˇ hpaˍ venˇ lo hteˇ lehˍ kʼai tuˬ yoˬ. Yawˇ hui ngaˬ hui hta‸ ca bawˆ la tuˬ tawˆ la ve teˇ yanˇ, awˉ lawˉ teˇ pawˆ htaˇ hkʼe ngaˬ hui gʼuiˇ hpaw-e maˍ piˇ tuˬ yoˬ.

6Yawˇ hui venˇ hta‸ vuiˇ ve chehˇ kuiˬ lo gaˬ htaˇ hkʼa gaˬ ngaˬ hui gʼuiˇ hpaw-e maˍ piˇ leh, yawˇ hui ngaˬ hui hkʼaˇ suh gʼa‸ yuˬ laˬ tuˬ yoˬ. Awˉ lawˉ teˇ pawˆ htaˇ hkʼa shuˍ ngaˬ hui gʼuiˇ hpaw-e chehˇ ve yoˬ, teh‸ yawˇ hui dawˇ chehˇ tuˬ yoˬ.

7Oˇ htaˇ nawˬ hui va‸ taˍ kuiˬ lo tawˆ la leh venˇ hta‸ bawˆ yuˬ-o‸. Nawˬ hui ve Jawˇmawˇ Gʼuiˬsha lehˬ, venˇ oˇ ve nawˬ hui hta‸ piˇ laˇ tuˬ yoˬ.

8Nawˬ hui venˇ oˇ ve hta‸ bawˆ yuˬ gʼa peuˬ ve kʼo, Gʼuiˬsha kʼoˆ taˍ ve hkʼe venˇ oˇ ve hta‸ aˬ miˍ tuˉ baˬ-o‸. Chi ve lehˬ nawˬ hui na yuˬ leh gʼa te tuˬ ve kanˉ hpeh‸ ve yoˬ, teh‸ yawˇ hui hta‸ kʼoˆ piˇ ve yoˬ.

9Oˇ ve hkʼaw‸ nawˉ, Yawˇsuˆ yawˇ hui hta‸ tawˆ kʼai tcuh leh yawˇ hui lehˬ, Aˍiˆ venˇ mvuhˇ nyi kʼehˬ hpawˇ Aˍiˆ venˇ leh Beˍteˍlaˆvenˇ awˬ kaˍ lo ca va‸ taˍ ve yoˬ. Yawˇsuˆ lehˬ, oˇ ve teˇ haˉ yawˇ hui deh chehˇ taˍ kuiˬ lo haˉ taˍ ve yoˬ.

10Shawˉ pawˍ mvuhˇ shawˉ teˇ na‸ Yawˇsuˆ tu la leh, yawˇ ve ma‸ yaˇ teˇ hpaˍ hta‸ kuˬ hpawnˬ ve yoˬ. Peuˬ hkʼaw‸ nawˉ, yawˇ leh Iˉsaˍreˍlaˆ awˬ hoˉ awˬ naˬ teˇ hpaˍ lehˬ, ma‸ yaˇ oˇ ve teˇ hpaˍ hta‸ shiˍ veu leh Aˍiˆ venˇ lo kʼai ve yoˬ.

11Yawˇ ve ma‸ yaˇ teˇ hpaˍ Aˍiˆ venˇ lo kʼai leh, venˇ oˇ ve awˬ na hpawˇ teˇ ceˍ lo deh chehˇ taˍ ve yoˬ. Yawˇ hui deh chehˇ kuiˬ leh, Aˍiˆ venˇ awˬ kaˍ lo lawˬ hkʼo‸ teˇ ma hkanˍtaˍ ve yoˬ.

12Yawˇ lehˬ ma‸ yaˇ ngaˇ hinˉ gʼaˇ hta‸ shiˍ veu leh, venˇ mvuhˇ nyi kʼehˬ hpawˇ, Aˍiˆ venˇ leh Beˍtaˍlaˆ venˇ awˬ kaˍ lo ca va‸ taˍ tcuh ve yoˬ.

13Ma‸ bawˆ tuˬ awˬ pon yawˇ awˬ hkʼaˇ chi hkʼe gu taˍ ve yoˬ. Yawˇ ve ma‸ moˍ lonˉ hta‸ venˇ awˬ na hpawˇ teˇ ceˍ lo teh taˍ leh, awˬ nu ve ma‸ yaˇ teˇ hpaˍ hta‸ mvuhˇ nyi kʼehˬ hpawˇ teˇ ceˍ lo teh taˍ ve yoˬ. Oˇ ve teˇ haˉ yawˇ lehˬ lawˬ hkʼo‸ hkʼaw haˉ ve yoˬ.

14Aˍiˆ venˇ hta‸ uˉ peunˍ chehˇ ve jawˇmawˇ lehˬ, Yawˇsuˆ ve ma‸ yaˇ teˇ hpaˍ hta‸ gʼa mawˬ ve teˇ yanˇ, aˉ suhˆ htaˇ teˇ pawˆ hkʼa shuˍ la‸ haˉ gʼa‸ bawˆ tuˬ tawˆ la ve yoˬ. Shu nyiˇ hpawˇ lo va‸ taˍ leh yawˇ hui hta‸ hoˆ bawˆ la tuˬ ve hta‸ yawˇ maˇ shiˍ.

15Yawˇ suˆ leh yawˇ ve ma‸ yaˇ teˇ hpaˍ lehˬ kawˆ ve hkʼe te leh, heh puiˉ hkʼaw lo gʼuiˇ hpaw-e ve yoˬ.

16Venˇ oˇ ve awˬ hkʼaw lo hkʼa chehˇ taˍ ve hawˉ hkʼaˆ paˍ hkʼa peu-eˬ lehˬ, jawˇmawˇshiˍ veu leh Iˉsaˍreˍlaˆ chaw hui hkʼaˇ suh gʼa‸ yuˬ kʼai peuˬ ve yoˬ. Yawˇ hui Yawˇsuˆ hkʼaˇ suh gʼa‸ yuˬ kʼai leh, venˇ hta‸ shaˬ te shaˬ vuiˇ kʼai ve yoˬ.

17Aˍiˆ venˇ hkʼaw hkʼa chehˇ taˍ ve hawˉ hkʼaˆ paˍ hkʼa peu-eˬ Iˉsaˍreˍlaˆ chaw hui hkʼaˇ suh gʼa‸ yuˬ kʼai peuˬ ve yoˬ. Venˇ hta‸ chaw teˇ gʼaˇ ka‸ maˇ shaw taˉ leh, venˇ taˍ meu‸ hpe‸ hta‸ htawˇ hkʼe leˇ hpaw baˬ taˉ ve yoˬ.

18Oˇ htaˇ Gʼuiˬsha lehˬ, Aˍiˆ venˇ hpawˇ lo nawˬ ve gehˇ hta‸ che peu-o. Venˇ oˇ ve ngaˬ nawˬ hta‸ piˇ laˇ ve yoˬ, teh‸ Yawˇsuˆ hta‸ kʼoˆ piˇ ve yoˬ. Gʼuiˬsha kʼoˆ ve hkʼe Yawˇsuˆ na yuˬ leh te ve yoˬ.

19Yawˇ ve la‸ sheh hta‸ chiˇ ve teˇ yanˇ va‸ taˍ ve ma‸ yaˇ teˇ hpaˍ pawˆ tu la leh venˇ hkʼaw gʼuiˇ lo‸-e ve yoˬ. Hkʼe te leh yawˇ hui venˇ hta‸ aˬ miˍ tuˉ baˬ ve yoˬ.

20Aˍiˆ venˇ ve ma‸ yaˇ teˇ hpaˍ hkʼaw‸ nawˉ hpawˇ lo hpfuhˆ nyi leh, mvuhˇ hkʼawˇ naˆ dawˇ lonˉ mvuh naw hkʼoˆ taˆ-e chehˇ ve hta‸ yawˇ hui gʼa mawˬ ve yoˬ. Yawˇ hui gʼuiˇ hpaw-e kuiˬ maˇ cawˬ. Awˬ lawn kʼo, heh puiˉ hkʼaw lo yawˇ hui gʼa‸ yuˬ chehˇ ve Iˉsaˍreˍlaˆ chaw teˇ hpaˍ, yawˇ hui hta‸ kʼaw‸ hpfuhˆ bawˆ piˇ ve pa taw yoˬ.

21Yawˇsuˆ leh yawˇ ve ma‸ yaˇ teˇ hpaˍ lehˬ, yawˇ hui ve chaw teˇ hpaˍ venˇ hta‸ bawˆ gʼa taˍ peuˬ leh, venˇ hta‸ aˬ miˍ tuˉ keu chehˇ ve hta‸ gʼa mawˬ ve teˇ yanˇ, yawˇ hui kʼaw‸ hpfuhˆ kʼaw‸ la leh Aˍiˆ venˇ yaˇ teˇ hpaˍ hta‸ tiˇ pehˍ piˇ ve yoˬ.

22Venˇ hkʼaw lo gaˬ taˍ peuˬ ve ma‸ yaˇ teˇ hpaˍ htawˇ ya‸ la leh, Aˍiˆ venˇ ve ma‸ yaˇ teˇ hpaˍ hta‸ ga bawˆ ve yoˬ. Yawˇ hui lehˬ, Aˍiˆ venˇ ve ma‸ yaˇ teˇ hpaˍ hta‸ teˇ hpawˇ le le caw hoˆ taˍ leh tiˇ pehˍ piˇ ve yoˬ.

23Aˍiˆ venˇ hta‸ uˉ peunˍ chehˇ ve jawˇmawˇ maˇ heˆ kʼo, awˬ nu ve ma‸ yaˇ hkʼa peu-eˬ suh peuˬ sheˬ ve yoˬ. Yawˇ hui lehˬ, jawˇmawˇ oˇ ve hta‸ hpeh yuˬ leh Yawˇsuˆ geh shiˍ veu laˇ ve yoˬ.

24Yawˇ hui hkʼaˇ suh gʼa‸ yuˬ laˬ chehˇ ve canˇ paˍ hkʼa peu-eˬ ve hta‸ Iˉsaˍreˍlaˆ chaw hui tiˇ pehˍ piˇ ve yoˬ. Oˇ hkʼe te peuˬ hkʼaw‸ nawˉ, yawˇ hui venˇ hkʼaw lo kʼaw‸ kʼo‸-e leh, oˇ kaˬ lo chehˇ ve chaw hkʼa peu-eˬ ve hta‸ htawˇ tiˇ pehˍ piˇ ve yoˬ.

25Oˇ ve teˇ nyi Aˍiˆ venˇ hkʼaw tiˇ pehˍ ve hta‸ gʼa hkanˍ ve hawˉ hkʼaˆ yaˇ miˇ hkʼa peu-eˬ 12,000 gʼaˇ cawˬ ve yoˬ.

26Aˍiˆ venˇ hkʼaw chehˇ ve chaw hkʼa peu-eˬ hta‸ tiˇ pehˍ peuˬ htaˇ hkʼa gaˬ, Yawˇsuˆ lehˬ Aˍiˆ venˇ hpawˇ lo yawˇ ve gehˇ hta‸ che peu taˍ ve yoˬ.

27Gʼuiˬsha Yawˇsuˆ hta‸ kʼoˆ piˇ taˍ ve hkʼe, Iˉsaˍreˍlaˆ chaw teˇ hpaˍ lehˬ venˇ oˇ ve awˬ hkʼaw lo cawˬ ve mawˇ jeˬ leh ceˇ teˇ hpaˍ hta‸, a shu yawˇ heuˆ gaˇ ve hkʼe yuˬ kʼai ve yoˬ.

28Yawˇsuˆ lehˬ Aˍiˆ venˇ hta‸ aˬ miˍ tuˉ baˬ piˇ ve pa taw, ya‸ nyi hkʼa gaˬ venˇ oˇ ve luˬ kʼai taˍ ve yoˬ.

29Yawˇ lehˬ Aˍiˆ venˇ hta‸ uˉ peunˍ chehˇ ve jawˇmawˇ hta‸ suhˆ cehˬ hkʼoˆ lo hpeh yu pehˍ piˇ leh, mvuhˇ hpeu‸ la htaˇ hkʼa gaˬ oˇ hkʼe te baˬ taˍ piˇ ve yoˬ. Mvuhˇ nyi lo‸-e ve teˇ yanˇ, Yawˇsuˆ tawˇ piˇ leh, yawˇ hui lehˬ jawˇmawˇ oˇ ve hta‸ venˇ taˍ meu‸ hpe‸ lo baˬ keu piˇ leh, yawˇ awˬ hkʼoˆ lo haˉ pui shiˍ gʼawˆhpoˆ piˇ ve yoˬ. Ya‸ nyi hkʼa gaˬ haˉ pui hpoˆ chi cawˬ taˍ sheˍ ve yoˬ.

30Oˇ ve hkʼaw‸ nawˉ Yawˇsuˆ lehˬ, Eˇbaˍlaˆ hkʼaw hkʼoˆ lo Iˉsaˍreˍlaˆ chaw hui ve Gʼuiˬsha hta‸ tuˉ tanˇ kuiˬ teˇ maˬ te ve yoˬ.

31Yawˇ lehˬ Moˉseˍ ve awˬliˇtawˇhkawˇ li‸ daw hkʼaw bvuh‸ taˍ leh, Gʼuiˬsha ve awˬ ceˬ paˍ Moˉseˍ Iˉsaˍreˍlaˆ chaw hui hta‸ maˍ piˇ taˍ ve hkʼe, tcuhˇ maˇ yuˬ htawˆ ve haˉ pui shiˍ teˇ hpaˍ yuˬ leh tuˉ tanˇ kuiˬ hta‸ te ve yoˬ. Tuˉ tanˇ kuiˬ oˇ ve awˬ hkʼoˆ lo aˬ miˍ tuˉ tanˇ tuˬ leh, awˬ chawˇ te da‸ ve tanˇ tuˬ Gʼuiˬsha hta‸ tuˉ tanˇ piˇ ve yoˬ.

32Oˇ kaˬ lo Iˉsaˍreˍlaˆ chaw teˇ hpaˍ mehˆ gʼuˇ suhˍ Yawˇsuˆ lehˬ, Moˉseˍ bvuh‸ taˍ ve awˬliˇtawˇhkawˇ teˇ hpaˍ hta‸ haˉ pui shiˍ hkʼoˆ lo kʼaw‸ htawˆ bvuh‸ ve yoˬ.

33Iˉsaˍreˍlaˆ chaw awˬ hoˉ awˬ naˬ teˇ hpaˍ, ma‸ poˍ teˇ hpaˍ, suhˉ jehˬ paˍ teˉ hpaˍ, yawˇ hui geh chehˇ taˍ ve hkehˉ chaw teˇ hpaˍ leh Iˉsaˍreˍlaˆ chaw hkʼa peu-eˬ, ka ti‸ shaˉ caˆ ta kʼoˍ choˬ hpawˇ oˇ hpawˇ lo huˉ taˍ ve yoˬ. Chaw teˇ hkoˇ lehˬ, Geˍraˍsenˍ hkʼaw hpawˇ lo hpfuhˆ taˍ leh, awˬ nu ve chaw teˇ hkoˇ lehˬ Eˇbaˍlaˆ hkʼaw hpawˇ lo hpfuhˆ huˉ taˍ ve yoˬ. Gʼuiˬsha ve awˬ bon hta‸ ha‸ yuˬ tuˬ awˬ yanˇ gaˬ kʼo chi hkʼe gʼa te ve yoˬ, teh‸ Gʼuiˬsha ve awˬ ceˬ paˍ Moˉseˍ kʼoˆ taˍ ve pa taw, yawˇ hui chi hkʼe te huˉ taˍ ve yoˬ.

34Oˇ ve hkʼaw‸ nawˉ Yawˇsuˆ lehˬ, awˬ bon na‸ piˇ ve hkawˇ teˇ hpaˍ maˇ kʼoˆ, hkeu ve hkawˇ teˇ hpaˍ maˇ kʼoˆ, awˬliˇtawˇhkawˇ li‸ daw awˬ hkʼaw lo bvuh‸ taˍ ve hkʼe, chaw chi ma ve hta‸ awˬ hkawˇ bvuhˬ chaweh te gʼaw maˍ piˇ ve yoˬ.

35Moˉseˍ ve awˬliˇtawˇhkawˇ teˇ hkawˇ le le ve hta‸, oˇ kaˬ lo chehˇ taˍ ve hawˉ hkʼaˆ, yaˇ miˇ, yaˇ ehˉ leh yawˇ hui geh chehˇ taˍ ve hkehˉ chaw hkʼa peu-eˬ hta‸ Yawˇsuˆ gʼaw maˍ piˇ ve yoˬ.

← Chapter 7 Jump to: Chapter 9 →