1 Chronicles 9 — Lao Bible 2012 (ພຣະຄຳພີສັກສິ)

1ຊາວອິດສະຣາເອນທັງໝົດທີ່ຂຶ້ນທະບຽນລາຍຊື່ຂອງຕົນຕາມຄອບຄົວຕ່າງໆ ແມ່ນໄດ້ຖືກບັນທຶກໄວ້ໃນປຶ້ມປະຫວັດສາດຂອງບັນດາກະສັດແຫ່ງອິດສະຣາເອນ ຕາມການແຈ້ງໃຫ້ຊາບນີ້. ຊາວຢູດາໄດ້ຖືກຈັບໄປເປັນຊະເລີຍທີ່ນະຄອນບາບີໂລນເປັນການລົງໂທດ ເພາະພວກເຂົາໄດ້ເຮັດບາບ.

2ພວກທຳອິດທີ່ກັບຄືນມາສູ່ທີ່ດິນຂອງຕົນຕາມເມືອງຕ່າງໆ ມີທັງຊາວອິດສະຣາເອນຄົນທຳມະດາ, ປະໂຣຫິດ, ຊາວເລວີ ແລະຄົນຮັບໃຊ້ໃນພຣະວິຫານຮວມຢູ່ດ້ວຍ.

3ປະຊາຊົນຈາກເຜົ່າຢູດາ, ເບັນຢາມິນ, ເອຟຣາອິມແລະມານາເຊໄດ້ໄປອາໄສຢູ່ໃນນະຄອນເຢຣູຊາເລັມ.

4ເຜົ່າຢູດາ ຫົກຮ້ອຍເກົ້າສິບຄອບຄົວ ໄດ້ໄປອາໄສຢູ່ໃນນະຄອນເຢຣູຊາເລັມ. ເຊື້ອສາຍຂອງເປເຣັດລູກຊາຍຂອງຢູດາ ມີຜູ້ນຳຊື່ວ່າອູໄທເປັນລູກຊາຍຂອງອາມມີຮຸດແລະຫລານຊາຍຂອງອົມຣີ. ສ່ວນບັນພະບຸລຸດຄົນອື່ນໆຂອງລາວນັ້ນແມ່ນອິມຣີແລະບານີ. ເຊື້ອສາຍຂອງເຊລາລູກຊາຍຂອງຢູດາ ມີຜູ້ນຳຊື່ວ່າ ອາສາອີຢາ ຜູ້ເປັນຫົວໜ້າຄອບຄົວຂອງລາວເອງ. ເຊື້ອສາຍຂອງເຊຣາລູກຊາຍຂອງຢູດາ ມີຜູ້ນຳຊື່ວ່າ ເຢອູເອນ.

7ສະມາຊິກຂອງເຜົ່າເບັນຢາມິນທີ່ອາໄສຢູ່ໃນນະຄອນເຢຣູຊາເລັມ ມີດັ່ງນີ້: ສານລູ ເປັນລູກຊາຍຂອງເມຊຸນລຳ, ເມຊຸນລຳ ເປັນລູກຊາຍຂອງໂຮດາວິຢາ ແລະໂຮດາວິຢາ ເປັນລູກຊາຍຂອງຮັດເສນູຢາ ອິບເນອີຢາ ເປັນລູກຊາຍຂອງເຢໂຣຮາມ ເອລາ ເປັນລູກຊາຍຂອງອຸດຊີແລະຫລານຊາຍຂອງມີກະຣີ ເມຊຸນລຳ ເປັນລູກຊາຍຂອງເຊຟາຕີຢາແລະຫລານຊາຍຂອງເຣອູເອນ ແລະເຣອູເອນ ເປັນລູກຊາຍຂອງອິບນີຢາ.

9ເຜົ່າເບັນຢາມິນ ເກົ້າຮ້ອຍຫ້າສິບຫົກຄອບຄົວ ໄດ້ອາໄສຢູ່ທີ່ນັ້ນ. ຊາຍທຸກຄົນທີ່ໄດ້ມີຊື່ຢູ່ຂ້າງເທິງນັ້ນເປັນຫົວໜ້າຄອບຄົວທັງໝົດ.

10ຕໍ່ໄປນີ້ແມ່ນບັນດາປະໂຣຫິດທີ່ໄດ້ອາໄສຢູ່ໃນນະຄອນເຢຣູຊາເລັມ ມີດັ່ງນີ້: ເຢດາອີຢາ, ເຢໂຮຍອາຣິບ, ຢາກິນ

11ແລະອາຊາຣີຢາ ເປັນລູກຊາຍຂອງຮິນກີຢາ (ຫົວໜ້າເຈົ້າໜ້າທີ່ປະຈຳວິຫານຂອງພຣະເຈົ້າ), ຜູ້ເປັນລູກຊາຍຂອງເມຊຸນລຳ, ຜູ້ເປັນລູກຊາຍຂອງຊາດົກ, ຜູ້ເປັນລູກຊາຍຂອງເມຣາອີໂຢດ, ຜູ້ເປັນລູກຊາຍຂອງອາຮີຕຸບ

13ບັນດາປະໂຣຫິດຜູ້ເປັນຫົວໜ້າຄອບຄົວ ມີລວມທັງໝົດ ໜຶ່ງພັນເຈັດຮ້ອຍຫົກສິບຄົນ. ພວກເຂົາລ້ວນແລ້ວແຕ່ຊ່ຽວຊານກັບວຽກງານທີ່ໄດ້ປະຕິບັດໃນວິຫານຂອງພຣະເຈົ້າ.

14ຕໍ່ໄປນີ້ແມ່ນຊາວເລວີທີ່ໄດ້ອາໄສຢູ່ໃນນະຄອນເຢຣູຊາເລັມ ມີດັ່ງນີ້: ເຊມາອີຢາ ເປັນລູກຊາຍຂອງຮັດຊຸບ, ຜູ້ເປັນລູກຊາຍຂອງອາຊະຣີກຳ, ຜູ້ເປັນລູກຊາຍຂອງຮາຊາບີຢາແຫ່ງຕະກຸນເມຣາຣີ

15ແລະ ບັກບັກກາ, ເຮເຣັດ ແລະກາລານ ມັດຕານີຢາ ລູກຊາຍຂອງມີກາ, ຜູ້ເປັນລູກຊາຍຂອງຊີກະຣີ, ຜູ້ເປັນລູກຊາຍຂອງອາສັບ

16ແລະ ໂອບາດີຢາ ລູກຊາຍຂອງເຊມາອີຢາ, ຜູ້ເປັນລູກຊາຍຂອງກາລານ, ຜູ້ເປັນລູກຊາຍຂອງເຢດູທູນ ແລະ ເບເຣກີຢາ ລູກຊາຍຂອງອາສາແລະຫລານຊາຍຂອງເອນການາ ຜູ້ໄດ້ອາໄສຢູ່ໃນເຂດແດນທີ່ເປັນເມືອງຂອງເນໂຕຟາ.

17ຕໍ່ໄປນີ້ແມ່ນຄົນເຝົ້າຍາມພຣະວິຫານທີ່ໄດ້ອາໄສຢູ່ໃນນະຄອນເຢຣູຊາເລັມ ມີດັ່ງນີ້: ຊານລູມ, ອັກກຸບ, ຕານໂມນ ແລະອາຮີມານ. ຊານລູມເປັນຜູ້ນຳຂອງພວກເຂົາ.

18ນັບລົງໄປເຖິງສະໄໝນັ້ນ ບັນດາສະມາຊິກໃນຕະກຸນຂອງພວກເຂົາ ແມ່ນໄດ້ຕັ້ງກອງປະຈຳການທາງດ້ານຕາເວັນອອກຂອງພຣະວິຫານ ທີ່ປະຕູເຂົ້າຂອງກະສັດ. ແຕ່ກ່ອນພວກເຂົາໄດ້ຢືນເຝົ້າຍາມທີ່ທາງປະຕູເຂົ້າຄ້າຍພັກຂອງຊາວເລວີ.

19ຊານລູມ ລູກຊາຍຂອງໂກເຣແລະຫລານຊາຍຂອງເອບີອາສັບ ພ້ອມດ້ວຍພວກພີ່ນ້ອງໃນຕະກຸນໂກຣາ ຮັບຜິດຊອບເຝົ້າຍາມປະຕູເຂົ້າຫໍເຕັນຂອງພຣະເຈົ້າຢາເວ; ເຊັ່ນດຽວກັນກັບພວກບັນພະບຸລຸດຂອງພວກເຂົາທີ່ໄດ້ເຄີຍປະຕິບັດມາ ສະໄໝທີ່ພວກເຂົາໄດ້ຮັບຜິດຊອບຫໍເຕັນ.

20ຟີເນຮາ ລູກຊາຍຂອງເອເລອາຊາໄດ້ເຄີຍປົກຄອງພວກເຂົາມາຄັ້ງໜຶ່ງ. ຂໍໃຫ້ພຣະເຈົ້າຢາເວສະຖິດຢູ່ນຳລາວດ້ວຍ.

21ເຊກາຣີຢາລູກຊາຍຂອງເມເຊເລມີຢາ ເຊັ່ນດຽວກັນເປັນຄົນເຝົ້າຍາມທາງເຂົ້າຫໍເຕັນບ່ອນຊຸມນຸມ.

22ຜູ້ທີ່ໄດ້ຖືກເລືອກໃຫ້ເຝົ້າຍາມປະຕູເຂົ້າແລະທາງເຂົ້າມີສອງຮ້ອຍສິບສອງຄົນ. ພວກເຂົາໄດ້ຖືກຈົດຊື່ເຂົ້າບັນຊີຕາມບ້ານຕ່າງໆທີ່ພວກເຂົາໄດ້ອາໄສຢູ່. ແມ່ນກະສັດດາວິດແລະຜູ້ທຳນວາຍຊາມູເອນ ທີ່ໄດ້ໃຫ້ບັນພະບຸລຸດຂອງພວກເຂົາຮັບໜ້າທີ່ນີ້.

23ພວກເຂົາແລະເຊື້ອສາຍໄດ້ສືບຕໍ່ເຝົ້າຍາມປະຕູທັງຫຼາຍຂອງວິຫານແຫ່ງພຣະເຈົ້າຢາເວ, ວິຫານແຫ່ງຫໍເຕັນ.

24ປະຕູນັ້ນປິ່ນໜ້າໃສ່ທຸກທິດເຊັ່ນ: ເໜືອ, ໃຕ້, ຕາເວັນອອກ ແລະຕາເວັນຕົກ ແລະແຕ່ລະປະຕູກໍມີນາຍຍາມເຝົ້າຢູ່.

25ຄົນເຝົ້າຍາມເຫຼົ່ານີ້ມີພີ່ນ້ອງທີ່ໄດ້ອາໄສຢູ່ໃນບ້ານເປັນຜູ້ຊ່ວຍ ແລະໄດ້ປ່ຽນຜຽນກັນມາເຝົ້າຍາມທຸກໆເຈັດວັນ.

26ນາຍເຝົ້າຍາມສີ່ຄົນແມ່ນຊາວເລວີ ແລະພວກເຂົາມີຄວາມຮັບຜິດຊອບຢ່າງເດັດຂາດ. ພວກເຂົາຮັບຜິດຊອບຫ້ອງຕ່າງໆແລະຊັບສົມບັດຕ່າງໆທີ່ເປັນຂອງພຣະວິຫານຂອງອົງພຣະຜູ້ເປັນເຈົ້າ.

27ພວກເຂົາຢູ່ໃກ້ກັບວິຫານຂອງພຣະເຈົ້າເພາະແມ່ນໜ້າທີ່ຂອງພວກເຂົາທີ່ຈະຮັກສາແລະໄຂປະຕູທີ່ທາງເຂົ້າໃນທີ່ນັ້ນທຸກໆເຊົ້າ.

28ຊາວເລວີອື່ນໆຮັບຜິດຊອບເຄື່ອງໃຊ້ຕ່າງໆທີ່ໄດ້ໃຊ້ໃນການນະມັດສະການ. ພວກເຂົາກວດນັບທຸກເທື່ອ ທີ່ມີຜູ້ເອົາອອກໄປໃຊ້ແລະເອົາມາສົ່ງຄືນ.

29ຄົນອື່ນຮັບເບິ່ງແຍງເຄື່ອງໃຊ້ສັກສິດອື່ນໆແລະດູແລແປ້ງ, ເຫຼົ້າອະງຸ່ນ, ນໍ້າມັນໝາກກອກເທດ, ເຄື່ອງຫອມ ແລະເຄື່ອງເທດ.

30ແຕ່ຄວາມຮັບຜິດຊອບປຸງເຄື່ອງເທດນັ້ນແມ່ນໜ້າທີ່ຂອງພວກປະໂຣຫິດ.

31ຄົນເລວີຜູ້ໜຶ່ງຊື່ມັດຕີທີຢາ ລູກຊາຍກົກຂອງຊານລູມແຫ່ງຕະກຸນໂກຣາ ເປັນຜູ້ຮັບຜິດຊອບເຄື່ອງປີ້ງຖວາຍ.

32ສະມາຊິກໃນຕະກຸນຂອງໂກຮາດເປັນຜູ້ຮັບຜິດຊອບ ຈັດແຈ່ງເຂົ້າຈີ່ສັກສິດ ລຽນໄວ້ເປັນແຖວ, ເພື່ອຈັດຕຽມເຂົ້າຈີ່ນັ້ນທຸກໆວັນຊະບາໂຕ.

33ຊາວເລວີບາງຄອບຄົວຮັບຜິດຊອບດົນຕຼີໃນພຣະວິຫານ. ຫົວໜ້າຄອບຄົວເຫຼົ່ານີ້ໄດ້ຢູ່ໃນຕຶກອື່ນໆຂອງພຣະວິຫານ ແລະໄດ້ຖືກຍົກເວັ້ນຈາກໜ້າທີ່ອື່ນໆ ຍ້ອນພວກເຂົາຮັບຜິດຊອບເຮັດວຽກທັງເວັນແລະທັງຄືນ.

34ພວກຜູ້ຊາຍທີ່ໄດ້ກ່າວຊື່ມານັ້ນແມ່ນຫົວໜ້າຄອບຄົວຊາວເລວີທັງຫລາຍ ຕາມເຊື້ອສາຍບັນພະບຸລຸດຂອງພວກເຂົາ. ພວກເຂົາເປັນຜູ້ນຳທີ່ໄດ້ອາໄສຢູ່ໃນນະຄອນເຢຣູຊາເລັມ.

35ເຢອີເອນ ໄດ້ສ້າງເມືອງກີເບໂອນ ແລະໄດ້ຕັ້ງຫຼັກແຫຼ່ງຢູ່ທີ່ນັ້ນ. ເມຍຂອງເພິ່ນຊື່ວ່າ ມາອາກາ.

36ລູກຊາຍກົກຂອງເພິ່ນຊື່ວ່າ ອັບໂດນ ແລະລູກຊາຍຄົນອື່ນໆຂອງເພິ່ນ ມີດັ່ງນີ້: ຊູຣະ, ກີເຊ, ບາອານ, ເນຣະ, ນາດາບ,

37ເກໂດເຣ, ອາຮີໂອ, ເຊກາຣີຢາ ແລະມີກໂລດ,

38ຜູ້ເປັນພໍ່ຂອງຊີເມຢາ. ເຊື້ອສາຍຂອງເພິ່ນໄດ້ອາໄສຢູ່ໃນນະຄອນເຢຣູຊາເລັມ ໃກ້ກັບຄອບຄົວອື່ນໆໃນຕະກຸນຂອງພວກເຂົາ.

39ເນຣະເປັນພໍ່ຂອງກີເຊ ແລະກີເຊເປັນພໍ່ຂອງໂຊນ. ໂຊນມີລູກຊາຍສີ່ຄົນ ດັ່ງນີ້: ໂຢນາທານ, ມັນກີຊູອາ, ອາບີນາດາບ ແລະເອຊະບາອານ.

40ສ່ວນໂຢນາທານນັ້ນເປັນພໍ່ຂອງເມຣິບບາອານ, ແລະເມຣິບບາອານເປັນພໍ່ຂອງມີກາ.

41ມີກາມີລູກຊາຍສີ່ຄົນ ດັ່ງນີ້: ປີໂທນ, ເມເລັກ, ຕາເຣອາ ແລະອາຮາດ.

42ອາຮາດເປັນພໍ່ຂອງຢາຣາ ແລະຢາຣາມີລູກຊາຍສາມຄົນ ດັ່ງນີ້: ອາເລເມດ, ອາຊະມາເວດ ແລະຊິມຣີ. ຊິມຣີເປັນພໍ່ຂອງໂມຊາ,

43ໂມຊາເປັນພໍ່ຂອງບີເນອາ, ບີເນອາເປັນພໍ່ຂອງເຣຟາອີຢາ, ເຣຟາອີຢາເປັນພໍ່ຂອງເອເລອາສາ ແລະເອເລອາສາເປັນພໍ່ຂອງອາເຊນ.

44ອາເຊນມີລູກຊາຍຫົກຄົນ ດັ່ງນີ້: ອາຊະຣີກຳ, ໂບເກຣູ, ອິດຊະມາເອນ, ເຊອາຣີຢາ, ໂອບາດີຢາ ແລະຮານານ.