1 Chronicles 10

Lao Bible 2012 (ພຣະຄຳພີສັກສິ)

← Chapter 9 Jump to: Chapter 11 →

1ພວກຟີລິດສະຕິນໄດ້ເຮັດເສິກກັບພວກອິດສະຣາເອນທີ່ເທິງພູເຂົາກິນໂບອາ. ພວກອິດສະຣາເອນໄດ້ຖືກຂ້າຢ່າງຫລວງຫລາຍໃນທີ່ນັ້ນ ແລະສ່ວນທີ່ເຫຼືອຢູ່ກັບກະສັດໂຊນເອງ ພ້ອມດ້ວຍລູກຊາຍຂອງເພິ່ນຕ່າງກໍໄດ້ປົບໜີໄປ.

2ແຕ່ພວກເຂົາຖືກພວກຟີລິດສະຕິນຈັບໄດ້ ພ້ອມທັງລູກຊາຍສາມຄົນຂອງກະສັດໂຊນ ດັ່ງນີ້: ໂຢນາທານ, ອາບີນາດາບ ແລະມັນກີຊູອາ. ພວກຟີລິດສະຕິນໄດ້ຂ້າພວກເຂົາຖິ້ມ.

3ການສູ້ຮົບປິດລ້ອມກະສັດໂຊນໜັກໜ່ວງຫລາຍ ແລະເພິ່ນເອງກໍຖືກລູກທະນູຂອງສັດຕູບາດເຈັບສາຫັດ.

4ເພິ່ນກ່າວແກ່ຊາຍໜຸ່ມຜູ້ທີ່ຖືອາວຸດຂອງເພິ່ນວ່າ, “ຊັກດາບອອກມາຂ້າຂ້ອຍສາ ເພື່ອພວກຟີລິດສະຕິນຜູ້ບໍ່ນັບຖືພຣະເຈົ້າຈະບໍ່ໄດ້ສົມນໍ້າໜ້າຂ້ອຍ.” ແຕ່ຊາຍໜຸ່ມຜູ້ນັ້ນຢ້ານຫລາຍຈຶ່ງບໍ່ກ້າຂ້າເພິ່ນ. ດັ່ງນັ້ນ ກະສັດໂຊນຈຶ່ງຊັກດາບອອກມາແລະຂ້າຕົນເອງເສຍ.

5ເມື່ອຊາຍໜຸ່ມຜູ້ນັ້ນເຫັນວ່າກະສັດໂຊນໄດ້ຕາຍແລ້ວ, ລາວຈຶ່ງໃຊ້ດາບແທງຕົນເອງຕາຍໄປຕາມເພິ່ນ.

6ກະສັດໂຊນແລະລູກຊາຍສາມຄົນຂອງເພິ່ນໄດ້ຕາຍໄປດັ່ງນີ້ແຫລະ ແລະບໍ່ມີເຊື້ອສາຍຄົນໃດຂອງເພິ່ນໄດ້ປົກຄອງປະເທດໃນເວລາຕໍ່ມາ.

7ເມື່ອພວກອິດສະຣາເອນທີ່ອາໄສຢູ່ໃນຮ່ອມພູຢິດຊະເຣນໄດ້ຍິນວ່າ ກອງທັບອິດສະຣາເອນໄດ້ປົບໜີ ແລະກະສັດໂຊນພ້ອມທັງພວກລູກຊາຍຂອງເພິ່ນກໍໄດ້ຕາຍແລ້ວ; ສະນັ້ນ ພວກເຂົາຈຶ່ງພາກັນປະເມືອງແລະປົບໜີໄປ. ແລ້ວພວກຟີລິດສະຕິນກໍໄດ້ເຂົ້າມາຢຶດເອົາເມືອງ.

8ມື້ຕໍ່ມາ ຫລັງຈາກເຊົາສູ້ຮົບແລ້ວ ພວກຟີລິດສະຕິນກໍໄປແກ້ເອົາເຄື່ອງຈາກຊາກສົບ ແລະພວກເຂົາໄດ້ພົບຊາກສົບຂອງກະສັດໂຊນພ້ອມທັງຊາກສົບຂອງພວກລູກຊາຍ ນອນດອຍຢູ່ທີ່ເທິງພູເຂົາກິນໂບອາ.

9ພວກເຂົາຈຶ່ງຕັດເອົາຫົວຂອງກະສັດໂຊນພ້ອມທັງປົດເຄື່ອງຮົບອອກ ແລ້ວກໍສົ່ງຄົນນຳຂ່າວດີໄປທົ່ວດິນແດນຟີລິດສະຕິນ ບອກຊາວຟີລິດສະຕິນແລະພະຂອງພວກເຂົາ.

10ພວກເຂົາໄດ້ເອົາອາວຸດເພິ່ນໄປບັນຈຸໄວ້ໃນວິຫານແຫ່ງໜຶ່ງຂອງພວກເຂົາ ແລະເອົາຫົວຂອງກະສັດໂຊນຫ້ອຍໄວ້ໃນວິຫານຂອງພະດາໂກນ.

11ເມື່ອຊາວເມືອງຢາເບັດກີເລອາດໄດ້ຍິນສິ່ງທີ່ພວກຟີລິດສະຕິນ ໄດ້ເຮັດຕໍ່ກະສັດໂຊນ

12ບັນດາທະຫານຜູ້ເກັ່ງກ້າທີ່ສຸດກໍໄດ້ໄປເອົາຊາກສົບຂອງກະສັດໂຊນ ແລະຊາກສົບຂອງພວກລູກຊາຍຂອງເພິ່ນກັບຄືນມາທີ່ຢາເບັດ. ພວກເຂົາໄດ້ຝັງຊາກສົບເຫຼົ່ານັ້ນໄວ້ຢູ່ກ້ອງຕົ້ນໂອກແລະຖືສິນອົດອາຫານເຈັດວັນ.

13ກະສັດໂຊນໄດ້ຕາຍໄປກໍເພາະເພິ່ນບໍ່ສັດຊື່ຕໍ່ພຣະເຈົ້າຢາເວ. ເພິ່ນບໍ່ເຊື່ອຟັງຂໍ້ຄຳສັ່ງຂອງພຣະເຈົ້າຢາເວ; ເພິ່ນໄດ້ປຶກສານຳວິນຍານຂອງຄົນຕາຍ

14ແທນທີ່ຈະປຶກສານຳພຣະເຈົ້າຢາເວ. ດັ່ງນັ້ນ ພຣະເຈົ້າຢາເວຈຶ່ງໄດ້ຂ້າເພິ່ນ ແລະມອບອານາຈັກໃຫ້ດາວິດລູກຊາຍຂອງເຢຊີ ຂຶ້ນປົກຄອງແທນ.

← Chapter 9 Jump to: Chapter 11 →