1 Chronicles 15

Lao Bible 2012 (ພຣະຄຳພີສັກສິ)

← Chapter 14 Jump to: Chapter 16 →

1ກະສັດດາວິດໄດ້ສ້າງສຳນັກຫລາຍຫລັງສຳລັບຕົນທີ່ເມືອງຂອງດາວິດ. ເພິ່ນຍັງໄດ້ຈັດຕຽມບ່ອນໄວ້ຫີບຂອງພຣະເຈົ້າ ແລະສ້າງເຕັນສຳລັບບັນຈຸຫີບຢູ່ທີ່ນັ້ນ.

2ແລ້ວເພິ່ນກໍກ່າວວ່າ, “ໃຫ້ພວກເລວີເທົ່ານັ້ນຫາມຫີບຂອງພຣະເຈົ້າ ເພາະພວກເຂົາແມ່ນພວກດຽວທີ່ພຣະເຈົ້າຢາເວໄດ້ເລືອກໄວ້ເພື່ອຫາມຫີບຂອງພຣະເຈົ້າຢາເວ ແລະຮັບໃຊ້ພຣະອົງຕະຫລອດໄປ.”

3ສະນັ້ນ ກະສັດດາວິດຈຶ່ງເອີ້ນປະຊາຊົນອິດສະຣາເອນທັງໝົດ ມາທີ່ນະຄອນເຢຣູຊາເລັມເພື່ອນຳເອົາຫີບຂອງພຣະເຈົ້າຢາເວ ໄປບ່ອນທີ່ໄດ້ຖືກຈັດຕຽມໄວ້ແລ້ວ.

4ແລ້ວເພິ່ນກໍເຊີນເອົາພວກເຊື້ອສາຍຂອງອາໂຣນ ແລະເອີ້ນເອົາເຊື້ອສາຍຂອງພວກເລວີ.

5ຄົນເລວີຈາກຕະກຸນໂກຮາດແມ່ນອູຣິເອນ ເບິ່ງແຍງສະມາຊິກໜຶ່ງຮ້ອຍຊາວຄົນ ໃນຕະກຸນຂອງຕົນເອງ;

6ຈາກຕະກຸນເມຣາຣີແມ່ນອາສາອີຢາ ເບິ່ງແຍງສອງຮ້ອຍຊາວຄົນ;

7ຈາກຕະກຸນເກໂຊນແມ່ນໂຢເອນ ເບິ່ງແຍງໜຶ່ງຮ້ອຍສາມສິບຄົນ;

8ຈາກຕະກຸນເອລີຊາຟັນແມ່ນເຊມາອີຢາ ເບິ່ງແຍງສອງຮ້ອຍຄົນ;

9ຈາກຕະກຸນເຮັບໂຣນແມ່ນເອລີເອນ ເບິ່ງແຍງແປດສິບຄົນ;

10ແລະຈາກຕະກຸນອຸດຊີເອນແມ່ນອຳມີນາດາບ ເບິ່ງແຍງໜຶ່ງຮ້ອຍສິບສອງຄົນ.

11ກະສັດດາວິດໄດ້ເອີ້ນເອົາປະໂຣຫິດຊາດົກແລະອາບີອາທາ ເພື່ອໃຫ້ເຂົ້າມາພົບເພິ່ນພ້ອມດ້ວຍຊາວເລວີຫົກຄົນ ດັ່ງນີ້: ອູຣິເອນ, ອາສາອີຢາ, ໂຢເອນ, ເຊມາອີຢາ, ເອລີເອນ ແລະອຳມີນາດາບ.

12ເພິ່ນກ່າວແກ່ພວກເລວີວ່າ, “ພວກເຈົ້າເປັນຜູ້ນຳບັນດາຕະກຸນຊາວເລວີ. ຈົ່ງຊຳລະຕົນເອງໃຫ້ສະອາດ ແລະພີ່ນ້ອງເລວີຄົນອື່ນດ້ວຍ ເພື່ອພວກເຈົ້າຈະນຳຫີບຂອງພຣະເຈົ້າຢາເວ ພຣະເຈົ້າແຫ່ງຊາດອິດສະຣາເອນ ມາສູ່ບ່ອນທີ່ຖືກຈັດຕຽມໄວ້ແລ້ວນັ້ນໄດ້.

13ຍ້ອນພວກເຈົ້າບໍ່ໄດ້ໄປທີ່ນັ້ນເທື່ອທຳອິດ ເພື່ອຫາມຫີບພັນທະສັນຍາ; ພຣະເຈົ້າຢາເວ ພຣະເຈົ້າຂອງພວກເຮົາຈຶ່ງໄດ້ລົງໂທດພວກເຮົາ ເພາະບໍ່ໄດ້ນະມັດສະການພຣະອົງຕາມທີ່ສົມຄວນ.”

14ແລ້ວບັນດາປະໂຣຫິດແລະພວກເລວີກໍຊຳລະຕົນເອງໃຫ້ສະອາດ ເພື່ອຈະຍົກຍ້າຍຫີບຂອງພຣະເຈົ້າຢາເວ ພຣະເຈົ້າຂອງຊາດອິດສະຣາເອນ.

15ພວກເລວີໄດ້ໃຊ້ໄມ້ຄານຫາມຫີບຂອງພຣະເຈົ້າແບກໃສ່ບ່າ ຕາມຖ້ອຍຄຳທີ່ພຣະເຈົ້າຢາເວໄດ້ສັ່ງຜ່ານທາງໂມເຊ.

16ກະສັດດາວິດໄດ້ສັ່ງບັນດາຜູ້ນຳໃຫ້ມອບໝາຍໜ້າທີ່ແກ່ພວກເລວີ ເພື່ອຮ້ອງລຳທຳເພງແລະບັນເລງດົນຕຼີຢ່າງມ່ວນຊື່ນ ຄືດີດພິນແລະຕົບແສ່ງໄປພ້ອມ.

17ພວກເຂົາໄດ້ເລືອກເອົານັກດົນຕຼີຈາກຕະກຸນຂອງພວກນັກຮ້ອງໃຫ້ຕົບແສ່ງທຸ້ມ ມີດັ່ງນີ້: ເຮມານລູກຊາຍຂອງໂຢເອນ, ອາສັບລູກຊາຍຂອງເບເຣກີຢາທີ່ເປັນພີ່ນ້ອງຂອງລາວເອງ ແລະເອທານລູກຊາຍຂອງກູຊາອີຢາແຫ່ງຕະກຸນເມຣາຣີ. ເພື່ອເປັນການປະກອບສ່ວນຊ່ວຍກັນ.

18ພວກເຂົາໄດ້ເລືອກເອົາຊາວເລວີໃຫ້ດີດພິນສຽງສູງ ມີດັ່ງນີ້: ເຊກາຣີຢາ, ຢາອາຊີເອນ, ເຊມີຣາໂມດ, ເຢຮີເອນ, ອຸນນີ, ເອລີອາບ, ເບນາອີຢາ ແລະມາອາເສອີຢາ. ພວກເຂົາໄດ້ເລືອກເອົາຊາວເລວີໃຫ້ດີດພິນສຽງຕໍ່າ ມີດັ່ງນີ້: ມັດຕີທີຢາ, ເອລີເຟເລຮູ, ມິກເນອີຢາ, ຜູ້ເຝົ້າຍາມພຣະວິຫານໄດ້ແກ່: ໂອເບັດເອໂດມແລະເຢອີເອນ.

19ນັກຮ້ອງມີ ເຮມານ, ອາສັບ ແລະເອທານ

20ເຊກາຣີຢາ, ອາຊີເອນ, ເຊມີຣາໂມດ, ເຢຮີເອນ, ອຸນນີ, ເອລີອາບ, ມາອາເສອີຢາ ແລະເບນາອີຢາ ຫຼິ້ນພິນໃຫຍ່ຕາມສຳນຽງອາລາໂມດ;

21ແຕ່ມັດຕີທີຢາ ເອລີເຟເລຮູ, ມິກເນອີຢາ, ໂອເບັດເອໂດມ, ເຢອີເອນ ແລະອາຊາຊີຢາ ເປັນຜູ້ດີດພິນຄູ່ຕາມສຳນຽງເຊມີນິດ.

22ເນື່ອງຈາກວ່າເກນານີຢາມີສີມືດີທາງດ້ານດົນຕຼີ ລາວຈຶ່ງຖືກເລືອກໃຫ້ເປັນຄົນເບິ່ງແຍງພວກນັກດົນຕຼີຊາວເລວີ.

23ເບເຣກີຢາແລະເອນການາ ໄດ້ຖືກຮັບເລືອກໃຫ້ເປັນຜູ້ເຝົ້າຍາມຫີບພັນທະສັນຍາ.

24ບັນດາປະໂຣຫິດເຊບານີຢາ, ໂຢຊາຟັດ, ເນທາເນນ, ອາມາໄສ, ເຊກາຣີຢາ, ເບນາອີຢາ ແລະເອລີເອເຊໄດ້ຖືກເລືອກໃຫ້ເປັນຜູ້ເປົ່າແກ ນຳໜ້າຫີບພັນທະສັນຍາຂອງພຣະເຈົ້າ. ໂອເບັດເອໂດມ ແລະເຢຮີຢາ ໄດ້ຖືກຮັບເລືອກໃຫ້ເປັນຜູ້ເຝົ້າຍາມຫີບພັນທະສັນຍາດ້ວຍ.

25ສະນັ້ນ ກະສັດດາວິດ, ບັນດາຜູ້ນຳຊາດອິດສະຣາເອນ ແລະພວກຜູ້ບັນຊາການກອງທັບຈຶ່ງໄດ້ໄປທີ່ເຮືອນຂອງໂອເບັດເອໂດມ ເພື່ອນຳເອົາຫີບພັນທະສັນຍາຂອງພຣະເຈົ້າຢາເວ. ພວກເຂົາໄດ້ຈັດງານສະຫລອງຢ່າງໃຫຍ່ໂຕຂຶ້ນ.

26ພວກເຂົາໄດ້ຖວາຍງົວເຖິກເຈັດໂຕກັບແກະເຖິກເຈັດໂຕ ເພື່ອເປັນການແນ່ໃຈວ່າພຣະເຈົ້າຈະຊ່ວຍພວກເລວີ ໃຫ້ຫາມຫີບພັນທະສັນຍາຂອງພຣະເຈົ້າຢາເວໄປໄດ້.

27ກະສັດດາວິດໄດ້ນຸ່ງເຄື່ອງທີ່ເຮັດດ້ວຍຜ້າປ່ານເນື້ອລະອຽດດີ ເຊັ່ນດຽວກັບເກນານີຢາຫົວໜ້າວົງດົນຕຼີກັບພວກນັກດົນຕຼີ ທີ່ຫາມຫີບພັນທະສັນຍາ. ກະສັດດາວິດຍັງໄດ້ນຸ່ງເສື້ອຄຸມສັ້ນເອໂຟດດ້ວຍ.

28ສະນັ້ນ ຊາວອິດສະຣາເອນທັງໝົດຈຶ່ງແຫ່ຫີບພັນທະສັນຍາຂອງພຣະເຈົ້າຢາເວ ມາເຖິງນະຄອນເຢຣູຊາເລັມດ້ວຍສຽງໂຮຮ້ອງຊົມຊື່ນຍິນດີພ້ອມທັງເປົ່າແກ, ເປົ່າເຂົາສັດ, ຕົບແສ່ງ ແລະດີດພິນ.

29ໃນຂະນະທີ່ນຳຫີບພັນທະສັນຍາຂອງພຣະເຈົ້າຢາເວເຂົ້າໄປໃນເມືອງນັ້ນ ນາງມີການ ຜູ້ເປັນລູກສາວຂອງກະສັດໂຊນໄດ້ແນມເບິ່ງໄປທາງປ່ອງຢ້ຽມ ໄດ້ເຫັນກະສັດດາວິດຟ້ອນແລະເຕັ້ນດ້ວຍຄວາມຊົມຊື່ນຍິນດີ ນາງຈຶ່ງດູຖູກໝິ່ນປະໝາດເພິ່ນໃນໃຈ.

← Chapter 14 Jump to: Chapter 16 →