1 Chronicles 23

Lao Bible 2012 (ພຣະຄຳພີສັກສິ)

← Chapter 22 Jump to: Chapter 24 →

1ເມື່ອກະສັດດາວິດໄດ້ແກ່ຊະຣາຫລາຍແລ້ວ ເພິ່ນໄດ້ແຕ່ງຕັ້ງໂຊໂລໂມນລູກຊາຍຂອງເພິ່ນໃຫ້ຂຶ້ນເປັນກະສັດຂອງຊາດອິດສະຣາເອນແທນເພິ່ນ.

2ກະສັດດາວິດໄດ້ເອີ້ນຜູ້ນຳຊາດອິດສະຣາເອນທັງໝົດປະໂຣຫິດທຸກຄົນ ແລະພວກເລວີທັງໝົດມາປະຊຸມກັນ.

3ເພິ່ນໄດ້ນັບຈຳນວນຜູ້ຊາຍຊາວເລວີທັງໝົດທີ່ມີອາຍຸສາມສິບປີຂຶ້ນໄປ. ຈຳນວນທັງໝົດມີສາມສິບແປດພັນຄົນ.

4ກະສັດມອບໝາຍຊາວສີ່ພັນຄົນ ໃຫ້ບໍລິຫານວຽກງານໃນວິຫານຂອງພຣະເຈົ້າຢາເວ; ຫົກພັນຄົນ ໃຫ້ຮັກສາທະບຽນແລະຕັດສິນຂໍ້ໂຕ້ແຍ້ງຕ່າງໆ;

5ສີ່ພັນຄົນ ໃຫ້ເຮັດໜ້າທີ່ເຝົ້າຍາມປະຕູ ແລະອີກສີ່ພັນຄົນ ສຳລັບສັນລະເສີນພຣະເຈົ້າຢາເວໂດຍໃຊ້ເຄື່ອງດົນຕຼີ ທີ່ກະສັດດາວິດໄດ້ຈັດຫາໄວ້ສຳລັບສັນລະເສີນໂດຍສະເພາະ.

6ກະສັດດາວິດໄດ້ແບ່ງພວກເລວີອອກເປັນສາມໝວດ ຕາມຕະກຸນຂອງພວກເຂົາ ດັ່ງນີ້: ເກໂຊນ, ໂກຮາດ ແລະເມຣາຣີ.

7ເກໂຊນມີລູກຊາຍສອງຄົນ ດັ່ງນີ້: ລາດານແລະຊີເມອີ.

8ລາດານມີລູກຊາຍສາມຄົນ ດັ່ງນີ້: ເຢຮີເອນ, ເຊທາມ ແລະໂຢເອນ,

9ຜູ້ທີ່ເປັນຫົວໜ້າຕະກຸນຊຶ່ງສືບເຊື້ອສາຍມາຈາກລາດານ. (ຊີເມອີມີລູກຊາຍສາມຄົນດັ່ງນີ້: ເຊໂລໂມດ, ຮາຊີເອນ ແລະຮາຣານ.)

10ຊີເມອີມີລູກຊາຍສີ່ຄົນຕາມລຳດັບອາຍຸ ດັ່ງນີ້: ຢາຮາດ, ຊີນາ, ເຢອຸດ ແລະເບຣິຢາ. ເຢອຸດ ແລະເບຣິຢາບໍ່ໄດ້ມີເຊື້ອສາຍຫລາຍ. ດັ່ງນັ້ນ ທັງສອງຈຶ່ງໄດ້ນັບເຂົ້າເປັນຕະກຸນດຽວ.

12ໂກຮາດມີລູກຊາຍສີ່ຄົນດັ່ງນີ້: ອຳຣາມ, ອີຊະຮາ, ເຮັບໂຣນ ແລະອຸດຊີເອນ.

13ອຳຣາມລູກຊາຍກົກຂອງເພິ່ນເປັນພໍ່ຂອງອາໂຣນແລະໂມເຊ. (ອາໂຣນແລະເຊື້ອສາຍຂອງລາວໄດ້ຖືກແຍກອອກຢູ່ຕ່າງຫາກ ເພື່ອເບິ່ງແຍງເຄື່ອງສັກສິດຕ່າງໆຕະຫລອດໄປເຊັ່ນ: ເຜົາເຄື່ອງຫອມຕ່າງໆຕໍ່ໜ້າພຣະເຈົ້າຢາເວ, ຮັບໃຊ້ພຣະອົງ ແລະອວຍພອນປະຊາຊົນໃນນາມຂອງພຣະອົງ.

14ແຕ່ພວກລູກຊາຍຂອງໂມເຊຄົນຂອງພຣະເຈົ້ານັ້ນ ນັບເຂົ້າກັບພວກເລວີ.)

15ໂມເຊມີລູກຊາຍສອງຄົນ ດັ່ງນີ້: ເກໂຊມ ແລະເອລີເອເຊ.

16ຜູ້ນຳໃນບັນດາລູກຊາຍຂອງເກໂຊມແມ່ນເຊບູເອນເປັນຫົວໜ້າ.

17ເອລີເອເຊມີລູກຊາຍພຽງຄົນດຽວເທົ່ານັ້ນຊື່ວ່າ ເຣຮາບີຢາເປັນຫົວໜ້າ ແຕ່ເຣຮາບີຢາມີເຊື້ອສາຍຫລາຍຄົນ.

18ອີຊະຮາລູກຊາຍຜູ້ທີສອງຂອງໂກຮາດ ມີລູກຊາຍຜູ້ໜຶ່ງຊື່ວ່າ ເຊໂລມິດເປັນຫົວໜ້າ.

19ເຮັບໂຣນ ລູກຊາຍຜູ້ທີສາມຂອງໂກຮາດມີລູກຊາຍສີ່ຄົນດັ່ງນີ້: ເຢຣີຢາເປັນຫົວໜ້າ, ອາມາຣີຢາ, ເຢຮາຊີເອນ ແລະເຢກາເມອາມ.

20ອຸດຊີເອນ ລູກຊາຍຜູ້ທີສີ່ຂອງໂກຮາດມີລູກຊາຍສອງຄົນດັ່ງນີ້: ມີກາເປັນຫົວໜ້າແລະອິດຊີຢາ.

21ເມຣາຣີມີລູກຊາຍສອງຄົນດັ່ງນີ້: ມາຮະລີແລະມູຊີ. ມາຮະລີມີລູກຊາຍສອງຄົນເຊັ່ນດຽວກັນດັ່ງນີ້: ເອເລອາຊາແລະກີເຊ,

22ແຕ່ເອເລອາຊາໄດ້ຕາຍໄປໂດຍບໍ່ມີລູກຊາຍ ແລະມີແຕ່ລູກສາວ. ພວກລູກສາວຂອງລາວໄດ້ແຕ່ງງານກັບລູກຊາຍຂອງກີເຊ ພີ່ນ້ອງຕົນເອງ.

23ມູຊີ ລູກຊາຍຜູ້ທີສອງຂອງເມຣາຣີ ມີລູກຊາຍສາມຄົນດັ່ງນີ້: ມາຮະລີ, ເອເດ ແລະເຢເຣໂມດ.

24ຄົນເຫຼົ່ານີ້ເປັນເຊື້ອສາຍຂອງເລວີຕາມຕະກຸນ ແລະຄອບຄົວທີ່ທຸກຄົນໄດ້ຖືກຈົດຊື່ໄວ້ໃນບັນຊີຂອງໃຜລາວ. ແຕ່ລະຄົນໃນເຊື້ອສາຍຂອງລາວທີ່ມີອາຍຸຕັ້ງແຕ່ຊາວປີຂຶ້ນໄປ ກໍມີສ່ວນໃນວຽກງານຮັບໃຊ້ຢູ່ໃນວິຫານຂອງພຣະເຈົ້າຢາເວ.

25ກະສັດດາວິດເວົ້າວ່າ, “ພຣະເຈົ້າຢາເວ ພຣະເຈົ້າຂອງຊາດອິດສະຣາເອນ ໄດ້ໃຫ້ປະຊາຊົນຂອງພຣະອົງຢູ່ເຢັນເປັນສຸກ ແລະພຣະອົງເອງກໍຈະສະຖິດຢູ່ທີ່ນະຄອນເຢຣູຊາເລັມຕະຫລອດໄປ.

26ດັ່ງນັ້ນ ຈຶ່ງບໍ່ມີຄວາມຈຳເປັນ ທີ່ພວກເລວີຕ້ອງຫາມຫໍເຕັນສັກສິດ ແລະເຄື່ອງໃຊ້ໃນການຮັບໃຊ້ອີກຕໍ່ໄປ.”

27ຕາມຫລັກຄຳແນະນຳເທື່ອສຸດທ້າຍຂອງກະສັດດາວິດແລ້ວ ຄົນເລວີທີ່ມີອາຍຸຊາວປີຂຶ້ນໄປ ຕ້ອງຈົດຊື່ເຂົ້າຮັບໃຊ້ໃນວຽກງານ.

28ພວກເຂົາໄດ້ຮັບມອບໝາຍໜ້າທີ່ດັ່ງຕໍ່ໄປນີ້: ຊ່ວຍປະໂຣຫິດທີ່ສືບເຊື້ອສາຍມາຈາກອາໂຣນ ກ່ຽວກັບການນະມັດສະການໃນວິຫານຂອງພຣະເຈົ້າຢາເວ ຮັກສາບົວລະບັດເດີ່ນແລະຫ້ອງຕ່າງໆ ແລະຮັກສາຄວາມສະອາດສິ່ງສັກສິດທຸກຢ່າງໃນວິຫານຂອງພຣະເຈົ້າ;

29ຮັບຜິດຊອບເຂົ້າຈີ່ທີ່ຖວາຍແກ່ພຣະເຈົ້າ, ແປ້ງເຂົ້າທີ່ໃຊ້ໃນການຖວາຍບູຊາ, ເຂົ້າໜົມທີ່ບໍ່ມີເຊື້ອແປ້ງ, ເຄື່ອງປີ້ງບູຊາ ແລະແປ້ງເຂົ້າປະສົມນໍ້າມັນໝາກກອກເທດ; ຊັ່ງແລະຕັກຕວງເຄື່ອງຖວາຍໃນພຣະວິຫານ;

30ແລະພວກເຂົາຈະຕ້ອງຢືນຮັບໃຊ້ເພື່ອໂມທະນາຂອບພຣະຄຸນແລະຍ້ອງຍໍສັນລະເສີນພຣະເຈົ້າຢາເວທຸກໆເຊົ້າແລະທຸກໆແລງ

31ແລະເມື່ອໃດທີ່ມີການເຜົາບູຊາດ້ວຍໄຟຖວາຍແກ່ພຣະເຈົ້າຢາເວໃນວັນຊະບາໂຕ, ວັນຂຶ້ນເດືອນໃໝ່ ແລະວັນອື່ນໆອີກ. ກົດຕ່າງໆນີ້ໄດ້ເຮັດໄວ້ຢ່າງສະເພາະເຈາະຈົງຕໍ່ຈຳນວນຄົນເລວີ ທີ່ໄດ້ຖືກມອບໝາຍໃຫ້ເຮັດວຽກນີ້. ຊາວເລວີໄດ້ຖືກມອບໝາຍໃຫ້ປະຕິບັດໜ້າທີ່ຕໍ່ໜ້າພຣະເຈົ້າຢາເວສືບໄປ.

32ພວກເຂົາຮັບຜິດຊອບຊ່ວຍພີ່ນ້ອງຂອງພວກເຂົາເບິ່ງແຍງຫໍເຕັນບ່ອນຊຸມນຸມແລະຫໍເຕັນສັກສິດ; ແລະຊ່ວຍບັນດາປະໂຣຫິດທີ່ສືບເຊື້ອສາຍມາຈາກອາໂຣນ ໃນການຮັບໃຊ້ໃນວິຫານຂອງພຣະເຈົ້າຢາເວ.

← Chapter 22 Jump to: Chapter 24 →